“Rau Hli Ntuj 23–29: ‘Muaj Nqis … Li tej Kev Nplua Nuj ntawm Tag Nrho lub Ntiaj Teb’: Lus Qhuab Qhia thiab Kev Khi Lus 67–70,” Los, Nrog Kuv Mus—Siv hauv Tsev thiab lub Koom Txoos: Lus Qhuab Qhia thiab Kev Khi Lus 2025 (2025)
“Lus Qhuab Qhia thiab Kev Khi Lus 67–70,” Los, Nrog Kuv Mus—Siv hauv Tsev thiab lub Koom Txoos: 2025
Rau Hli Ntuj 23–29: “Muaj Nqis … Li tej Kev Nplua Nuj ntawm Tag Nrho lub Ntiaj Teb”
Lus Qhuab Qhia thiab Kev Khi Lus 67–70
Txij thaum xyoo 1828 mus txog 1831, tus Yaj Saub Joseph Smith tau txais tej kev tshwm sim ntau los ntawm tus Tswv, tsis hais tej lus ntuas rau tib neeg, tej lus qhia kom paub kav lub Koom Txoos, tej kev ua yog toog pom hnub nyoog kawg, thiab ntau yam tseeb uas nyob mus ib txhis. Tiam sis Haiv Neeg Ntseeg feem coob tsis tau nyeem. Tej kev tshwm sim no los tseem tsis tau muab luam tawm, thiab tsuas muaj tej daim uas neeg tau sau ntawv thiab cov mej zeej ib leeg tau muab rau ib leeg thiab cov tub txib nqa mus.
Ces, thaum lub Kaum Ib Hlis Ntuj 1831, Joseph hu kom lub Koom Txoos cov thawj coj sib sab laj txog kev muab tej kev tshwm sim no luam tawm. Tom qab lawv thov kom paub tus Tswv lub siab nyiam, cov thawj coj no tau npaj muab Phau Ntawv Lus Txib luam tawm—yog phau ntawv ua tom qab ntawd yog phau Lus Qhuab Qhia thiab Kev Khi Lus. Tsis ntev tom qab ntawd txhua tus nyeem tau Vajtswv txoj lus uas ib tug yaj saub muaj sia nyob tau muab tshwm sim, yog qhov puav pheej uas qhia tias “cov yawm sij ntawm tej txuj ci uas neeg tsis paub txog peb tus Cawm Seej lub nceeg vaj rau neeg dua ib zaug ntxiv.” Yog vim li no thiab ntau yam ntxiv, Tsoom Haiv Neeg Ntseeg thaum ntawd thiab tam sim no xav tias tej kev tshwm sim no “muaj nqis … tshaj li tej kev nplua nuj ntawm tag nrho lub Ntiaj Teb” (Lus Qhuab Qhia thiab Kev Khi Lus 70, zaj lus piav txog tshooj).
Saib Saints, 1:140–43.
Tej Tswv Yim Pab Qhia hauv Tsev thiab lub Koom Txoos
Lus Qhuab Qhia thiab Kev Khi Lus 67:1–9; 68:3–6
Tus Tswv cov tub qhe hais Nws lub siab nyiam thaum tus Vaj Ntsuj Plig Dawb Huv tshoov lawv lub siab.
Tej zaum yus xav tias kev txiav txim muab tej kev tshwm sim uas Joseph Smith txais luam tawm yeej yog kev txiav txim yooj yim heev, tiam sis muaj ib co thawj coj ntawm lub Koom Txoos uas xav tias tej zaum tsis yog ib lub tswv yim zoo. Ib yam uas lawv txhawj txog yog qhov uas tej lus Joseph Smith tau siv kom sau tej kev tshwm sim los tsis zoo tag. Kev tshwm sim hauv tshooj 67 tau los kom teb kev txhawj ntawd. Koj kawm dab tsi txog tus Tswv cov yaj saub thiab kev tshwm sim los ntawm nqe 1–9? Koj kawm dab tsi ntxiv los ntawm 68:3–6?
Ua li cas koj thiaj paub ntawm koj tus kheej tias tej kev tshwm sim uas Vajtswv qhia rau Nws cov tub qhe muaj tseeb? Tej zaum koj yuav xav txog tej lub sij hawm thaum koj hnov tus Tswv hais lus rau koj los ntawm Nws ib tug tub qhe (saib Lus Qhuab Qhia thiab Kev Khi Lus 68:4). Thaum twg koj tau hnov “tus Vaj Ntsuj Plig Dawb Huv tshoov [koj] lub siab” (nqe 3) kom koj hais ib yam dab tsi? Tus Tswv tau ua li cas kom “nrog nraim koj nyob”? (nqe 6).
