“8–14 Septemba: ‘Stap Kwaet, mo Save se Mi Mi God’: Doktrin mo Ol Kavenan 98–101,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 98–101,” Kam Folem Mi—Blong Hom mo Jos: 2025
C.C.A. Christensen (1831–1912), Ol Sent Oli Stap Muv aot long Jackson County Misuri, c. 1878, posta peint long muslin, 77 ¼ x 113 longfala. Brigham Yang Yunivesiti Miusiom blong Art, presen blong ol apupikinini blong C.C.A. Christensen, 1970.
8–14 Septemba: “Stap Kwaet, mo Save se Mi Mi God”
Doktrin mo Ol Kavenan 98–101
Long Ol Sent long ol yia 1830, Indipendens, Misuri, i promes graon ia nao. Hem i bin “stap long senta;” blong Saeon (Doktrin mo Ol Kavenan 57:3)—siti ia blong God long wol—mo kam tugeta blong Ol Sent long ples ia i wan gudfala ples blong rere bifo long Seken Kaming. Be ol neba blong olgeta long eria ia oli bin luk ol samting long defren wei. Oli gat poen wetem klem ia se God i bin givim graon ia long Ol Sent, mo oli no glad long wanem we bae i kam afta long saed blong politik, ekonomi, mo sosol laef blong plante pipol we oli no save gud oli kam kwiktaem insaed long eria ia. Ol filing blong harem nogud bae i no longtaem i save tanem i kam long hadtaem mo raorao. Long 1833, oli bin damejem printing ofis blong Jos, mo oli fosem Ol Sent aot long ol hom blong olgeta.
Josef Smit i bin ova 800 mael longwe long Ketlan, mo nius ia i tekem wik blong i kasem hem. Be Lod i bin save wanem i stap hapen, mo Hem i bin talemaot long profet blong Hem abaot ol prinsipol blong pis mo blong leftemap tingting we bae i givim kamfot long Ol Sent—ol prinsipol we oli save helpem yumi tu taem yumi fesem fasin blong agens, taem we ol stret mo gud tingting blong yumi oli no save kamtru, o taem yumi nidim wan samting blong rimaenem yumi abaot ol evri dei hadtaem, se bae oli “wok tugeta blong gud blong [yumi]” (Doktrin mo Ol Kavenan 98:3
Luk long Saints, 1:171–93; “Waiting for the Word of the Lord,” long Revelations in Context, 196–201.
Ol aedia blong Stap Lanem Samting long Hom mo long Jos
Doktrin mo Ol Kavenan 98:1–3, 11–14, 22; 101:1–16, 22–31, 36
Ol tes blong mi oli save wok tugeta blong gud blong mi.
Sam long ol jalenj long laef blong yumi, oli hapen from ol joes blong yumi nomo. Ol narawan oli kam from joes blong ol narawan. Mo samtaem ol samting oli hapen from oli pat blong laef long wol ia. Nomata long wanem we i mekem, hadtaem i save help blong mekem i hapen ol tabu stamba tingting taem yumi tanem yumi i go long God.
Hemia i hapen long Ol Sent long Misuri long 1833, mo i hapen tu long yumi tedei. Taem yu ridim wanem we Lod i bin talem long Ol Sent long Doktrin mo Ol Kavenan 98 mo 101, tingting hevi long olsem wanem mesej blong Hem i kam tru long ol defdefren tes blong laef o ol hadtaem we maet yu bin gat. Hemia sam long ol kwestin mo ol risos blong helpem yu.
Sapos wan hadtaem i wan risal blong:
-
Ol Joes blong Yuwan: ?Wanem kaonsel—mo ol promes—we yu faenem long Doktrin mo Ol Kavenan 98:11–12; 101:1–9? ?Wanem nao yu lanem insaed long ol ves ia abaot Papa long Heven mo Jisas Kraes? ?Wanem nao yu filim se God bae i wantem yu blong mekem?
-
Ol joes blong ol narawan: ?wanem kamfot nao yu faenem long Doktrin mo Ol Kavenan 98:1–3, 22; 101:10–16, 22? ?Long wanem wei nao Lod i wantem yumi blong ansa long fasin blong abius, fasin blong jikim narawan o raorao? (Luk long Life Help, “Abuse,” Gospel Laebri; Topics and Questions, “Abuse,” Gospel Laebri.) ?Wanem nao ol ves ia oli tijim abaot olsem wanem blong putum tras blong yu long Lod?
