ఆదికాండము 3–4; మోషే 4–5

ఆదాము హవ్వల యొక్క ఎంపిక మర్త్యత్వంలో మనం అనుభవించే అనేక ఇబ్బందులకు దారితీసిందనేది నిజం. కానీ దానర్థం మనము వారి ఎంపికకు చింతిస్తున్నామని కాదు. మీరు ఆదికాండము 3 మరియు మోషే 4 చదువుతున్నప్పుడు, దేవుని ప్రణాళికకు పతనం ఎందుకు ముఖ్యమైనది? అని మిమ్మల్ని మీరు ప్రశ్నించుకోవచ్చు.

మోషే 5:9–12 ప్రకారం, పతనం గురించి ఆదాము హవ్వలు ఎలా భావించారు? ఈ పతనమైన ప్రపంచంలో మీ అనుభవాలకు మీరు వారి మాటలను ఎలా అన్వయించగలరు? 2 నీఫై 2:19–25 నుండి మీరింకేమి నేర్చుకుంటారు?

మోషైయ 3:19; ఆల్మా 12:21-37; మరియు సిద్ధాంతము మరియు నిబంధనలు 29:39–43 కూడా చూడండి.

ఆదాము హవ్వల కథ యేసు క్రీస్తు ద్వారా వచ్చే నిరీక్షణ మరియు విమోచనకు సంబంధించినది. ఎందుకో చూడడానికి, మీరు ఆదికాండము 3:1–7; మోషే 4:22–31లో పతనం యొక్క ఫలితాలను వెదకడం మరియు మీరు కనుగొన్న వాటిని గుర్తించడం లేదా జాబితా చేయడం ద్వారా ప్రారంభించవచ్చు. ఈ ఫలితాలు మిమ్మల్ని ఎలా ప్రభావితం చేస్తాయి? తర్వాత ఈ ప్రభావాల నుండి మనలను విమోచించడానికి దేవుని ప్రణాళిక కోసం చూస్తూ, మీరు మోషే 5:4–15ను శోధించవచ్చు. దేవదూత వారిని సందర్శించిన తర్వాత ఆదాము హవ్వలు ఎందుకు “ఆనందంగా” ఉన్నారు? పరలోక తండ్రి ప్రణాళిక గురించి వారి నుండి మీరేమి నేర్చుకుంటారు?

2:44

ఈ లేఖన భాగానికి అర్థము ఒక భర్త తన భార్యపట్ల నిర్దయగా వ్యవహరించడం న్యాయమేనని కొన్నిసార్లు తప్పుగా అర్థం చేసుకోబడుతున్నది. మన కాలంలో, కుటుంబములో తమ దైవిక బాధ్యతలను నెరవేర్చడంలో భార్యాభర్తలు ఒకరినొకరు సమాన భాగస్వాములుగా చూడాలని ప్రభువు యొక్క ప్రవక్తలు బోధించారు (“కుటుంబము: ప్రపంచానికి ఒక ప్రకటన” [సువార్త గ్రంథాలయము] చూడండి). ఎల్డర్ డేల్ జి. రెన్‌లండ్ మరియు సహోదరి రూత్ లిబ్బెర్ట్ రెన్‌లండ్ ఇలా వివరించారు, నీతిమంతుడైన ఒక భర్త “పరిచర్య చేయాలని చూస్తాడు; తన తప్పులను ఒప్పుకొని, క్షమాపణ కోరతాడు; మెచ్చుకోవడానికి వేగంగా ఉంటాడు; కుటుంబ సభ్యుల ప్రాధాన్యతల గురించి ఆలోచిస్తాడు; తన కుటుంబానికి ‘జీవితపు అవసరాలను, రక్షణను’ అందించడానికి గల బాధ్యత యొక్క గొప్ప బరువును అతడు మోస్తాడు; తన భార్యను అత్యంత మర్యాదతో, గౌరవంతో ఆదరిస్తాడు. … అతడు తన కుటుంబాన్ని దీవిస్తాడు” (The Melchizedek Priesthood: Understanding the Doctrine, Living the Principles [2018], 23).

