Taim Yu Ritim Olpela Testamen

Jisas Krais em i ansa bilong olgeta hevi i kamap long yu na famili bilong yu. Olsem na, long painim ol ansa insait long Olpela Testamen, painim Em. Em i no isi. Yu mas skelim gut ol samting wantaim bel isi na painim stia bilong spirit. Sampela taim, ol i tokaut stret long Em, kain olsem Aisaia i tok, “Wanpela pikinini man i kamap pinis long yumi, em wanpela pikinini God i givim long yumi. … na em bai i gat … na nem bilong em bai Prins bilong gutpela sindaun na bel isi” (Isaiah 9:6). Long ol narapela hap, Sevia i kamap isi tasol, thru long ol ol sain na mak—, na ol samting i wankain olsem ol samting Em bai mekim—kain olsem, ol ofa bilong animal i makim ofa Em bai mekim long en o stori bilong Josep i lusim rong bilong ol brata bilong em na em kisim bek ol long taim bilong nogat kaikai.

Sapos yu laik strongim bilip bilong yu long Sevia moa taim yu stadim Olpela Testamen, yu bai painim. Ating dispela em ken gol bilong yu long stadi dispela yia. Beten olsem Spirit bai stiaim yu long painim na sanap antap long ol ves, stori, na ol tok profet we i bai bringim yu go klostu long Jisas Krais.

Olpela Testamen i no bilong stori long olgeta ol liklik samting ol manmeri mekim. Ol lain i raitim i no tingting long dispela. Tingting bilong ol em ol laik skulim ol manmeri long God—long plen Em mekim bilong ol pikinini bilong Em, long yumi bai stap olsem wanem taim yumi mekim kavanen pinis wantaim Em, na long rot bilong Em kisim bek yumi taim yumi pundaun long sin. Sampela taim ol i mekim olsem taim ol stori long ol samting i kamap bipo, wankain long ol stori bilong ol bikpela profet. Buk bilong Stat i soim dispela, na ol buk olsem Josua, Hetman, na 1 na 2 King. Tasol ol narapela lain i raitim Olpela Testamen i no laik stori long ol samting i kamap. Ol i skulim ol manmeri long ol samting olsem poem na ol narapela kain samting ol raitim. Psalms na Proverbs em dispela kain. Na bihain i gat ol gutpela tok bilong ol profet, olsem Aisaia na Malakai, husat i autim tok bilong God i go long ol Israel long bipo—na, long yumi tude, insait long Buk Baibel.

Ol dispela profet, ol lain i raitim ol poem, na ol man i raitim ol stori i save olsem ol manmeri bilong dispela graun bai ritim samting ol i tok na raitim planti tausen yia bihain, o nogat? Yumi i no save. Tasol yumi kirap nogut olsem dispela i kamap. Ol kantri i kirap na pundaun, ol birua i kisim ol biktaun, ol king i stap laip na ol i dai, tasol Olpela Testamen i winim olgeta yet, long wanpela lain i go long narapela lain, long wanpela man bilong raitim go long narapela man bilong raitim, na long wanpela tokples go long narapela. Em i tru olsem sampela samting i raus o senis, tasol planti samting moa i stap.

Em ol sampela samting bilong tingim taim yu ritim Olpela Testamen dispela yia. God i lukautim ol dispela toktok bilong bipo, long wanem, Em save long yu na wanem hevi i kamap long yu. Em i redim wanpela liklik tok insait long ol dispela tok bilong helpim sol bilong yu, bai yu go klostu long em na strongim bilip bilong yu long plen bilong Em na Pikinini bilong Em, Em laikim tumas. Ating Em bai bringim yu go long wanpela ves o wanpela tingting bilong blesim wanpela yu save long en—wanpela toktok yu ken tokim wanpela poro bilong yu, famili bilong yu, o narapela Bilipman. I gat ol planti samting long mekim. Dispela tingting i mekim yu amamas, o nogat?

Nifai i tok, “Sol bilong mi i amamas long buk bilong God” (2 Nifai 4:15). Ating yu bai pilim wankain olsem taim yu ritim planti bilong ol toktok Nifai i ritim pinis—em yumi kolim Olpela Testamen.