“Cuaj Hlis Ntuj 1–7: ‘Rau txoj Kev Cawm Seej ntawm Xi-oos’: Lus Qhuab Qhia thiab Kev Khi Lus 94–97,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 94–97,” Los, Nrog Kuv Mus—Siv hauv Tsev thiab lub Koom Txoos: 2025
Lub Tuam Tsev Kirtland, los ntawm Al Rounds
Cuaj Hlis Ntuj 1–7: “Rau txoj Kev Cawm Seej ntawm Xi-oos”
Lus Qhuab Qhia thiab Kev Khi Lus 94–97
Puag thaum ub, tus Tswv txib Mauxes ua ib lub tuam tsev ntaub “yuav tsum ua txhua yam raws li tej qauv uas [tus Tswv] qhia rau [nws] saum roob” (Henplais 8:5; kuj saib Khiav Dim 25:8–9). Lub tuam tsev ntaub nyob hauv plawv ntawm Ixayees lub yeej hauv roob moj sab qhua (saib Teev Npe 2:1–2).
Nyob xyoo 1833, tus Tswv txib Joseph Smith tsim cov tuam tsev “tsis yog raws li neeg ntiaj teb ua” tiam sis “raws li tus qauv uas kuv yuav muab qhia los rau nej” (Lus Qhuab Qhia thiab Kev Khi Lus 95:13–14; kuj saib 97:10). Ib yam li lub tuam tsev ntaub nyob hauv roob moj sab qhua, lub tuam tsev yeej yog ib qhov chaw tseem ceeb nyob hauv Kirtland lub plawv (saib Lus Qhuab Qhia thiab Kev Khi Lus 94:1).
Niaj hnub no, tuam tsev nyob thoob plaws lub ntiaj teb. Txawm yog tej lub tuam tsev no tsis nyob hauv plawv ntawm peb tej nroog los, lawv taw peb rau Khetos, tus uas nyob tau hauv plawv ntawm peb lub neej. Txawm yog txhua lub tuam tsev nyias txawv nyias, nyob haud peb kawm txog Vajtswv tus txheej txheem—ib tug txheej txheem uas pab peb rov qab mus nyob ntawm Vajtswv lub xub ntiag. Cov kab ke thiab tej kev khi lus uas dawb ceev pab peb txhawb nqa peb lub neej thiab ntxiv dag zog rau peb tsev neeg “tsis yog raws li neeg ntiaj teb ua” tiam sis yog raws li tus txheej txheem uas Vajtswv qhia rau peb.
Saib Saints, 1:169–70; “A House for Our God,” nyob hauv Revelations in Context, 165–73.
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 94; 97:10–17
Kuv muaj peev xwm “fij rau tus Tswv.”
Nyob hauv phau Lus Qhuab Qhia thiab Kev Khi Lus 94, tus Tswv qhia txog txoj kev tsa tsev rau cov thawj coj ua hauj lwm nyob Kirtland—ib lub tsev ua hauj lwm thiab lub tsev luam ntawv. Koj xav li cas txog tus Tswv tej lus qhia txog tej tsev no nyob hauv Lus Qhuab Qhia thiab Kev Khi Lus 94:2–12? Qhov no nruab li cas rau tej yam Nws qhia txog lub tuam tsev nyob hauv 97:10–17?
Koj xav tias txoj kev “fij rau tus Tswv” txhais li cas?
Lus Qhuab Qhia thiab Kev Khi Lus 95
Tus Tswv qhuab ntuas cov uas Nws hlub.
Thaum txais txoj kev tshwm sim nyob hauv tshooj 95, twb dhau tsib lub hlis tom qab tus Tswv txib kom Tsoom Haiv Neeg Ntseeg ua Vajtswv ib lub tsev (saib Lus Qhuab Qhia thiab Kev Khi Lus 88:117–19)—thiab lawv tseem tsis tau pib. Saib seb tus Tswv tau qhuab ntuas lawv li cas nyob hauv kev tshwm sim no. Tej zaum koj yuav xav sau ntawv txog tej ntsiab cai koj nrhiav rau txoj kev qhuab ntuas. Koj kawm dab tsi txog tus Tswv los ntawm Nws txoj kev qhuab ntuas Haiv Neeg Ntseeg?
Kuj saib Lus Qhuab Qhia thiab Kev Khi Lus 121:43–44; D. Todd Christofferson, “Kuv Yeej Qhuab Ntuas thiab Cem Txhua Tus uas Kuv Hlub,” Liyahaunas, Tsib Hlis Ntuj 2011, 97–100.
Vajtswv Hlub Nws cov Me Nyuam
Lus Qhuab Qhia thiab Kev Khi Lus 95:8, 11–17; 97:10–17
Lub tuam tsev yog tus Tswv lub tsev.
