“1–7 Septemba: ‘Blong Mi Sevem Saeon’: Doktrin mo Ol Kavenan 94–97,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 94–97,” Kam Folem Mi—Blong Hom mo Jos: 2025
Ketlan Tempol, i kam long Al Rounds
1–7 Septemba: “Blong Mi Sevem Saeon”
Doktrin mo Ol Kavenan 94–97
Long taem bifo Lod i bin givim komanmen long Moses blong bildim wan tabenakol,“olsem plan ya we [Hem] i soemaot finis long [Moses], antap long bigfala hil ya” (Hibrus 8:5; luk tu long Eksodas 25:8–9). Tabenakol i mas stap olsem senta blong kamp blong Isrel long waelples (luk long Namba 2:1–2
Long 1833, Lod i givim komanmen long Josef Smit blong bildim ol tempol “i no folem fasin blong wol,” be blong “folem fasin we bambae mi soemaot,” (Doktrin mo Ol Kavenan 95:13–14; luk tu long 97:10). Semmak wetem tabenakol ia long waelples, tempol hem i blong wan stamba tingting long Ketlan (luk long Doktrin mo Ol Kavenan 94:1
Tedei, yumi luk ol tempol raon long wol. Nomata, sapos oli no stap long medel blong ol siti blong yumi, oli poenem yumi i go long Jisas Kraes, we Hem nao i mas stap long medel blong laef blong yumi. I nomata we wanwan tempol i defren long wei we hem i luk, insaed long olgeta, yumi save lanem semfala tabu paten—wan plan we i kam long heven, blong tekem yumi i gobak long ples we God i stap long hem. Ol odinens we oli tabu, oli joenem yumi long Kraes mo mekem ol famli blong yumi oli kam moa strong “i no folem fasin blong wol ia” be i folem plan ia we God i soem long yumi.
Luk long Saints, 1:169–70; “A House fo Our God,” long Revelations in Context, 165–73.
Ol aedia blong Stap Lanem Samting long Hom mo long Jos
Doktrin mo Ol Kavenan 94; 97:10–17
Mi save stap “dediketem [mi] fulwan i kam long Lod.”
Insaed long Doktrin mo Ol Kavenan 94, Lod i givim instraksen abaot fasin blong stap bildimap ol administretiv bilding long Ketlan—wan ofis mo wan printing haos. ?Wanem filing o tingting we i kam long yu abaot wanem we Lod i stap talem abaot ol bilding ia long Doktrin mo Ol Kavenan 94:2–12? ?Olsem wanem nao hemia i semmak long wanem we Hem i stap talem abaot tempol long 97:10–17?
?Wanem nao i minim long yu blong stap “dediketem [yu] fulwan i kam long Lod”?
Lod i stretem olgeta we Hem i lavem.
Taem we oli kasem revelesen long seksen 95 hem i abaot faef manis we i bin pas afta we Lod i komandem Ol Sent blong bildim wan haos blong God (luk long Doktrin mo Ol Kavenan 88:117–19)—mo oli no bin statem yet. Luk olsem wanem Lod i stretem olgeta insaed long revelesen ia. Bae yu save mekem wan lis blong ol prinsipol we yu faenem blong stap givim ol toktok blong stretem man we i kam tru long revelesen. ?Wanem nao yu lanem long Lod long wei ia we Hem i stretem Ol Sent blong Hem?
Luk tu long Doktrin mo Ol Kavenan 121:43–44; D. Todd Christofferson, “Hamas Mi Lavem, Mi Tok Strong mo Stretem Olgeta,” Liahona, Mei 2011, 97–100.
God Loves His Children
Doktrin mo Ol Kavenan 95:8, 11–17; 97:10–17
Tempol hem i haos blong Lod.
Afta we Lod i tok strong long olgeta from se oli no bildim haos blong Lod long Ketlan, ol lida blong Jos oli jusum wan ples long wan fil blong wit we bae oli bildim long hem. Haeram Smit, brata blong Profet, kwiktaem i ron blong karem wan huknaef mo i stat blong kliarem fil ia. “Mifala i stap rere blong bildim wan haos long Lod,” hem i talem, “mo mi gat strong tingting blong mi faswan long wok ia” (long Teachings of Presidents of the Church: Josef Smit [2007], 271, 273). ?From wanem yu ting se Haeram i wantem tumas blong bildim tempol? Tingting hevi long hemia taem yu ridim Doktrin mo Ol Kavenan 95:8, 11–17; 97:10–17.
Long dei blong yumi, Lod “i stap hariap blong mekem yumi bildim ol tempol” (Russell M. Nelson, “Lukluk Nomo long Tempol,” Liahona, Novemba 2022, 121). Sapos wan i askem yu se from wanem Jos Ia blong Jisas Kraes i stap bildim plante tempol, ?wanem nao bae yu talem? Lukaotem ol gudfala ansa long:
-
Mesej blong Presiden Russell M. Nelson we i stap anaonsem ol tempol (olsem long “Naoia Hem I Taem,” Liahona, Mei 2022, 126).
-
“Why Latter-day Saints Build Temples” (temples.ChurchofJesusChrist.org).
-
Vidio ia “Temples” (Gospel Laebri).
What Is a Temple?
Yu save komperem ol hadwok blong Ol Sent blong bildim Ketlan Tempol wetem ol hadwok blong yu blong rere blong kasem ol eksperiens we i gat mining wetem Lod insaed long tempol. ?Olsem wanem nao yu save soem semmak strong tingting we Haeram Smit i bin gat from tabu haos blong Lod? Eksampol, ?wanem nao bae yu save mekem we bae i olsem blong kliarem fil olsem we Haeram i bin mekem? ?Wanem nao ol sakrifaes we yu filim se Lod i wantem yu blong mekem? (luk long Doktrin mo Ol Kavenan 97:12).