Ua ntej tau muab Phau Ntawv Lus Txib luam tawm, ob peb tug thawj coj ntawm lub Koom Txoos tau sau ib zaj lus tim khawv hais tias tej kev tshwm sim hauv phau ntawv ntawd muaj tseeb. Yog xav saib lawv zaj lus tim khawv, saib “Testimony, circa 2 November 1831,” Revelation Book 1, 121, josephsmithpapers.orgjosephsmithpapers.org.
Lus Qhuab Qhia thiab Kev Khi Lus 67:10–14
“Ua siab ntev mus ntxiv.”
Vim li cas kev khib siab, kev ntshai, thiab kev muab hlob ua rau peb tsis nyob ze tus Tswv? Peb yuav ua li cas kom kov yeej tus “neeg ntawm sab cev nqaij daim tawv” los sis “lub siab nyiam sab cev nqaij daim tawv” kom peb thiaj li “pom [Nws], thiab paub hais tias [Nws] yog lawm”? (nqe 12; kuj saib Mauxiyas 3:19). Koj kawm dab tsi hauv tej nqe no uas tshoov koj lub siab kom ua siab ntev mus ntxiv kom txog thaum koj ua tau zoo tag nrho”? (nqe 13).
Lus Qhuab Qhia thiab Kev Khi Lus 68:25–31
Kuv pab tau kom tsom ntsoov rau Yexus Khetos hauv kuv lub tsev.
Tus Tswv tej lus nyob hauv Lus Qhuab Qhia thiab Kev Khi Lus 68:25–31 yog hais rau cov niam tsev txiv tsev, tiam sis txawm tias koj yog niam los yog txiv los tsis yog, koj siv tau Nws tej lus ntuas kom tsom ntsoov rau Yexus Khetos tej lus qhuab qhia hauv koj tsev. Nyob nram qab no los muaj tej lub ntsiab cai uas tus Tswv hais tias yuav tsum qhia hauv tsev. Cia li xav seb koj yuav ua li cas kom ua txhua yam no thiaj li muaj ib lub hauv paus rau koj lub tsev uas tsom ntsoov rau Yexus Khetos—lub tsev koj nyob tam sim no los sis koj lub tsev yav tom ntej. Tej kev pab thiab tej lus nug uas muab los yeej pab tau.
-
Hloov Siab Lees Txim: Kawm Amas 36:17–20, thiab saib Amas tau koob hmoov thaum ib lub sij hawm tseem ceeb rau qhov nws txiv tau qhia nws txog tus Cawm Seej txoj hauj lwm theej txhoj. Koj ua tau li cas kom pab koj tsev neeg tig mus rau Yexus Khetos thiab hloov siab lees txim? (kuj saib 2 Nifais 25:26).
-
Kev Ntseeg Khetos: Nyeem Thawj Tswj Hwm Russell M. Nelson tsib lub tswv yim los txhim kho kev ntseeg nyob hauv “Khetos Sawv Rov Los Lawm; Kev Ntseeg Nws Yuav Muab cov Roob Txav Tau” (Liyahaunas, Tsib Hlis Ntuj 2021, 103). Cia li xav seb tej lub tswv yim no yuav ua li cas kom tsim kev ntseeg hauv koj tsev neeg.
-
Ua Kev Cai Raus Dej: Rov qab nyeem kev khi lus thaum ua kev cai raus dej nyob hauv Mauxiyas 18:8–10, 13. Koj txoj kev xiv zog ua raws li txoj kev khi lus no yuav ua li cas kom txhawb koj tsev neeg lub zog?
-
Lub Txiaj Ntsim Vaj Ntsuj Plig Dawb Huv: Kawm tej lus caw nyob phab 17–19 los ntawm Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv. Koj xav ua dab tsi kom caw tus Vaj Ntsuj Plig Dawb Huv lub hwj huam hauv koj lub tsev?
-
Thov Vajtswv: Koj kawm dab tsi txog lub hwj chim ntawm kev thov Vajtswv hauv tsev nyob hauv “Love Is Spoken Here”? (Children’s Songbook, 190–91). Tus Cawm Seej cog lus dab tsi nyob hauv 3 Nifais 18:15–21?