Tom qab lawv raug qhuab ntuas vim lawv tseem tsis tau ua tus Tswv lub tsev nyob hauv Kirtland, lub Koom Txoos cov thawj coj tau xaiv ib qho chaw nyob hauv ib thaj nplej rau lawv ua lub tuam tsev ntawd. Hyrum Smith, tus Yaj Saub tus tij laug, tau khiav tam sim ntawd mus nqa ib rab liag thiab pib luaj teb. Nws hais tias, “Peb npaj ua tus Tswv lub tsev, thiab kuv mob siab xav ua thawj thawj tug uas yuav pib ua txoj hauj lwm ntawd” (nyob hauv Teachings of Presidents of the Church: Joseph Smith [2007], 271, 273). Vim li cas koj xav tias Hyrum maj ua lub tuam tsev? Cia li xav txog qhov no thaum koj nyeem Lus Qhuab Qhia thiab Kev Khi Lus 95:8, 11–17; 97:10–17.
Niaj hnub no, tus Tswv “ua kom peb txawj ua tuam tsev ceev zog” (Russell M. Nelson, “Tsom Ntsoov rau lub Tuam Tsev,” Liyahaunas, Kaum Ib Hlis Ntuj 2022, 121). zog Yog tias leej twg nug koj seb vim li cas Yexus Khetos lub Koom Txoos ua ntau lub tuam tsev, koj yuav hais li cas? Nrhiav lus teb nyob hauv:
-
Thawj Tswj Hwm Russell M. Nelson zaj lus tshaj tawm tuam tsev tshiab (ib yam li “Now Is the Time,” Liyahaunas, Tsib Hlis Ntuj 2022, 126).
-
“Why Latter-day Saints Build Temples” (temples.ChurchofJesusChrist.org).
-
Zaj vidi-aus “Tuam Tsev” (Txoj Moo Zoo cov Ntawv).
What Is a Temple?
Tej zaum koj yuav xav muab cov Ntseeg txoj kev siv zog ua lub tuam tsev piv rau koj kev sib zog npaj txais tej yam tseem ceeb los ntawm tus Tswv hauv lub tuam tsev. Koj yuav ua li cas kom qhia koj maj ua ib yam li Hyrum Smith maj ua tus Tswv lub tsev dawb huv? Piv txwv hais tias, koj xav ua dab tsi uas zoo li kev luaj teb, ib yam li Hyrum tau ua? Koj xav tias tus Tswv xav kom koj muab dab tsi tso tseg kom koj ua tau? (saib Lus Qhuab Qhia thiab Kev Khi Lus 97:12).
Kuj saib “Holy Temples on Mount Zion,” Hymns, zaj 289; Tej Ntsiab Lus thiab tej Lus Nug, “Tuam Tsev,” Txoj Moo Zoo cov Ntawv.
Hyrum Smith luaj teb rau lub Tuam Tsev Kirtland.
Lus Qhuab Qhia thiab Kev Khi Lus 97:8–9
“Kuv txais yuav lawv.”
Xav txog ib lub sij hawm thaum ib pawg neeg los sis ib pab neeg tau txais koj—los sis tsis txais koj. Qhov ntawd zoo li cas los sis txawv li cas ntawm qhov uas Lus Qhuab Qhia thiab Kev Khi Lus 97:8–9 qhia txog tus Tswv txoj kev txais yuav? Koj xav tias tus Tswv qhia dab tsi rau koj thaum siv lus piv txwv nyob hauv nqe 9?
Kuj saib Erich W. Kopischke, “Tus Tswv Zoo Siab Rau Yus,” Liyahaunas, Tsib Hlis Ntuj 2013, 104–6.
Tsim ib qhov chaw ntawm sab ntsuj plig kawm thiab qhia. Yexus cog lus tias, “Tus Vaj Ntsuj Plig Dawb Huv yuav qhia nej txhua yam” (Yauhas 14:26). Ces txawm tias koj kawm koj tus kheej los sis nrog lwm tus, cia li ua tib zoo kom caw tus Ntsuj Plig los qhia koj. Cov nkauj dawb huv, kev thov Vajtswv, thiab kev sib raug zoo los ntawm kev hlub pab tsim ib qhov chaw ntawm sab ntsuj plig thiab kaj siab uas cia tus Vaj Ntsuj Plig Dawb Huv qhia qhov tseeb rau koj.
Lus Qhuab Qhia thiab Kev Khi Lus 97:18–28
Xi-oos yog cov uas “muaj lub siab dawb.”
