“Mme Ekikere Ndinim ke Esit: Edikot Akani Testament” Edi, Etiene Mi—Eke Ufɔkiduŋ ye Ufɔk Abasi: Akani Testament 2026 (2026)
“Edikot Akani Testament,” Edi, Etiene Mi: 2026
Mme Ekikere Ndinim ke Esit
Edikot Akani Testament
Ini emi Nephi okoyomde ndinam nditɔ-ete esie enyene mbuɔtidem ke Jehovah, enye ekebuana mme mbuk abaŋade Moses ye ukpep-ŋkpɔ otode Isaiah. Ini emi Apostle Paul ooyomde ndidɔŋ akpa mbon Christian ete enyene mbuɔtidem ke eŋwɔŋɔ Abasi, enye eketi mmɔ abaŋa mbuɔtidem eke Noah, Abraham, Sarah, Rahab, ye eke mbon efen. Ndien kini Jesus Christ ɔkɔdɔhɔde mme adausuŋ mme Jew ete “eduŋɔŋre Ŋwed Abasi,” anam-aŋwaŋa ke mmɔ “edi ntiense enɔ Mi” (John 5:39), ŋwed Abasi emi Enye eketiŋde abaŋa edi se ewetde emi nnyin ikotde Akani Testament.
Ke ikɔ efen, ini eke mbufo okotde Akani Testament, mbufo okot ikɔ emi ɔkɔnɔde ikɔt Abasi ifiɔk, ndɔŋesit, ye item ke ata ediwak tɔsin isua.
Edi nte ŋkpɔ emi ekewetde ke ata anyan ini ko enehede ekeme ediŋwam fi ndikut ibɔrɔ nnɔ mme afanikɔŋ eke eyo emi.? Iŋ, oro ekeme! Akpan-akpan edieke mbufo etide owo eke Akani Testament enehede edi abaŋa.
Testameny eke Jesus Christ
Se mfina ekpededi emi mbufo ye ufɔkemana ekutde, ke ofuri ini ibɔrɔ edi Jesus Christ. Ntem ke ndikut mme ibɔrɔ ke Akani Testament, se yom Enye. Kpukpru ini oro idimemke. Mbufo enyene ndinehede ŋkere nyuŋ nyom ndausuŋ eke spirit. Ubak-ini se etiŋde etuuk Enye ebiet enehede edi ntre, nte edide ke ubiere Isaiah ete, “Koro eyen amanande ɔnɔ nnyin, enɔ nyin eyen-eren: … enyuŋ esio enyiŋ … Ɔbɔŋ Emem” (Isaiah 9:6). Ke mme ebiet efen, ewut Andinyaŋa ke ata mfefere, oto ke idiɔŋɔ ye mbiet-ŋkpɔ—nte uwutŋkpɔ, ke ediwut eke uwa unam mme ke mbuk emi Joseph ekefende ɔnɔ nditɔ-ete esie ye ndinyaŋa mmɔ nsio ke akaŋ.
Uŋwana Ererimbot, otode Scott Sumner
Edieke mbufo eyomde akwa mbuɔtidem ke Andinyaŋa nte mbufo ekotde Akani Testament, mbufo eyekut oro. Ndusuk emi ekeme edidi uduak eke edikot fo ke isua emi. Bɔŋ-akam yak Spirit edida fi usuŋ ndikut nyuŋ ntiŋ-enyin ke mme itie-ŋwed, mbuk, ye prophecy emi edidade fi ikpere Jesus Christ.
Ekesuhɔ-enim ke Edisana-usuŋ
Kuyom ete Akani Testament edinɔ ata ye nnen-nnen mbuk eke ubonowo. Oro idighe se akpa andikiwet ye andikitum ekedomode ndinam. Akpan ekikere mmɔ ekedi ndikpep ŋkpɔ kabaŋa Abasi kabaŋa uduak emi Enye enyenede ɔnɔ nditɔ Esie, kabaŋa se oo ɔwɔrɔ ndidi mbon ediomi Esie, ye kabva nte ekutde erifak kini nnyin inamde ndudue. Ubak-ini mmɔ ekenam oro ke ndibuana mme mbuk ŋkpɔ-ntibe nte mmɔ efiɔkde mmɔ, esinede mme mbuk otode uwem eke ikpɔ prophet. Genesis edi uwutŋkpɔ kiet kabaŋa emi, ndien ntre edi mme ŋwed Joshua, Judges, ye 1 ye 2 Ndidem. Edi mbon efen emi ekewetde Akani Testament ikiduak-ke ndinɔ mbuk ke ofuri-ofuri. Edi, mmɔ ekekpep eto mme utom usɔ nte uto ye ŋwed. Mme Psalm ye mme Ŋke esine ke ibat emi. Ndien ekem odu mme nsɔŋurua ikɔ eke mme prophet, oruk nte Isaiah ye Malachi, emi eketiŋde ikɔ ebaŋa Abasi Israek eke eset—ndien, otode ke utibe-ŋkpɔ eke Bible, esuk etetiŋ ikɔ enɔ nnyin mfin emi.
