Kadkad in Kallim̧ur M̧okta

Juon wāween n̄an en̄jaake kajoorin najidik jetōb eo ilo Kallim̧ur M̧okta ej n̄an pukot Bred in Mour, Jisōs Kraist (lale Jon 6:48). N̄an waanjon̄ak, elmen am̧ kalimjōk Rilo̧mo̧o̧r eo ilo laajrak kein?

• Manna (Exodus 16:4, 11–15; Jon 6:35)

• Lamb in katok (Exodus 12:3–5; Jon 1:29)

• Jedpānit Bronze eo (Bōnbōn 21:4–10; Jon 3:14)

• Jona (Jona 1:4–17; Matu 12:38–41)

Ta ko waanjon̄ak kein rej katakin kōn E? Ta bar jet meļeļe ko kōn Jisōs Kraist ilo Kallim̧ur M̧okta me kojeļā kaki?

Ilo enaan eo an “Jisōs Kraist ej men eo Eaorōk,” Elder Dale G. Renlund ekar kōketak kōj n̄an “keememej im aolep iien mije wōt Jisōs Kraist” (Liaona, Nob. 2023, 98) Ļōmņak in riiti enaan eo an, kappukot men ko me komaron̄ kōm̧m̧ani n̄an lo Jisōs Kraist ejjab ilo Kallim̧ur M̧okta wōt ak bar ilo mour eo am̧.

Bar lale “Types or Symbols of Christ” ilo Unin Tōl n̄an Jeje ko Rekwojarjar, “Jesus Christ,” Gospel Library; “Seek the Lord Early,” Children’s Songbook, 108.

Būreejtōn Dallin H. Oaks ekar katakin: “Jemād eaar kwaļo̧k kadkadin Nejin Emake Wōt, Jisōs Kraist, āinwōt ad Rilo̧mo̧o̧r im Ripinmuur im letok n̄an kōj kean̄ n̄an ‘ron̄jake E.’ Jān tōl in jej lo bwe rekoot in jeje ko rekwojarjar kōn naan ko kōnono jān ‘Anij’ ak ‘Irooj’ enan̄in aolepeer rej naan ko an Jeova, ad Irooj ejerkakpeje, Jisōs Kraist” (“Katak ko an Jisōs Kraist,” Liaona, Māe 2023, 102).

14:7

Ke ritōl ro an riJu ro raar jum̧ae Jisōs kōn wōn E, Ekar ba “ṃokta jān Ebream, Ij pād.” Naan kein raar kailibōk armej ro raar ron̄ ainikien Jisōs, im er raar pojak in kad E (lale Jon 8:58–59). Ļōmņak in riiti Exodus 3:13–15; 6:3–5 n̄an lale etke jet riJu raar lukkuun illu kōn ta eo Jisōs ekar ba.

Etke ejaam aorōk bwe kwon jeļā ke Jisōs Kraist ej Jeova?

Ilo juon visōn, Irooj ekar kwaļo̧k n̄an riNipai ro itok eo an Baibōļ, kōm̧eļeļe bwe “elōn̄ men ko realikkar im raorōk” naaj joļo̧k jāne. Ļōmņak in riiti 1 Nipai 13:21–29, 38–42, pukot ekōjkan an Irooj kar karōk n̄an “kwaļo̧k men ko realikkar im reaorōk.” Ekkar n̄an 2 Nipai 3:12, ekōjkan an Baibōļ eo im Bok in Mormon jerbal ippān doon?

Ilo am̧ ekkatak Kallim̧ur M̧okta iiō in, konaaj bar ekkatak jet iaan “bok ko” Nipai ekar loi. Men kein rekoba:

• Bok in Moses, m̧ōttan ukook eo an Josep Smith an Baibōļ eo. Ej kōjepļaaktok m̧ool ko im bwebwenato ko me rejako ilo jeje eo kiiō an Jenesis 1–6.

• Bok in Ebream, eo kar kwaļo̧k n̄an Josep Smith ke ekar etale jeje in Ijept eo etto (lale Unin Kōnono ko im Kajjitōk ko, “Bok In Ebream,” Gospel Library).

• Eoon ko jet jān Ukook eo an Josep Smith, jet iaer rej waļo̧k ilo footnote ko, appendix eo an Baibōļ eo, im Unin Tōl n̄an Jeje ko Rekwojarjar.

Erkein jet waanjon̄ak in bwebwenato ko ilo Kallim̧ur M̧okta me Josep Smith ekar kōjepļaakitok: Bukwon Zaiōn eo an Enoch (Moses 7:18–19), Visōn eo an Ebream̧ kōn kweilo̧k eo lan̄ (Ebream 3:22–28), im jerbal eo an Melkisedek (Josep Smith Ukook, Jenesis 14:25–40). Etke bwebwenato kein “realikkar im aorōk” n̄an kwe?

