“January 19–25. Iduɔ Adam ye Eve: Genesis 3–4; Moses 4–5,” Edi, Etiene Mi—Eke Ufɔkiduŋ ye Ufɔk Abasi: Akani Testament 2026 (2026)
“January 19–25. Iduɔ Adam ye Eve,” Edi, Etiene Mi: 2026
Adam ye Eve, otode Douglas M. Fryer
January 19–25: Iduɔ Adam ye Eve
Genesis 3–4; Moses 4–5
Ke akpa, mbuk Iduɔ Adam ye Eve ekeme edibiet nte edi ndiɔkiso. Ema ebin Adam ye Eve esio ke ediye Iŋwaŋ Eden. Ekebin mmɔ esio esin ke ererimbot eke ubiak, mfuhɔ, ye mkpa (se Genesis 3:16–19). Ndien ema ediaŋare mmɔ ekpɔŋ Ete eke Enyɔŋ mmɔ. Edi mme akpanikɔ emi ekefiakde-emen-edi eto Prophet Joseph Smith ke ŋwed Moses ɔnɔ nnyin isio-isio idorenyin kabaŋa Iduɔ oro.
Iŋ, Iŋwaŋ Eden ama eye. Edi Adam ye Eve ema eyom sikponde ikan ediye ŋkan-ŋkuk. Mmɔ ekeyom—ndien nnyin kpukpru iyom—eti ifet kiet ndikɔri. Ndikpɔŋ Iŋwaŋ Eden ekedi akpa ntɔŋɔ ikpat ndisim edifiak-mbine Abasi ndien ke akpatre ndikabare ntie nte Enye. Oro ɔkɔwɔrɔ ndikut efaŋa, ndinam mbumek, ndinam ndudue, ndikpep ndikabare-esit, nyuŋ nnyene mbuɔtidem ke Andinyaŋa, emi Erisio-isop Esie anamde ŋkaiso ye “idara erifak nnyin nsio” odu (Moses 5:11). Ntem ini emi mbufo okotde abaŋa Iduɔ Adam ye Eve, ku-se nte ebietde ndiɔkiso, edi se ŋkpɔ emi eketibede—idighe ndise paradise emi Adam ye Eve ekenanade edi se ndaha ubɔŋ emi mbumek mmɔ ekenyimede ɔnɔ nnyin ndibɔ.
Mme Ekikere ke Edibɔ-ukpep ke Ufɔkiduŋ ye ke Ufɔk Abasi
Genesis 3; Moses 4
Iduɔ ekedi akpan ubak-ŋkpɔ kiet ke otu uduak Abasi.
Edi akpanikɔ ke mbumek eke Adam ye Eve akada ekesim ediwak nsɔŋɔ-ŋkpɔ emi nnyin ikutde ke uwem isɔŋ. Edi oro iwɔrɔke ke nnyin imitua-mkpɔfiɔk ke mbumek mmɔ. Nte mbufo okotde Genesis 3 ye Moses 4, mbufo emekem edibup idem fo ete, nsidi ntak emi Iduɔ ekedide akpan-ŋkpɔ ke uduak Abasi?
Nte asaŋade ye Moses 5:9–12, didie ke Adam ye Eve ekekere ebaŋa Iduɔ oro? Didie ke mbufo ekeme ndida ikɔ mmɔ nsin ke ifiɔk-ukpep fo ke idiɔk ererimbot emi? Nso efen ke mbufo ekpep oto 2 Nephi 2:19–25?
Se ŋko Mosiah 3:19; Alma 12:21–37; and Doctrine ye Covenants 29:39–43.
Ediwɔrɔ ke Eden, otode Annie Henrie Nader
Genesis 3:1–7; Moses 4:22–31; 5:4–15
Jesus Christ ɔnɔ nnyin idorenyin ye erifak-nsio.
