Doktrin mo Ol Kavenan 89–92

Taem ol elda long Skul blong ol Profet oli bin harem Josef Smit i ridim Tok blong Waes blong fas taem, wan taem nomo oli “sakemaot ol paep blong smok mo ol lif blong tabak blong olgeta i go long faea” (Saints, 1:168). Oli wantem blong soem se oli tingting blong olgeta i wantem blong obei long Lod. Maet yu bin “sakemaot” long laef blong yu finis sam samting we Tok blong Waes i bin wonem yu agensem, be wanem moa yu save lanem aot long revelesen ia? Tingting long ol aedia ia:

• Tingting long revelesen olsem “wan prinsipol wetem wan promes” (ves 3)—ol trutok blong stap folem we bae i lidim ol taem blong mekem desisen. ?Wanem ol prinsipol we yu faenem we i save lidim ol desisen blong yu? ?Wanem ol blesing we Lod i promes blong givim? (luk long ol ves 18–21). ?Long wanem wei nao Hem i bin mekem ol promes ia oli kam tru long laef blong yu?

• ?Wanem ol eksampol we yu bin luk we i “ol nogud samting mo ol plan we oli stap … long hat blong ol man we oli stap mekem ol sikret samting” we i go wetem Tok blong Waes? (ves 4). Blong ademap long revelesen ia, ?wanem nao Lod i bin givim blong helpem yu blong stap longwe o winim ol nogud samting ia?

• ?Wanem nao revelesen ia i tijim yu abaot Lod? ?Olsem wanem nao Tok blong Waes i go wetem Doktrin mo Ol Kavenan 29:34–35?

• ?Wanem nao spirit i talem long yu blong mekem blong lukaotem gud moa bodi blong yu?

Maet yu bin gat ol janis blong eksplenem long ol narawan se from wanem yu laef folem Tok blong Waes—mo bae yu save gat moa janis long fiuja. Tingting long olsem wanem yu save yusum ol janis ia blong testifae abaot Sevya, hamas bodi blong yumi oli tabu mo ol narafala trutok long saed blong spirit. Blong kasem ol aedia, luk long “Bodi blong yu i tabu,” Blong Ol Yut Oli Kam Strong: Wan Gaed blong Stap Mekem Ol Joes, 22–29.

Luk tu long 1 Korin 6:19–20; Thomas S. Monson, “Principles and Promises,” Liahona, Nov. 2016, 78–79; Topics and Questions, “Tok blon Waes,” Gospel Laebri; “The Word of Wisdom,” long Revelations in Context, 183–91; “Addiction,” “Physical Health,” Life Help, Gospel Laebri.

4:40

Long seksen 90, Lod i givim ol instraksen abaot “seves mo presidensi” (ves 12) blong Josef Smit, Sidni Rigdon, mo Frederik G. Williams—ol memba blong wanem we, naoia, yumi stap singaotem, Fas Presidensi. ?Wanem nao yu lanem abaot Fas Presidensi long ol ves 1–17? Tingting blong luklukbak long ol mesej we i jes pas i no longtaem we i kam long ol memba blong Fas Presidensi. ?Wanem nao oli mekem blong “putum oda long evri wok blong jos mo kingdom ia”? (ves 16). ?Long wanem wei nao yu save soem se oli no “wan smol samting,” long yu? (ves 5).

Tingting blong singsing o stap ridim ol toktok blong “Come, Listen to a Prophet’s Voice” (Hym, namba 21) o wan narafala singsing abaot ol profet we i go wetem ol tijing insaed long ol ves ia. ?Olsem wanem seves blong Fas Presidensi i helpem yu blong save Papa long Heven mo Jisas Kraes?

Tingting hevi long eni eksperiens we yu bin gat we oli testifae abaot promes blong Lod we i stap long Doktrin mo Ol Kavenan 90:24. Tingting blong raetemdaon ol eksperiens ia, mo blong stap serem olgeta wetem wan memba blong famli o wan we yu lavem hem—mebi wan we i nidim blong harem toktok we i leftemap tingting blong hem. Sapos i gat sam blesing we yu stap wet yet from, tingting hevi long wanem nao yu save mekem blong gohed blong stap fetful taem yu stap wet blong luk olsem wanem “evri samting bambae oli wok tugeta blong gud blong yu.”

Viena Jak i bon long 10 Jun 1787 long Masajusets. Wan woman we i gat strong fet, mo i gat plante mane; fastaem we Viena i mitim ol misinari, hem i long 1831. Afta we hem i kasem wan witnes long saed blong spirit, se mesej blong olgeta i tru, hem i travel blong mitim Profet long Ketlan, Ohaeo; long ples ia hem i bin kasem baptaes.

