Ol Voes blong Restoresen

Ova 40 yia i pas, afta long Saeon Kamp, Josef Yang, we i bin wan memba blong kamp ia, i bin ripotem se Josef Smit i bin talem hemia:

“Ol brata. Sam long yufala i kros long mi, from se yufala i no bin faet long Misuri; be bae mi talem long yufala, God i no wantem blong yufala i faet. Bae Hem i no save oganaesem kingdom blong Hem wetem twelef man blong openem doa blong gospel long ol nesen blong wol ia, mo wetem seventi man anda long daereksen blong olgeta blong folem wokbaot blong olgeta, sapos Hem i no tekemaot olgeta long wan grup blong ol man we oli bin givim laef blong olgeta, we oli bin mekem wan bigfala sakrifaes olsem we Ebraham i bin mekem.

“Naoia, Lod i gat Olgeta Twelef blong Hem, mo Olgeta Seventi blong Hem, mo bambae i gat ol nara kworom blong Olgeta Seventi we bae oli mekem sakrifaes; mo olgeta we oli no bin mekem ol sakrifaes blong olgeta, mo ol ofring blong olgeta naoia, bae oli jes mekem olgeta afta.”

“Taem mifala i bin kasem Misuri, Lod i bin toktok long wokman blong Hem, Josef, mo i talem: ‘Mi bin akseptem ofring blong yu,’ mo mifala i bin gat janis ia blong gobak bakegen. Long rod blong mi i gobak, plante fren oli bin askem mi se, wanem yus blong singaotem ol man blong oli lego wok blong olgeta blong go long Misuri, mo afta kambak, mo i luk se oli no mekem eni samting i hapen. Oli bin askem, ‘?Huia i win aot long hemia?’. ‘Sapos Lod i no bin givim komanmen ia blong mekem hemia, wanem tingting i stap long hem blong mekem olsem?’ … Mi bin talem long ol brata ia se oli stap pem gud mi—we oli pem wetem hevi intres—yes, mekem se mak blong mi i fulap tumas wetem save we mi bin kasem taem mi bin stap travel wetem Profet.”

“Mi bin stap long Saeon Kamp wetem Profet blong God. Mi bin luk ol samting we God i bin mekem wetem hem. Mi bin luk paoa blong God we i stap wetem hem. Mi bin luk se hem i bin wan Profet. ?Wanem we i bin kamaot long hem tru long paoa blong God long misin ia, i bigwan tumas long mi mo long evriwan we i bin kasem ol instraksen blong hem.”

“Taem oli bin singaotem ol memba blong Saeon Kamp, plante long mifala i neva bin luk fes blong ol narawan; mifala i bin ol strenja long wanwan long mifala, mo plante oli neva bin luk profet. Mifala i bin stap olbaot long ol nara ples, semmak olsem kon we oli sevem long wan net, truaot long nesen. Mifala i bin ol yang man, we oli bin singaotem mifala long stat blong go antap mo pemaot Saeon, mo wanem samting we mifala i bin gat blong mekem, mifala i mas mekem wetem fet. Mifala i aot long ol defren Stet mo kam tugeta long Ketlan, mo mifala i go blong sevem Saeon, blong mekem komanmen ia we God i bin givim long mifala i hapen. God i bin akseptem ol wok blong mifala, semmak olsem we Hem i bin akseptem ol wok blong Ebraham. Mifala i bin mekem i hapen plante samting, i nomata we olgeta we oli mekem apostasi mo olgeta we oli no biliv oli bin askem plante taem kwestin ia: ‘?Yufala i bin mekem wanem?’ Mifala i bin kasem wan eksperiens we bae mifala i neva save kasem, sapos i no bin long wei ia nomo. Mifala i bin gat spesel janis blong luk fes blong profet, mo mifala i bin gat spesel janis blong travel plante kilometa wetem hem, mo luk ol wok blong Spirit blong God wetem hem, mo luk ol revelesen blong Jisas Kraes oli kam long hem, mo luk we ol revelesen ia oli kamtru. Mo hem i pulum tugeta kolosap tu handred elda truaot long nesen long eli dei ia, mo hem i bin sendem mifala blong talemaot long wol blong oli prijim gospel blong Jisas Kraes. Sapos mi no bin go long Saeon Kamp, bae mi no save stap ia tedei [long Sol Lek Siti, mo stap insaed long Kworom blong Olgeta Twelef]. … Taem mifala i bin stap long ples ia, oli sakem mifala i go long plantesen blong prijim gospel, mo Lod i bin akseptem ol wok blong mifala. Wetem evri wok blong mifala, ol samting we oli kam agens long mifala, laef blong mifala we i stap long denja plante taem, mifala i bin mas wok mo laef wetem fet.”

“Eksperiens we mifala i bin kasem taem mifala i bin travel i go long Saeon Kamp, i moa impoten, o i moa , o i moa sas bitim gol.”