Faatomuaga i le Feagaiga Tuai

O se tasi o auala e maua ai le tamaoaiga o le fafagaina faaleagaga i le Feagaiga Tuai o le vaavaai lea mo le Areto o le Ola, o Iesu Keriso (tagai i le Ioane 6:48). Mo se faataitaiga, e faapefea ona e vaai i le Faaola i mea nei?

• Manai (Esoto 16:4, 11–15; Ioane 6:35)

• O le tamai mamoe e osi ai taulaga (Esoto 12:3–5; Ioane 1:29)

• Gata apa memea (Numera 21:4–10; Ioane 3:14)

• Iona (Iona 1:4–17; Mataio 12:38–41)

O a ni mea ua aoao mai e nei faataitaiga e uiga ia te Ia? O a isi mau faasino ia Iesu Keriso i le Feagaiga Tuai ua e masani i ai?

I lana savali “O Iesu Keriso o le Oa,” na faamalosiau mai ai Elder Dale G. Renlund ia i tatou ina ia “manatua ma taulai atu pea ia Iesu Keriso” (Liahona, Nov. 2023, 98). Mafaufau e faitau lana savali, ma vaavaai mo mea e mafai ona e faia e maua ai Iesu Keriso e le gata i le Feagaiga Tuai ae faapea foi i lou olaga.

Tagai foi i le “Ituaiga po o Faatusa o Keriso” i le Taiala i Tusitusiga Paia, “Iesu Keriso,” Potutusi o le Talalelei; “Saili Vave Le Alii,” Tusipese a Tamaiti, 108.

Sa aoao mai Peresitene Dallin H. Oaks: “Sa faalauiloa mai e le Tama Lona Alo Pele e Toatasi, o Iesu Keriso, o lo tatou Faaola ma le Togiola ma tuuina mai le poloaiga ia te i tatou ia ‘faalogo ia te Ia.’ Mai lea faatonuga ua tatou faia ai se faaiuga e faapea, o faamaumauga faatusi paia o upu na tulei i ai le “Atua” po o le “Alii” e toetoe o upu uma lava a Ieova, lo tatou Alii, o Iesu Keriso” (“O Aoaoga a Iesu Keriso,” Liahona, Me 2023, 102).

14:7

Ina ua luiina e taitai o tagata Iutaia Iesu e uiga i Lona faasinomaga, sa Ia tautino mai, “Sa a’u i ai a o lei iai se Aperaamo.” O nei upu na faateia ai tagata na faalogo ia Iesu, ma sa latou saunia e fetogi o Ia i maa (tagai i le Ioane 8:58–59). Mafaufau e faitau le Esoto 3:13–15; 6:3–5 e iloa ai le mafuaaga na matua le fiafia ai nisi o tagata Iutaia i le fetalaiga a Iesu.

Aiseā e tāua ai iā te oe le iloa o Iesu Keriso o Ieova?

I se faaaliga vaaia, na faaali atu ai e le Alii ia Nifae le oo mai o le Tusi Paia, ma faamalamalama atu ai o le a aveesea mai ai “le tele o mea manino ma pele”. Mafaufau e faitau le 1 Nifae 13:21–29, 38–42, ma vaavaai pe na faapefea ona fuafua le Alii e “faailoa atu mea manino ma pele.” E tusa ai ma le 2 Nifae 3:12, e faapefea ona galulue faatasi le Tusi Paia ma le Tusi a Mamona?

A o e suesue i le Feagaiga Tuai i lenei tausaga, o le a e suesueina foi nisi o “isi tusi” na muai vaai i ai Nifae. E aofia ai tulaga nei:

• O le tusi a Mose, o le vaega o le faaliliuga a Iosefa Samita o le Tusi Paia. E toefuatai mai ai upumoni ma tala e le o maua i le anotusi o loo i ai nei o le Kenese 1–6.

• O le tusi a Aperaamo, lea na faaali atu ia Iosefa Samita a o ia suesueina tusitusiga pa’u o Aikupito anamua (tagai i Autu ma Fesili, “Tusi a Aperaamo,” Potutusi o le Talalelei).

• O fuaitau eseese mai le Faaliliuga a Iosefa Samita, o nisi o na fuaitau o loo i vaefaamatalaga, o le faaopoopoga o le Tusi Paia, ma le Taiala i Tusitusiga Paia.

