Fotopampianarana sy Fanekempihavanana 121–123

Rehefa mijaly isika na ireo olona tiantsika dia tsy mahagaga raha manontany tena isika raha toa ka mba mahafantatra antsika Andriamanitra. Eo am-pamakianao ny Fotopampianarana sy Fanekempihavanana 121:1–6 dia eritrereto ireo fotoana izay nanananao fanontaniana na fahatsapana mitovy amin’ny an’i Joseph Smith. Inona no hitanao ao amin’ny valinteny nomen’ny Tompo ka mety hanampy anao rehefa manana ireo fanontaniana na fahatsapana ireo ianao? Ohatra, jereo ao amin’ny andininy 7–10, 26–33 ireo fitahiana izay nampanantenainy. Inona no dikan’ny hoe “[miaritra] tsara”? Ahoana no fomba hanampian’ny Mpamonjy anao hanao izany?

Rehefa mamaky ny fizarana 122 ianao dia eritrereto ny fomba tian’ny Tompo hiheveranao ireo fahorianao. Mety hisaintsaina ireo zavatra niainana avy amin’ireo fitsapana nolalovanao sy ny fomba mety hahatonga azy ireny “ho soa ho anao” ianao (andininy 7).

Jereo ihany koa ny Quentin L. Cook, “Fiadanana ho an’ny tena manokana mandritra ny fotoan-tsarotra,” Liahona, nôv. 2021, 89–92; “Où pourrais-je chercher?,” Cantiques, no. 68.

Nanery ny Olomasina hiala tao Missouri ny herin’izao tontolo izao ary nampiditra an’i Joseph Smith am-ponja. Saingy nandritra ny fotoana nijanonan’i Joseph tao, dia nampianatra azy momba ny karazana hery iray hafa ny Tompo, dia “ny herin’ny lanitra.” Afaka manampy anao hianatra ny fomba hahazoana izany hery izany, sy ny fomba hampiasana izany mba hitahiana ny hafa ny famakiana momba izany hery izany ao amin’ny Fotopampianarana sy Fanekempihavanana 121:34–46. Azonao atao tsara ny mirakitra an-tsoratra ny zavatra nianaranao ao anatina tabilao misy tsanganana mitondra ny anarana hoe Herin’ny lanitra sy Herin’izao tontolo izao. Inona no tsy mampitovy ireo karazana hery roa ireo? Inona no ampianarin’ireo famaritana ny herin’ny Tompo ireo anao momba Azy?

Azonao saintsainina koa ilay teny hoe fitaomana ao amin’ny andininy 41. Inona avy ireo toe-javatra sasantsasany izay tianao hahitana ny tenanao ho fitaomana ho amin’ny tsara ao anatiny, ohatra hoe ao anatina fifandraisan’ny mpianakavy, any an-tsekoly, any am-piasana, na amin’ny andraikitra ao am-piangonana? Inona no ianaranao ao amin’ny andininy 41–46 mikasika ny fomba hitaoman’ Andriamanitra ireo zanany? Azonao fintinina ny zavatra nianaranao amin’ny alalan’ny famenoana fehezan-teny tahaka ity iray ity: “Mba hitaomako ny olona amin’ny tsara dia … aho.”

Jereo ihany koa ny Jeffrey R. Holland, “Tsy tahaka ny fanomen’izao tontolo izao,” Liahona, mey 2021, 35–38; David A. Bednar, “Ireo herin’ny lanitra,” Liahona, mey 2012, 48–51; “Ireo herin’ny lanitra” (horonan-tsary), Médiathèque de l’Évangile.

9:14

Midika inona aminao ny filazana fa “nidina tambanin’ … [ny zavatra] rehetra” i Jesoa Kristy? Ireto misy andinin-tsoratra masina vitsivitsy fanampiny izay afaka ny hanampy anao hahatakatra io andian-teny io: Isaia 53:3–4; Hebreo 2:17–18; 1 Nefia 11:16–33; Almà 7:11–13. Avereno lazaina amin’ny teninao manokana, miainga avy amin’ny zavatra ianaranao, ny Fotopampianarana sy Fanekempihavanana 122:8. Ahoana no ahafahanao maneho ny fankasitrahanao an’i Jesoa Kristy noho ny fidinany ambanin’ny zava-drehetra?

Inona no fiantraikan’ity hevitra avy amin’ny Filoha Dallin H. Oaks ity amin’ny fahatakaranao? “Mety hilaza mihitsy aza isika fa rehefa nidina ho ambanin’ny zava-drehetra [i Jesoa Kristy] dia Izy Tenany no mitana ny anjara toerana tsara indrindra mba hanandratra antsika sy hanome ny tanjaka ilaintsika mba hahafahantsika miaritra ny fahoriantsika” (“Ankaherezin’ny Sorompanavotan’i Jesoa Kristy,” Liahona, nôv. 2015, 64).

