“Bwanaa man Kaokan Bwaai: Te Bootaki n Aine,” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Te Bootaki n Aine,” Nakomai, Iriirai—Ibukin te Mweenga ao te Taromauri: 2025
Bwanaa n Kaokan Bwai
Te Bootaki n Aine
N te 1842, i mwiin katean te Bootaki n Aine i Nauvoo, Illinois, e taku te Burabeti ae Iotebwa Timiti, “E aki kona te Ekaretia n bobonga kateana ni karokoa a barongaki raoi aine.” N aron naba aei, te kamatebwai i aon Kaokan ana Ekaretia te Uea ao Ana nakoanibonga e aki tabwanin ni karokoa e irianaki ma kamatebwaiakan te Bootaki n Aine, are bon aekan “kaokan aron tein te banna n taai ake rimoa” irouia ana reirei Iesu Kristo aika aine.
E karaoa te tabe ae kakaawaki Eliza R. Snow ni kaokan bwaai aikanne. E mena ikekei ngke e moan ni kateaki te Bootaki n Aine ao, ngke te tia koroboki n aia bootaki aine, e koroi bwaai ake a maroroakinaki n tain te bowi. E moan kakoaua ae te Bootaki n Aine e kateaki “i mwiin ana baeten te nakoanibonga.” Aika oti i nano bon ana taeka, aika a koreaki ngke e beku bwa te kauoman ni Beretitenti ni Kabuta n te Bootaki n Aine, ni buokiia tarina n ataa te mwakuri mai ieta ae a onimakinakinaki iai natin te Atua aine n te berita ae tabu.
N reiakina riki ae bati i aon aron katean te Bootaki n Aine, taraa Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Tamnein aia bootaki kaain te Bootaki n Aine iroun Paul Mann
Eliza R. Snow
“E ngae ngke te ara ae [Te Bootaki n Aine] aran te bootaki n taai aikai, te bootaki aei e moanaki man rimoa. Ti tuangaki iroun [Iotebwa Timiti], bwa te aeka ni botaki anne e riki n te ekaretia n taai ake rimoa, kabwarabwaraana a karaoaki i nanon tabeua reeta ake a koreaki i nanon te Nu Tetemanti, ni kabongana taekan, ‘te aine ae rineaki’ [taraa 2 Ioane 1:1; Reirei ao Berita aika Tabu 25:3].
“Aio te bootaki are e aki kona n tei n akean te Nakoanibonga, man te koaua are e karekei ni kabane ana kariaia ao ana kairoro man te bwai n ibuobuoki anne. Ngke e anaaki te Nakoanibonga anne mai iaon te aonaaba, te botaki aei n raonaki ma ake tabeua n aron bairean ana Ekatetia Iesu Kristo ni koaua i aon te aba, e a mauna nako. …
“Ngke I kaaina bootakin te ‘Te Bootaki n Aine i Nauvoo,’ … ni karekea naba te taneiai ae korakora n te bootaki anne, tao N na tibwauai tabeua iango are e na buokiia natin Tion aine ni waaki rake n te nakoa ae kakawaki aei, are e onrake n mwakuri aika a boou ao n tibwangaia aika a mwaiti. Ngkana iai naati aine ao tiina i Iteraera aika a namakina ae aki kona ni karekea te korakora n taian kaangaanga ake a kaitarai, a na kunea ngkai aia tai ae bati ni kabonganai aia konabwai aika a mwaiti ake a inaomata ni karekei. …
E barongaaki ni kateaki te Bootaki n Aine n ruun te Titoa te Buriki ae Uraura mai ieta.
“Ngkana iai te titiraki ae rio n te iango, , Tera te kouru ibukin te Bootaki n Aine? N na kaeka—karaoan ae raoiroi—n uota kabonganakin konabwai ni kabane ake iai iroura ibukin karaoan ae raoiroi, tiaki n ti kamaiuakiia aika a rarikin ma ni kamaiuakiia naba tamnei. Te katiteuanaki ni mwakuri e na kakoroa nanon ae mwaiti riki nakon are e kona ni kakoroaki bukina man aia mwakuri ae korakora aomata n tatabemaniia. …
“Irarikin are buokaia rarikin, iai taben riki te Bootaki n Aine ae e na karaoi nakon ae ti kamaiuakiia ni kainnanoia n rabwata. Te aki atatai ao namakinan te aki kukurei, a kainnanoa naba te ibuobuoki; ao te tai ae mwaiti kaotan te akoi n—taeka n reirei tabeua, ke bon te iobai ni kamauri ni kaotan te tangira ao te tabeaianga e na tamaroa riki ao ni butimwaeaki riki nakon te baeki ni koora. …
“Ngkana a roko Aomata aika Itiaki mai aban itinaniku, n riki bwa ianena nakoia aomata ni kabane, ao a kona ni katinanikuaki irouia aika a kataia ni mwamwanaia aomata, e riai te Bootaki n [Aine] ni waekoa n [tararuaia], ao ni kabwarabwaraia nakoia aomata bwa aonga ni kaotaaki ao n reireiaki, ao i aon bwaai nako ni kakorakoraia n ana koaua te Euangkerio, ao man karaoan aei, a na riki bwa taan n ibuobuoki ni kamaiuakiia aika a mwaiti.
“E na kainnanoi booki aika a mwaiti are a na kabwarabwarai tabeia, tibwangaia ao aia mwakuri are a iri ma taben te Bootaki n Aine. … Karaoa te mwakuri (iaan ana kaetieti te bitiobi) ma te rau, nanom ni koaua, te marurung, ni inanoi ao n tataro mwaaka, ao te Atua e na kakabwaiai am mwakuri ma te nakoraoi.”