Lus Qhuab Qhia thiab Kev Khi Lus 88

Ob peb hnub tom qab tus Tswv ceeb toom hais tias yuav muaj kev tsov rog “muaj nplua mias rau txhua haiv neeg” (Lus Qhuab Qhia thiab Kev Khi Lus 87:2), tus Tswv tau muab kev tshwm sim rau Joseph Smith hu ua “rev nplooj ntoo txiv roj,” uas yog ib lub cim txog kev thaj yeeb (Lus Qhuab Qhia thiab Kev Khi Lus 88, zaj piav txog tshooj; kuj saib Chiv Keeb 8:11). Thaum koj kawm tshooj 88 lub lim tiam no, nrhiav tus Tswv tsab xov kaj siab rau koj.

Cov lus txoj kev kaj thiab kev cai los hais ntau zaus nyob hauv tshooj 88. Sau lub cim rau tej nqe uas koj nrhiav tau tej lus no nyob hauv nqe 6–67, thiab sau txoj tej yam uas koj kawm txog txoj kev kaj thiab kev cai—thiab txog Yexus Khetos. Koj xav ua dab tsi kom txais tau txoj kev kaj thiab ua raws li “Khetos txoj kev cai”? (nqe 21).

Kuj saib Yaxayas 60:19; Yauhas 1:1–9; 3 Nifais 15:9; Timothy J. Dyches, “Kev Kaj Npuab rau Kev Kaj,” Liyahaunas, Tsib Hlis Ntuj 2021, 112–15; Sharon Eubank, “Tus Khetos: Txoj Kev Kaj uas Ci hauv Kev Tsaus Ntuj,” Liyahaunas, Tsib Hlis Ntuj 2019, 73–76.

Tej yam twg hauv koj lub neej tau qhia koj tias cov lus cog tseg hauv tej nqe no muaj tseeb? Koj yuav tsum ua dab tsi tom ntej thiaj li “txav los nyob ze” Khetos? Xav seb puas nyeem zaj nkauj qhuas Vajtswv “Nyob Ze Nrog Koj, Vajtswv” (Cov Nkauj Qhuas Vajtswv, zaj 37) thaum koj kawm thiab peb hawm.

Tus Tswv txoj lus txib kom “hloov nej tus kheej ua dawb huv” los Nws twb hais ob zaug nyob hauv tshooj 88 (nqe 68, 74). Koj xav hais tias qhov no txhais tau li cas? Tej zaum koj yuav xav nyeem tej zaj lus nyob hauv “Kev Hloov ua Neeg Dawb Huv” hauv Phau Qhia txog Vaj Lug Kub (Txoj Moo Zoo cov Ntawv). Peb yuav tsum ua dab tsi kom hloov los ua neeg dawb huv? Cia zaj lus nug no pab koj kawm phau Lus Qhuab Qhia thiab Kev Khi Lus 88:67–76, thiab sau tej lub tswv yim ntawm sab ntsuj plig uas koj xav txog.

Tus Tswv hais kom Haiv Neeg Ntseeg tsim “cov yaj saub lub koom haum kawm” nyob hauv Kirtland (Lus Qhuab Qhia thiab Kev Khi Lus 88:137). Tej lus qhia feem ntau nyob hauv tshooj 88 tau qhia lawv paub ua li no. Tej lus qhia no kuj pab tau koj “tsa … ib lub tsev kawm” (nqe 119) nyob hauv koj lub neej. Muaj tseeb tiag, koj kuj nyeem tau tej nqe 77–80 thiab 118–26 los ua tswv yim zoo kom “kho nej lub tsev [los sis nej lub neej] kom ua lub hauv paus rau txoj kev kawm txoj moo zoo” thiab “ib qho chaw cawm sia vim muaj kev ntseeg” (Russell M. Nelson, “Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo{,” Liyahaunas, Kaum Ib Hlis Ntuj 2018, 113). Tej zaum yuav zoo rau koj kov ib daim duab txog thaum koj “kho koj lub tsev” yuav zoo li cas, tsis hais tej zaj lus los ntawm tej nqe no uas koj xav tias pab tau.

Tej zaum yuav pab yog koj nug tej lus no: Vim li cas kev kawm thiab kev kawm ntawv tseem ceeb rau tus Tswv? Nws xav kom kuv kawm dab tsi? Nws xav kom kuv kawm li cas? Nrhiav tej lus teb rau tej lus nug no nyob hauv tej nqe 77–80 thiab nyob hauv “Qhov tseeb yuav tso koj dim” (Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 30–33).

