“Janueri 5–11. ‘Dispela Em Wok Bilong Mi na Mi Kisim Biknem Long Dispela’: Moses 1; Abraham 3,” Kam, Bihainim Mi—Bilong Haus na Sios: Olpela Testamen 2026 (2026)
“Janueri 5–11. ‘Dispela Em Wok Bilong Mi na Mi Kisim Biknem Long Dispela’,” Come, Follow Me: 2026
Janueri 5–11: “Dispela Em Wok Bilong Mi na Mi Kisim Biknem Long Dispela”
Moses 1; Abraham 3
Buk Baibel i stat wantaim dispela tok “Bipo bipo tru God i mekim kamap skai na graun na olgeta samting i stap long en” (Stat 1:1). Tasol wanem samting i stap pinis bipo long dispela taim? Na bilong wanem na God mekim olgeta dispela samting? Bikpela i soim olgeta dispela samting long Profet Josep Smit.
Kain olsem, Em soim yumi dispela driman Abraham i lukim, olsem yumi bin stap olsem spirit “bipo long kamap bilong dispela graun” (lukim Abraham 3:22–28). Bikpela i givim yumi tu sampela moa toktok long ol samting i kamap long 6-pela sapta i stap paslain long buk bilong Stat, dispela yumi kolim buk bilong Moses—na em i no stat wantaim “bipo bipo tru.” Tasol em stat wantaim wanpela samting i kamap long Moses, i givim sampela save long wanem samting i kamap taim God kamapim ol samting. Ol dispela tok bilong God i kamap long nau, em ol gutpela bilong statim skul bilong yumi long Olpela Testamen, long wanem, ol bekim sampela ol askim yumi bai gat taim yumi ritim, olsem: Husat em God? Yumi husat? Wok bilong God em wanem, na yumi bai inapim dispela wok olsem wanem? Ol sapta i paslain long buk bilong Stat em ol samting God i soim Moses taim em askim olsem: “Marimari long mi, wokman bilong yu, O God, na tokim mi long ol samting i kamap long dispela graun, na ol manmeri antap long en, na tu long ol samting i kamap long skai” (Moses 1:36).
Ol Sampela Tingting bilong Lainim long Haus na long Sios
Moses 1
Mi pikinini bilong God, olsem na bihain bilong mi em gutpela tru.
Presiden Russell M. Nelson i tok, “Sapos God i toktok long yu, namba wan samting Em laik bai yu save em yu husat” (“Choices for Eternity” [divosenel bilong ol yangpela lain, Mei 2022], Gospel Library). Setan bai taim long paulim yu long dispela taim. Painim dispela samting long tok bilong God i go long Moses long Moses 1:4, 6 na long toktok bilong Setan long Moses 1:12. Yu lainim wanem long ol dispela ves, long God i narakain long Setan olsem wanem?
Presiden Nelson i tok tu olsem, “Tingting bilong yu long yu husat tru i save bosim olgeta samting yu bai tingim na mekim” (“Choices for Eternity”). Mekim wanpela lista bilong ol samting yu bai mekim, long wanem, nem bilong yu olsem pikinini bilong God i go pas long olgeta samting.
Wanem ol narapela ves o toktok long Moses 1 i helpim yu luksave long yu husat tru? Yu ken ritim moa toktok bilong Presiden Nelson, aninit long dispela het tok bilong “Choices for Eternity” “First: Know the truth about who you are.” Bel bilong yu i kirap long mekim wanem, long larim nem bilong yu olsem pikinini bilong God i go pas long olgeta nem?
Lukim tu “I Am a Child of God,” Hymns (1985), no. 301; “Our True Identity” (vidio), Gospel Library; Topics and Questions, “Children of God,” Gospel Library.
Our True Identity
Moses 1:12–26
Bikpela i ken helpim mi long daunim Setan.
Olsem Moses 1 i soim, traim bai go het long kamap long yumi, wankain long taim yumi lukim ol bikpela samting bilong spirit. Setan i bai mekim yumi gat tupela tingting long dispela samting yumi lukim long en. Taim yu ritim bekim bilong Moses long Setan long ves 12–26, yu lainim wanem bilong helpim yu sanap strong antap long testimoni yu kisim long en? Wanem samting i helpim Moses winim Setan?
Wanpela samting yumi ken lainim long wanem i kamap long Moses, em Setan bai trikim yumi long ol giaman samting i wankain olsem tok tru na pawa bilong God. Tingim sampela ol giaman samting, olsem plaua ol mekim long plastik, o wanpela doli. Ol dispela samting i giaman olsem wanem? Bihain, tingim ol giaman samting Setan i save yusim nau long trikim yu. Yu lainim wanem long Moses 1:13–18 long luksave na tok nogat long ol giaman bilong em? Bikpela bai helpim yu olsem wanem? (lukim Moses 1:24–26).
Lukim tu Matyu 4:1–11; Gary E. Stevenson, “Deceive Me Not,” Liahona, Nov. 2019, 93–96; “I Am a Son of God” (vidio), Gospel Library.
I Am a Son of God
Yu ken plen long lainim long haus, tasol em i ken kamap long wanem taim em kamap. “I gat planti taim bilong skulim ol narapela insait long famili, na i save kamap insait long ol samting yupela i mekim wan wan de—kain olsem long taim bilong kaikai, mekim wok bilong haus, pilai, [o] taim yupela i wokabaut i go long narapela hap” (Teaching in the Savior’s Way, 31). Kain olsem, taim yu ritim wanem rot Moses i winim Setan long Moses 1, long taim yupela famili i kaikai, yupela ken toktok long wanem rot yupela i winim strong bilong man nogut.
