“15–21 Septemba: ‘From Afta long Plante Hadtaem … Bae Blesing I Kam’: Doktrin mo Ol Kavenan 102–105,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 102–105,” Kam Folem Mi—Blong Hom mo Jos: 2025
C. C. A. Christensen (1831–1912), Saeon Kampc. 1878, tempera long muslin, 78 × 114 inj. Brigham Yang Yunivesiti Miusiom blong Art, presen blong ol apupikinini blong C.C.A. Christensen, 1970.
15–21 Septemba: “From Afta long Plante Hadtaem … Bae Blesing I Kam”
Doktrin mo Ol Kavenan 102–105
Ol Sent we oli stap long Ketlan oli bin harem nogud tumas blong harem se oli stap ronemaot ol brata mo ol sista blong olgeta we oli stap long Jakson Kaonti, Misuri, blong oli aot long hom blong olgeta. Maet long tetaem ia, ol toktok blong Lod i bin leftemap tingting blong olgeta taem Lod i talem se “fasin blong pemaot Saeon” i mas “kam tru long paoa” (Doktrin mo Ol Kavenan 103:15). Wetem promes ia long hat blong olgeta, ova long 200 man, i gat 25 woman mo pikinini, oli joenem wanem we oli singaotem Kamp blong Isrel, we afta oli save long hem olsem Saeon Kamp. Misin blong hem i blong maj i go long Misuri mo sevem Saeon.
Long ol memba blong kamp, blong sevem Saeon i minim blong putumbak Ol Sent long graon blong olgeta. Be bifo oli kasem Jakson Kaonti, Lod i talem long Josef Smit blong seraotem Kamp blong Saeon. Sam memba blong kamp oli konfius mo harem nogud; i luk olsem se rod we oli bin tekem i no bin go gud mo ol promes blong Lod oli no bin hapen. Be ol narawan oli luk hemia long defren wei. I nomata we Ol Sent we oli ronemaot olgeta oli no karembak ol graon mo hom blong olgeta, ol eksperiens ia i givim wan digri blong “pemaot” Saeon, mo i bin mekem i “kam tru long paoa.” Ol fetful memba blong Saeon Kamp, we plante long olgeta, we afta oli bin kam ol lida blong Jos, oli bin testifae se eksperiens ia i bin mekem fet blong olgeta long paoa blong God i kam bigwan moa, oli save moa se Kraes i singaotem Josef Smit, mo oli gat moa fet long Saeon—i no Saeon we i ples ia nomo, be Saeon we i ol pipol blong God. Oli no bin askem hamas valiu blong wok ia i no bin wan sakses; be oli bin lanem se stret wok i blong folem Sevya, iven taem yumi no andastanem evri samting. Hemia i olsem wanem, long en, bae oli pemaot Saeon.
Luk long Saints, 1:194–206; “The Acceptable Offering of Zion’s Camp,” long Revelations in Context, 213–18.
Ol aedia blong Lanem Samting long Hom mo long Jos
Doktrin mo Ol Kavenan 102:12–23
?Wanem nao i stamba tingting blong ol membasip kaonsel?
Seksen 102 i gat insaed ol minit blong miting long Ketlan, Ohaeo, ples we fas hae kaonsel blong Jos i bin oganaes. Long ol ves 12–23, Lod i tokbaot ol fasin blong wok we ol hae kaonsel oli folem taem oli holem ol membasip kaonsel blong olgeta we oli bin brekem ol series loa.
Presiden M. Russell Ballard i tijim: “Samtaem ol memba oli askem se from wanem oli stap holem ol Jos [membasip] kaonsel. Stamba tingting biaen long hemia, i gat trifala pat long hem: i blong sevem sol blong hem we i brekem loa, blong protektem hem we i no gat rong, mo blong protektem klin fasin, tru fasin, mo gudfala nem blong Jos” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).
Luk tu long Topics and Questions, “Membership Councils,” Gospel Laebri.
Doktrin mo Ol Kavenan 103:1–12, 36; 105:1–19
Saeon, bae oli save bildim nomo antap long ol prinsipol blong stret mo gud fasin.
