Reirei ao Berita aika Tabu 133–134

Kaitaraan Tion n te maiu n tamnei bon Bwaburon—te kaawa rimoa are i nanon booki aika tabu e tei bwa te buakaka ao te tautoronaki n te maiu n tamnei. Ngkai ko wareka Reirei ao Berita aika Tabu 133:4–14, iangoia bwa e kanga te Tia Kamaiu ni weteiko bwa ko na “kitana … Bwaburon” (kibu 5) ao “naako … nakon aban … Tion” (kibu 9). Ko kanga ni kaeka nakon Ana wewete? Tera riki ae ko reiakinna iaon Tion man ana rongorongo Unimwaane D. Todd Christofferson “Nakomai nakon Tion”? (Riaona, Nobembwa 2008, 37–40).

A uaia mwakoro 1, ana kabwarabwara te Uea nakon Reirei ao Berita aika Tabu, ao mwakoro 133, te moan n abenteikiti nakon te Boki n Tua, ni moanaki ma te bubuti ae ti tearona mairoun te Uea: “Ongora, ngkami aomata n au ekaretia” (Reirei ao Berita aika Tabu 1:1; 133:1). Tao ko kona ni kamatebwaia Reirei ao Berita aika Tabu 133:1–19, 37–39 ao korei ni karinanii rongorongo ake e kaoiko iai te Uea n “Ongora” nakon (ongo nakon ao ongotaeka) ngkai ko katauraoi ibukin Kauaokina. N rangi n onoti, ko na korei bwaai ake E tangiriki bwa ko na karaoi bwa (1) katauraoiko (2) buoka katauraoa te aonaaba ibukin manga Okina. Tera ae ko reiakinna man baika ko korei ni karinanii aikai?

E tibwaia Beretitenti Russell M. Nelson kakawakin koaua iaona bwa e na aekakira te aonaaba ngkana e oki te Tia Kamaiu—ao ko na kanga ni katauraoi. Russell M. Nelson, “Te Ekaretia n Taai aika A na Roko: Katauraoakin te Aonaaba ibukin Kauaokin te Tia Kamaiu” (Riaona, Eberi 2020, 6–11). Tera ae ko namakinna bwa ko na karaoia—ke n reitianako—ni “katauraoa te aonaaba ibukin okin te Tia Kamaiu”? (“Aaronic Priesthood Quorum Theme,” Gospel Library).

Taraa naba Mataio 25:1–13; Russell M. Nelson, “Butimwaai Taai aika a na Roko ma te Onimaki,” Riaona, Nobembwa 2020, 73–76; “Mai Ana Ataei te Uea,” Anene n Taromauri, nambwa 58; Topics and Questions, “Second Coming of Jesus Christ,” Gospel Library.

Ngkai ko wareka kabwarabwaraan okin te Tia Kamaiu i nanon kiibu 19–56, tera ae ko kunea ae ko rangi ni kariaria nako iai? Tera taeka ke kibuntaeka aika a kabwarabwarai ana tangira te Uea ibukiia Ana aomata? Iangoa tauan mwiin oin am taneiai ma “ana tangira n akoi [am] Uea, ao bwaai ni kabane ake E a tia ni katoka [i aom] ni kaineti ma raoiroina” (kibu 52).

Aia reitaki Aika Itiaki ma te tautaeka rimoa e bon kangaanga. Ngke a kanakoaki ma te matoa Aika Itiaki mai Jackson County, Missouri, n te 1833, a bubuti te boutoka man bon aia tabo ao man te tautaeka ma akea ae e roko. N te tai naba anne, tabeman aomata itinanikun te Ekaretia a kabwarabwara nanon reirei n taekan Tion bwa Aika Itiaki a totokoa te kariaia man te tautaeka n te aba. Reirei ao Berita aika Tabu 134 e koreaki bwa, ni iterana teuana, te kamataata bwa e tei iia te Ekaretia ni kaineti ma te tautaeka. Tera ae taku te kibu aei bwa e na kanga aia namakin ana Aomata te Uea nakon te tautaeka n te aba?

