“Jānwōde 19–25. Wōtlo̧k eo an Adam im Iv: Jenesis 3–4; Moses 4–5,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)

“Jānwōde 19–25. Wōtlo̧k eo an Adam im Iv,” Itok, Ļoor Eō: 2026

Adam im Iv,, jān Douglas M. Fryer

Jānwōde 19–25: Wōtlo̧k eo an Adam im Iv

Jenesis 3–4; Moses 4–5

Kar jinoin, bwebwenato in Wōtļo̧k eo an Adam im Iv emaron̄ kar juon jorrāān eļap. Adam im Iv rej diwōjļo̧k jān Jikin Kallip Eden. Rekar kadiwōjļo̧k er n̄an juon laļ ijo renaaj en̄jake metak, būrom̧ōj, im mej (lale Jenesis 3:16–19). Im rekar jepelļo̧k jān Jemeier Ilan̄. Ak m̧ool ko kar kōjepļaaktok kōn Rikanaan Josep Smith ilo bok in Moses ej letok n̄an kōj juon meļeļe eo ejenolo̧k kōn Wōtļo̧k eo.

Aaet, Jikin Kallip Eden ekar aiboojoj. Ak Adam im Iv raar aikuj eļapļo̧k jān ijoko raiboojoj ipeļaakin. Rekar aikuji—im jekar aolep aikuji—juon iien em̧m̧an n̄an eddōkļo̧k. Em̧m̧akūt jān Jikin Kallib Eden ekar bun̄tōn eo kein kajuon eaorōk n̄an oktakļo̧k n̄an Anij im āliktata erom̧ āinwōt E. Meļeļein ke renaaj ioon mālijjon̄, kōm̧m̧ani kāālet ko, kōm̧m̧an bōd, ekkatak ukweļo̧k, im lōke Rilo̧mo̧o̧r, eo Pinmuur eo an ekōm̧m̧an wōnm̧aanļo̧k im “lan̄lōn̄ kōn lo̧mo̧o̧ren eo ad” (Moses 5:11). Kōn menin, n̄e kwoj riiti Wōtļo̧k eo an Adam im Iv, jab mije wōt jorrāān ko reļļap ak men ko me maron̄ kōjatdikdik kaki—kōn paredais eo Adam im Iv rekar luuji ak kōn aibojooj eo kar aer kāālet ekar kōm̧m̧an bwe jen bar bōke.

Ļōmņak ko n̄an Ekkatak ilo M̧weeo im ilo Kabun̄ in

Jenesis 3; Moses 4

Wōtlo̧k eo ekar juon m̧ōttan eo eaorōk ilo karōk eo an Anij.

Em̧ool ke kāālet eo an Adam im Iv ekar tōl n̄an elōn̄ apan̄ ko jej en̄jake ilo mour in. Ak ejjab meļeļein bwe jej ajļo̧ke kāālet eo aer. Ilo am̧ riiti Jenesis 3 im Moses 4, kwomaron̄ kajjitōk ippam̧ make, etke eaorōk Wōtlo̧k eo n̄an karōk eo an Anij?

Ekkar n̄an Moses 5:9–12, elmen an kar Adam im Iv en̄jake kōn Wōtlo̧k eo? Ekōjkan am̧ maron̄ kōjerbal naan ko aer n̄an en̄jake ko am̧ ilo laļin? Bar ta ko jet kwoj ekkatak jān 2 Nipai 2:19–25?

Bar lale Mosaia 3:19; Alma 12:21–37; im Katak im Bujen Ko 29:39–43.

Iv ej jibwe juon abōļ — Diwōjļo̧k jān Eden,, jān Annie Henrie Nader

Jenesis 3:1–7; Moses 4:22–31; 5:4–15

Jisōs Kraist ej letok kōjatdikdik im lo̧mo̧o̧r.

