Lus Qhuab Qhia thiab Kev Khi Lus 93

Tus Yaj Saub Joseph Smith qhia hais tias, “Yog tias tib neeg tsis to taub tias Vajtswv tus cwj pwm zoo li cas, lawv yeej tsis to taub lawv tus kheej” (Teachings: Joseph Smith, 40). Thaum koj kawm txog tus Cawm Seej los ntawm Lus Qhuab Qhia thiab Kev Khi Lus 93, cia li nrhiav tej yam uas koj kawm tau txog koj tus kheej thiab. Piv txwv hais tias, koj kawm dab tsi txog Nws los ntawm nqe 3, 12–13, 21, thiab 26? Koj kawm tej yam tseeb twg zoo li ntawd txog koj tus kheej nyob hauv nqe 20, 23, thiab 28–29? (kuj saib 1 Yauhas 3:2; 3 Nifais 27:27). Tej zaum tej lus nug no yuav pab koj to taub thiab siv tej lus tseeb hauv tshooj no:

• Koj xav tias kev “txais lub hwj chim ntxiv rau lub hwj chim” txhais li cas? (nqe 12–13). Yog pab tau, koj nyeem “Tshav Ntuj” nyob hauv Phau Qhia txog Vaj Lug Kub (Txoj Moo Zoo cov Ntawv) los tau.

• Koj nrhiav tau dab tsi hauv zaj lus tshwm sim no uas qhia tias Vajtswv pab koj loj hlob thiab kawm li cas? Qhov uas koj paub qhov no ua rau koj coj zoo li cas rau lwm tus—thiab rau koj tus kheej?

• Koj kawm dab tsi txog qhov uas koj “paub teev tiam, thiab paub hais tias [koj] teev tiam dab tsi” (nqe 19; kuj saib Phau Qhia txog Vaj Lug Kub, “Teev Tiam,” Txoj Moo Zoo cov Ntawv).

Tej zaum koj yuav pom tias muaj tej lus yeeb koob, txoj kev kaj, thiab qhov tseeb ntau zaus hauv kev tshwm sim no. Thaum koj kawm tej nqe 20–39 cia li sau tej yam tseeb uas koj kawm txog tej ntsiab lus no. Koj sau tau ib daim phiaj zoo li no kom tej zaum pab tau:

Koj nrhiav tau dab tsi hauv tej nqe no uas pab koj nrhiav kev kaj thiab qhov tseeb ntxiv? Vim li cas qhov kaj thiab qhov tseeb yog tej lus zoo hais txog Yexus Khetos? Saib Yauhas 8:12; 14:6. Tej lus tseeb no tau pab koj li cas?

Tej zaum koj yuav xav sau ntawv txog tej lus cog tseg txog koj txoj hmoov nyob mus ib txhis nyob hauv tej nqe 20, 22, 28, 33–35. Qhov uas yus txais tau tej lus cog tseg no thiab txais tau txoj kev kaj puas muaj feem ua ke?

Xav seb puas nyeem “Taug kev hauv Vajtswv txoj kev kaj” (Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 18–21) kom nrhiav seb koj yuav tsum ua dab tsi kom txais tau kev kaj thiab tus Tswv cog lus tias Nws yuav foom koob hmoov rau koj li cas. Cov vidi-aus “Light and Truth, Part 1” thiab “Part 2” (Txoj Moo Zoo cov Ntawv) tej zaum yuav pab muab tswv yim ntxiv.

Kuj saib “Qhia Kuv Los Ua Raws Li Vajtswv txoj Lus,” Cov Nkauj Qhuas Vajtswv, zaj 140; Tej Ntsiab Lus thiab tej Lus Nug, “Tus Vaj Ntsuj Plig Dawb Huv,” Txoj Moo Zoo cov Ntawv.

6:40

6:52

Kev txib kom “kho koj tsev neeg kom muaj kab muaj kev” (nqe 43) tsis yog kho txee rau tais diav thiab chaw hloov khaub ncaws tiam sis yog kev qhia—thiab kev kawm—“txoj kev kaj thiab qhov tseeb” (nqe 42). Xav seb koj ua li cas kom ua raws li tej lus ntuas no. Koj muaj tej teeb meem dab tsi? Tej lus tseeb nyob hauv phau Lus Qhuab Qhia thiab Kev Khi Lus 93 pab tau li cas?

Koj kawm dab tsi los ntawm tej lus qhia no uas Txwj Laug David A. Bednar qhia?

“Nyob hauv kuv lub hoob kas yog ib daim duab uas yog ib cov nplej. Daim duab ntawd nyias muaj nyias ib xim uas txhuam rau—tsis muaj ib qhov uas tseem ceeb uas ntxim saib. Yog tias yus sawv ze daim duab ntawd, yus tsis tshua pom dab tsi, tsuas pos xim daj, xim kub, xim kas fes xwb uas yeej tsis ntxim saib. Tiam sis yog yus txav deb zuj zus ntawm daim duab ntawd, ces ua rau yus pom ib thaj nplej zoo nkauj kawg. Txhuam txhua yam xim ntawd los koom ua ke ua tau ib daim duab uas zoo nkauj kawg li.

