“Cuaj Hlis Ntuj 22–28: ‘Tus Txheej Txheem ntawm Vajtswv Leej Tub’: Lus Qhuab Qhia thiab Kev Khi Lus 106–108,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 106–108,” Los, Nrog Kuv Mus—Siv hauv Tsev thiab lub Koom Txoos: 2025
Cuaj Hlis Ntuj 22–28: “Tus Txheej Txheem ntawm Vajtswv Leej Tub”
Lus Qhuab Qhia thiab Kev Khi Lus 106–108
Thawj zaug yus nyeem phau, Lus Qhuab Qhia thiab Kev Khi Lus 107 tej zaum ua rau yus xav tias tshooj no hais txog kev txhim tsa tej luag hauj lwm pov thawj hwj los ua thawj coj hauv tus Tswv lub Koom Txoos xwb. Thaum twg tau muab kev tshwm sim no luam tawm, cov mej zeej hauv lub Koom Txoos yeej coob dhau cov thawj coj thiaj tsis muaj peev xwm coj tag nrho. Qhov uas tau qhia txog tej hauj lwm thiab tej kev lav ris ntawm Thawj Pawg Thawj Tswj Hwm, Pawg Kaum Ob tug Thwj Tim, Pawg Xya Caum, cov npisov, thiab tej pawg thawj tswj hwm los tau pab lawv thiab lawv yeej xav tau. Tiam sis Vajtswv tej lus qhia hauv tshooj 107 los muaj ntau tshaj qhov uas yuav tsum txhim tsa lub Koom Txoos cov thawj coj li cas. Hauv tshooj no, tus Tswv qhia peb txog Nws lub hwj chim thiab txoj cai, “lub Pov Thawj Hwj Dawb Huv raws li tus Txheej Txheem ntawm Vajtswv Leej Tub” (nqe 3). Lub hom phiaj ntawm lub pov thawj hwj yog kom qhib “tag nrho lub koom txoos tej koob hmoov ntawm sab ntsuj plig” kom tag nrho Vajtswv cov me nyuam “kom ntuj qhib rau lawv” thiab “kom xyiv fab rau txoj kev sib raug zoo thiab yeeb haum ntawm Vajtswv uas yog Leej Txiv, thiab Yexus uas yog tus neeg nruab nrab ntawm txoj kev khi lus tshiab” (nqe 18–19). Thaum Nws qhia peb txog Nws lub pov thawj hwj, tus Cawm Seej qhia peb txog Nws tus Kheej thiab peb yuav ua li cas kom los cuag Nws.
Saib “Restoring the Ancient Order,” nyob hauv Revelations in Context, 208–12.
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 106; 108
Tus Tswv txhawb nqa kuv thaum Nws hu kuv ua hauj lwm.
Nyob hauv phau Lus Qhuab Qhia thiab Kev Khi Lus 106 thiab 108, tus Tswv tau hais lus ntuas thiab cog lus rau ob tug mej zeej uas Nws hu kom ua hauj lwm hauv lub Koom Txoos. Thaum koj kawm txog Nws tej lus ntuas, tej zaum koj yuav xav txog koj tej lub cib fim ua hauj lwm rau tus Tswv—tej zaum ib txoj hauj lwm txhawb pab, txoj kev hu hauv lub Koom Txoos, kev muaj tej kev lav ris hauv koj tsev neeg, los sis kev tshoov siab ntawm sab ntsuj plig kom ua zoo.
Koj xav tias tus Tswv qhia dab tsi rau koj nyob hauv tej kev tshwm sim no? Tej nqe twg muaj nqis rau koj? Nov yog tej nqe rau koj xav txog:
-
Thaum twg tus Tswv twb muab “hwj chim [los sis kev pab] thiab kev tso siab” kom koj ua hauj lwm tau rau Nws? (Lus Qhuab Qhia thiab Kev Khi Lus 106:8).
-
Koj xav tias txoj kev ntxiv zog rau lwm tus “nyob hauv tag nrho tej koj ua”? (Lus Qhuab Qhia thiab Kev Khi Lus 108:7).
Thaum Txwj Laug Carl B. Cook txais ib txoj hauj lwm hauv lub Koom Txoos uas nyuaj, nws tau muaj zog los ntawm nws ib tug poj koob yawm txiv. Nyeem txog hauv nws zaj lus “Pab Lwm Tus” (Liyahaunas, Kaum Ib Hli Ntuj 2016, 110–12). Tej zaum koj yuav xav sau ib tsab ntawv txhawb koj cov xeeb ntxwv—los sis koj tus kheej yav tom ntej—kom ua hauj lwm thaum muaj cib fim ua hauj lwm rau tus Tswv. Sau tej yam tseeb uas koj kawm los ntawm Txwj Laug Cook zaj lus, Lus Qhuab Qhia thiab Kev Khi Lus 106 thiab 108, thiab tej yam uas koj ua hauv koj tsab ntawv.
