“19--25 Ianuari. O Le Pa’ū o Atamu ma Eva: Kenese 3–4; Mose 4–5,” Sau, Mulimuli Mai ia te A’u—Mo Aiga ma le Ekalesia: Feagaiga Tuai 2026 (2026)

“19--25 Ianuari. O Le Pa’ū o Atamu ma Eva,” Sau, Mulimuli Mai ia te A’u: 2026

Atamu ma Eva, saunia e Douglas M. Fryer

19--25 Ianuari: O Le Pa’ū o Atamu ma Eva

Kenese 3–4; Mose 4–5

I le taimi muamua, o le tala i le Pa’ū o Atamu ma Eva na foliga mai o se faalavelave tuga. Na tuliesea Atamu ma Eva mai le Faatoaga matagofie o Etena. Sa auina atu i laua i se lalolagi o tiga, faanoanoaga, ma le oti (tagai i le Kenese 3:16–19). Ma sa vavaeeseina mai i laua mai lo la Tama Faalelagi. Ae o upumoni na toefuatai mai e ala mai i le Perofeta o Iosefa Samita i le tusi a Mose ua tatou maua ai se vaaiga tulaga ese i le Pa’ū.

Ioe, sa matagofie le Faatoaga o Etena. Ae na manaomia e Atamu ma Eva mea e sili atu nai lo o siosiomaga matagofie. Sa la’ua manaomia—ma tatou te manaomia uma—se avanoa e tuputupu a’e ai. O le tuua o le Faatoaga o Etena sa o le laasaga muamua lea e agai atu i le toe foi atu i le Atua ma iu ai ina avea faapei o Ia. O lona uiga, o le fetaiai ma mea faafeagai, faia o filifiliga, faia o mea sese, aoao e salamo, ma le faatuatuaina o le Faaola, o lana Togiola ua mafai ai ona agai i luma ma le “olioli o le togiolaina o i taʼua” (Mose 5:11). A e faitau la i le pa’ū o Atamu ma Eva, aua e te taulai i mea e foliga mai o ni faalavelave matuia ae taulai i avanoa—e le o le parataiso lea na aveesea mai ia Atamu ma Eva, ae o le mamalu o le la filifiliga lea ua mafai ona tatou mauaina.

Manatu mo le Aoaoina i le Aiga ma i le Ekalesia

Kenese 3; Mose 4

O Le Pa’ū o se vaega manaomia o le fuafuaga a le Atua.

E moni e faapea o le filifiliga a Atamu ma Eva na taitai atu ai i le tele o faigata tatou te oo i ai i le olaga nei. Ae e le faapea ai la tatou te faanoanoa i le la filifiliga. A o e faitauina le Kenese 3 ma le Mose 4, atonu e te fesili ifo ia te oe lava, Aisea na taua ai le Pa’ū i le fuafuaga a le Atua?

E tusa ai ma le Mose 5:9–12, o a ni lagona o Atamu ma Eva e uiga i le Pa’ū? E mafai faapefea ona e faaaogaina a la upu i ou aafiaga i lenei lalolagi pa’ū? O le a se isi mea ua e aoaoina mai le 2 Nifae 2:19–25?

Tagai foi i le Mosaea 3:19; Alema 12:21–37; ma le Mataupu Faavae ma Feagaiga 29:39–43.

Eva o loo uuina se apu — Tuua o Etena, saunia e Annie Henrie Nader

Kenese 3:1–7; Mose 4:22–31; 5:4–15

Ua ofo mai e Iesu Keriso le faamafanafanaga, faamoemoe, ma le togiolaina.

O le tala ia Atamu ma Eva o se tala o le faamoemoe ma le togiola e ala mai ia Iesu Keriso. Ina ia iloa pe aisea, e mafai ona e amata i le saili mo taunuuga o le Pa’ū i le Kenese 3:1–7; Mose 4:22–31 ma faailoga pe lisi mea e te maua. E faapefea e nei taunuuga ona aafia ai oe? Ona mafai lea ona e suesue i le Mose 5:4–15, ma vaavaai mo le fuafuaga a le Atua e togiolaina i tatou mai nei aafiaga. Aisea na “fiafia” ai Atamu ma Eva ina ua mavae le asiasi atu o le agelu ia i laua? O a ni mea ua e aoao mai ia i la’ua e uiga i le fuafuaga a Tama Faalelagi?

Tagai foi i le “Because of Him” (vitio), Potutusi o le Talalelei.

Kenese 3:16; Mose 4:22

O le a le uiga o le [faamatalaga], o Atamu e “pule ia” Eva?