Luk tu long “Holy Temples on Mount Zion,” Hym, namba 289; Topics and Questions, “Temples,” Gospel Laebri.
Haeram Smit i stap kliarem graon blong Ketlan Tempol.
“Yufala ia, mi akseptem yufala.”
Tingbaot wan taem we oli akseptem yu—o oli no akseptem yu—i kam long wan grup o tim. ?Long wanem wei nao hemia i semmak o defren long wanem we Doktrin mo Ol Kavenan 97:8–9 i tijim abaot wanem i minim blong Lod i akseptem yu? ?Wanem nao yu ting se Lod i stap traem blong tijim long yu wetem eksampol long ves 9?
Luk tu long Erich W. Kopischke, “Being Accepted of the Lod,” Liahona, Mei 2013, 104–6.
Krietem wan envaeromen long saed blong spirit blong stap lan mo stap tij. “Tabu Spirit,” Jisas I givim promes ia “bambae i tijim yufala long olgeta samting” (Jon 14:26). So, wanem we yu stap lanem yuwan o wetem ol narawan, mekem Spirit i faswan blong invaetem. Tabu miusik, prea mo fasin blong mekem samting wetem lav wetem ol narawan i save helpem evriwan blong krietem wan ples long saed blong spirit we i gat pis, long ples ia Tabu Spirit i save tijim trutok long yu.
Doktrin mo Ol Kavenan 97:18–28
Saeon i olgeta “we hat blong olgeta i klin evriwan”.
Long Olgeta Sent long ol 1830, Saeon i bin wan ples. Long revelesen long seksen 97, Lod i mekem i kam bigwan mining blong ol pipol we oli tokbaot se oli—“olgeta we hat blong olgeta i klin” (ves 21). Taem yu ridim ol ves 18–28, yu save jenisim mining ia taem yu ridim toktok ia Saeon. ?Hem i minim wanem long yu blong gat hat we i klin evriwan?
Luk tu long Moses 7:18.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Doktrin mo Ol Kavenan 95:8; 97:10–17
Tempol hem i haos blong Lod.
-
Long samfala bakgraon long seksen 95 mo 97, yu save serem wetem ol pikinini blong yu “Oli Bin Dediketem Ketlan Tempol” long Ol Doktrin mo Ol Kavenan Stori blong Ol Yangfala we Oli Rid (Gospel Laebri; luk tu long Saints, 1:210). Ol pikinini blong yu bae oli laekem blong stap priten se oli stap help blong bildimap Ketlan Tempol, (stap katem wud, hamarem ol nil, peintem ol wol mo i gohed). Mo tu, yu save soem wan pikja blong Ketlan Tempol long olgeta, olsem olgeta long aotlaen ia, taem yu stap ridim Doktrin mo Ol Kavenan 95:8 blong tijim ol pikinini blong yu, from wanem Lod i wantem yumi blong bildim ol tempol.
The Kirtland Temple
-
Afta we yufala i ridim tugeta Doktrin mo Ol Kavenan 97:15–16, yu mo ol pikinini blong yu i save serem wetem yufala wanwan, from wanem tempol i spesel long yufala. Mo tu, yufala save singsing tugeta wan singsing blong helpem ol pikinini blong yu blong filim respek long haos blong Lod, olsem “I Love to See the Temple” (Children’s Songbook, 95). ?From wanem tempol i tabu?
Doktrin mo Ol Kavenan 97:1–2, 8–9, 21
Saeon i olgeta “we hat blong olgeta i klin evriwan”.
-
Blong helpem ol pikinini blong yu blong andastanem wanem toktok ia klin i stap minim long Doktrin mo Ol Kavenan 97:21, tugeta, yufala save lukluk long wan klas blong klin wota mo putum wan samting i go insaed long wota ia blong mekem i nomo klin (olsem graon o pepa spaes). ?From wanem i impoten blong wota i stap klin? Afta, ol pikinini blong yu oli save ridim ves 21 mo putum fingga blong olgeta long toktok ia klin. ?I minim wanem blong hat blong yumi i klin evriwan? Ol ves 1–2 mo 8–9 i save givim sam aedia. ?Olsem wanem nao Sevya i help blong mekem hat blong yumi i klin?
Papa long Heven i wantem mi blong stap klin long hat.
Lod i blesem ol pipol we oli kipim ol kavenan wetem Hem.
-
?Ol pikinini blong yu oli save wanem ol kavenan we yumi mekem wetem Lod taem yumi kasem baptaes o ol kavenan insaed long tempol? Tingting blong luklukbak long ol kavenan ia wetem olgeta taem yufala i ridim Mosaea 18:9–10, 13 o Jeneral Hanbuk, 27.2. Serem wetem yufala wanwan olsem wanem yufala i stap traehad blong “wantem blong stap folem ol kavenan blong [yufala] tru long sakrifaes” (Doktrin mo Ol Kavenan 97:8).
-
Yu save invaetem ol pikinini blong yu blong droem ol pikja blong wanem we Doktrin mo Ol Kavenan 97:9 i stap tokbaot. Taem oli serem ol pikja blong olgeta, tokbaot olsem wanem Lod i bin blesem yufala taem yufala i stap kipim ol kavenan blong yufala. ?Long wanem wei nao ol blesing ia oli olsem wan “tri we tekem plante frut we oli planem … long saed blong wan reva we i klin gud”?
Blong kasem moa aedia, luk long magasin blong Fren blong manis ia.