Ndi ofuri mme prophet, ewet-uto, ye anditum emi ema ediɔŋɔ ke kpukpru owo ke ofuri ererimbot eyekot ikɔ mmɔ mme tɔsin isua ekedidide? Nnyin idiɔŋɔke. Edi imidu ke mkpaidem koro emi edi ata se ikitibede. Mme idut edaha-eda enyuŋ eduɔ, ekan mme obio, ndidem edu-uwem enyuŋ ekpaŋa, edi Akani Testament ebighe akan kpukpru mmɔ, tɔŋɔ emana kesim emana, tɔŋɔ scribe kesim scribe, tɔŋɔ erikabare kesim erikabare. Ke akpanikɔ ubak ŋkpɔ ama osop mme edinehede, ndien ke nte ededi ema ekpeme ata ediwak ke utibede-usuŋ.
Prophet Akani Testament, otode Judith A. Mehr (mbuk)
Emi edi esisit ŋkpɔ edinim ke esit nte mbufo okotde Akani Testament ke isua emi. Abasi ekekpeme mme ŋwed eset emi koro Enye ɔdiɔŋɔ fi ye se afo edikutde. Enye ama ebeŋe etop ŋkpɔ Abasi enim ɔnɔ fi ke mme ikɔ emi, eke edidade fi ikpere Enye onyuŋ ɔsɔŋɔ mbuɔtidem fo ke uduak Esie ye Edima Eyen Esie. Ndusuk Enye eyeda fi usuŋ aka itie-ŋwed mme ifiɔk emi edidiɔŋde owo emi mbufo ɔdiɔŋɔŋɔ-ke etop emi mbufo ekemede edibuana ye ufan, owo ufɔkemana, mme owo Ufɔk Abasi fo. Odu ata ediwak nti-ifet. Nte oro idighe inem ŋkpɔ ndikere mbaŋa?
Nephi ete, “Ukpɔŋ mi okop inemesit ke ŋwed Abasi” (2 Nephi 4:15). Ekeme-ndidi mbufo emekere ukem usuŋ oro nte mbufo ekotde ukem ikɔ emi Nephi okokotde—se nnyin ikootde Akani Testament idahaemi.
Mme Ŋwed ekedude ke Akani Testament
Ke ediwak ikpehe eke mme Christian ke Akani Testament, eketum mme ŋwed nsio-nsio eto nte ekenimde mmɔ kini etumde mmɔ ke akpa ini esin ke eboho kiet. Ntem kini Bible mbon Hebrew enimde ŋwed oro esin ke eboho ita—ibet, mme prophet, ye se ewewet—ediwak Bible eke mbon Christian etuum ŋwed oro esin ke eboho inaŋ: ibet (Genesis–Deuteronomy), mbuk-eset (Joshua–Esther), ŋwed uto (Job–Ikwɔ Solomon), ye mme prophet (Isaiah–Malachi).
Nsidi ntak mme eboho emi edide akpan-ŋkpɔ? Koro edidiɔŋɔ se oruk ŋwed emi mbufo okotde ekeme ediŋwam fi ndifiɔk nte ekpekotde enye.
Se ŋkpɔ emindinim ke esit nte mbufo ɔtɔŋɔŋde edikot ibet, mme akpa ŋwed ition eke Akani Testament. Mme ŋwed emi, eke enehede ekot edian Moses, ekeme edibe nto ubɔk ediwak scribe ye andiwet nte ini akakde iso. Ndien nnyin imidiɔŋɔ ete, ke ediwak mme tɔsin isua, ema esio “ediwak ubak emi aŋwaŋade onyuŋ ɔfɔnde” efep ke Bible (se 1 Nephi 13:23–26). Ke ntre, ŋwed Moses edi nti ikɔ Abasi, okposuk nte mmɔ edide—ukem nte utom Abasi ekededi mme owo ekebarare—esuk enyenyene ndudue eke owo (se Moses 1:4.; Ikɔ Mbuɔtidem 1:8.). Mme ikɔ Moroni, etiŋde abaŋa nsasana Ŋwed Mormon emi enye akaŋwamde ediwet, ɔnɔ uŋwam mi: “Edieke ndudue odude mmɔ edi ndudue eke owo; ke ntre, etre ndibiat ŋkpɔ Abasi” (ikpa ŋwed enyiŋ eke Ŋwed Mormon). Ke ikɔ efen, ŋwed Abasi inaha nte ananana ndudue eke owo mbemiso edi-di ikɔ Abasi.