“22–28 Septemba: ‘Oda blong Pikinini blong God’: Doktrin mo Ol Kavenan 106–108,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 106–108,” Kam Folem Mi—Blong Hom mo Jos: 2025
22–28 Septemba: “Oda blong Pikinini blong God”
Doktrin mo Ol Kavenan 106–108
Mekem wan hariap lukluk faswan, bae yu luk se Doktrin mo Ol Kavenan 107 bae i abaot fasin blong stap oganaesem ol ofis blong prishud insaed long wan lidasip strakja we i blong Jos Ia blong Lod. Long taem we oli pablisim revelesen ia, membasip blong Jos i bin stap gro finis we i bitim namba blong ol lida we i bin stap. Blong talemaot gud ol rol mo ol responsabiliti blong Fas Presidensi, Kworom blong Olgeta Twelef Aposol, Olgeta Seventi, ol bisop, mo ol presidensi blong kworom, i bin wan nid mo i bin help bigwan. Be i gat plante moa samting long tabu instraksen ia long seksen 107 we i bitim blong olsem wanem lidasip blong Jos i sapos blong oganaes. Long ples ia, Lod i tijim yumi abaot paoa mo atoriti blong Hem, “Tabu Prishud, folem oda blong Pikinini blong God” (ves 3). Stamba tingting blong prishud i blong openem doa blong “evri blesing blong jos long saed blong spirit” blong mekem se evri pikinini blong God oli save “gat ol heven oli open long olgeta,” mo “stap glad blong toktok long God mo stap wetem God Papa, mo Jisas, we i man blong toktok long bihaf blong yumi blong niu kavenan.” (ol ves 18–19). Blong stap tijim yumi abaot prishud blong Hem, Sevya i stap tijim yumi abaot Hemwan mo olsem wanem yumi save kam long Hem.
Luk long “Restoring the Ancient Order,” long Revelations in Context, 208–12.
Ol aedia blong Stap Lanem Samting long Hom mo long Jos
Doktrin mo Ol Kavenan 106; 108
Lod i sapotem mi taem Hem i singaotem mi blong givim seves.
Insaed long Doktrin mo Ol Kavenan 106 mo 108, Lod i bin givim kaonsel mo ol promes long tufala memba we oli bin singaotem tufala blong givim seves insaed long Jos. Taem yu stadi long kaonsel blong Hem, bae yu save tingting long janis blong yuwan blong givim seves long Lod—maet wan asaenmen blong wok blong givhan, wan koling blong Jos, ol responsabiliti insaed long famli blong yu, o ol kwaet toktok blong Tabu Spirit blong mekem gudfala samting.
?Wanem nao yu filim se i mesej blong Lod we i blong yu long ol revelesen ia? ?Wijwan long ol ves ia we, speseli, i gat mining long yu? Hemia sam we yu save tingting long hem:
-
?Wetaem nao Lod i givim long yu “gladhat [o tabu help] mo stret save” blong yu save givim seves long Hem? Doktrin mo Ol Kavenan 106:8
-
?Wanem nao yu ting se i minim blong mekem ol narawan oli kam strong moa “long evri samting we yufala i mekem”? (Doktrin mo Ol Kavenan 108:7).
Taem we Elda Carl B. Cook i kasem wan asaenmen we i had tumas, hem i karem paoa aot long eksperiens blong wan bubu blong bifo. Rid abaot mesej blong hem long “Serve” (Liahona, Novemba 2016, 110–12). Tingting blong raetem wan leta blong leftemap tingting blong ol laen blong yu—o fiuja blong yuwan—blong akseptem ol janis blong givim seves long Lod. Putum tu long leta blong yu ol trutok we yu lanem aot long mesej blong Elda Cook long, Doktrin mo Ol Kavenan 106 mo 108, mo long ol eksperiens blong yuwan.