Bwebwenato eo an Adam im Iv ej kōn juon kōjatdikdik im lo̧mo̧o̧r jān Jisōs Kraist. N̄an lale etke, kwomaron̄ bar pukot tōprak in Wōtlo̧k eo ilo Jenesis 3:1–7; Moses 4:22–31 im kakōļļeik ak kōllaajraki ta ko kwoj loi. Elmen an men kein jelet eok? Innām kwomaron̄ etale Moses 5:4–15, pukot karōk eo an Anij n̄an lo̧mo̧o̧ren kōj jān men kein rejelet kōj. Etke Adam im Iv raar “m̧ōņōņō” ālkin an enjeļ eo kar loļo̧k er? Ta eo kwoj ekkatak jān er kōn karōk eo an Jemedwōj Ilan̄?

Bar lale “Because of Him” (pija in alooj), Gospel Library.

Jenesis 3:16; Moses 4:22

Ta meļeļein ke Adam ekar “irooj ioon” Iv?

Eoon in ilo jeje ko rekwojarjar jet iien armej rejjab meļeļe kake n̄an meļeļein ke ļeo pālele ewōr an maron̄ in kōm̧m̧ani men ko rejjab em̧m̧an n̄an lio pāleen. Ilo raan kein ad, rikanaan ro an Irooj raar katakin bwe ļeo im lio pālele rej aikuj kalimjōk er make āinwōt juon wōt jemjerā n̄an kakūrm̧ool eddo ko aer rekwojarjar ilo baam̧le eo (lale “Baam̧le Eo: Juon Naan in Kean̄ n̄an Laļ in” [Gospel Library]). Elder Dale G. Renlund im Sister Ruth Lybbert Renlund rekar kōmeļeļeik bwe ļeo pālele eo ej mour jim̧we “enaaj kappukot n̄an jerbal in karejar; enaaj kile bōd im kappukot jeorļo̧k bōd; enaaj m̧ōkaj n̄an leļo̧k nōbar; enaaj ļōmņak kōn kōņaan ko an ro uwaan baam̧le eo; enaaj en̄jake eddo ko reļļap n̄an kakke ‘aikuji ko an mour im kōjparok eo an baam̧le eo an; enaaj ļap an kautiej im kōttāiki n̄an kōrā eo pāleen. … Enaaj kōjeraam̧m̧an baam̧le eo am̧” (The Melchizedek Priesthood: Understanding the Doctrine, Living the Principles [2018], 23).

Moses 4:1–4

Ij aikuj anemkwoj im kāālet im jum̧ae ko n̄an eddōk.

Elder Dale G. Renlund katakin, “Kōttōpar eo an Jemedwōj Ilan̄ ilo kōkaajriri ejjab n̄an ajri ro Nejin bwe ren kōm̧m̧ane ta eo ejim̧we; ej n̄an ajri ro Nejin bwe ren kāālet n̄an kōm̧m̧ane ta eo ejm̧we im āliktata n̄an erom̧ ainwōt E” (“Kom̧winKāālōt Rainin,” Liaona, Nob. 2018, 104). Etke elukkun aorōk ilo karōk eo an Jemedwōj Ilan̄ bwe jen kāālet n̄an kōm̧m̧ane ta eo ejim̧we.

Ilo am̧ riiti Mosaia 4:1–4, pukot ta eo Jemedwōj Ilan̄ im Jisōs Kraist raar kōm̧m̧ane n̄an kōjparok maron̄ eo am̧ n̄an kāālet—anemkwoj in kāālet eo am̧. Elmen am̧ maron̄ pād ilo kajoor in kōjparok eo aer? N̄an ļōmņak ko, ļōmņak in ekkatak jekjōn eo “Kōm̧m̧ani kālet ko reim̧we” ilo N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko (4–5).

Bar ļōmņak in riiti ta eo Liai ekar katakin kōn anemkwoj in kāālet ilo 2 Nipai 2:11–20, 25–30. Etke jum̧ae eaorōk n̄an anemkwoj in kāālet? Ekōjkan am̧ maron̄ kwaļo̧k kam̧m̧oolol n̄an Jisōs Kraist kōn an kar kōm̧m̧an bwe kwōn “anemkwoj n̄an kāālet”? (2 Nipai 2:27).

