Faitauina o le Feagaiga Tuai

Po o a lava luitau atonu o loo feagai ma oe ma lou aiga, o le tali lava o Iesu Keriso. Ina ia maua tali i le Feagaiga Tuai, vaavaai mo Ia. E le faigofie i taimi uma. Atonu e manaomia lou mafaufau loloto ma le onosai ma saili le taitaiga faaleagaga. O nisi taimi o mea e faasino ia te Ia e foliga mai e tuusao tonu lava, e pei ona i ai i le folafolaga a Isaia “Aua ua fanau mai mo i tatou le tama, ua foaiina mai mo i tatou le atalii … e igoa foi o ia … O le Alii o le Filemu” (Isaia 9:6). I nisi nofoaga, e tele ina tau le iloa le faatusaina o le Faaola, e ala i faailoga ma mea e talitutusa—mo se faataitaiga, e ala i le faamatalaina o taulaga e osi i manu vaefa po o le tala i le faamagaloina e Iosefa o ona uso ma le faasaoina o i latou mai le oge.

Afai e te sailia le faatuatua tele atu i le Faaola a o e suesue i le Feagaiga Tuai, o le a e maua. Atonu e mafai ona avea lea ma manulauti o au suesuega i lenei tausaga. Tatalo ina ia taialaina e le Agaga oe ina ia maua ma taulai atu i fuaitau, tala, ma valoaga o le a aumaia latalata atili ai oe ia Iesu Keriso.

Aua ne’i e manatu e tuuina mai e le Feagaiga Tuai se talafaasolopito mae’ae’a ma sa’o o le tagata soifua. E le o le mea lena na taumafai uluai tusitala ma i latou na tuufaatasia e fatu. O lo latou atugaluga tele o le aoao atu lea o se mea e uiga i le Atua—e uiga i Lana fuafuaga mo Lana fanau, e uiga i le avea ma Lona nuu o le feagaiga, ma le pe faapefea ona maua le togiolaina pe a tatou faia mea sese. O nisi taimi sa latou faia ai e ala i le faamatalaina o mea na tutupu i le talafaasolopito e pei ona sa latou malamalama i ai—e aofia ai ma tala mai olaga o perofeta maoae. O le Kenese o se faataitaiga lea o lenei mea, e faapena foi i tusi o Iosua, Faamasino ma le Tupu 1 ma le 2. Ae o isi tusitala o le Feagaiga Tuai sa lei taulai atu lava e tusitusi faa-talafaasolopito. Nai lo o lena, na latou aoao atu e ala i galuega o faatufugaga e pei o solo ma tusi faitau. O le Salamo ma le Faataoto e i totonu o le vaega lenei. Ona i ai lea o upu taua a perofeta, e pei o Isaia ma Malaki, o e na ta’uina atu le upu a le Atua i Isaraelu anamua—ma, e ala mai i le vavega o le Tusi Paia, o loo talanoa mai pea ia i tatou i aso nei.

Na silafia ea e nei perofeta, fatusolo ma e na tuufaatasia, o a latou upu o le a faitauina e tagata i le lalolagi atoa i le faitau afe o tausaga mulimuli ane? Tatou te le iloa. Ae tatou te maofa ona o le mea tonu lava lea ua tupu. Sa faatutu ma toilalo mālō, sa faoa aai, sa soifua mai tupu ma maliliu, ae na tumau pea le Feagaiga Tuai nai lo i latou uma, mai lea augatupulaga i lea augatupulaga, mai lea tusiupu i lea tusiupu, mai lea faaliliuga i lea faaliliuga. E moni e i ai nisi o mea na leiloloa pe toe suia, ae peitai o le tele o mea na faasaosaoina faavavega.

O nai mea laiti nei ia nofouta i ai e manatua ma mafaufau i ai a’o e faitauina le Feagaiga Tuai i lenei tausaga. Na faasaosaoina e le Atua nei tusitusiga anamua ona o loo Ia silafia oe ma mea e te oo i ai. Ua Ia saunia se savali faaleagaga mo oe i nei upu, o le a faapea ona faalatalata atili atu ai oe ia te Ia ma atinae ai lou faatuatua i Lana fuafuaga ma Lona Alo Pele. Atonu o le a Ia taitaia oe i se fuaitau po se malamalamaaga manino o le a faamanuiaina ai se tasi e te iloa—o se savali e mafai ona e faasoa atu i se uo, se tagata o le aiga, po o se uso o le Au Paia. E tele lava avanoa! Pe le manaia ea lena mea e mafaufau i ai?

Na faapea mai Nifae, “Ua olioli lo’u agaga i tusitusiga paia” (2 Nifae 4:15). Atonu o le a faapena foi ou lagona a o e faitau i le tele o upu lava ia na faitauina e Nifae—o le mea ua tatou ta’ua nei o le Feagaiga Tuai.