“Txhua zaus peb tsev neeg thov Vajtswv, kawm vaj lug kub, thiab txhua zaus nej muaj tsev neeg hmo ua ke zoo li tej xim uas txhuam ntawd nyob rau hauv peb lub siab. Tsis muaj ib qho xwb uas yuav zoo thiab tseem ceeb. Tiam sis ib yam li xim daj, xim kub thiab xim kas fes los ua ke ua tau ib daim duab zoo nkauj kawg, yog li ntawd, thaum peb ua txhua yam me me tsis tu tsis tseg ces yuav pab peb sab ntsuj plig muaj zog heev. ‘Yog li ntawd, tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm tseem ceeb. Thiab los ntawm tej yam me yuav muaj tej yam uas loj tawm los’ [Lus Qhuab Qhia thiab Kev Khi Lus 64:33]. Kev rau siab ua yog ib txoj ntsiab cai rau peb txoj kev puas lub hauv paus rau peb lub neej thiab thaum peb rau siab thiab mob siab ntxiv nyob hauv tsev” (“Rau Siab thiab Mob Siab Ntxiv Nyob hauv Tsev,” Liyahaunas, Kaum Ib Hlis Ntuj 2009, 19–20).

Kuj saib Henry B. Eyring, “Ib lub Tsev uas tus Tswv tus Ntsuj Plig Nyob Haud,” Liyahaunas, Tsib Hlis Ntuj 2019, 22–25.

• Xav seb puas muab ib daim duab txog tus Cawm Seej rau lawv pom thiab nug koj cov me nyuam seb vim li cas yog ib qho tseem ceeb uas lawv kawm txog thiab coj raws li Yexus Khetos. Ces tej zaum nej yuav xav nyeem phau Lus Qhuab Qhia thiab Kev Khi Lus 93:19 ua ke kom nrhiav ib yam dab tsi tseem ceeb.

• Tej zaum koj yuav xav xaiv tej lus tseeb txog Khetos nyob hauv tshooj 93 uas tshoov koj lub siab thiab pab koj cov me nyuam to taub tej lus tseeb no (kuj saib “Tshooj 33: Ib txoj Kev Tshwm Sim txog Yexus Khetos,” nyob hauv Cov Dab Neeg hauv phau Lus Qhuab Qhia thiab Kev Khi Lus, 126–27, los sis zaj vidi-aus nyob hauv Txoj Moo Zoo cov Ntawv). Rau txhua zaj lus tseeb uas koj xaiv, tej zaum koj yuav xav muab ob peb lo lus rau lawv mloog thaum koj nyeem nqe no ua ke. Piv txwv hais tias, Yexus Khetos:

  • Ua Leej Txiv tej hauj lwm (nqe 5).

  • Yog txoj Kev Kaj ntawm lub Ntiaj Teb (nqe 9).

  • Yog tus uas tau tsim lub ntiaj teb (nqe 10).

  • Tau txais hwj chim tag nrho (nqe 17).

  • Tau nrog Vajtswv nyob thaum chiv keeb (nqe 21).

  

  1:18

• Tus Cawm Seej hais peb zaug nyob hauv tshooj 93 hais tias peb tau nrog Vajtswv “nyob thaum chiv keeb” (nqe 23, 29, 38). Kom pab koj cov me nyuam paub qhov no, koj caw tau lawv nyeem phau Lus Qhuab Qhia thiab Kev Khi Lus 93:23, 29, 38 thiab nrhiav tej lus tseeb txog lawv tus kheej uas nyob hauv tej nqe no. Vim li cas Leej Txiv Saum Ntuj Ceeb Tsheej xav kom peb paub qhov tseeb no? Tej zaum koj yuav xav nug koj cov me nyuam seb lawv puas paub txog peb lub neej nrog Leej Txiv Saum Ntuj Ceeb Tsheej ua ntej peb yug los. Kom pab lawv kawm ntxiv, nyeem ob peb nqe vaj lug kub no: Yelemis 1:5; Lus Qhuab Qhia thiab Kev Khi Lus 138:53–56; Mauxes 3:5; Anplaham 3:22–26.

• Nej kuj hu nkauj ua ke “Kuv yog Vajtswv Me Nyuam” los sis “I Lived in Heaven” (Children’s Songbook, 2–3, 4) thiab sib tham txog tej lus tseeb uas peb kawm los ntawm cov nkauj no txog peb lub hom phiaj uas los hauv lub ntiaj teb.

• Kom pab koj cov me nyuam siv tej lus tseeb no txog kev mloog lus nyob hauvLus Qhuab Qhia thiab Kev Khi Lus 93, xav seb puas sau tej nqe vaj lug kub ntawm tshooj no rau ib daim ntawv. Nyob rau lwm daim ntawv, sau tej lus tseeb uas tej nqe no qhia txog. Tej zaum koj cov me nyuam yuav xav nyeem tej nqe ua ke thiab muab tej lus tseeb tso rau ntawm tej nqe vaj lug kub. Piv txwv hais tias:

  • Nqe 24: Kev tseeb yog kev paub tias tej yam zoo li cas thaum ub, tam sim no, thiab yav tom ntej.

  • Nqe 28: Kuv txais txoj kev kaj thiab qhov tseeb thaum kuv ua raws li Vajtswv cov lus txib.

  • Nqe 37: Thaum kuv tau txoj kev kaj thiab qhov tseeb, kuv muaj peev xwm tiv tau kev phem.

  • Nqe 39: Thaum kuv tsis ua raws li Vajtswv cov lus txib, kuv txais tsis tau kev kaj thiab qhov tseeb.

  Tej zaum koj yuav xav qhia tej lus tseeb uas koj tau los paub txog thaum koj tau ua raws li tus Tswv tej lus txib.