Bar lale Dallin H. Oaks, “Jum̧ae ilo Men Otemjeļo̧k,” Liaona, Māe 2016, 114–17; Unin Kōnono ko im Kajjitōk ko, “Anemkwoj,” Gospel Library; “Choose the Right,” Hymns, no. 239.

Kōļapļo̧k bōk ko̧naer. Elōn̄ m̧akūtkūt in ekkatak jemaron̄ kōm̧m̧ani make, ilo baam̧le, ak kūlaaj; ilo kurup ko reddik, ak ilo ruoļo̧k iaan. Kōjerbal elōn̄ kain kilen katakin ko n̄an kōtļo̧k bwe ro rej bōk koņaer me raar jab maron̄ kar. N̄an m̧akūtkūt in, kwomaron̄ karuwaneneik juon armej ak juon kurup n̄an riiti Moses 4 im unin tōl an N̄an Kōkajoorļo̧k Jodikdik ro ilo an kurup eo juon ekkatak eoon ko ilo 2 Nipai 2. Innām remaron̄ katakin doon ta ko raar ekkatak ilo jekjōn ko kar leļo̧k n̄an er.

Moses 4:4–12; 5:13–33

Setan ej kappukōt “n̄an m̧oņe im kaploik” kōj.

Ilo am̧ riiti Moses 4:4–12; 5:13–33, ļōmņak in laajraki wāween ko me Setan ekar kajjieon̄ kapoik Adam im Iv im ajri ro nejier. Ekōjkan an bar kajjieon̄e ejja menin rainin? Ekōjkan an Jemedwōj Ilan̄ jipan̄ eok eļļo̧k jān m̧ōņ ko an Setan.

Moses 4:13–16, 27

“N̄a, Irooj Anij … Iaar kanuknuk er.”

Ālkin aer kar m̧ōn̄ā leen wōjke eo, Adam im Iv rekar kajjieon̄ kalboboik aer keelwaan. Tokālik, Irooj ekar kanuknuk er. Ilo am̧ riiti Moses 4:13–16, 27, ļōmņak in riiti laajrak in:

Lin̄ūri ta eo keelwaan im nuknuk rej pinej jenkwan ilo jeje ko rekwojarjar (lale, n̄an waanjon̄ak, Revelesōn 7:9, 13–15; 2 Nipai 9:14; Katak im Bujen Ko 109:22–26, 76). Ta eo kwoj ekkatak jān en̄jake eo an Adam im Iv ikijeen keelwaan im nuknuk?
Eļan̄n̄e em̧ōj am̧ bōk menin letok kwojarjar ilo tampeļ, ļōmņake ta eo Adam im Iv remaron̄ kar ba n̄an kwe kōn aorōkin kaarmen in tampeļ ko am̧ im ta eo ej pinej jenkwan.

Bar lale “Sacred Temple Clothing” (pija in alooj), Gospel Library.

Moses 5:4–9, 16–26

Anij enaaj kile kijejeto ko aō eļan̄n̄e ij kōm̧m̧ani kōn ikdeelel in bōro im pokake.

Ilo am̧ ekkatak Moses 5:4–9, 16–26, ļōmņake m̧wil in Adam im Iv im ļōm̧aro nejier Cain im Abel ikijeen katok. Etke Irooj ekar kile katok eo an Ebel im jab Cain?

Ta eo Anij ej kajjitōk bwe kwōn joortak kake. Ebar wōr ke men ilo eoon kein me raar ukōt wāween am̧ ļōmņak kōn mennin katok ko?

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Jenesis 3; Moses 4; 5:8–15

Jisōs Kraist ej lo̧mo̧o̧ren kōj jān Wōtlo̧k eo.