Mbuk Adam ye Eve edi mbuk idorenyin ye erifak-nsio otode Jesus Christ. Man edikut ntak, mbufo emekeme nditɔŋɔ ke ediduŋɔre nyom ibɔrɔ eke Iduɔ oro ke Genesis 3:1–7; Moses 4:22–31 nyuŋ nim-idiɔŋɔ mme edibat se mbufo okutde. Didie ke mme ibɔrɔ emi anam-ŋkpɔ ye mbufo? Ndien mbufo emekeme ediduŋɔ Moses 5:4–15, ke oyomde uduak Abasi man edifak nnyin osio ke mme ŋkpɔ emi. Nsidi ntak emi Adam ye Eve “ekedarade” ke angel oro ama ekedise mmɔ? Nso ŋkpɔ ke mbufo ekpep oto mmɔ kabaŋa uduak eke Ete Heaven?
Se ŋko “Otode ke Enye” (ndise-vidio), Gospel Library.
Because of Him
Genesis 3:16; Moses 4:22
Nso ŋkpɔ ke oro ɔwɔrɔ ke akana nte Adam “edika-kara” Eve?
Ke ubak-ini esikpuhɔre ke itie-ŋwed Abasi emi ɔwɔrɔ ke ebe enyene unen ndinam ŋwan esie nte amade. Ke eyo nnyin emi, mme prophet Abasi ekpep ete ke ebe ye ŋwan enyene edikut idem mmɔ nte ukem-ukem nsaŋa ke ndinam ubiɔŋ-utom mmɔ ke ufɔkemana (se “Ufɔkemana: Etop emi enɔde Ererimbot” [Gospel Library]). Elder Dale G. Renlund ye Sister Ruth Lybbert Renlund enam-aŋwaŋa ke eti ebe “eyeyom ndinɔ uŋwam; enye eyekut ndudue esie ndien oyom erifen-nnɔ; enye eyesɔp edinɔ itoro; enye edikere ŋkpɔ kabaŋa ufɔn eke mbon ufɔkemana esie nte akpa ŋkpɔ; enye eyekere abaŋa akwa udobi ubiɔŋ eke edinɔ ‘ŋkpɔ uwem ye ukpeme’ ke ufɔkemana esie; enye edikama ŋwan esie ke ata ukpono ye ndinam uduak esie. … Enye eyediɔŋ ufɔkemana esie” (The Melchizedek Priesthood: Understanding the Doctrine, Living the Principles [2018], 23).
Moses 4:1–4
Ami mmoyom unen-edimek ye efaŋa man ŋkɔri.
Elder Dale G. Renlund ekekpep ke, “Uduak eke Ete eke Enyɔŋ nnyin ke ndidi ete ye eka idighe ndinam nditɔ Esie enam ŋkpɔ emi enende; edi ndinam nditɔ Esie emek ndinam ŋkpɔ emi enende ndien ke akpatre ekabare etie nte Enye” (“Choose You This Day,” Liahona, Nov. 2018, 104). Nso idi ntak oro enehede edi akpan-ŋkpɔ ke uduak eke Ete ke Enyɔŋ yak nnyin imek ndinam ŋkpɔ se inende?
Nte mbufo okotde Moses 4:1–4, se yom ŋkpɔ emi Ete eke Enyɔŋ ye Jesus Christ ekenamde ndikpeme unen fo ke edimek—mbumek fo. Didie ke mbufo ekeme edikut odudu ukpeme mmɔ? Ke oyomde ifiɔk, kere-baŋa ndikot ikpehe eke “Nam nti mbumek” ke Enɔde ke Nsɔŋɔnda eke Iwaad: Ndausuŋ ke Ndinam Mbumek (4–5).
Kere-baŋa ŋko ndikot ŋkpɔ se Lehi ekekpepde kabaŋa unen-edimek ke 2 Nephi 2:11–20, 25–30. Nsidi ntak emi efaŋa enyenede-ndidu nnɔ unen-edimek? Didie ke mbufo ekeme ediwut ekɔm nnɔ Jesus Christ ke ndinam fi “enyene-unen ndimek” (2 Nephi 2:27).
