“28 Julae–3 Ogis: ‘Paoa we I Olsem Hemia blong God’: Doktrin mo Ol Kavenan 84,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 84,” Kam Folem Mi—Blong Hom mo Jos: 2025
Wan smol pat blong pikja ia Restoresen blong Melkesedek Prishud, i kam long Liz Lemon Swindle
28 Julae–3 Ogis: “Paoa we I Olsem Hemia blong God”
Doktrin mo Ol Kavenan 84
Stat long taem we prishud i bin kambak bakegen long 1829, Ol fas Lata-dei Sent oli bin gat blesing we i kam long Lod tru long tabu paoa ia. Oli bin kasem baptaes, kasem presen ia we i Tabu Spirit, mo oli bin singaot blong wok tru long prishud atoriti, semmak olsem fulap long yumi tedei. Be blong save yusum prishud paoa i no semmak samting olsem blong andastanem fulwan, mo God i gat moa we Hem i wantem Ol Sent blong Hem blong andastanem—speseli wetem ol restoresen blong ol tempol odinens we oli stap kam. Revelesen blong prishud long 1832, we naoia i Doktrin mo Ol Kavenan 84, i mekem lukluk blong Ol Sent i kam bigwan moa long wanem stret nao hem i prishud. Mo hemia i save semmak long yumi tedei. Afta long evri samting, i gat fulap blong lanem abaot tabu paoa we i holem “ki blong kasem save long saed blong God,” we i soemaot “paoa we i olsem hemia blong God,” mo hemia i stap rere long yumi blong “luk fes blong God, we i Papa, mo laef” (ol ves 19–22).
Ol aedia blong Stap Lanem Samting long Hom mo long Jos
Doktrin mo Ol Kavenan 84:17–32
Mi gat akses long prishud paoa mo ol blesing blong God.
Taem yu tingting long toktok ia prishud, ?wanem nao i kam long maen blong yu? ?Long wanem wei nao prishud paoa blong God i jenisim laef blong yu?
Afta we yu tingting hevi long ol kwestin ia, bae yu save stadi long Doktrin mo Ol Kavenan 84:17–32, blong stap lukaotem wanem nao God i wantem yu blong save abaot prishud paoa blong Hem. Tingting long olsem wanem yu save yusum ol ves ia blong tokbaot prishud mo stamba tingting blong hem long wan narawan.
Wan samting we bae yu faenem i we, tru long ol odinens blong prishud “paoa we i olsem hemia blong God, i kamaot” (luk long ol ves 19–21). Maet yu save mekem lis blong ol odinens blong prishud we yu bin tekempat long olgeta long (lis long Jeneral Hanbuk, 18.1, 18.2, i save help). ?Long wanem wei nao ol odinens ia—mo ol kavenan we i go wetem—i tekem i kam paoa blong God long laef blong yu? ?Laef blong yu bae i olsem wanem sapos i nogat olgeta?
Presiden Russell M. Nelson i tijim se: “Evri woman mo evri man, we oli mekem ol kavenan wetem God mo oli stap kipim ol kavenan ia, mo oli stap klin inaf blong tekempat long ol prishud odinens ia, oli save go stret blong kasem paoa blong God” (“Ol Rij Samting long Saed blong Spirit,” Liahona, Nov. 2019, 77). Tingting blong stap stadi long mesej blong Presiden Nelson blong stap lukaotem ol wei we yu save “yusum paoa blong Sevya insaed long laef blong [yu] .”
Luk tu long Doktrin mo Ol Kavenan 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Laebri; Jeneral Hanbuk, 3.6, Gospel Laebri.
Doktrin mo Ol Kavenan 84:31–44
Prishud i kam wetem wan strong promes mo wan kavenan.
Strong promes mo kavenan ia blong prishud (luk long Doktrin mo Ol Kavenan 84:31–44) i gat spesel wei blong ol pikinini boe blong Papa long Heven oli yusum, we oli odenem olgeta i kam insaed long wan prishud ofis, be plante long ol promes blesing insaed long ol ves ia, oli kam long evri pikinini blong God. ?Wanem nao i ol promes ia, mo wanem nao God i askem long yumi blong mekem blong kasem olgeta?
Elda Paul B. Pieper i bin tijim: “Hem i gud tumas blong luk se long strong promes mo kavenan ia blong prishud long [luk long Doktrin mo Ol Kavenan 84:31–44, Lod i yusum ol toktok ia kasem mo akseptem. Hem i no yusum toktok ia odenem. Hem i insaed long tempol we man mo woman—tugeta—i kasem mo akseptem ol blesing mo paoa blong tugeta Aronik mo Melkesedek Prishud” (“Revealed Realities of Mortality” Ensign, Jan. 2016, 21).
Taem yu stadi long Doktrin mo Ol Kavenan 84:31–44, tingting hevi long wanem i minim blong “kasem” mo “akseptem” prishud. ?Olsem wanem nao hemia i defren long taem we wan oli odenem hem i kam long prishud ofis? ?Wanem bakegen Lod i invaetem yu blong akseptem insaed long ol ves ia? ?Olsem wanem nao yu stap mekem hemia?
?Wanem nao yu faenem we i givim insperesen long yu blong stap fetful moa blong stap akseptem Sevya, Papa blong Hem, ol wokman blong Hem, mo prishud paoa blong Hem?
Luk tu long Doktrin mo Ol Kavenan 121:36–46.
Doktrin mo Ol Kavenan 84:43–61
Blong stap laef folem toktok blong God i givim laet mo trutok long laef blong mi.