ఎల్డర్ డేల్ జి. రెన్‌లండ్ ఇలా బోధించారు, “సంతాన సాఫల్య విషయములో, మన పరలోక తండ్రి యొక్క లక్ష్యం, తన పిల్లలు సరైనది చేయడం మాత్రమే కాదు; అది ఆయన పిల్లలు సరైనది చేయడానికి ఎన్నుకోవడం మరియు చివరికి ఆయనలా మార్పు చెందటం” (“నేడు మీరు కోరుకొనుడి,” లియహోనా, నవ. 2018, 104). మనం సరైనది చేయాలని ఎంచుకోవడం పరలోక తండ్రి యొక్క ప్రణాళికలో ఎందుకు చాలా ముఖ్యమైనది?

మీరు మోషే 4:1–4 చదువుతున్నప్పుడు, ఎంచుకునే మీ హక్కును—మీ కర్తృత్వాన్ని రక్షించడానికి పరలోక తండ్రి మరియు యేసు క్రీస్తు ఏమి చేసారో చూడండి. వారి రక్షణ శక్తిని మీరు ఎలా పొందగలరు? ఉపాయముల కొరకు, యౌవనుల బలము కొరకు: ఎంపికలు చేయుటకు మార్గదర్శి (4–5) లోని “ప్రేరేపిత ఎంపికలు చేయండి” విభాగాన్ని చదవడాన్ని పరిగణించండి.

2 నీఫై 2:11–20, 25–30లో కర్తృత్వము గురించి లీహై బోధించిన దానిని కూడా చదవడాన్ని పరిగణించండి. కర్తృత్వము కొరకు వ్యతిరేకత ఎందుకు అవసరము? మిమ్మల్ని “ఎంచుకోవడానికి స్వతంత్రులుగా” చేసినందుకు యేసు క్రీస్తు పట్ల మీరు మీ కృతజ్ఞతను ఎలా చూపించగలరు? (2 నీఫై 2:27).

మీరు మోషే 4:4–12; 5:13–33 చదువుతున్నప్పుడు, ఆదాము హవ్వలను మరియు వారి పిల్లలను శోధించడానికి సాతాను ప్రయత్నించిన మార్గాలను జాబితా చేయడాన్ని పరిగణించండి. అతడు ఈ రోజు ఇలాంటి వాటిని ఎలా ప్రయత్నిస్తాడు? సాతాను మోసాలను నిరోధించడానికి పరలోక తండ్రి మీకు ఎలా సహాయం చేస్తారు?

నిషేధించబడిన ఫలమును తినిన తరువాత, ఆదాము హవ్వలు తమ దిగంబరత్వాన్ని దాచుకోవడానికి ప్రయత్నించారు. తరువాత, ప్రభువు వారికి దుస్తులు ఇచ్చారు. మీరు మోషే 4:13–16, 27 చదువుతున్నప్పుడు, క్రింది వాటిని పరిగణించండి:

• లేఖనాలలో దిగంబరత్వము మరియు దుస్తులు దేనిని సూచించగలవో ధ్యానించండి (ఉదాహరణకు, ప్రకటన 7:9, 13–15; 2 నీఫై 9:14; సిద్ధాంతము మరియు నిబంధనలు 109:22–26, 76 చూడండి). దిగంబరత్వము మరియు దుస్తులతో ఆదాము హవ్వల యొక్క అనుభవం నుండి మీరు ఏమి నేర్చుకుంటారు?

• మీరు దేవాలయంలో వరము పొందియున్నట్లయితే, మీ దేవాలయ వస్త్రం యొక్క ప్రాముఖ్యత మరియు అది దేనిని సూచిస్తుందనే దాని గురించి ఆదాము హవ్వలు మీతో ఏమి చెప్పవచ్చో పరిగణించండి.

4:12

మీరు మోషే 5:4–9, 16–26 చదువుతున్నప్పుడు, బలి పట్ల ఆదాము హవ్వలు మరియు వారి కుమారులు కయీను మరియు హేబేలుల వైఖరులను పరిగణించండి. ప్రభువు హేబేలు బలిని అంగీకరించి, కయీను దానిని ఎందుకు అంగీకరించలేదు?

ఏమి త్యాగం చేయమని ప్రభువు మిమ్మల్ని అడుగుతారు? ఆ బలుల గురించి మీ ఆలోచనా విధానాన్ని మార్చేలా ఈ వచనాలలో ఏదైనా ఉన్నదా?