O nisi nei o faataitaiga o tala o le Feagaiga Tuai na toefuatai mai e ala mai ia Iosefa Samita: aai o Siona a Enoka (Mose 7:18–19), faaaliga vaaia a Aperaamo o le fono i le lagi (Aperaamo 3:22–28), ma le galuega a Mekisateko (Faaliliuga a Iosefa Samita, Kenese 14:25–40). Aisea e “manino ma pele” ai nei tala ia te oe?

O le Feagaiga Tuai o le tala lea i le Atua o loo saili e fai i tatou ma Ana “oloa taua” e ala i feagaiga (Esoto 19:5). Mo lena mafuaaga, o se auala lelei e saunia ai e faitau le Feagaiga Tuai o le aoao lea e uiga i feagaiga—aemaise lava le feagaiga tumau-faavavau na ofoina atu e le Atua i perofeta anamua e pei o Aperaamo, Isaako, Iakopo, ma a latou fanau. Ma o se auala sili e aoao ai e uiga i feagaiga o le suesue lea i le savali a Peresitene Russell M. Nelson “O Le Feagaiga e Faavavau” (Liahona, Oketopa 2022, 4–11).

A o e faitau, fesili ifo ia te oe lava: Aisea e taua ai feagaiga ia te au? O le a le “ituaiga o alofa ma le alofa mutimutivale faapitoa” ou te maua mai le Atua a o ou tausia a’u feagaiga ma Ia? A o e faitauina le Feagaiga Tuai i lenei tausaga, ia vaavaai mo mea e finagalo le Atua e aoao atu ia te oe e uiga i lau sootaga o le feagaiga ma Ia.

Tagai foi i le Ieremia 31:31–34.

• O upu ma aganuu o le Feagaiga Tuai atonu e faigata mo tamaiti ona malamalama i ai, ae e mafai ona e fesoasoani ia i latou e vaai ia Iesu Keriso i faatusa ma tala. Atonu e mafai e oe ma lau fanau ona vaai i le ata o i lalo, The Prophet Isaiah Fortells Christ’s Birth (Ua Valoia e le Perofeta o Isaia le Fanau Mai o Keriso. Tuu atu i lau fanau e faasino mai faamatalaga auiliili latou te vaaia. Ae maise lava, ia taula’i atu lo latou vaai i le pepe o Iesu. Ona mafai lea ona e faitau faatasi ma i latou i mea na tusia e Isaia e uiga i le fanau mai o le Faaola i le Isaia 7:14; 9:6. Faasoa atu i lau fanau ou lagona e uiga i le vaavaai mo le Faaola i le Feagaiga Tuai i lenei tausaga.

  

• E mafai foi ona e faitauina ma lau fanau le Salamo 23 po o le Isaia 53:3–9 ma sue upu na e faamanatu atu ai ia te oe ia Iesu Keriso. O le a se mea ua aoao mai e nei upu ia i tatou e uiga i Lona soifuaga ma le Togiola?

• O feagaiga o se autu tele lea i le Feagaiga Tuai. Ina ia faailoa atu lenei autu i lau fanau, e mafai ona e talanoa ma i latou e uiga i folafolaga latou te faia ma tausia faatasi ma aiga po o uo ma le mafuaaga e taua ai le tausia o nei folafolaga. Ona mafai lea ona e vaai i se ata o se papatisoga ma talanoa e uiga i le folafolaga, po o le feagaiga, tatou te osia ma le Atua pe a papatisoina i tatou (tagai i le Mosaea 18:10, 13). E mafai foi ona e faaali atu se ata o le malumalu ma faasoa atu ou lagona e uiga i feagaiga tatou te osia iina.

• O le itulau o gaoioiga o lenei vaiaso e mafai ona fesoasoani i lau fanau ia fiafia e osia ma tausia feagaiga ma le Tama Faalelagi. E mafai foi ona outou usuina se pese e uiga i le osia o feagaiga, e pei o le “Pe a Ou Papatiso” (Tusipese a Tamaiti, 53).

• Pe iloa e lau fanau se tasi e eseese igoa e faaigoa ai i nofoaga eseese? Atonu e ese le faalagiga o se matua po o se faiaoga i le galuega, i le fale, ma i le lotu. Talanoa e uiga i na igoa; ona faitau faatasi lea o le Esoto 6:3 ma valaaulia lau fanau e sue igoa na iloa ai Iesu Keriso a o lei fanau mai o Ia (tagai foi i le Faaliliuga a Iosefa Samita i le vaefaamatalagai).