పాత నిబంధన చదవడము

మీరు, మీ కుటుంబము ఏ సవాళ్ళను ఎదుర్కొంటున్నప్పటికీ, జవాబు ఎల్లప్పుడూ యేసు క్రీస్తే. కాబట్టి పాత నిబంధనలో సమాధానాలను కనుగొనడానికి, ఆయన కోసం వెదకండి. అది ఎల్లప్పుడూ సులభం కాదు. మీరు ఓపికగా ఆలోచించి, ఆధ్యాత్మిక మార్గదర్శకత్వం వెదకవలసి రావచ్చు. కొన్నిసార్లు ఆయనను గురించిన నిర్దేశాలు యెషయా ప్రకటనలో ఉన్నట్లుగా చాలా నేరుగా కనబడుతున్నాయి, “మనకు శిశువు పుట్టెను, మనకు కుమారుడు అనుగ్రహింపబడెను. … సమాధానకర్తయగు అధిపతి అని ఆయనకు పేరు పెట్టబడును” (యెషయా 9:6). ఇతర స్థలములలో, రక్షకుడు మరింత సూక్ష్మంగా, చిహ్నములు మరియు సారూప్యతల చేత సూచించబడ్డారు—ఉదాహరణకు, జంతు బలుల యొక్క వర్ణనల ద్వారా లేదా యోసేపు తన అన్నలను క్షమించి, వారిని కరువు నుండి రక్షించే వృత్తాంతము ద్వారా.

మీరు పాత నిబంధనను అధ్యయనం చేసినప్పుడు, రక్షకునియందు గొప్ప విశ్వాసమును మీరు వెదకినట్లయితే, మీరు దానిని కనుగొంటారు. బహుశా ఈ సంవత్సరము అది మీ అధ్యయనము యొక్క లక్ష్యము కావచ్చు. యేసు క్రీస్తుకు మిమ్మల్ని దగ్గరగా తెచ్చే గద్యభాగాలు, కథలు మరియు ప్రవచనాలను కనుగొనుటకు మరియు వాటిపై దృష్టిసారించుటకు ఆత్మ మిమ్మల్ని నడిపించేలా ప్రార్థించండి.

పాత నిబంధన మానవజాతి యొక్క సమగ్రమైన మరియు ఖచ్చితమైన చరిత్రను ఇస్తుందని ఆశించవద్దు. అసలు రచయితలు మరియు సంగ్రహకులు సృష్టించడానికి ప్రయత్నిస్తున్నది అది కాదు. వారి విస్తారమైన ఆలోచన ఏమనగా దేవుని గురించి—ఆయన బిడ్డల కొరకు ఆయన ప్రణాళికను గూర్చి, ఆయన నిబంధన జనులవ్వడం అంటే అర్థమేమిటనే దాని గురించి మరియు మనం అసంపూర్ణులుగా ఉన్నప్పుడు విమోచనను ఎలా కనుగొనాలనే దాని గురించి బోధించడం. కొన్నిసార్లు వారు గొప్ప ప్రవక్తల జీవితాలనుండి వృత్తాంతములను కలిపి—వాటిని వారు గ్రహించినట్లుగా చారిత్రక సంఘటనలను సంబంధింపజేయడం ద్వారా దానిని చేసారు. ఆదికాండము దీనికొక మాదిరి, అలాగే యెహోషువ, న్యాయాధిపతులు, 1 మరియు 2 రాజులు వంటి గ్రంథములు కూడా. కానీ ఇతర పాత నిబంధన రచయితలు చారిత్రకంగా ఉండాలనే లక్ష్యం పెట్టుకోలేదు. బదులుగా, వారు కవిత్వము మరియు సాహిత్యం వంటి కళాకృతుల ద్వారా బోధించారు. కీర్తనలు మరియు సామెతలు ఈ వర్గానికి సరిపోతాయి. తరువాత యెషయా మరియు మలాకీ వంటి ప్రవక్తల యొక్క ప్రశస్థమైన మాటలున్నాయి, వారు ప్రాచీన ఇశ్రాయేలుతో దేవుని వాక్యము గురించి మాట్లాడారు—మరియు బైబిలు యొక్క అద్భుతము ద్వారా, నేటికి మనతో ఇంకా మాట్లాడుతున్నారు.

ఈ ప్రవక్తలు, కవులు మరియు సంగ్రహకులు అందరికి వేల సంవత్సరాల తరువాత ప్రపంచమంతటనున్న జనుల చేత వారి మాటలు చదవబడతాయని తెలుసా? మనకు తెలియదు. కానీ ఖచ్చితంగా ఇదే జరిగిందని మనము ఆశ్చర్యపడతాము. రాజ్యములు లేచాయి, పడిపోయాయి, పట్టణాలు జయించబడ్డాయి, రాజులు జీవించారు మరియు మరణించారు; కానీ పాత నిబంధన వారందరినీ, తరము నుండి తరానికి, లేఖకుడి నుండి లేఖకుడికి, అనువాదం నుండి అనువాదానికి అధిగమించింది. కొన్ని విషయాలు కోల్పోబడవచ్చు లేదా మార్చబడవచ్చు, అయినప్పటికీ ఏదోవిధంగా అత్యధికం అద్భుతంగా కాపాడబడింది.

ఈ సంవత్సరం మీరు పాత నిబంధన చదివినప్పుడు మీరు మనస్సులో ఉంచుకోవాల్సిన కొన్ని విషయాలు ఇవి. దేవుడు మిమ్మల్ని, మీరు అనుభవిస్తున్న దానిని ఎరుగును గనుక ఆయన ఈ ప్రాచీన రచనలను భద్రపరిచారు. ఈ మాటలలో మీ కోసం ఆయన ఒక ఆత్మీయ సందేశమును సిద్ధపరిచారు, అది మిమ్మల్ని ఆయనకు దగ్గరగా తెచ్చి, ఆయన ప్రణాళికయందు మరియు ఆయన ప్రియమైన కుమారునియందు మీ విశ్వాసమును పెంచుతుంది. బహుశా మీకు తెలిసిన వారిని దీవించునట్లు ఒక గద్యభాగమునకు లేదా ఒక అంతరార్థమునకు—ఒక స్నేహితుడు, ఒక కుటుంబ సభ్యుడు లేదా ఒక సహ పరిశుద్ధునితో మీరు పంచుకోగల ఒక సందేశమునకు ఆయన మిమ్మల్ని నడిపిస్తారు. అనేక అవకాశాలు ఉన్నాయి. ఇది ఆలోచించడానికి ఉత్సాహకరమైనది కాదా?

“నా ఆత్మ లేఖనములయందు ఆనందించును” అని నీఫై అన్నాడు (2 నీఫై 4:15). మనం ఇప్పుడు పాత నిబంధన అని పిలిచేది—నీఫై చదివిన అవే పదాలు అనేకము మీరు చదివినప్పుడు మీరు కూడా అలాగే భావించవచ్చు.