Se ŋko Dallin H. Oaks, “Opposition in All Things,” Liahona, May 2016, 114–17; Topics and Questions, “Agency,” Gospel Library; “Choose the Right,” Hymns, no. 239.
Enam edibuana okpon. Ekeme ndinam ediwak edinam edibɔ ukpep ke idem owo kiet-kiet, ke ufɔkemana, mme ubet ukpep; ke mkpri eboho; mme ke ndidian owo iba-iba. Ekama nsio-nsio usuŋ ndiyak mbonowo ebuana emi mikpiki-nnyeneke ufaŋ ke edibuana. Eke edinam emi, mbufo emekeme ndidɔhɔ owo kiet mme eboho kiet ete ekot Moses 4 ye Enɔde ke Nsɔŋɔnda eke Iwaad kini eboho fen ekotde ufaŋ-ŋwed ke 2 Nephi 2. Mmɔ ekeme ndien edikpep kiet eken se ekekpepde mmɔ ke nsio-nsio ikpehe mmɔ.
Moses 4:4–12; 5:13–33
Satan oyom “ndibiaŋa nyuŋ ŋkim mi enyin” .
Nte mbufo okotde Moses 4:4–12; 5:13–33, kere-baŋa ndibat usuŋ nte Satan okoyomde ndidomo Adam ye Eve ye nditɔ mmɔ. Didie ke enye aŋwana edinam ukem ŋkpɔ emi mfin emi? Didie ke Ete eke Enyɔŋ aŋwam fi ndikan abiaŋa Satan?
Moses 4:13–16, 27
“Ami, Jehovah Abasi … ŋkesine mmɔ ɔfɔŋidem.”
Ke ema ekedia mfri emi ekekpande ete ekudia, Adam ye Eve enam edomo ndifuk iferi mmɔ. Edikem, Jehovah ama edinyime ndisine mmɔ ɔfɔŋidem. Nte mbufo okotde Moses 4:13–16, 27, kere-baŋa se itiene emi:
-
Kere se edisaŋa-iferi ye edisine-ɔfɔŋ ekemede edida nnɔ ke ŋwed Abasi (se, nte uwutŋkpɔ, Revelation 7:9, 13–15; 2 Nephi 9:14; Doctrine ye Covenants 109:22–26, 76). Nso ŋkpɔ ke mbufo ekpep oto ifiɔk-ukpep eke Adam ye Eve ke edisaŋa-iferi ye edisine-ɔfɔŋ?
-
Edieke edide mbufo amanam endowment ke temple, kere-baŋa se Adam ye Eve ekpetiŋde enɔ fi kabaŋa ufɔn temple garment fo ye se oro adade-ɔnɔ.
Se ŋko “Nsasana Ɔfɔŋ Temple” (ndise-vidio), Gospel Library.
Sacred Temple Clothing
Moses 5:4–9, 16–26
Abasi eyenyime nwaidem mi edieke ami nnɔde mmɔ unyime ye esit ŋkopitem.
Nte mbufo okotde Moses 5:4–9, 16–26, kere-baŋa ido eke Adam ye Eve ye eke nditɔ irenowo mmɔ Cain ye Abel kabaŋa uwa. Ntak emi Abasi ɔkɔbɔde uwa eke Abel edi esin eke Cain?
Nso ke Jehovah oyom ete mbufo awa-idem anam? Nte odu ŋkpɔ ekededi ke ufaŋ-ŋwed emi eke enehede usuŋ nte mbufo esikerede abaŋa mme uwa oro?
Ke oyomde awak, se mme ŋwed-ndise eke ɔfiɔŋ emi Liahona ye Enɔde ke Ŋsɔŋɔnda eke Iwaad .