-
Ol hadtaem blong Laef long Wol Ia: ?Wanem tingting i kam long yu abaot Doktrin mo Ol Kavenan 98:1–3; 101:22–31, 36? ?Wanem nao yu stap lanem aot long ol hadtaem blong yu? Wanem nao yu stap mekem blong invaetem help blong God? ?Olsem wanem nao Hem i stap helpem yu?
Blong lanem moa abaot olsem wanem God i save mekem “evri samting we yufala i bin gat hadtaem wetem, … oli wok tugeta blong gud blong yufala,” (Doktrin mo Ol Kavenan 98:3), tingting blong stap stadi long mesej blong Elda Anthony D. Perkins “Tingbaot Ol Sent blong Yu we Oli Stap Safa, O God blong Mifala” (Liahona, Nov. 2021, 103–5). Yu save lukaotem wan sentens insaed long mesej blong hem we i helpem yu blong andastanem olsem wanem Sevya i invaetem yu blong lukluk long ol jalenj blong yu. ?Long ol wanem wei nao yu luk se ol hadtaem blong yu oli wok tugeta blong gud blong yu o blong mekem stamba tingting blong God i hapen?
Luk tu long Rom 8:28; 2 Nifae 2:2; Doktrin mo Ol Kavenan 90:24; D. Todd Christofferson, “Come to Zion,” Liahona, Nov. 2008, 37–40; “Trial of Adversity,” “Feeling the Lord’s Love and Goodness in Trials,” “The Refiner’s Fire” (ol vidio), ChurchofJesusChrist.org.
Trial of Adversity
Feeling the Lord's Love and Goodness in Trials
The Refiner's Fire
Doktrin mo Ol Kavenan 98:23–48
Lod i wantem mi blong lukaotem pis long wei blong Hem.
Presiden Russell M. Nelson i bin tijim: “Olgeta we oli folem Jisas Kraes, oli mas soem eksampol blong ful wol i stap folem. Mi askem strong long yufala blong yufala i mekem evri samting blong endem ol raorao blong yufalawan we oli stap strong insaed long hat blong yufala, insaed long hom blong yufala, mo insaed long laef blong yufala” (“Paoa blong Faea blong Spirit,” Liahona, Mei 2022, 97).
From se i no evri samting long Doktrin mo Ol Kavenan 98:23–48 bae oli wok long wei blong yuwan long saed blong tritim ol narawan, be ?wanem prinsipol nao yu faenem we bae i save lidim yu blong endem ol raorao blong yuwan long laef blong yu? Yu save faenem sam moa trutok insaed long wan singsing abaot pis mo fasin blong fogivnes olsem “Truth Reflects upon Our Senses” (Hym, namba 273).
Moa long storian ia, long Kraes mo Yangfala Rij Rula, i kam long Heinrich Hoffman
Lod i lukaotem gud ol pipol we oli givim seves long Hem.
Ol revelesen long seksen 99 mo 100 oli givim i go long ol pipol we oli gat ol impoten responsabiliti blong Jos we oli stap wari tu abaot ol famli blong olgeta. ?Wanem nao yu faenem insaed long ol revelesen ia we i save helpem olgeta? ?Wanem mesej nao Lod i gat blong yu insaed long ol revelesen ia?
Luk tu long “Jon Murdock’s Missions to Missouri” long “‘I Quit Other Business’: Early Missionaries” mo “A Mission to Canada,” long Revelations in Context, 87–89, 202–7.
Doktrin mo Ol Kavenan 101:43–65
Blong stap folem kaonsel blong God i helpem mi blong stap sef.
Parabol long Doktrin mo Ol Kavenan 101:43–62 i eksplenem from wanem Lod i letem blong oli ronemaot Ol Sent long Saeon. Taem yu stap ridim ol ves ia, ?yu yu luk eni wei we yu yu olsem ol wokman insaed long parabol ia? ?Olsem wanem nao yu save soem long God se yu “wantem se [Lod] i lidim [yu] long wan raet mo stret wei blong [Hem i] sevem [yu]”? (luk long ol ves 63–65).