Luk tu long Henry B. Eyring, “Walk with Me,” Liahona, Mei 2017, 82–85; Topics mo Questions, “Stap Givim Seves long Ol Koling long Jos,” Gospel Laebri; “Warren Cowdery” mo “‘Wrought Upon’ to Seek a Revelation,” long Revelations in Context, 219–23, 224–28.
Doktrin mo Ol Kavenan 107:1–4, 18–20
Prishud hem i “folem Oda blong Pikinini blong God.”
Lod i statem “revelesen long saed blong prishud” blong Hem (Doktrin mo Ol Kavenan 107, seksen heding) blong tijim long yumi fas nem blong Melkesedek Prishud (luk long ol ves 1–4). ?From wanem yu ting se i impoten blong save hemia? ?Olsem wanem nao nem ia i jenisim wei we yu tingting abaot prishud?
Holemtaet ol tingting ia long maen blong yu taem yu rid abaot prishud, speseli long ol ves 18–20. ?Wanem i minim blong “ol heven oli open”? ?Wanem nao i minim blong “stap glad blong toktok long God mo stap wetem God Papa, mo Jisas”? ?Long wanem wei nao prishud paoa blong Sevya mo atoriti blong Hem i mekem evri samting ia i gat i stap blong yu?
Luk tu long Alma 13:2, 16; Doktrin mo Ol Kavenan 84:19–27.
Lukluk Nomo long Kraes “I gat fulap samting blong tijim insaed long gospel ia we i kambak, we i blong Jisas Kraes—ol prinsipol, ol komanmen, ol profesi, mo ol skripja stori. Be evriwan ia oli ol branj blong semfala tri ia, from olgeta evriwan oli gat wan stamba tingting: blong helpem evri pipol blong kam long Kraes mo kam stret gud evriwan tru long Hem (luk long Jerom 1:11; Moronae 10:32). So nomata wanem we yu stap tijim, tingbaot se i tru, yu stap tij abaot Jisas Kraes mo olsem wanem blong kam olsem Hem” (Tij Folem Wei blong Sevya, 6). Eksampol, taem yu stap tij—mo lanem samting—abaot prishud long Doktrin mo Ol Kavenan 107, oltaem askem, “?Wanem nao yumi stap lanem abaot Sevya?”
Ol wokman blong Lod, “Jos i sastenem olgeta tru long tras, fet, mo prea.”
?Wanem nao yu ting se i minim blong sastenem ol wokman blong Lod tru long tras blong yufala? ?tru long fet blong yufala? ?tru long prea blong yufala?
Luk tu long “God Bless Our Prophet Dear,” Hym, namba 24.
Doktrin mo Ol Kavenan 107:23–24, 33–35, 38, 91–92
Ol profet mo ol Aposol oli testifae abaot Jisas Kraes.
Josef Smit i serem seksen 107 long 1835 wetem ol niu Kworom blong Olgeta Twelef Aposol (luk long seksen heding). ?Wanem nao Lod i tijim long olgeta abaot koling blong olgeta long ol ves 23–24, 33–35, 38? ?Olsem wanem nao witnes blong yu abaot Jisas Kraes i bin kam moa strong tru long tijing mo seves blong Ol Aposol blong Hem we oli stap laef?
Insaed long ol ves 91–92, Lod i stap tij abaot ol Senia Aposol blong Hem, we i Presiden blong Jos. ?Olsem wanem nao hem “i semmak olsem Moses”? (luk long Gaed long Ol Skripja, “Moses,” Gospel Laebri).
Luk tu long David A. Bednar, “Chosen to Bear Testimony of My Name,” Liahona, Novemba 2015, 128–31.
Doktrin mo Ol Kavenan 107:27–31, 85–89
Lod i mekem wok blong Hem i hapen tru long ol kaonsel.
Luksave wanem Lod i bin tijim abaot ol kaonsel long Doktrin mo Ol Kavenan 107:27–31, 85–89. ?Wanem nao i mekem wan kaonsel i gat moa mining? ?Long wanem wei nao yu save yusum ol prinsipol ia insaed long Jos koling blong yu, hom blong yu o long ol narafala responsabiliti blong yu?