Kallim̧ur M̧okta ej bwebwenato in an Anij pukot n̄an kōm̧m̧an bwe jen ro “e aorōk” An ilo bujen (Exodus 19:5). Kōn un in, juon wāween em̧m̧an n̄an kepopo in riiti Kallim̧ur M̧okta ej n̄an ekkatak kōn bujen ko—eļaptata bujen eo ejelo̧k jem̧ļo̧kin Anij ekar letok n̄an rikanaan ro etto āinwōt Ebream, Isaac, Jekab, im ro ineer. Im juon wāween em̧m̧an n̄an ekkatak bujen kein ej n̄an ekkatak enaan eo an Būreejtōn Russell M. Nelson “Bujen Ejjeļo̧k Jem̧ļo̧kin” (Liaona, Oktoba 2022, 4–11).

Ilo am̧ riit, kajjitōk ippam̧ make: Etke eaorōk bujen ko n̄an n̄a? Ta “kain iakwe im tūriam̧okake eo ejenolo̧k” iaar bōk jān Anij ilo aō kōjpārok bujen ko aō Ippān? Ilo am̧ riit Kallim̧ur M̧okta iiō in, lale men ko Anij ekōņaan katakin eok kōn bujen jemjerā eo am̧ Ippān.

Bar lale Jeremiah 31:31–34.

• Naan im m̧anit ko an Kallim̧ur M̧okta remaron̄ pen n̄an an ajri ro meļeļe, ak kwomaron̄ jipan̄ er loe Jisōs Kraist ilo kōkaļļe im bwebwenato ko. Bōlen kwe im ajri ro nejum̧ maron̄ lale pija in ilaļ The Prophet Isaiah Foretells Christ’s Birth. Kōtļo̧k bwe ajri ro nejum̧ ren kwaļo̧k meļeļe ko rej loi. Kipel er bwe ren mije, eļaptata, nin̄nin̄ Jisōs. Innem komaron̄ riit ippaer ta eo Aiseia eaar je kōn ļotak eo an Rilo̧mo̧o̧r ilo Aiseia 7:14; 9:6. Kwaļo̧k n̄an ajri ro en̄jake eo am̧ kōn pukot Rilo̧mo̧o̧r eo ilo Kallim̧ur M̧okta iiō in.

  

• Kwe im ajri ro nejum̧ maron̄ bar riiti Sam Ko 23 ak Aiseia 53:3–9 im kappukot ta ko rej kakeememej kom kōn Jisōs Kraist. Ta ko naan kein rej katakin kōj kōn mour im Pinmuur eo An?

• Bujen ko rej unin tōl ko raorōk ilo Kallim̧ur M̧okta. N̄an kwaļo̧k kadkadin unin tōl in n̄an ajri ro nejum̧ , kwomaron̄ kōņaan ippāer kōn kallim̧ur ko rej kōm̧m̧ani im kōjparok ippān baam̧le eo aer ak ro m̧ōttaer im etke kōjparok kallim̧ur kein raorōk. Innām kwomaron̄ lale juon pija in peptaij im kōnono kōn kallim̧ur eo, ak bujen eo, jej kōm̧m̧ane ippān Anij n̄e jej peptaij (lale Mosaia 18:10, 13). Kwomaron̄ bar kwaļo̧k juon pija in tampeļ im kwaļo̧k en̄jake eo am̧ kōn bujen ko jej kōm̧m̧ani ijo.

• Peij in m̧akūtkūt eo an wiik in emaron̄ jipan̄ ajri ro nejum̧ m̧ōņōņō in kōm̧m̧ani im kōjparok bujen ko ippān Jemedwōj Ilan̄. Kom maron̄ bar al juon al kōn kōm̧m̧an bujen ko, āinwōt “When I Am Baptized” (Children’s Songbook, 103).

• Ajri ro nejūm̧ rejeļā ke kajjieon̄ juon eo me ej kōjerbal āt ko roktaktak ilo ijoko roktaktak? Bōlen juon jinen im jemān ak rūkaki eoktak aer kūr er ilo jikin jerbal, ilo m̧weeo, im ilo m̧ōnjar eo. Kōnono kōn āt kein; innām riiti Exodus 6:3 ippān doon im karuwainene ajri ro n̄an kappukot āt ko etan Jisōs Kraist me kar jeļā kaki m̧okta jān an kar ļotak (bar lale Josep Smith Translation ilo footnote c).