• ఆదాము, హవ్వల పతనము గురించి మీ పిల్లలు బాగా అర్థం చేసుకోవడానికి సహాయపడేందుకు, (పాత నిబంధన కథలు, 13–16 లో) “ఆదాము హవ్వలు” నుండి చిత్రాలను మీరు నకలు చేసి, వాటిని కత్తిరించుకోవచ్చు. తర్వాత మీరు ఆదాము హవ్వల అనుభవాలను చర్చిస్తున్నప్పుడు, ఆ చిత్రాలను వరుసక్రమంలో పెట్టడానికి మీరు కలిసి పనిచేయవచ్చు. మీరు చేస్తున్నప్పుడు, ఆదాము హవ్వలు ఏదెను తోట‌ను విడిచిపెట్టడం పరలోక తండ్రి యొక్క ప్రణాళికలో ఎందుకు ముఖ్యమైనది అనే దాని గురించి మాట్లాడండి.

• పతనం యొక్క ప్రభావాలను యేసు క్రీస్తు ఎలా అధిగమిస్తారో మీ పిల్లలు అర్థం చేసుకున్నప్పుడు ఆయన ప్రాయశ్చిత్తము కొరకు వారు కృతజ్ఞతలు తెలియజేయగలరు. మోషే 4:25; 6:48; రోమా 5:12; 2 నీఫై 2:22–23 లను మీరు కలిసి చదువుతున్నప్పుడు, ఈ వాక్యాన్ని పూరించడానికి మార్గాలను కనుగొనడానికి మీ పిల్లలకు సహాయం చేయండి: “పతనము మూలముగా, నేను …” తర్వాత, మీరు కలిసి మోషే 5:8–11, 14–15; 6:59; ఆల్మా 11:42 చదువుతున్నప్పుడు, వారు ఈ వాక్యాన్ని పూరించగలరు: “యేసు క్రీస్తు మూలముగా, నేను …” యేసు క్రీస్తు పట్ల మీ కృతజ్ఞతను ఒకరితో ఒకరు పంచుకోండి.

• కర్తృత్వము యొక్క సూత్రాన్ని పరిచయం చేయడానికి ఒక సాధారణ వస్తుపాఠాన్ని పరిగణించండి: ఈ వారం ప్రోత్సాహకార్యక్రమ పేజీకి రంగు వేయడానికి మీ పిల్లలను ఆహ్వానించండి, కానీ వారికి ఉపయోగించడానికి ఒక రంగు మాత్రమే ఇవ్వండి. ఎంపికలను కలిగి ఉండడం ఎందుకు మంచిది? ఆ తర్వాత మీరు మోషే 4:1–4 ను కలిసి చదివి, మనం తప్పు ఒప్పుల మధ్య ఎంచుకోవాలని దేవుడు ఎందుకు కోరుకుంటున్నారో మాట్లాడవచ్చు. మంచి ఎంపికలు చేయడానికి పరలోక తండ్రి మరియు యేసు క్రీస్తు మనకు ఎలా సహాయం చేస్తారు?

• యేసు క్రీస్తును అనుసరించడానికి వారు చేయగలిగే మంచి ఎంపికల గురించి ఆలోచించి, చిత్రాలను గీయడంలో మీ పిల్లలకు సహాయపడండి. మీరు ఒక మంచి ఎంపిక చేసిన సమయం గురించి ఒకరికొకరు చెప్పుకోవచ్చు మరియు ఆ తర్వాత మీరు ఎలా భావించారనే దాని గురించి మాట్లాడుకోవచ్చు.

• ఆదాము హవ్వలు ఏదెను తోటను విడిచిపెట్టవలసి వచ్చినప్పుడు, వారు ఇకపై పరలోక తండ్రితో ఉండలేరు. మీ పిల్లలతో కలిసి మోషే 5:4, 8 చదవండి మరియు ఆదాము హవ్వలు ఆయనకు సన్నిహితంగా భావించి, ఆయన మాట వినడానికి ఏమి చేశారో కనుగొనడంలో వారికి సహాయపడండి. మన ప్రార్థనలలో పరలోక తండ్రికి మనం చెప్పగలిగే కొన్ని విషయాలు ఏమిటి?