N̄an jipan̄ ajri ro nejum̧ meļeļeļo̧k kōn Wōtlo̧k eo an Adam im Iv, kwomaron̄ kapeik pija ko jān “Adam and Iv” (in Bwebwenato ko an Kallim̧ur M̧okta, 13–16) im m̧wijitļo̧k. Innām kwomaron̄ jerbal ippān doon n̄an likūt pija ko karōki ilo am̧ kōmeļeļeik en̄jake ko an Adam im Iv. Ilo am̧ kōm̧m̧ane, kōnono kōn etke ekar aorōk, ilo karōk eo an Jemedwōj Ilan̄, n̄an Adam im Iv bwe ren ilo̧k jān Jikin Kallib in Iden.
Ajri ro nejum̧ remaron̄ en̄jake kam̧m̧oolol kōn Pinmuur eo an Jisōs Kraist ilo aer meļeļe ekōjkan An kar anjo̧ jān men ko rej waļo̧k jān Wōtlo̧k eo. Ilo ami riit ippān doon Moses 4:25; 6:48; Rom 5:12; 2 Nipai 2:22–23, jipan̄ ajri ro nejum̧ pukot kilen aer kadedeļo̧k jantōj in: “Kōnke kōn Wōtlo̧k eo, N̄a …” Innām, riit ippān doon Moses 5:8–11, 14–15; 6:59; Alma 11:42, remaron̄ kadedeļo̧k jantōj in: “Kōnke kōn Jisōs Kraist, N̄a …” Kwaļo̧k n̄an doon kam̧m̧oolol eo am̧ n̄an Jisōs Kraist.

Moses 4:1–4

Imaron̄ kāālet jim̧we eo.

Ļōmņake juon object lesson n̄an kwaļo̧k kadkadin pedped in anemkwoj in kāālet: kipel ajri ro nejum̧ n̄an kōļare peij in m̧akūtkūt eo an wiik in, ak leļo̧k wōt juon kōļar bwe ren kōjerbale. Etke ejaam em̧m̧anļo̧k bwe en wōr ad kāālet? Innām kom kwomaron̄ riit ippān doon Moses 4:1–4 im kōnono kōn ekte Anij ekōņaan bwe jen maron̄ kāālet kōtaan jim̧we im bōd. Ekōjkan an Jemedwōj Ilan̄ im Jisōs Kraist jipan̄ kōj kōm̧m̧ani kāālet ko rem̧m̧an.
Jipan̄ ajri ro nejum̧ ļōmņak kōn im jin̄aik pija in kāālet ko rem̧m̧an remaron̄ kōm̧m̧ani n̄an ļo̧o̧r Jisōs Kraist. Ak kom̧ maron̄ al ippān doon juon al kōn kōm̧m̧ane kāālet ko rem̧m̧an, āinwōt “Choose the Right Way” (Children’s Songbook, 160–61). Kwomaron̄ jiron̄ doon kōn juon iien me kwaar kōm̧m̧ane juon kāālet em̧m̧an im kōnono kōn elmen am̧ kar en̄jake tokālik.

Adam im Iv — Wōtlo̧k Eo, jān Robert T. Barrett

Moses 5:4, 8

Imaron̄ Jar n̄an Jemedwōj Ilan̄.

Ke Adam im Iv rekar aikuj em̧makūt jān Jikin Kallib Eden, raar jab maron̄ pād ippān Jemedwōj Ilan̄. Riiti Moses 5:4, 8 ippān ajri ro nejum̧, im jipan̄ er pukot ta eo Adam im Iv raar kōm̧m̧ane n̄an en̄jake aer epaake E im ron̄jake E. Ta jet iaan men ko jemaron̄ ba n̄an Jemedwōj Ilan̄ ilo jar ko ad?

N̄an eļapļo̧k, lale ennaan eo an allōn̄ in ilo eo Jera māākjiin.

Adam im Iv ippān juon lamb in katok ilo lokatok eo — In Similitude of the Sacrifice of the Only Begotten of the Father, jān Mike Malm (lale Moses 5:5–9)

peij in m̧akūtkūt eo an Būraimere: Wōtlo̧k eo an Adam im Iv — In Similitude of the Sacrifice of the Only Begotten of the Father, jān Mike Malm (lale Moses 5:5–9)