Tsoom Haiv Neeg Ntseeg hauv tej xyoo 1830 xav tias Xi-oos yog ib qho chaw. Hauv kev tshwm sim nyob hauv tshooj 97, tus Tswv qhia tias lo lus piav txog ib co neeg—“cov neeg muaj siab dawb” (nqe 21). Thaum koj nyeem nqe 18–28, tej zaum koj yuav xav muab cov lus no pauv lo lus Xi-oos. Koj xav tias kev muaj siab dawb txhais li cas?
Kuj saib Mauxes 7:18.
Yog xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 95:8; 97:10–17
Lub tuam tsev yog tus Tswv lub tsev.
-
Kom to taub tshooj 95 thiab 97 zoo dua, tej zaum koj yuav xav qhia koj cov me nyuam txog “Kirtland lub Tuam Tsev” nyob hauv Cov Dab Neeg hauv phau Lus Qhuab Qhia thiab Kev Khi Lus (Txoj Moo Zoo cov Ntawv; kuj saib Saints, 1:210). Tej zaum koj cov me nyuam yuav nyiam ua yeeb yam txog kev pab ua lub Tuam Tsev Kirtland (txiav ntoo, rauj ntsia hlau, tha phab ntsa, thiab lwm yam). Koj kuj cia lawv pom daim duab txog lub Tuam Tsev Kirtland los tau, ib yam li cov uas nyob hauv tus txheej txheem qhia no, thaum koj nyeem Lus Qhuab Qhia thiab Kev Khi Lus 95:8 kom qhia koj cov me nyuam vim li cas tus Tswv xav kom peb ua cov tuam tsev.
The Kirtland Temple
-
Tom qab nej nyeem Lus Qhuab Qhia thiab Kev Khi Lus 97:15–16 ua ke, tej zaum koj thiab koj cov me nyuam yuav xav sib qhia seb vim li cas lub tuam tsev tshwj xeeb rau koj. Tej zaum nej yuav xav hu ib zaj nkauj ua ke kom pab koj cov me nyuam xav txog txoj kev tswm seeb hauv tus Tswv lub tsev, ib yam li “I Love to See the Temple” (Children’s Songbook, 95). Vim li cas lub tuam tsev dawb ceev?
Lus Qhuab Qhia thiab Kev Khi Lus 97:1–2, 8–9, 21
Xi-oos yog cov uas “muaj lub siab dawb.”
-
Kom pab koj cov me nyuam to taub tias lo lus siab dawb txhais li cas nyob hauv Lus Qhuab Qhia thiab Kev Khi Lus 97:21, tej zaum koj kuj yuav xav saib ib khob iav uas muaj dej huv ua ke thiab ntxiv ib yam dab tsi rau hauv dej kom nws qias neeg (ib yam li av los sis hwj txob). Vim li cas dej yuav tsum dawb huv? Ces tej zaum koj cov me nyuam yuav xav nyeem nqe 21 thiab muab lawv tus ntiv tes tso rau ntawm lo lus siab dawb. Qhov uas hais tias peb lub siab dawb txhais li cas? Tej zaum nqe 1–2 thiab 8–9 yuav pab nej tawm tswv yim. Tus Cawm Seej ua li cas kom peb muaj lub siab dawb?
Leej Txiv Saum Ntuj Ceeb Tsheej xav kom kuv muaj lub siab dawb.
Lus Qhuab Qhia thiab Kev Khi Lus 97:8–9
Tus Tswv foom koob hmoov rau cov neeg uas ua raws li lawv tej kev khi lus nrog Nws.
-
Koj cov me nyuam puas paub seb peb khi lus ua dab tsi rau tus Tswv thaum peb ua kev cai raus dej los sis hauv lub tuam tsev? Xav seb puas nrog lawv kawm txog tej kev khi lus thaum nyeem Mauxiyas 18:9–10, 13 los sis Phau Qhia Kev Coj lub Koom Txoos, 27.2. Cia li sib qhia tias nej ua li cas kom sim “coj raws li [koj] tej kev khi lus los ntawm kev txi” (Lus Qhuab Qhia thiab Kev Khi Lus 97:8).
-
Tej zaum koj yuav xav caw koj cov me nyuam kos duab txog tej uas phau Lus Qhuab Qhia thiab Kev Khi Lus 97:9 qhia. Thaum lawv muab lawv cov duab rau nej saib, sib tham txog cov koob hmoov uas tus Tswv foom pub rau koj vim koj ua raws li koj tej kev khi lus. Vim li cas cov koob hmoov ntawd zoo li “tsob ntoo muaj txiv ntau heev uas cog … nyob rau ntawm ib tug dej ntshiab”?
Yog xav tau tswv yim ntxiv, saib phau xov xwm Phooj Ywg rau lub hlis no.