“Amazwi eMbuyiselo: Iimbonakaliso zoMoya neTempile yaseKirtland,” Yizani, Nindilandele—EyeKhaya neBandla: IMfundiso neMinqophiso 2025 (2025)
“Iimbonakaliso zoMoya neTempile yaseKirtland,” Yizani, Nindilandele—EyeKhaya neBandla: 2025
Amazwi eMbuyiselo
Iimbonakaliso zoMoya neTempile yaseKirtland
Ngezantsi ngamazwi wabaNgcwele beMihla yokuGqibela ababekhona kwiTempile yaseKirtland ngelixa longcwaliso lwayo nakwezinye iintlanganiso ezathi zalandela. Abaninzi baye bathelekisa amava wabo noko abaNgcwele bamandulo bakuvayo xa “babembathiswe amandla aphuma enyangweni” ngomhla wePentekoste (Luka 24:49; bona kananjalo Izenzo 2:1–4; IMfundiso neMinqophiso 109:36–37).
U-Eliza R. Snow
“Imisitho yoloo ngcwaliso isenokuphindwa ibaliswe, kodwa akukho lwimi lwasemhlabeni olungachaza iimbonakaliso zasezulwini zaloo mhla ukhumbulekayo. Iingelosi zavela kwabanye, xeshikweni ifuthe lobukho bobuthixo lalibonwa ngabo bonke abo babekhona, kwaye intliziyo nganye yayizele ‘luvuyo olwalungenakuvakaliswa kunye nenzaliseko yobuqaqawuli.’”
USylvia Cutler Webb
“Enye yeenkumbulo zam zakwangoko yayilungcwaliso lweTempile. Utata wam waye wasithatha wasibeka phezu kwethanga lakhe kwaye wasixelela ngokuba kutheni sasisiya yaye nokuba kwakuthetha ukuthini ukungcwalisa indlu kaThixo. Kwaye nangona ndandimncinane kakhulu ngeloo xesha, ndiyawukhumbula loo msitho ngokucacileyo. Ndingajonga ngasemva kuloo minyaka yagqithayo kwaye ndibona njengoko ndandibona ngoko uJoseph umProfeti, emile ngezandla zakhe ziphakanyiselwe phezulu ezulwini, ubuso bakhe buluthuthu okwamalahle, iinyembezi ziqengqeleka ezidleleni zakhe njengoko wayethetha ngaloo mhla ukhumbulekayo. Phantse bonke babebonakala bekwiinyembezi. Indlu yayixinene kakhulu abantwana uninzi lwabo lwaluhleli phezu kwamathanga abantu abadala; udade wam wayehleli phezu kwethanga likatata, mna ndihleli phezu kwethanga likamama. Ndisakhumbula neelokhwe esasizinxibile. Ingqondo yam yayisencinane kakhulu ngeloo xesha ukubamba intsingiselo ezeleyo yako konke, kodwa njengoko ixesha lalihamba kwaye kwaqabuka kum ngakumbi nangakumbi, kwaye ndiyabulela kakhulu ngokuba ndabanenyhweba yokuba khona apho.”
U-Oliver Cowdery
“Ngoloo rhatya ndaye ndadibana namagosa webandla endlwini yeNkosi. UMoya waye wathululwa—ndabona ubuqaqawuli bukaThixo, obufana nelifu elikhulu, busehlela ezantsi kwaye baphumla phezu kwendlu, kwaye bagcwala ngokufana nomoya omkhulu ovuthuzayo. Ndaye ndabona neelwimi ezabekayo, ngathi zezomlilo zizinza phezu kwabaninzi, … xeshikweni babethetha ngezinye iilwimi kwaye beprofeta.”
UBenjamin Brown
“Imibono emininzi [yaye] yabonwa. Omnye wabona umqamelo okanye ilifu lisehlela phezu kwendlu, likhazimla okungathi lilanga xa likhazimla kwilifu njengegolide. Abanye ababini babona iziqu ezithathu zitshitshiliza egumbini nezitshixo ezikhazimlayo ezandleni zazo, kwaye kananjalo nekhonkco elikhazimlayo ezandleni zazo.”
U-Orson Pratt
“UThixo wayekhona apho, iingelosi zakhe zazikhona, uMoya oyiNgcwele wawusembindini wabantu … kwaye babezaliswe ukusukela kwisithsaba seentloko zabo ukuya kwiintende zeenyawo zabo ngamandla nempembelelo yoMoya oyiNgcwele.”
UNancy Naomi Alexander Tracy
“[Xa] iTempile yayigqityiwe kwaye ingcwalisiwe … ezo yayiziintsuku ezimbini zolonwabo ebomini bam. Iculo elalifanele oko elaliqanjelwe umsitho lalisithi ‘The Spirit of God Like a Fire is Burning.’ Kwakuyinyaniso ngokwenene okokuba iMpembelelo yeZulu yayehlele ezantsi phezu kwaloo ndlu. … Ndeva ingathi yayilizulu emhlabeni.”