Doktrin mo Ol Kavenan 88

Sam dei i pas nomo, afta long woning blong wo we bae i “kapsaet antap long evri nesen,” (Doktrin mo Ol Kavenan 87:2), Lod i givim wan revelesen we Josef Smit i singaotem wan “lif blong oliv tri,” we hem i wan tradisen saen blong pis (Doktrin mo Ol Kavenan 88, seksen heding; luk tu long Jenesis 8:11). Truaot long stadi blong yu long seksen 88 long wik ia, lukaotem ol mesej blong Lod long yu abaot pis.

Ol toktok laet mo loa oli ripitim plante taem long seksen 88. Makem o mekem not long ol ves we yu fanem ol toktok ia long ol ves 6–67, mo raetemdaon wanem yu lanem abaot laet mo loa—mo abaot Jisas Kraes. ?Wanem nao yu filim we kam tru long insperesen blong mekem blong kasem laet mo laef folem “loa blong Kraes”? (ves 21).

Luk tu long Aesea 60:19; Jon 1:1–9; 3 Nifae 15:9; Timothy J. Dyches, “Light Cleaveth unto Light,” Liahona, Mei 2021, 112–15; Sharon Eubank, “Christ: The Light That Shines in Darkness,” Liahona, Mei 2019, 73–76.

?Wanem nao ol eksperiens we i bin soem long yu se ol promes insaed long ol ves ia oli tru? ?Wanem hem i nekis step blong yu blong “kam kolosap” long Kraes? Tingting blong mekem singsing ia “Nearer, My God, to Thee” (Hym, namba 100) i pat blong stadi mo wosip blong yu.

Oda blong Lod blong “mekem yufala i kam tabu,” i kamaot tu taem long seksen 88 (ol ves 68, 74 ?Wanem nao yu ting se toktok ia i stap minim? Yu save luklukbak long sam long ol sentens ia anda long “Tabu, Fasin blong Mekem I Kam” long Gaed long Ol Skripja (Gospel Laebri). ?Olsem wanem nao yumi kam tabu? Letem kwestin ia i lidim stadi blong yu long Doktrin mo Ol Kavenan 88:67–76, mo raetemdaon eni niu tingting long saed blong spirit we yu kasem.

Lod i talem long Ol Sent blong stanemap wan “skul blong ol profet,” long Ketlan (Doktrin mo Ol Kavenan 88:137). Plante long ol instraksen long seksen 88 i tijim olgeta olsem wanem blong mekem hemia. Instraksen ia i save helpem yu tu blong “stanemap … wan haos blong lan” (ves 119) long laef blong yuwan. Be, yu save lukluk long ol ves 77–80 mo 118–26 olsem wan plan blong “jenisim hom blong yu [o laef blong yu] i kam wan senta blong lanem gospel” mo “wan tabu ples blong fet” (Russell M. Nelson, “Blong Kam Ol Lata-dei Sent we I Givim Eksampol,” Liahona, Novemba 2018, 113). Bae i wan gudfala samting blong droem wan plan blong “jenisim” laef blong yuwan, bae i luk olsem blong tekem tu, ol sentens long ol ves ia we yu filim se yu nidim blong praktisim.

Bae i help blong lukluk long ol kwestin ia: ?From wanem fasin blong stap lanem samting mo edukesen oli impoten long Lod? ?Wanem nao Hem i wantem mi blong stadi? ?Olsem wanem nao Hem i wantem mi blong lanem samting? Lukaotem ol ansa blong ol kwestin ia long ol ves 77–80 mo long “Trutok bae i mekem yu yu kam fri” (Blong Ol Yut Oli Kam Strong: Wan Gaed Buk blong Mekem Ol Joes, 30–33).

?Wanem nao yu ting se i minim blong lanem samting “tru long stadi, mo tu, tru long fet”? (ves 118). ?Wanem nao yu lanem long mesej blong Elda Mathias Held abaot “Stap Lukaotem Save Tru long Spirit”? (Liahona, Mei 2019, 31–33).

Luk tu long Topics and Questions, “Seeking Truth and Avoiding Deception,” Gospel Laebri; “A School and an Endowment,” long Revelations in Context, 174–82.

• Yu save statem wan storian abaot Doktrin mo Ol Kavenan 88:33 taem yu askem ol pikinini blong yu blong tokbaot ol presen we oli bin givim long olgeta—tugeta, olgeta we oli bin kasem wetem bigfala glad mo ol narawan we oli no bin kasem. Bae oli save aktem taem oli stap kasem wan presen wetem bigfala glad. Afta, yu save tokbaot ol presen we Papa long Heven i givim long yumi (olsem presen ia we i Tabu Spirit). ?Olsem wanem nao yumi kasem ol presen ia wetem glad?

• Doktrin mo Ol Kavenan 88:63 i gat insaed ol toktok blong aksen we i save givim insperesen abaot sam naesfala aktiviti blong leftemap tingting blong ol pikinini blong yu blong lukaotem ples we Lod i stap long hem long laef blong olgeta. Eksampol, ?yu mo ol pikinini blong yu, yufala i save tingting long wan gem blong stap toktok raon long sentens ia “lukaotem mi wetem strong tingting mo bambae yufala i faenem mi” (oli ademap italik) o “noknok, mo bae i open long yufala”?

• Blong tokbaot plante invitesen blong Sevya we i blong “kam kolosap long mi,” yu save askem wan pikinini blong holem wan pikja blong Jisas (olsem pikja long en blong aotlaen ia) long wan saed blong rum taem narafala pikinini i stanap long narasaed blong rum. Taem ol pikinini blong yu oli tingting abaot ol samting we oli save mekem blong kam kolosap long Sevya, oli save mekem wan step i go from pikja, mo pikinini we i holem pikja i save mekem wan step i go from ol narafala pikinini ia. Toktok wetem ol pikinini blong yu abaot wanem nao yu save mekem blong kam kolosap long Sevya mo olsem wanem Hem i kam kolosap long yu. Yu save singsing tu wetem olgeta wan singsing abaot topik ia olsem “I Feel My Savio’s Love” (Children’s Songbook, 74–75).

• Askem ol pikinini blong yu blong talem long yu abaot wanem we oli stap lanem long skul o Praemeri. Mo tu, yu save serem samfala samting we yu stap lanem. Afta, yu save soem ol toktok ia long ol pikinini blong yu wanem, from wanem, mo olsem wanem. Helpem olgeta blong lukluk long Doktrin mo Ol Kavenan 88:77–79 blong faenemaot wanem Lod i wantem yumi blong lanem. Afta, lukluk tugeta long ves 80 blong faenemaot from wanem Hem i wantem yumi blong lanem samting mo long ves 118 blong faenemaot olsem wanem yumi mas lanem samting.

• Taem yu ridim Doktrin mo Ol Kavenan 88:119 long ol pikinini blong yu, oli save mekem wan tempol ruf wetem han blong olgeta evri taem oli harem toktok ia “haos.” Eksplenem se Papa long Heven i wantem Josef Smit mo Ol Sent blong oli bildim wan tempol, o wan “haos blong God.”

• Yu save askem ol pikinini blong yu blong jusum seven toktok we i tokbaot hom blong olgeta. Afta, helpem olgeta blong faenem long Doktrin mo Ol Kavenan 88:119, ol seven toktok we Lod i yusum blong tokbaot haos blong Hem. ?Olsem wanem nao yumi save mekem hom blong yumi i kam wan “haos blong God”?