Moses 1:27–39; Abraham 3
Wok bilong God em bilong helpim mi kisim laip i stap gut oltaim oltaim, na Em yet bai kisim biknem long dispela.
Bihain long em lukim driman bilong ol samting God kamapim, Moses i tokim Bikpela: “Tokim mi … bilong wanem ol dispela samting i olsem” (Moses 1:30). Bel bilong yu i kirap long wanem samting, long bekim bilong Bikpela long Moses, long Moses 1:31–39? Laip i stap gut oltaim oltaim i narakain olsem wanem long bodi i no inap dai long en? (lukim Topics and Questions, “Eternal Life,” Gospel Library). Jisas Krais i helpim long kamapim tupela wantaim olsem wanem? Abraham i lukim wanpela driman tu, long Abraham 3. Yu painim wanem long ves 24–26 we bai helpim long bekim askim bilong Moses?
Abraham 3:22–28
Mi stap olsem spirit bipo long mi kamap long graun.
Yumi i no save long planti samting long laip bilong yumi bipo yumi kam long graun. Tasol planti samting yumi save i kam long driman bilong Abraham long Abraham 3:22–28. Taim yu ritim ol dispela ves, mekim wanpela lista bilong ol tok tru yu painim—putim tu ol tok tru i toktok long yu yet na long Jisas Krais. Bilong wanem na ol dispela tok tru i bikpela samting long yu? Wanem senis bai ol mekim long laip bilong yu?
Lukim tu Topics and Questions, “Premortal Life,” Gospel Library.
Long kisim sampela moa tingting, lukim Liahona na For the Strength of Youth megesin bilong dispela mun.
Ol Sampela Tingting bilong Lainim ol Pikinini
Moses 1:1–4, 6, 12
Mi pikinini bilong God.
-
Bihain long yu ritim toktok bilong God i go long Moses long Moses 1:4, yu ken larim ol pikinini bilong yu lukim ol yet long glas na tokim ol yet olsem: “Mi pikinini bilong God.” Bihain ol ken tokim ol yet wankain tok: “Yu pikinini bilong God.” Yupela ken painim ol piksa bilong ol man na askim ol pikinini bilong yu long poinim ol wan wan na tok: “Em pikinini bilong God.” Toktok go kam namel long yupela, bilong wanem na yu amamas long save olsem yu pikinini bilong God. Dispela save i senisim pasin yu save mekim long yu yet na ol narapela olsem wanem?
-
Yu na ol pikinini bilong yu ken skelim toktok bilong God long Moses, long Moses 1:4 wantaim toktok bilong Setan long ves 12. Yu bai helpim ol pikinini bilong yu luksave namel long toktok bilong God long ol, na toktok bilong Setan olsem wanem?
Moses Sees Jehovah, Joseph Brickey i mekim (detail)
Moses 1:6, 39
Papa long Heven i gat wok bilong mi long mekim.
-
Taim yu ritim Moses 1:6 wantaim ol pikinini bilong yu, yu ken toktok long ol long “wok” God i gat bilong Moses long mekim. Yu ken yusim Gospel Art Book, nos. 13–16, o Old Testament Stories, pes 64–84, long helpim ol pikinini bilong yu wanem Moses i mekim wantaim helpim bilong Papa long Heven. Wanem wok God i gat bilong yumi long mekim? (lukim, kain olsem long Doktrin na ol Kavanen 11:20).
Moses 1:12–26
Mi ken winim ol tok gris bilong Setan.
-
Taim yu ritim Moses 1:12–26 wantaim ol pikinini bilong yu, helpim ol painimaut wanem samting Moses i mekim long winim Setan (lukim ves 13, 15, 18, 20–22, 26). Ol i ken mekim sampela pilai bilong soim wanem ol i ken mekim long winim traim (kain olsem beten, wokabaut go longwe, o askim long helpim).
Abraham 3:22–28
Mi stap olsem spirit bipo long mi kamap long graun.
-
Taim yumi save long laip bilong yumi bipo long yumi kam long graun, dispela ken helpim ol pikinini bilong yu mekim ol samting bihainim ol tok tru bilong stap oltaim. Long helpim ol lainim dispela, yu ken givim ol sampela bikpela hap toktok long painim, long Abraham 3:22–28, olsem “bipo dispela graun i kamap,” “ol spirit,” “kamapim wanpela graun,” na “soim stret.” Ol dispela ves i skulim yumi wanem samting long wanem as Papa long Heven i salim yumi kam hia long graun?
-
Wanpela song olsem “I Will Follow God’s Plan” (Children’s Songbook, 164–65) ken strongim wanem Abraham 3 i skulim yumi. Ating yu iken askim ol pikinini bilong yu droim ol piksa bilong go wantaim ol dispela tok.
-
Helpim ol pikinini bilong yu tingim sampela taim ol bai laik, o nogat, long bihainim wanem God i askim ol long mekim (lukim Abraham 3:25; lukim tu For the Strength of Youth: A Guide for Making Choices). Larim ol lainim wanem ol bai mekim long dispela taim. Jisas Krais bai helpim yumi olsem wanem taim yumi mekim samting i no stret?
Long kisim sampela moa tingting, lukim Friend piksa buk bilong dispela mun.