Сэргээлтийн дуу хоолой

“Онцгойлон адислах ёслолуудыг дурсан ярьж болох ч тэрхүү дурсгалт өдрийн тэнгэрлэг үйл явдлуудыг мөнх бус хүмүүний хэл дүрсэлж чадахгүй юм. Тэнгэр элч нар зарим хүнд харагдсан бол, харин тэнд байсан бүх хүн бурханлаг оршихуйг мэдэрсэн бөгөөд хүн бүрийн зүрх сэтгэл ‘үгээр хэлэхийн аргагүй алдар суу, баяр хөөрөөр’ дүүрсэн байлаа.”

“Миний хамгийн анхны дурсамжуудын нэг бол ариун сүмийн онцгойлон адислал юм. Аав маань биднийг өвөр дээрээ суулгаад, яагаад бид явж байгаа талаар мөн өргөөг Бурханд зориулан онцгойлон адисалж байгаа нь юу гэсэн утгатайг хэлсэн. Тэр үед би балчир байсан ч тухайн үйл явдлыг тодорхой санадаг. Олон жилийн өмнөх уг үйл явдлыг эргэн санахад, миний нүдэнд тэрхүү дурсгалт өдөр тухайн үеийн бошиглогч Иосеф үг хэлэхдээ тэнгэр өөд гараа сунган зогсоод, царай нь цайж, нулимс хацрыг нь даган урсаж байсан нь харагддаг. Бараг хүн бүр нүдэндээ нулимстай байсан санагдаж байна. Уг өргөөнд маш олон хүн байсан учир ихэнх хүүхэд том хүмүүсийн өвөр дээр суусан байв. Миний эгч аавын өвөр дээр, би ээжийн өвөр дээр сууж байсан. Бид ямар даашинз өмссөн байсныг хүртэл би санадаг. Би тэр үед дэндүү бага балчир байсан болохоор энэ бүх зүйлийн ач холбогдлыг бүрэн ойлгож чадаагүй ч цаг хугацаа өнгөрөх тусам утга учрыг нь улам бүр ойлгож, тэнд байх боломжтой байсандаа маш их талархдаг.”

“Орой нь би сүмийн албаныхантай Их Эзэний өргөөнд уулзсан. Сүнс юүлэгдэж, би Бурханы алдар суу агуу их үүл мэт буун ирж, ариун сүмийн дээр тогтон, хуйлрах хүчит салхи лугаа адил ариун сүмийг дүүргэхийг харсан. Түүнчлэн олон хүн дээр буусан бүр галынх мэт салаалсан хэл өөр бусад хэлтэй ярьж, бошиглохыг би харсан.”

“Олон үзэгдэл үзэгдсэн. Нэг хүн алт мэт үүлэн дээр нар тусаж байгаа мэт хурцаар гэрэлтэн бууж ирсэн дэр эсвэл үүлийг ариун сүмийн дээр тогтохыг харсан. Гартаа гялалзсан түлхүүрүүд бас гинж барьсан гурван биет хүн өрөөн дотор агаарт зогсож байхыг өөр хоёр хүн харсан.”

“Бурхан, түүний тэнгэр элч нар тэнд байсан. Ариун Сүнс хүмүүсийн дунд байсан … ба тэд толгойнхоо оройгоос хөлийнхөө ул хүртэл Ариун Сүнсний хүчээр болон нөлөөгөөр дүүрсэн байсан.”

“Ариун сүмийг барьж дууссан болон онцгойлон адисалсан … хоёр өдөр миний амьдралын хамгийн аз жаргалтай хоёр өдөр байсан. Уг арга хэмжээнд зориулан бичигдсэн ганц тохирох дуулал бол ‘Бурханы Сүнс нь дүрэлзэн шатах гал мэт’ дуулал юм. Тэнгэрлэг нөлөө ариун сүмийн дээр тогтсон байсан гэдэг нь үнэхээр үнэн. … Яг л дэлхий дээрх тэнгэр мэт мэдрэгдсэн.”