Aktem ol stori o ol parabol. Samtaem hem i moa isi blong lanem samting long mo mekem ol samting we i go wetem ol stori mo ol parabol insaed long ol skripja taem yumi putum yumiwan long ples blong ol pipol we oli tokbaot. Sapos yu stap tijim Doktrin mo Ol Kavenan 101:43–62, bae yu save invaetem olgeta we oli stap lan blong oli aktem parabol taem wan i stap ridim. ?Wanem nao ol niu tingting we yu kasem taem yu stap tekem aksen folem ol toktok?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jisas Kraes i save tanem ol hadtaem blong mi i kam ol blesing.
-
Maet yu save statem wan storian blong toktok raon taem yu stap askem ol pikinini blong yu abaot sam long ol jalenj we ol pikinini we oli gat semmak yia olsem olgeta, oli stap fesem. Afta, tugeta, yufala i save ridim Doktrin mo Ol Kavenan 98:1–3 mo tokbaot olsem wanem Jisas Kraes i save tanem ol hadtaem i kam ol blesing. Maet yu save tokbaot wetem ol pikinini blong yu abaot ol eksampol blong olsem wanem Hem i bin tanem ol hadtaem blong yu i kam ol blesing.
Doktrin mo Ol Kavenan 98:39–40
Sevya i helpem mi blong fogiv.
Not: Taem yu stap tijim ol pikinini blong yu abaot hamas i impoten blong stap fogivim man, meksua se oli andastanem tu se, sapos wan i mekem olgeta i harem nogud, oltaem oli mas talemaot long wan bigfala man we oli trastem.
-
Japta 34 mo 35 long Ol Doktrin mo Ol Kavenan Stori (128–34) i save helpem yu blong tij abaot olsem wanem oli bin tritim Ol Sent long Misuri long 1833. Yu mo ol pikinini blong yu i save tokbaot wanem Ol Sent oli bin save filim long taem ia. Afta, tugeta, yufala save ridim Doktrin mo Ol Kavenan 98:23, 39–40 blong faenemaot wanem Lod i bin wantem olgeta blong mekem. Yu mo ol pikinini blong yu i save tokbaot ol taem we yufala i nidim blong fogivim wan mo olsem wanem Lod i bin helpem yufala blong mekem.
-
Mo tu, yu save soem long ol pikinini blong yu ol pikja blong wan fes we i hapi mo wan fes we i no hapi. Tokbaot ol situesen we wan i soem fasin blong no stap kaen, mo givim tingting long ol wei we oli save ansa long kaen situesen ia. Helpem ol pikinini blong yu blong jusum sapos wanwan long ol ansa bae i mekem olgeta oli hapi o no hapi taem oli poen i go long ol fes ia. ?From wanem Jisas i wantem yumi blong fogivim ol pipol, iven olgeta we oli no naes o gud long yumi?
Chapter 34: God Warns the People of Zion: July–August 1833
Chapter 35: The Saints Leave Jackson County, Missouri: September–December 1833
Doktrin mo Ol Kavenan 101:16, 23–32
Jisas Kraes i save karem pis i kam long mi.
-
Afta we yufala i ridim Doktrin mo Ol Kavenan 101:16, helpem ol pikinini blong yu blong luksave ol filing blong pis we i kam taem yumi stap kwaet mo stap tingting long Jisas—eksampol, taem yumi stap prea o tekem sakramen. Mo tu, tugeta, yufala save singsing wan singsing abaot stap respek olsem “Reverently, Quietly” o “To Think about Jesus” (Children’s Songbook, 26, 71). ?Olsem wanem nao yumi save filim pis blong Hem insaed long hom blong yumi?
-
Maet ol pikinini blong yu bae oli intres blong stap lanem abaot laef we bae i kam olsem wanem taem we Jisas Kraes bae i kambak bakegen. Ridim Doktrin mo Ol Kavenan 101:23–32 tugeta, mo tokbaot ol samting we oli faenem insaed long ol ves ia we bae i givim glad long yumi taem Hem i kambak. ?From wanem i help blong save abaot ol samting ia taem yumi stap gat hadtaem?
Jisas Kraes bae i givim pis mo bigfala glad taem Hem i kambak bakegen.
Blong kasem moa aedia, luk long magasin blong Fren blong manis ia.