O lenei fasifuaitau o le mau, o nisi taimi e sese ai le faauigaga e faapea, e ta’uamiotonuina se tane i le faia faalealofa o lana avā. I o tatou aso, ua aoao mai perofeta a le Alii e tatau i se tane ma se ava ona vaai le tasi i le isi o ni paaga tutusa i le faataunuuina o o laua tiutetauave paia i le aiga (tagai i le “O Le Aiga: O Se Folafolaga i le Lalolagi” [Potutusi o le Talalelei]). Na faamalamalama mai e Elder Dale G. Renlund ma Sister Ruth Lybbert Renlund e faapea, o se tane amiotonu “o le a saili e auauna atu; o le a ia talia le sese ma saili le faamagaloga; o le a vave ona ia tuuina atu le viia; o le a magafagafa i mea e mananao i ai tagata o le aiga; o le a ia lagona le mamafa o le tiutetauave o le tuuina atu o ‘mea e manaomia o le olaga ma le puipuiga’ mo lona aiga; o le a ia taulimaina lana avā i le faaaloalo ma le migao tele. … O le a ia faamanuiaina lona aiga” (O le Perisitua Mekisateko: Malamalama i le Aoaoga Faavae, Ola i Mataupu Faavae [2018], 23).

Mose 4:1–4

Ou te manaomia le faitalia ma mea faafeagai ina ia tuputupu ae ai.

E pei ona aoao mai Elder Dale G. Renlund, “O le sini a lo tatou Tama Faalelagi i tulaga faamatua, o le le tuu atu lea i Ana fanau ia faia le mea sa’o; ae o le tuu atu lea i Lana fanau e filifili e fai le mea sa’o ma mulimuli ane avea e faapei o Ia” (“Ina Filifili ia o Outou i le Aso Nei,” Liahona, Nov. 2018, 104). Aisea e taua tele ai i le fuafuaga a le Tama Faalelagi lo tatou filifili e fai le mea sa’o?

A o e faitauina le Mose 4:1–4, vaavaai mo mea na faia e le Tama Faalelagi ma Iesu Keriso e puipuia ai lau aia tatau e filifili ai—lou faitalia. E mafai faapefea ona e maua lo la mana puipuia? Mo ni manatu, mafaufau e suesue le vaega “Fai ni filifiliga musuia” i le Mo Le Malosi o le Autalavou: O Se Taiala mo le Faia o Filifiliga (4–5).

Mafaufau foi e faitau mea na aoao mai e Liae e uiga i le faitalia i le 2 Nifae 2:11–20, 25–30. Aisea e manaomia ai le tetee mo le faitalia? E mafai faapefea ona e faaalia lou agaga faafetai ia Iesu Keriso mo le “saoloto e filifili”? (2 Nifae 2:27).

Tagai foi i le Dallin H. Oaks, “Faafeagai o Mea Uma,”” Liahona, Me 2016, 114–17; Autu ma Fesili, “Faitalia, Potutusi o le Talalelei; “Filifili Tau o Mea Tonu,” Viiga. nu. 149.

Faateleina le auai. E tele gaoioiga e aoao mai ai e mafai ona faia o se tagata lava ia, aiga, po o vasega, i vaega toalaiti, po o paga. Faaaoga metotia eseese e mafai ai e tagata ona auai, o e le ono maua se avanoa. Mo lenei gaoioiga, e mafai ona e valaaulia se tagata se toatasi po o se vaega e faitau le Mose 4 ma le taiala Mo Le Malosi o le Autalavou a o suesue e le isi vaega ia fuaiupu o loo i le 2 Nifae 2. Ona mafai lea ona latou aoao atu e le tasi le isi i mea sa latou aoaoina i a latou lava vaega.

Mose 4:4–12; 5:13–33

Ua saili Satani “e faasese ma faatauaso” a’u.

A o e faitauina le Mose 4:4–12; 5:13–33, mafaufau e lisi auala na taumafai ai Satani e faaosooso Atamu ma Eva ma a la fanau. O faapefea ona ia taumafaia nei lava mea i le asō? E mafai faapefea ona fesoasoani le Tama Faalelagi ia te oe e teena taufaasese a Satani?

Mose 4:13–16, 27.

O “A’u, o le Alii le Atua … ma faaofu ai i la’ua.”

Ina ua uma ona aai Atamu ma Eva i le fua faasāina, sa la taumafai e ufiufi lo la lē lavalava. Mulimuli ane, na ofo mai le Alii e faaofu i la’ua. A o e faitauina le Mose 4:13–16, 27, mafaufau i mea nei:

Mafaufau loloto po o le a le mea e mafai ona faatusa i ai le lelavalavā ma lavalava i tusitusiga paia (tagai i le, mo se faataitaiga, Faaaliga 7:9, 13–15; 2 Nifae 9:14; Mataupu Faavae ma Feagaiga 109:22–26, 76). O le a se mea ua e aoaoina mai le aafiaga o Atamu ma Eva i le lelavalavā ma lavalava?
Afai ua e maua faaeega i le malumalu, mafaufau po o le a se tala a Atamu ma Eva ia te oe e uiga i le taua o lou ofu malumalu ma le mea o loo faatusa i ai.

Tagai foi i le “Sacred Temple Clothing” (vitio), Potutusi o le Talalelei.