Koj xav tias kev kawm “los ntawm kev kawm ntawv thiab los ntawm kev ntseeg” txhais li cas? (nqe 118). Koj kawm dab tsi ntxiv los ntawm Txwj Laug Mathias Held zaj lus “Nrhiav Kev Txawj Ntse Los ntawm tus Ntsuj Plig”? (Liyahaunas, Tsib Hlis Ntuj 2019, 31–33).

Kuj saib Txoj Moo Zoo tej Ntsiab Lus, “Nrhiav Qhov Tseeb thiab Dim Kev Ntxias,” Txoj Moo Zoo cov Ntawv; “A School and an Endowment,” nyob hauv Revelations in Context, 174–82.

• Tej zaum koj yuav qhib kev sib tham txog Lus Qhuab Qhia thiab Kev Khi Lus 88:33 thaum koj nug koj cov me nyuam txog tej txiaj ntsim uas lawv tau txais—tej uas lawv tau zoo siab txais thiab tej uas lawv tsis zoo siab txais. Tej zaum lawv yuav xav ua yeeb yam txog kev txais txiaj ntsim nrog kev zoo siab. Ces tej zaum nej yuav xav hais txog tej txiaj ntsim uas Leej Txiv Saum Ntuj Ceeb Tsheej tau muab rau peb (xws li lub txiaj ntsim los ntawm tus Vaj Ntsuj Plig Dawb Huv). Peb ua li cas kom txais tau tej txiaj ntsim no nrog kev zoo siab?

• Lus Qhuab Qhia thiab Kev Khi Lus 88:63 muaj tej lus uas tej zaum yuav tshoov nej cov me nyuam lub siab ua tej yam ntxim saib ntxim ua kom nrhiav tus Tswv hauv lawv lub neej. Piv txwv hais tias, koj thiab koj cov me nyuam xav puas tau txog ib txoj kev ua si uas sib tham txog nqe lus “rau siab ntso nrhiav kuv ces nej yuav ntsib kuv” (ntxiv qhov uas ntawv qaij) los sis “cia li khob, thiab yuav qhib rau nej”?

• Kom qhia txog tus Cawm Seej txoj kev caw “txav los nyob ze kuv,” tej zaum koj yuav xav nug ib tug me nyuam kom tuav ib daim duab txog Yexus (xws li daim duab tom kawg daim ntawv no) rau ntawm ib sab phab ntsa hauv hoob thiab lwm cov me nyuam sawv rau ntawm phab ntsa tim ub. Thaum koj cov me nyuam xav txog tej yam uas lawv ua tau kom los ze tus Cawm Seej, lawv mus ib ruam ze daim duab thiab tus me nyuam uas tuav daim duab mus ib ruam ze cov me nyuam tim ub. Qhia koj cov me nyuam tej yam uas koj ua uas pab koj mus nyob ze tus Cawm Seej thiab Nws txav los nyob ze koj li cas. Tej zaum nej kuj yuav xav hu ib zaj nkauj txog lub ntsiab lus no, xws li “I Feel My Savior’s Love” (Children’s Songbook, 74–75).

• Hais kom koj cov me nyuam qhia koj txog tej yam uas lawv kawm txog tom tsev kawm ntawv los sis Koom Haum Me Nyuam Yaus. Tej zaum koj yuav xav qhia txog tej yam uas koj kawm tam sim no. Ces koj muab tau tej lus no rau koj cov me nyuam ntsia dab tsi, vim li cas, thiab ua li cas. Pab lawv nrhiav hauv phau Lus Qhuab Qhia thiab Kev Khi Lus 88:77–79 kom nrhiav seb tus Tswv xav kom peb kawm dab tsi. Ces nrhiav ua ke hauv nqe 80 kom nrhiav seb vim li cas Nws xav kom peb kawm thiab nyob hauv nqe 118 nrhiav seb peb yuav tsum kawm li cas.

• Thaum koj nyeem phauLus Qhuab Qhia thiab Kev Khi Lus 88:119 rau koj cov me nyuam, hais kom lawv siv lawv ob txhais caj npab ua lub tuam tsev lub hau zuag zuag txhua zaus lawv hnov los lus “tsev.” Qhia tias Leej Txiv Saum Ntuj Ceeb Tsheej xav kom Joseph Smith thiab Haiv Neeg Ntseeg txua ib lub tuam tsev, los sis ib “lub tsev rau Vajtswv.”

• Tej zaum koj yuav xav hais kom koj cov me nyuam xaiv xya lo lus uas qhia txog lawv lub tsev. Ces pab lawv nrhiav, nyob hauv Lus Qhuab Qhia thiab Kev Khi Lus 88:119, xya lo lus uas tus Tswv siv qhia txog Nws lub tsev. Peb yuav ua li cas kom peb lub tsev yuav zoo li “ib lub tsev rau Vajtswv?”