Viena i bin obei long advaes we Lod i bin givim long hem, we i stap long Doktrin mo Ol Kavenan 90:28–31. Konsekresen blong hem long Lod, we i tekem tu, ol donesen we hem i bin mekem finis long Ketlan, i kam long wan impoten taem blong Jos; taem ol lida oli bin stap traem blong pem graon we bae Ketlan Tempol bae oli bildim long hem. Viena i bin “fetful, mo … i no stap mekem nating” truaot long laef blong hem, mo long en, hem i bin save “mekem gud hom blong hem mo stap long pis” (ves 31long Sol Lek Vale, mo hem i bin ded long ples ia taem hem i bin gat 96 yia.

Yumi evriwan i gat eksperiens abaot ol mesej we insaed “i gat plante samting… we oli tru” mo “i gat plante samting … we oli no tru” (Doktrin mo Ol Kavenan 91:1–2). ?Wanem kaonsel nao yu faenem long seksen 91 we i save helpem yu blong luksave trutok insaed long ol mesej we bin gotru long hem? ?Long wanem wei nao Spirit i helpem yu blong luksave trutok aot long giaman?

• Blong introdiusum seksen 89, maet yu mo ol pikinini blong yu i save lukluk long wan pikja blong wan tempol o wan singsing abaot helt blong bodi olsem “The Lord Gave Me a Temple” (Children’s Songbook, 153), blong tijim se ol bodi blong yumi oli olsem ol tempol blong ol spirit blong yumi. Helpem ol pikinini blong yu blong aktem ol wei we oli save lukaot gud long bodi blong olgeta.

• Blong lanem abaot ol komanmen blong Lod long Doktrin mo Ol Kavenan 89:10–17, yu mo ol pikinini blong yu i save dro o lukluk ol pikja blong ol samting we oli gud blong kakae o blong mekem blong kipim bodi blong yumi i helti (luk long pikja mo aktiviti pej long en blong aotlaen ia). ?Wanem nao Lod i bin wonem yumi blong no yusum? ?From wanem Hem i wantem yumi blong lukaot gud long bodi blong yumi?

• Elda Gary E. Stevenson i bin givim kaonsel long ol yangfala pipol blong mekem plan long fored from wanem we bae oli mekem taem oli fesem temtesen wetem alkol o ol drag. Hem i bin tijim, “Bae yu faenem se temtesen i gat smol kontrol nomo ova long yu. Bambae yu mekem finis wan desisen long olsem wanem bae yu ansa mo wanem bae yu mekem. Bae yu no nid blong disaed evri taem” (“Your Priesthood Playbook,” Liahona, Mei 2019, 48). Afta we yufala i ridim tugeta Doktrin mo Ol Kavenan 89:4 mo stetmen blong Elda Stevenson, kaonsel wetem ol pikinini blong yu abaot olsem wanem oli save disaed naoia—blong ful laef blong olgeta—blong laef folem Tok blong Waes. Yufala save mekem drama blong olsem wanem bae oli ansa long wan man, iven wan fren, taem oli givim wan samting we i agensem Tok blong Waes long olgeta. ?Long wanem wei nao Lod i blesem yumi taem yumi obei long Tok blong Waes? (Lukluk long ol ves 18–21)

• Yu save lukluk long ol pikja blong ol profet blong bifo o singsing wan singsing olsem “Follow the Prophet” (Children’s Songbook, 110–11). ?Olsem wanem nao God i blesem ol pikinini blong Hem tru long ol profet blong Hem? ?From wanem nao yumi mas lisin long ol profet blong God? (luk long Doktrin mo Ol Kavenan 90:5). Afta, yu mo ol pikinini blong yu i save lukluk long wan pikja blong wan profet we i stap laef mo serem sam samting we Lod i bin tijim o wonem yumi long hem, tru long profet ia we i stap laef. ?Olsem wanem nao yumi save folem profet?

• Yu save talem i sot seksen heding blong Doktrin mo Ol Kavenan 91 blong helpem ol pikinini blong yu blong andastanem from wanem oli bin givim revelesen ia. Afta, oli save tingting long ol ples, olsem long media, long ples ia yumi faenem se “i gat plante samting… we oli tru” mo “i gat plante samting … we oli no tru” (ol ves 1–2). ?Wanem nao ol ves 4–6 i tijim yumi abaot Tabu Spirit? ?Olsem wanem nao Tabu Spirit i helpem yumi blong save wanem we i tru?