Luk tu long M. Russell Ballard, “Family Councils,” Liahona, Mei 2016, 63–65; Jeneral Hanbuk, 4.3–4.4, Gospel Laebri.
Lod i invaetem ol famli blong kaonsel tugeta.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Doktrin mo Ol Kavenan 107:18–20
Jisas Kraes i blesem mi tru long prishud paoa blong Hem.
-
Taem yu mo ol pikinini blong yu i ridim tugeta Doktrin mo Ol Kavenan 107:18–19, tokbaot plante “evri blesing long saed blong spirit.” Maet yu mo ol pikinini blong yu i save mekem lis blong ol blesing we i kam tru long prishud. Yu save mekem wan gem aot long hem—luk se huia nao i save mekem wan longfala lis. Mo tu, ol pikinini blong yu oli save dro o faenem ol pikja we oli ripresentem ol blesing ia (luk long aktiviti pejblong wik ia). Afta, yufala save tokbaot olsem wanem ol odinens blong prishud (olsem baptaes o sakramen) oli helpem yumi blong kasem ol blesing.
Doktrin mo Ol Kavenan 107:21–26, 33–35, 91–92
Ol wokman blong Lod we Hem i bin jusum olgeta oli stap lidim Jos blong Hem.
-
Evri namba blong konfrens blong Liahona we i tekem tu, wan pej blong ol pikja blong Ol Jeneral Atoriti. Tingting blong stap lukluk long ol pikja ia wetem ol pikinini blong yu taem yu rid abaot ol responsabiliti blong olgeta long Doktrin mo Ol Kavenan 107:21–26, 33–35, 91–92. Yu mo ol pikinini blong yu i save tokbaot from wanem yu glad se Lod i bin givim long olgeta, ol responsabiliti ia.
-
Ol pikinini blong yu oli save lanem moa abaot ol wokman blong Lod long“General Church Leadership” long ChurchofJesusChrist.org. Maet wanwan long ol pikinini blong yu i save lanem wan samting abaot wan long ol lida ia mo tijim wanwan long olgeta abaot lida ia. Serem wetem wanwan long yufala, olsem wanem yufala i save se ol wokman ia oli ol tru wokman blong Lod.
-
Afta we yufala i ridim tugeta, Doktrin mo Ol Kavenan 107:22 yu mo ol pikinini blong yu i save gat wanwan janis blong holem wan pikja blong Fas Presidensi mo stap serem ol wei we yufala i save sastenem olgeta olsem ol wokman blong Lod.
Fas Presidensi
Mi save stap lukaot gud blong laef folem ol kavenan blong mi.
-
Blong statem wan storian abaot ves ia, yu save askem ol pikinini blong yu blong mekem wan samting we i nidim olgeta blong lukaot gud, olsem blong fulumap wan kap wetem wota, be no mas mekem i stap kapkapsaed. ?Wanem i hapen taem yumi no stap lukaotgud? Afta, yu save ridim Doktrin mo Ol Kavenan 108:3 blong faenemaot wanem Lod i wantem yumi blong mekem blong stap lukaot gud. ?Wanem “ol tabu promes” (ol promes o ol kavenan) we yumi mekem wetem God? ?Olsem wanem nao yumi save lukaot gud moa blong stap kipim olgeta? Yu save serem sam pat blong mesej blong Sista Becky Craven long “Lukaotgud agens Lukaot Wanwan Taem” (Liahona, Mei 2019, 9–11) we yu filim se i save givim insperesen long ol pikinini blong yu blong kipim ol kavenan blong olgeta. Mo tu, yufala save singsing long wan singsing abaot stap kipim ol kavenan olsem “I Will Be Valiant” (Children’s Songbook, 162).
Blong stap lukaot gud blong kapsaetem wota, oli save komperem wetem, blong stap lukaot gud blong kipim ol kavenan blong yumi.
Blong kasem moa aedia, luk long magasin blong Fren long manis ia.