Bwanaa n Kaokan Bwai

E maeka Phebe Woodruff ni kaan ma Nauvoo ngke e moana ana angareirei Iotebwa Timiti ibukin te bwabetitoaki ibukiia ake a tia ngkoa ni maiu. E korea rongorongona nakon kainnabana, Wilford, are e beku n te mition i Engiran:

“Te tari Joseph … e a tia n reikinna man te kaotioti bwa naake n te ekaretia aei a kona n bwabetitoaki ibukiia aia koraki ake a tia ni mate ao ake e aki reke tibwangaia n ongora te euangkerio, aio naba nakoia natiia, aia karo, tariia, mwaneia, tibuia, ai tamaia, ao ai tinaia. … Bon i mwin are a bwabetitoaki a kainaomataaki man te oo ni kaikain ao a kona n karekea te mangauti ao n uotiia nakon abanuean te teretio—te reirei aei e butimwaeaki raoi iroun te ekaretia ao a waaki nako n te koraki n aomata, tabeman a na bwabetitoaki n mwaitina ae 16 te tai … i nanon tebongina.”

Rimwi e taetae Wilford Woodruff ibukin te reirei aei: “Te tai are I ongo taekana e onrake tamneiu n te kimwareirei. … I waaki nako ao I bwabetitoaki ibukiia au koraki ni kabane ake a tia ni mate ake I kona n uring. … I namakinna taekinan areruia ngke e kaoti te kaotioti n kaota nakoira te bwabetito ibukiia maate. I namakinna bwa iai inaomatara n kimwareirei n ana kakabwaia Karawa.”

N aron Titita Woodruff, e ongo Vilate Kimball taekan te bwabetito ibukiia maate ngke kainnabana, Heber, e raroa nako n tataekina te euangkerio. E koroboki nakoina:

“E a tia ni kauka te rongorongo te bwai ae boou man mimitong Beretitenti Timiti … are e karekea te kamaiu ae bati n te ekaretia. Are bon, te bwabetitoaki ibukiia maate. E taetae i aona Bauro, n te moan I Korinto mwakoro 15 kibu 29. E a tia ni karekea te kabwarabwara riki ae bwanin Iotebwa man te Kaotioti. … Bon tibwangan te ekaretia aei te bwabetitoaki ibukiia ni kabane utuia nako ake a tia ni mate i mwain rokon te Euangkerio aei; rikaaki nakon tibumwamwanuia te Unimwaane ao te Unaine. … N karaon aei, ti mwakuri bwa taan tei ibukiia; ao ti anganiia te kona n ira te teirake n te moan mangauti. E taekinna bwa e na iai te Euangkerio ae na tataekinaki nakoia … ma akea te bwai n aron te tamnei ae e a tia ni bwabetitoaki. … Man te tai are e tataekinaki te kaetieti aei, a teimatoa raan n aki tiku n rau. I nanon te maungatabu iai n tabetai waniman nakon tengaun Unimwaane n te karaanga n te tai anne ae a bwabetito. … I tangiria n bwabetitoaki ibukin Tinau. I tareeia bwa n na tataninga ni karokoa ko roko n te mwenga, ma te kabanea n tai are e taetae Iotebwa ibukin aei, e tuangiia aomata ni kabane bwa a na teirake ni mwakuri, ao n kainaomataia raoraoia man te tautoronaki n te tai ae tawe. Ngaia are I taku bwa N na nako n te wiki aei, ngkai e bati kaain rarikiu aika a na nako. Tabeman a tia n bwabetitoaki n te tai ae mwaiti. … Ngaia are ko noria iai aia tai aomata ni kabane. Tiaki aei ngkanne te reirei ae mimitong?”

N te tai are e bobonga iai te tabo ni bwabetio n te Tembora i Nauvoo, a karaoaki ikekei bwabetito ibukiia maate ao ai tiaki te karaanga. Phebe Chase, kaain Nauvoo, e koroboki nakon tinana ibukin te Tembora, n kabwarabwara te tabo ni bwabetito bwa te tabo are “ti kona n bwabetitoaki ibukiia ara mate ao n riki bwa tia kamaiu n Maungan Tion” E reitinako n kabwarabwaraa bwa n te tabo ni bwabetito aei, “I a tia ni bwabetitoaki ibukin tamau ae tangiraki ao ni kabane raoraou ake a tia ni mate. … Ngkai I tangiria n ataa aran tamam ma tinam bwa I aonga n kainaomataia, bwa I tangiria n kamaiuia Maate. … E a tia ni manga taetae te Uea ao n kaoka aron te waaki are ngkoa.”

N ana koroboki nakoia raoraona ao ana utu ibukin te bwabetito ibukiia maate, Sally Randall e uringa maten natina te mwaane ae George:

“O bon te tai ni kakatai nakoiu ao e teimatoa n taraa n matoa butimwaeana irou, ma … e a tia tamana ni bwabetitoaki ibukina ao bon te waaki ae mimitong bwa ti kakoaua man karekea bwaninin te euangkerio n aron are tataekinaki ngkai ao ti a kona ni bwabetitoaki ibukiia ni kabane raoraora ake a tia ni mate ao ni kamaiuia nakon are e kona n reke rongorongoia iroura.

“I tangiria bwa ko na korei araia nikabane irekerekera nako ake a tia ni mate rikaaki nakoia tibura unimwaane ao unaine n aki tianna. Nanou karaoan are I kona ni kamaiuia raoraou ao N na bon rang kukurei ngkana iai iroumi ae roko ao n buokai bwa bon te mwakuri ae korakora ibukin temanna n tii ngaia. … I kataningaia bwa kam na taku bwa bon te reirei ae kamimi ma kam na kunea bwa e koaua.”