Kuj saib Henry B. Eyring, “Nrog Kuv Mus Kev,” Liyahaunas, Tsib Hli Ntuj 2017, 82–85; Tej lub Ntsiab Lus thiab tej Lus Nug, “Kev Ua Hauj Lwm Ua Yus txoj Kev Hu,” Txoj Moo Zoo cov Ntawv; “Warren Cowdery” thiab “‘Wrought Upon’ to Seek a Revelation,” nyob hauv Revelations in Context, 219–23, 224–28.
Lus Qhuab Qhia thiab Kev Khi Lus 107:1–4, 18–20
Lub pov thawj hwj yog “raws li tus Txheej Txheem ntawm Vajtswv Leej Tub.”
Tus Tswv pib Nws zaj lus “tshwm sim txog lub pov thawj hwj” (Lus Qhuab Qhia thiab Kev Khi Lus 107, zaj lus piav txog tshooj) los ntawm kev qhia peb txog lub pov thawj hwj Mekhixedes lub npe uas xub muaj (saib nqe 1–4). Koj xav tias vim li cas yeej tseem ceeb kom paub qhov ntawd? Lub npe no puas hloov koj txoj kev xav txog lub pov thawj hwj?
Cia li xav txog tej kev xav ntawd thaum koj nyeem txog lub pov thawj hwj, qhov tseem ceeb yog nyob nqe 18–20. Qhov hais tias “ntuj qhib rau lawv” txhais li cas? Qhov hais tias “kom xyiv fab rau txoj kev sib raug zoo thiab yeeb haum ntawm Vajtswv uas yog Leej Txiv, thiab Yexus” txhais li cas? Tus Cawm Seej lub hwj chim pov thawj hwj thiab txoj cai ua li cas kom koj txais tau tag nrho tej yam no?
Kuj saib Amas 13:2, 16; Lus Qhuab Qhia thiab Kev Khi Lus 84:19–27.
Tsom ntsoov rau Yexus Khetos. “Muaj ntau yam uas yus qhia tau txog Yexus Khetos txoj moo zoo—tej ntsiab cai, cov lus txib, tej lus qhia txog tej yuav muaj los yav tom ntej thiab cov dab neeg hauv vaj lug kub. Tiam sis tej no yeej zoo li tej ceg ntawm tib tug ntoo, vim tag nrho tej no los ntawm ib lub hom phiaj; kom pab tib neeg los cuag Khetos thiab hloov los ua neeg zoo tag nrho zoo li Nws (saib Yaloos 1:11; Maulaunais 10:32). Ces txawm koj qhia dab tsi los, cia li nco ntsoov tias koj yeej qhia txog Yexus Khetos thiab txoj kev hloov ua neeg zoo li Nws” (Kev Qhia Raws Li tus Cawm Seej txoj Ke, 6). Piv txwv tias, thaum koj qhia—thiab kawm—txog lub pov thawj hwj nyob hauv Lus Qhuab Qhia thiab Kev Khi Lus 107, cia li nug, “Peb kawm dab tsi txog tus Cawm Seej?”
Lus Qhuab Qhia thiab Kev Khi Lus 107:22
Tus Tswv cov tub qhe yeej “txhawb nqa los ntawm txoj kev tso siab, kev ntseeg, thiab kev thov Vajtswv ntawm cov ntseeg.”
Koj xav tias txoj kev txhawb nqa tus Tswv cov tub qhe los ntawm koj txoj kev tso siab txhais li cas? los ntawm koj txoj kev ntseeg? los ntawm koj txoj kev thov Vajtswv?
Kuj saib “Vajtswv Hlub tus Yaj Saub,” Cov Nkauj Qhuas Vajtswv, zaj 12.
Lus Qhuab Qhia thiab Kev Khi Lus 107:23–24, 33–35, 38, 91–92
Cov yaj saub thiab cov Thwj Tim ua tim khawv txog Yexus Khetos.
Joseph Smith qhia tshooj 107 nyob rau xyoo 1835 rau cov uas nyuam qhuav txais kev hu los koom Pawg Kaum Ob tug Thwj Tim (saib zaj lus piav txog tshooj). Tus Tswv tau qhia dab tsi rau lawv txog lawv txoj kev hu nyob hauv nqe 23–24, 33–35, 38? Koj txoj kev ua pov thawj txog Yexus Khetos tau txais dag zog los ntawm Nws cov Thwj Tim uas muaj sia nyob tam sim no tej hauj lwm qhuab qhia?
Nyob hauv nqe 91–92, tus Tswv qhia txog Nws tus Thwj Tim hlob, tus Thawj Tswj Hwm ntawm lub Koom Txoos. Nws “ua zoo li Mauxes” li cas? (saib Phau Qhia txog Vaj Lug Kub, “Mauxes,” Txoj Moo Zoo cov Ntawv).
Kuj saib David A. Bednar, “Xaiv Los Mus Ua Tim Khawv txog Kuv lub Npe,” Liyahaunas, Kaum Ib Hlis Ntuj 2015, 128–31.
Lus Qhuab Qhia thiab Kev Khi Lus 107:27–31, 85–89
Tus Tswv ua Nws txoj hauj lwm tiav los ntawm tej pawg sab laj.