Ngkai ko kamatebwaia mwakoro 134, iangoia ni kakaei tuua n te tautaeka ao tabeia kaain te aba. A kanga iango aikai n tia n ibuobuoki nakoia Aika Itiaki n taai ake rimoa? A kanga ni kabonganaki n te tabo are ko maeka iai?

Taraa naba Articles of Faith 1:11–12; Topics and Questions, “Religious Freedom,” Gospel Library.

• Kam kona ngkoe ma am ataei ni korei ni karinanii tabeua taabo ao waaki ake e tangiriira iai te Uea bwa ti na tei raroa mai iai. I mwiina ko kona ni kabotauii taabo ma waaki akanne ma are e nanonaki ni “Babera, Bwaburon” i nanon Bwai ni Kairi nakon Koroboki aika Tabu (Gospel Library). A kona ngkanne ni wareka Reirei ao Berita aika Tabu 133:4–5, 14. Tera ae nanonaki n “kam na kitana Bwaburon”? (kibu 5). Ko kona ni koreia ni karinanii taabo ao waaki are e kaoira nako iai te Uea ao katitebooi ake ko karinanii ma are e nanonaki n “Tion” inanon Bwai ni Kairi nakon Koroboki aika Tabu.

• A na bae ni kukurei am ataei ni karaoa te kaotioti bwa e na kanga aron taraakin te katauraoi ibukin te bwai teuana, n aron te kaboo n te takakaro, te irua ae kakannato, ke te bong ni motirawa ae mamate nanom iai. Bukin tera e kakawaki te katauraoi? Kam kona ngkanne n uaia ni wareka Reirei ao Berita aika Tabu 133:17–19, 21 ao kaoiia am ataei bwa a na kakaea bwa tera ae e kaoira iai te Uea bwa ti na katauraoi ibukina. Ko kona ni kaota nakoia te tamnei man te kabwarabwara n te wiiki aei ao titirakiniia am ataei bwa tera ae a ataia iaon Kauaokin Iesu Kristo. Tera riki ae ti reiakinna man kiibu 19–25, 46–52? Tera ae ti kona ni karaoia ni katauraoi imwain te bong ae kakukurei aei?

• Ko kona ni karabai tamnei ke bwaai aika a kakaokoro ae a tei ibukin bwaai ake ti kona ni karaoi ni katauraoi ibukin Kauoakin te Tia Kamaiu (n aron warekan booki aika tabu, tibwaua te euangkerio, ke ni beku ibukiia ara utu). Kariaia am ataei bwa a na kakaei tamnei ke bwaai ao maroroakinna bwa a kanga bwaai aikai ni buokiira ni katauraoira ni butimwaea te Tia Kamaiu ngkana E a oki.

• Kam kona naba n uaia n anenea kunan te Kauaoki, n aron “When He Comes Again” (Aia Boki n Anene Ataei, 82–83). Tibwaia i marenami ami tangira ibukin te Tia Kamaiu ao ami namakin ibukin Okina.

• Ko kona ngkoe ao am ataei n tarai tamnei ake a kaotia bwa e tatangira ao n akoi Iesu. (Te katooto, taraa Boki n Tamnei n te Euangkerio, nambwa 42,47.) Tera riki ae E a tia ni karaoia Iesu ni kaota ana tangira ao ana akoi? Botaki ni wareka Reirei ao Berita aika Tabu 133:52, ao buokiia am ataei bwa a na iangoi kawai aika a kona iai ni “taekina ana akoi te Uea” nakoia aomata tabeman.

  

• A kona am ataei ni korei kainibaire ke tuua ake a ongeaaba iai. E na kanga aron te maiu ngke arona bwa akea temanna ae ongeaba n tuua aikai? I mwiina ko kona ni wareka Reirei ao Berita aika Tabu 134:1–2 ma ngaiia, buokiia ni mataata n taeka ke kibuntaeka nako ake aki ota iai. Bukin tera te Uea e tangiriira bwa ti na ongeaaba nakon tuua? (taraa naba Taekan te Onimaki 1:12).