?Wanem nao ol trutok we yu faenem long Doktrin mo Ol Kavenan 84:43–61 we i helpem yu blong andastanem from wanem yu nid blong stadi long tok blong God oltaem? Luksave wanem i defren bitwin laet mo tudak long ol ves ia; ?olsem wanem nao “wok strong wetem strong tingting blong folem ol toktok blong laef we i no save finis” blong yu i karem laet, trutok, mo “Spirit blong Jisas Kraes” i kam long laef blong yu? (Olol ves 43, 45).
Luk tu long 2 Nifae 32:3.
Komperem ol prinsipol blong gospel wetem ol samting we oli kolosap semmak long olgeta. ?Yu save tingting long wan samting we i kolosap semmak long wanem trutok we i stap long ol ves 43–44? Eksampol, ?olsem wanem nao blong stap folem ol step insaed long wan resipi i semmak olsem blong stap “laef folem evri toktok … blong God”?
“Gogohed blong lisin gud long ol toktok blong laef we i no save finis.”
Doktrin mo Ol Kavenan 84:62–91
Lod bambae i stap wetem mi taem mi stap givim seves long Hem.
Taem yu ridim ol ves ia, yu save fanem ol wei we Lod i bin talem se Hem bae i save sapotem ol wokman blong Hem. ?Olsem wanem nao, bae ol promes ia oli aplae long wok we Hem i bin askem yu blong mekem? Eksampol, ?olsem wanem ol promes long ves 88 i bin kam tru mo hapen long laef blong yu?
Doktrin mo Ol Kavenan 84:106–110
Evriwan i save kontribiut long wok blong God.
?Wanem nao yu lanem long ol ves ia, abaot olsem wanem Lod i stap mekem ol wok blong Hem i kamtru? ?Wanem kaonsel mo ol blesing nao yu faenem? Bae yu save tingting abaot olsem wanem yu bin “kam antap wetem fasin blong no stap flas” from se yu givim seves wetem wan we i “strong long Spirit,” we i tekem tu, ol pipol long famli blong yu.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Stap Tijim Ol Pikinini
Ol odinens blong tempol oli helpem mi blong rere blong laef wetem Papa long Heven bakegen.
-
Blong helpem ol pikinini blong yu oli lukluk fored blong go long tempol, yu save krietem wan pasel gem aot long wan pikja blong tempol. Long biaen long wanwan pis, yu save raetem wan samting we yumi mekem insaed long tempol, olsem blong kasem baptaes blong ol bubu blong yumi blong bifo, blong sil wetem famli blong yumi mo blong stap mekem ol kavenan wetem God. Ridim Doktrin mo Ol Kavenan 84:4–5 wetem ol pikinini blong yu, mo askem olgeta blong lisin long wanem we Lod i askem long Ol Sent blong bildimap. Taem yu mo ol pikinini blong yu i putum ol pasel tugeta, serem wetem wanwan long yufala abaot ol narafala samting we yumi save mekem blong rere blong go insaed long tempol.
Doktrin mo Ol Kavenan 84:19–22
Mi save kasem paoa blong Papa long Heven tru long ol odinens blong prishud.
-
Blong helpem ol pikinini blong yu blong andastanem wanem wan odinens i minim, tingting blong stap lukluk long ol pikja blong sam long ol odinens blong prishud wetem olgeta, olsem long Gospel Art Buk, ol namba 103–8, aktiviti pej, blong wik ia. Askem olgeta blong tokbaot wanem i stap hapen long wanwan pikja. Afta, tugeta, yufala save ridim Doktrin mo Ol Kavenan 84:19–22. ?From wanem nao Papa long Heven i wantem yumi blong kasem ol odinens ia? Talem long ol pikinini blong yu, olsem wanem yu bin filim paoa blong God from se yu bin kasem ol odinens mo ol kavenan we yu bin mekem. (Luk tu long “Prishud Paoa, Atoriti, mo Ol Ki” long apendiks A o apendiks B.)
Mi mi fren blong Jisas taem mi folem Hem.
-
Afta, we yufala i ridim tugeta Doktrin mo Ol Kavenan 84:77 , askem ol pikinini blong yu se, wanem i minim blong stap wan fren. Bae yu save tokbaot ol gudfala fren we yu bin gat. ?Long wanem wei nao Jisas i soem long yumi se Hem i wantem yumi blong stap ol fren blong Hem? ?Long wanem wei nao yumi soem se yumi wantem hemia tu? Wan singsing olsem “Mi Traem blong Kam Olsem Jisas.” (,” Liahona, Epril 2012, pej 64, i save helpem storian ia.
Papa long Heven i helpem ol wokman blong Hem.
-
Ol pikinini blong yu bae oli glad blong stap harem abaot olsem wanem ol misinari oli bin helpem yu, famli blong yu, o ol bubu blong yu blong akseptem gospel. Afta, yu save rid abaot wan spesel promes we Lod i bin mekem i go long ol misinari long Doktrin mo Ol Kavenan 84:88. Maet ol pikinini blong yu oli save tingting long ol aksen we i go wetem ves ia. Tingting blong stap serem abaot wan taem we yu bin stap givim seves long Lod mo filim se Hem i bin stap wetem yu, olsem we oli tokbaot long ves 88. Mo tu, yu save helpem ol pikinini blong yu blong oli tingting long ol wei we oli save stap ol misinari naoia. Testifae se Papa long Heven bae i helpem yumi blong save wanem blong talem taem yumi toktok wetem ol narawan abaot Jisas Kraes.
Blong kasem moa aedia, luk long magasin blong Fren blong manis ia.