Niresaka ireo finoana diso izay nitondra ho amin’ny fahoriana i Joseph Smith ao amin’ny Fotopampianarana sy Fanekempihavanana 123:7–8, tafiditra ao anatin’izany ny fanenjehana ireo Olomasina. Mety ho toy ny hoe tsy nisy zavatra firy azon’ny Olomasina natao momba izany tamin’ny martsa 1839. Kanefa nolazain’i Joseph azy ireo tao amin’ny taratasiny izay nosoratany tao amin’ny Fonjan’i Liberty ny zavatra azon’izy ireo atao, dia ny: “manangona ny filazalazana momba ireo fihetsika … rehetra” sy “hahajoro … omban’ny fahatokian-tena lehibe indrindra fa hahita ny famonjen’ Andriamanitra” (Fotopampianarana sy Fanekempihavanana 123:1, 17). Eo am-pieritreretanao ireo olana eto amin’izao tontolo izao ankehitriny, dia eritrereto ireo fomba hiatrehana izany araka “izay tratry ny heri[nao]” (andininy 12, 17). Ary aza tsinontsinoavina ireo izay heverina ho toy ny “zavatra madinika” (andininy 15). Nahoana no manan-danja ny manao ireo zavatra ireo amim-pahazotoana? (andininy 17).

Maro amin’ireo tantara izay nangatahan’i Joseph tao amin’izany taratasy izany no naterina tany amin’ny governemanta ary navoaka tamin’ny fomba miantoana miisa 11 tao amin’ny gazety iray tao Nauvoo, ny Times and Seasons (Fotoana sy vanim-potoana) (jereo ny “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).

• Mba hanampiana ny ankizy haka sary an-tsaina hoe mety ho toy ny ahoana izany tao amin’ny Fonjan’i Liberty izany ho an’i Joseph Smith sy ireo namany, dia afaka miara-mamaky ny “Toko 46: I Joseph Smith tao amin’ny fonjan’i Liberty” (ao amin’ny Tantara ao amin’ny Fotopampianarana sy Fanekempihavanana, 172–74) na ny “Feon’ny Famerenana amin’ny laoniny: Fonjan’i Liberty” ianareo. Aorian’izay, rehefa miara-mamaky ny Fotopampianarana sy Fanekempihavanana 121:1–9 ianareo dia afaka miresaka mikasika ny fomba nanampian’ny Mpamonjy an’i Joseph hahatsapa fiadanana. Ahoana no ahazoantsika fiadanana ao amin’ny Mpamonjy, na dia mandritra ny fotoan-tsarotra aza?

  

  1:51

  

  62:4

• Mba hanampiana ny ankizy hahafantatra fa afaka ny “ho soa ho [antsika]” (Fotopampianarana sy Fanekempihavanana 122:7) ireo fitsapana lalovantsika, dia afaka miresaka amin’izy ireo momba ny fomba fitombon’ny hozatsika rehefa mitondra zavatra mavesatra ianao. Azonao atao mihitsy aza ny manasa azy ireo hibata zavatra mavesatra iray. Avy eo dia afaka miresaka momba ny fomba ahafahan’ny fandalovana ao anatin’ny fotoan-tsarotra manampy ny fanahintsika mba hitombo ianareo, rehefa mitodika any amin’ny Tompo isika mba hahazo fanampiana. Mizarà ohatra vitsivitsy avy amin’ny fiainanao.

• Mety hanampy ny ankizy angamba ny fanoharana iray mba hahatakarana momba ny “herin’ny lanitra.” Ohatra, azonareo ampitahaina amin’ny herinaratra ny herin’ Andriamanitra. Inona no mety hanakana ny fitaovana iray mandeha amin’ny herinaratra tsy handray hery? Inona no mampihena ny herintsika ara-panahy? Inona no mampitombo izany? (Mitadiava teny sy andian-teny ao amin’ny Fotopampianarana sy Fanekempihavanana 121:34–46; jereo koa ny Boky torolalan’ny Fiangonana maneran-tany, 3.5, 3.6, Médiathèque de l’Évangile.)

• Rehefa avy mamaky ny Fotopampianarana sy Fanekempihavanana 122:7–9 miaraka amin’ny ankizy, dia afaka mizara zavatra niainana iray ianao izay nahatsapanao fa niaraka taminao ny Mpamonjy nandritra ny fitsapana sarotra iray. Azonareo atao koa ny miara-mihira hira iray toy ny “Jesoa anie fahiny koa mba zaza tahaka ahy”, (Bokin-kiran’ny ankizy, 34) sy mijoro ho vavolombelona fa afaka manampy antsika i Jesoa Kristy satria fantany ny zavatra tsapantsika.

• Mba hanampiana ny ankizy hahatakatra ny Fotopampianarana sy Fanekempihavanana 123:15–17, dia afaka mizara amin’izy ireo sarina sambo lehibe iray sy familian-tsambo kely iray ianao, na mizara amin’izy ireo ny fanazavana nomen’ny Loholona David A. Bednar ao amin’ny “Ireo fitsipiky ny filazantsarako” (Liahona, mey 2021, 125–26). Avy eo dia afaka miresaka momba ireo fomba madinika azontsika hanompoana amim-pifaliana ny fianakaviantsika sy ny namantsika ianareo.

15:0