Pom seb tus Tswv qhia dab tsi txog tej pawg sab laj nyob hauv Lus Qhuab Qhia thiab Kev Khi Lus 107:27–31, 85–89. Tej yam dab tsi ua rau ib pawg sab laj zoo? Koj yuav ua li cas kom ua raws li tej ntsiab cai no thaum koj ua hauj lwm hauv lub Koom Txoos, koj lub tsev, los sis ua lwm yam kev lav ris?
Kuj saib M. Russell Ballard, “Tsev Neeg Kev Sab Laj,” Liyahaunas, Tsib Hlis Ntuj 2016, 63–65; Phau Qhia Kev Coj lub Koom Txoos, 4.3–4.4, Txoj Moo Zoo cov Ntawv.
Tus Tswv caw kom tsev neeg sib sab laj ua ke.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 107:18–20
Yexus Khetos foom koob hmoov rau kuv los ntawm Nws lub hwj chim pov thawj hwj.
-
Thaum koj thiab koj cov me nyuam nyeem Lus Qhuab Qhia thiab Kev Khi Lus 107:18–19 ua ke, hais txog cov lus no hais tias “tag nrho lub koom txoos tej koob hmoov ntawm sab ntsuj plig.” Tej zaum koj thiab koj cov me nyuam yuav xav sau tej koob hmoov uas los ntawm lub pov thawj hwj. Tej zaum koj yuav xav ua si kom saib seb leej twg txawj sau ntawv ntev dua. Tej zaum koj cov me nyuam yuav xav kos duab los sis nrhiav duab uas sawv cev tam li cov koob hmoov no (saib phab ntawv ntxim ua rau lub lim tiam no). Tej zaum nej yuav xav sib tham txog cov kab ke pov thawj hwj (xws li txoj kev ua kev cai raus dej los sis lub cim nco txog) pab peb li cas kom txais tau Vajtswv cov koob hmoov.
Lus Qhuab Qhia thiab Kev Khi Lus 107:21–26, 33–35, 91–92
Tus Tswv cov tub qhe uas Nws xaiv coj Nws lub Koom Txoos.
-
Txhua phau xov xwm Liyahaunas txog rooj sab laj muaj ib nplooj ntawv uas muaj cov duab ntawm cov Tuam Thawj Coj. Tej zaum koj yuav xav saib cov duab no nrog koj cov me nyuam thaum koj nyeem txog lawv txoj hauj lwm nyob hauv Lus Qhuab Qhia thiab Kev Khi Lus 107:21–26, 33–35, 91–92. Tej zaum koj thiab koj cov me nyuam yuav xav sib tham txog vim li cas nej ris Vajtswv txiaj vim tus Tswv tau muab tej hauj lwm no rau lawv.
-
Koj cov me nyuam kawm tau ntxiv txog tus Tswv cov tub qhe nyob hauv “General Church Leadership” ntawm ChurchofJesusChrist.org. Tej zaum koj cov me nyuam yuav xav kawm txog ib tug thawj coj thiab sib qhia seb lawv kawm dab tsi txog nws. Cia li sib qhia hais tias vim li cas nej paub tias cov thawj coj no yog Yexus Khetos cov tub qhe tiag tiag.
-
Tom qab nej nyeem Lus Qhuab Qhia thiab Kev Khi Lus 107:22 ua ke, tej zaum koj thiab koj cov me nyuam xav tuav ib daim duab txog Thawj Pawg Thawj Tswj Hwm thiab qhia seb nej txhawb nqa lawv uas tus Tswv cov tub qhe li cas.
Thawj Pawg Thawj Tswj Hwm
Lus Qhuab Qhia thiab Kev Khi Lus 108:3
Kuv yuav xyuam xim ua raws li kuv tej kev khi lus.
-
Kom pib sib tham txog nqe no, tej zaum koj yuav xav caw koj cov me nyuam ua ib yam dab tsi ua yuav tsum xyuam xim, ib yam li ntxiv dej rau ib lub khob tsis txhob nchuav. Yuav muaj li cas thaum peb tsis xyuam xim? Ces tej zaum koj yuav xav nyeem Lus Qhuab Qhia thiab Kev Khi Lus 108:3 kom kawm seb tus Tswv xav kom peb xyuam xim ua dab tsi. Peb “cog lus” (cog lus los sis khi lus) li cas nrog Vajtswv? Peb yuav ua li cas kom xyuam xim ua raws li peb tej kev khi lus? Tej zaum koj yuav xav qhia tej yam los ntawm Muam Becky Craven zaj lus “Ua Tib Zoo los sis Lam Tau Lam Ua” (Liyahaunas, Tsib Hli Ntuj 2019, 9–11) ua koj xav tias yuav txhawb kom koj cov me nyuam ua raws li lawv tej kev khi lus. Tej zaum koj yuav xav hu ib zaj nkauj txog kev ua raws li tej lus cog tseg, ib yam li “I Will Be Valiant” (Children’s Songbook, 162).
Tej zaum koj yuav xav muab kev maj mam hliv dej piv rau txoj kev ua raws li peb tej kev khi lus.
Yog xav tau tswv yim ntxiv, saib phau xov xwm Phooj Ywg rau lub hlis no.