Mose 5:4–9, 16–26

O le a talia e le Atua a’u taulaga pe a ou ofoina atu ma le loto i ai ma le usiusitai.

A o e suesue i le Mose 5:4–9, 16–26, mafaufau i uiga faaalia eseese o Atamu ma Eva ma o la atalii, o Kaino ma Apelu, e faatatau i taulaga. Aisea na talia ai e le Alii le taulaga a Apelu ae le o Kaino?

O le a le mea ua poloaiina oe e le Alii e ositaulaga? E i ai se mea i nei fuaiupu e mamanu ai le auala e te mafaufau ai i na osigataulaga?

Mo nisi manatu, tagai i le lomiga o lenei masina i mekasini o le Liahona ma le Mo le Malosi o le Autalavou .

Fautuaga mo le Aoaoina o Tamaiti

Kenese 3; Mose 4; 5:8–15

Ua laveai i tatou e Iesu Keriso mai le Pa’ū

Ina ia fesoasoani i lau fanau ia malamalama lelei i le Pa’ū o Atamu ma Eva, e mafai ona e kopiina ia ata mai le “Atamu ma Eva” (i Tala o le Feagaiga Tuai, 13–16) ma otioti ese. Ona outou galulue faatasi lea e tuu ata i le faasologa a o outou talanoa i aafiaga o Atamu ma Eva. A o e faia, talanoa e uiga i le mafuaaga na taua ai, i le fuafuaga a le Tama Faalelagi, mo Atamu ma Eva ona tuua le Faatoaga o Etena.
E mafai ona lagona e lau fanau le agaga faafetai mo le Togiola a Iesu Keriso a o latou malamalama i le auala na Ia faatoilaloina ai aafiaga o le Pa’ū. A o outou faitau faatasi Mose 4:25; 6:48; Roma 5:12; 2 Nifae 2:22–23, fesoasoani i lau fanau e saili ni auala e faamaea ai le fuaiupu lenei: “Ona o le Pa’ū, na ou …” Ma, a o outou faitau faatasi le Mose 5:8–11, 14–15; 6:59; Alema 11:42, e mafai ona latou faamaeaina le fuaiupu lenei: “Ona o Iesu Keriso, ua ou …” Faasoa atu i le tasi ma le isi lo outou agaga faafetai mo Iesu Keriso.

Mose 4:1-4

E mafai ona ou filifilia le mea sa’o.

Mafaufau i se lesona faatino faigofie e faailoa atu ai le mataupu faavae o le filifili: valaaulia lau fanau e valivali le itulau o le gaoioiga mo lenei vaiaso, ae tuu i ai na o le tasi le lanu e faaaoga. Aisea o le a sili ai le i ai o filifiliga? Ona mafai lea ona outou faitau faatasi le Mose 4:1–4 ma talanoa e uiga i le mafuaaga e finagalo ai le Atua ia mafai ona tatou filifili i le va o le sa’o ma le sese. E faapefea ona fesoasoani mai le Tama Faalelagi ma Iesu Keriso ia i tatou e faia filifiliga lelei?
Fesoasoani i tamaiti e mafaufau i ai ma tusi ata o filifiliga lelei e mafai ona latou faia e mulimuli ai ia Iesu Keriso. Po o le lo tou usuina faatasi se pese e faatatau i le faia o filifiliga lelei, e pei o le “Filifili Le Ala Sa’o” (Tusipese a Tamaiti, 82). Atonu e mafai ona taʻu atu e le tasi i le isi e uiga i se taimi na e faia ai se filifiliga lelei, ma faamatala e uiga i ou lagona ina ua uma.

Atamu ma Eva — O Le Pa’ū, saunia e Robert T. Barrett

Mose 5:4, 8

E mafai ona ou tatalo i le Tama Faalelagi.

Ina ua tatau ona tuua e Atamu ma Eva le Faatoaga o Etena, sa le mafai ona latou toe faatasi ma le Tama Faalelagi. Faitau faatasi ma lau fanau le Mose 5:4, 8 , ma fesoasoani ia i latou e sue mea na faia e Atamu ma Eva ina ia lagona ai le latalata atu ia te Ia ma faalogo ia te Ia. O a ni mea e mafai ona tatou fai atu ai i le Tama Faalelagi i a tatou tatalo?

Mo nisi manatu, tagai i le lomiga o lenei masina o le mekasini o le Uo .

Atamu ma Eva ma se tamai mamoe e taulagaina i luga o se fata faitaulaga — I le Faatusa ai o le Taulaga a le Toatasi na Fanaua e le Tama, saunia e Mike Malm (tagai i le Mose 5:5–9)

Itulau o gaoioiga a le Peraimeri: O Le Pa’ū o Atamu ma Eva — I le Faatusa ai o le Taulaga a le Toatasi na Fanaua e le Tama, saunia e Mike Malm (tagai i le Mose 5:5–9)