?From wanem Ol Sent oli lusum promes graon blong olgeta long Misuri? Bae i save gat plante risen—be i gat wan, Lod i talem se “from fasin blong ol pipol blong mi blong brekem loa.” Sapos i no bin from hemia, Hem i “putumbak olgeta finis naoia.” long Saeon (Doktrin mo Ol Kavenan 105:2). Taem yu stap ridim Doktrin mo Ol Kavenan 103:1–12, 36; 105:1–19, maet bae yu luksave sam samting we i bin stopem wok blong stanemap Saeon long Misuri mo ol narawan we maet oli bin save help. ?Wanem nao yu lanem we i save helpem yu blong stanemap Saeon insaed long hat, hom mo komuniti blong yu?
Doktrin mo Ol Kavenan 103:12–13, 36; 105:1–6, 9–19
Ol blesing oli kam afta long ol tes blong fet.
Long plante wei, blong stap tekempat long Saeon Kamp i wan tes blong fet. Wokbaot ia i bin longfala, ples i bin hot tumas, mo i no gat tumas kaekae mo wota. Mo afta evri samting we oli bin gotru long hem, Saeon Kamp i no bin gat sakses blong putumbak Ol Sent long graon blong olgeta. Pikjarem long maen blong yu se yu bin gat janis blong raetem wan leta i go long wan memba blong Saeon Kamp, we fet blong Hem long Lod i stap seksek tru long eksperiens blong hem. ?Wanem nao bae yu save talem blong leftemap tingting blong man o woman ia? ?Wanem nao ol trutok we yu faenem long Doktrin mo Ol Kavenan 103:5–7, 12–13, 36; 105:1–6, 9–19 we i save help?
Afta, maet yu save tingting long wan eksampol blong tedei we i moa olsem wan tes olsem blong Saeon Kamp—olsem wan misinari we i wok had, be i no gat wan i joenem Jos from ol efot blong hem. Folem wanem we yu bin stadi long hem, ?long wanem wei nao yu save helpem misinari ia blong luk se misin blong hem i gat sakses yet?
?Long wanem wei nao Lod i bin blesem yu “afta long plante hadtaem”? (Doktrin mo Ol Kavenan 103:12).
Luk tu long 1 Nifae 11:16–17; Alma 7:11–12; Doktrin mo Ol Kavenan 6:33–36; 84:88; 101:35–36; David A. Bednar, “On the Lord’s Side: Lessons from Zion’s Camp,” Ensign, July 2017, 26–35, o Liahona, July 2017, 14–23; Topics and Questions, “Endure to the End,” Gospel Laebri; “How Firm a Foundation,” Hym, namba 85.
Blong stap rere, i taem we yu stadi long histri bakgraon blong ol revelesen. Blong andastanem ples o taem we ol revelesen ia oli kam insaed long Doktrin mo Ol Kavenan bae i save helpem yu blong andastanem mo yusum ol prinsipol we oli tijim. Kam Folem Mi i givim ol link we i go long plante long ol risos ia. Blong Doktrin mo Ol Kavenan 102–5, luk long Saints, 1:194–206; “The Acceptable Offering of Zion’s Camp,” long Revelations in Context, 213–18; mo “Voices of the Restoration: Zion’s Camp.”
Kamp blong Isrel oli kamp long saed blong reva blong Smol Fising Reva.
?Wanem nao stamba tingting blong ol hadtaem?
Tingting long kaonsel blong Elda Orson F. Whitney abaot stamba tingting blong ol hadtaem: “I no gat wan soa blong bodi we yumi safa long hem o wan hadtaem we yumi kasem eksperiens long hem i blong nating. Hem i givhan long edukesen blong yumi, long divelopmen blong ol kaen kwaliti ia olsem fasin blong save wet longtaem, fet, fasin blong gat strong paoa, mo fasin blong gat tingting i stap daon. Ol samting we yumi safa from mo ol samting we yumi stanap strong from, speseli nao taem yumi stanap strong wetem fasin blong save wet longtaem, i bildimap fasin blong yumi, i klinim hat blong yumi, i mekem sol i kam bigwan, mo i mekem yumi kam moa kaen mo gat bigfala lav, moa klin inaf blong oli singaotem yumi ol pikinini blong God … Mo hem i tru long fasin blong harem nogud mo safaring, hadwok mo hadtaem, we yumi kasem edukesen ia we yumi kam long wol ia blong kasem, we i save mekem yumi kam moa olsem Papa mo Mama blong yumi long heven” (long Spencer W. Kimball, Faith Precedes the Miracle [1972], 98).