Mme Ekikere nnɔ Edikpep Nditɔ-ŋwɔŋ
Genesis 3; Moses 4; 5:8–15
Jesus Christ akanyaŋa nnyin osio ke Iduɔ oro.
-
Man eŋwam nditɔ mbufo ndinehede ndiɔŋɔ Iduɔ Adam ye Eve, mbufo emekeme ediwet ndise ke “Adam and Eve” (ke Mbuk Akani Testament, 13–16) ndien afat mmɔ osio. Ekem mbufo emekeme edinam utom ɔtɔkiet ndidian ndise oro ke adiana-adiana nte mbufo enemede ifiɔk-ukpep eke Adam ye Eve. Nte mbufo anamde oro, tiŋ baŋa ntak oro ekedide akpan-ŋkpɔ, ke uduak eke Ete Heaven, ɔnɔ Adam ye Eve ndikpɔŋ Iŋwaŋ Eden.
-
Nditɔ mbufo ekeme edinɔ ekɔm ke Erisio-isop Jesus Christ ke mmɔ efiɔkde nte Enye akakande idiɔkŋkpɔ eke Iduɔ oro. Nte mbufo ekotde Moses 4:25; 6:48; Romans 5:12; 2 Nephi 2:22–23ɔtɔkiet, ŋwam nditɔ mbufo ndiyom usuŋ ndikure udim-ikɔ emi: “Otode ke Iduɔ oro, Ami …” Ekem, nte mbufo ekotde Moses 5:8–11, 14–15; 6:59; Alma 11:42ɔtɔkiet, mmɔ ekeme edikure udim-ikɔ emi: “Otode ke Jesus Christ, Ami …” Ebuana ye kiet eken ekɔm mbufo kabaŋa Jesus Christ.
Moses 4:1–4
Ami mmekeme ndimek se inende.
-
Kere-baŋa ndimem ŋkpɔ ukpep ndimen ukpep-ŋkpɔ unen-edimek ŋwut: dɔhɔ nditɔ mbufo ete edebi edinam eke udua emi, edi nnɔ mmɔ mbuwed kiet kpɔt ete eda edebi. Ntak emi enehede-ɔfɔn ndinyene mbumek? Mbufo emekeme ndien edikot Moses 4:1–4 ɔtɔkiet onyuŋ eneme kabaŋa ntak emi Abasi oyomde ete nnyin inyene ukeme ndimek ke ufɔt eti ye idiɔk. Didie ke Ete eke Enyɔŋ ye Jesus Christ eŋwam nnyin ndinam nti mbumek?
-
Ŋwam nditɔ mbufo ekere ebaŋa ndien eduri ndise ni mbumek emi mmɔ ekemede ndinam nditiene Jesus Christ. Mme ke mbufo emekeme edikwɔ ikwɔ ɔtɔkiet kabaŋa ndinam nti mbumek, oruk nte “Choose the Right Way” (Children’s Songbook, 160–61). Mbufo emekeme edineme nnɔ kiet eken kabaŋa ini emi mbufo akanamde eti mbumek ndien eneme abaŋa nte mbufo ekekerede ke oro ebede.
Iduɔ, otode Robert T. Barrett
Moses 5:4, 8
Ami mmekeme edibɔŋ-akam nnɔ Ete ke Enyɔŋ.
-
Ini emi Adam ye Eve ekekpɔŋde Iŋwaŋ Eden, mmɔ ikikemeke ndidu ye Ete eke Enyɔŋ aba. Kot Moses 5:4, 8 ye nditɔ mbufo, ndien ŋwam mmɔ ndikut ŋkpɔ se Adam ye Eve ekenamde ndidu mkpere Enye nyuŋ ŋkop uyo Esie. Nso idi ubak ŋkpɔ emi nnyin ikemede editiŋ nnɔ Ete eke Enyɔŋ ke akam nnyin?
Ke oyomde awak, se ŋwed-ndise ɔfiɔŋ emi eke Ufan .