Doktrin mo Ol Kavenan 104:11–18, 78–83
Lod i bin mekem mi wan “man blong lukaot long ol blesing we [Hem] givim long wol ia.”
Antap long ol tes long Misuri, long 1834, Jos i bin fesem ol hadtaem long saed blong mane, we i tekem tu ol bigfala kaon mo ol samting blong pem. Long seksen 104, Lod i bin givim kaonsel long saed blong faenens situesen blong Jos. ?Olsem wanem nao bae yu save yusum ol prinsipol we i stap long ol ves 11–18 mo 78–83 long ol faenens desisen blong yuwan?
Luk tu long “Treasure in Heaven: The Jon Tanner Story” mo “The Labor of His Hands” (ol vidio), Gospel Laebri.
Treasure in Heaven: The John Tanner Story
The Labor of His Hands
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Mi save stap “olsem wan laet long wol” taem mi folem Jisas.
-
Yu save invaetem ol pikinini blong yu blong holem ol pikja blong wan balb blong laet, wan kandel o wan narafala samting we i givim laet taem yu stap ridim Doktrin mo Ol Kavenan 103:9. ?Olsem wanem nao yumi save stap olsem wan laet long ol narawan taem yumi folem Jisas Kraes? Luk tu long “Jesus Wants Me for a Sunbeam” (Children’s Songbook, 60–61).
Mi save stap olsem wan laet long ol narawan taem mi folem Jisas Kraes.
Doktrin mo Ol Kavenan 104:13–18
Lod i wantem mi blong serem wanem we mi gat wetem ol pipol we oli stap long nid.
-
Bae yu wantem blong givim smoltaem long ol pikinini blong yu blong mekem wan lis blong ol blesing we God i bin givim long olgeta (olsem kaekae, klos, ol talen, fet mo wan hom). Leftemap tingting blong olgeta blong raetemdaon long lis plante long olgeta blesing ia olsem we oli save mekem. Afta, tugeta, yufala save ridim Doktrin mo Ol Kavenan 104:13–18, blong stap lukaotem ol ansa blong ol kwestin olsem hemia: ?Huia nao i tru bos blong evri samting? ?From wanem Hem i wantem yumi blong mekem olgeta samting ia? Yu mo ol pikinini blong yu i save serem ol eksperiens blong ol taem we wan i bin givim wan samting long yufala taem yufala i nidim (luk tu long “The Coat” [vidio], Gospel Laebri).
2:8The Coat
Lod bambae i blesem mi taem mi stap obei ol komanmen blong Hem.
-
Plante taem, long seksen 104 Lod i givim ol promes blong “plante, plante blesing” long olgeta we oli stap fetful blong obei ol komanmen blong Hem. Blong helpem ol pikinini oli andastanem wanem “plante we plante” i stap minim, yu save droem wan sekol mo askem ol pikinini blong yu blong helpem yu blong mekem ol sekol ia i kam plante—stap droem tu, afta fo, afta eit, afta sikstin mo i gohed. Evri taem yu ademap ol sekol, helpem ol pikinini blong yu oli tingting long wan blesing we Papa long Heven i bin givim long olgeta.
Doktrin mo Ol Kavenan 105:38–40
Mi save kam wan man o woman blong putum pis.
-
Blong helpem ol pikinini blong yu blong lanem stori blong Kamp blong Saeon, yu save serem “Japta 36: Kamp blong Saeon” (long Ol Doktrin mo Ol Kavenan Stori, 135–39, o vidio we i go wetem long Gospel Laebri). Stop wanwan taem blong tokbaot ol lesen we yumi save lanem long Saeon Kamp—eksampol,se Lod i wantem yumi blong gat pis mo wok tugeta be i no blong stap raorao mo stap faet (luk tu long Russell M. Nelson, “Peacemakers Needed,” Liahona, Mei 2023, 98–101).
4:25The Camp of Israel
-
Yu save ridim Doktrin mo Ol Kavenan 105:38–40 tu, mo askem ol pikinini blong stanap evri taem we oli harem toktok ia “pis.” Eksplenem se Lod i wantem Ol Sent blong mekem pis wetem ol pipol we oli no stap kaen. Helpem ol pikinini blong yu blong tingting long samsamting we oli save mekem blong stap olsem ol man blong mekem pis, mo invaetem olgeta blong mekem drama long sam situesen.
Blong kasem moa aedia, luk long magasin blong Fren blong manis ia.