-
Lwm lub ntsiab cai uas koj nrhiav tau nyob hauv Lus Qhuab Qhia thiab Kev Khi Lus 68:25–31:
Koj yuav hais li cas rau ib tug neeg uas nws tsev neeg tsis txhawb nqa lawv txo jkev siv zog kom tib neeg ntseeg Yexus Khetos?
Kuj saib “Tsev Neeg: Ib zaj lus Tshaj Tawm rau lub Ntiaj Teb,” Txoj Moo Zoo cov Ntawv: Tej Ntsiab Lus thiab tej Lus Nug, “Parenting,” Txoj Moo Zoo cov Ntawv; Dieter F. Uchtdorf, “Yexus Khetos Yog cov Niam Tsev Txiv Tsev lub Dag Zog,” Liyahaunas, Tsib Hlis Ntuj 2023, 55–59.
Lus Qhuab Qhia thiab Kev Khi Lus 69:1
Cov phooj ywg “ncaj thiab rau siab ntseeg” pab kuv coj raws li Yexus Khetos.
Koj xav tias vim li cas yog tus Tswv “lub tswv yim” kom muaj ib tug neeg “ncaj thiab rau siab ntseeg” nrog Oliver Cowdery mus ua hauj lwm raws li nqe no piav? Yuav muab ntsiab cai no nruab rau koj lub neej li cas?
Pab cov neeg kawm ib leeg txhawb nqa ib leeg. Txhua tus neeg hauv koj chav kawm los sis tsev neeg yeej muaj lus tim khawv, tswv yim, thiab tej yam uas muaj los rau lawv thaum ua raws li txoj moo zoo. Caw lawv ib leeg qhia thiab txhawb nqa ib leeg.
Lus Qhuab Qhia thiab Kev Khi Lus 70:1–4
Kuv lav ris rau tej kev tshwm sim uas tus Tswv tau muab rau kuv.
Tus Tswv tau muab kev lav ris saib xyuas kev muab tej kev tshwm sim luam tawm rau ib co txwj laug. Txawm yog koj tsis muaj kev lav ris ntawd los, koj txoj hauj lwm “saib xyuas tej kev tshwm sim thiab tej lus txib” yog dab tsi? (nqe 3).
Yog koj xav tau tswv yim ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hlis no.
Tej Tswv Yim Pab Qhia cov Me Nyuam
Lus Qhuab Qhia thiab Kev Khi Lus 67
Phau Lus Qhuab Qhia thiab Kev Khi Lus qhia kuv txog Yexus Khetos.
-
Qhia koj cov me nyuam txog qhov uas tau ua li cas kom muab Joseph Smith tej kev tshwm sim luam tawm ua ib phau ntawv (saib “Tshooj 23: Lus Qhuab Qhia thiab Kev Khi Lus,” nyob hauv Cov Dab Neeg hauv phau Lus Qhuab Qhia thiab Kev Khi Lus, 90–92, los sis zaj vidi-aus nyob hauv Txoj Moo Zoo cov Ntawv). Pab lawv nco txog tej yam nej tau kawm txog Yexus Khetos los ntawm Lus Qhuab Qhia thiab Kev Khi Lus xyoo no. Tej zaum nej kuj yuav xav qhia txog tej nqe nej nyiam tshaj los ntawm Lus Qhuab Qhia thiab Kev Khi Lus.
2:2Chapter 23: The Doctrine and Covenants: August–November 1831
-
Tej zaum koj kuv xav muab phau ntawv Npaivnpaum, Phau Ntawv Maumoos, phau Lus Qhuab Qhia thiab Kev Khi Lus, phau Lub Hlaws uas Muaj Nqis Heev rau koj cov me nyuam thiab sib tham txog qhov uas txhua phau sib txawv thiab zoo sib xws li cas (saib zaj lus piav txog tej phau no nyob hauv Phau Qhia txog Vaj Lug Kub). Peb yuav ua li cas kom paub tias cov vaj lug kub muaj tseeb? Peb kawm dab tsi los ntawm Lus Qhuab Qhia thiab Kev Khi Lus 67:4, 9 txog tej kev tshwm sim uas tus Tswv muab rau Joseph Smith?
Lus Qhuab Qhia thiab Kev Khi Lus 68:25–31
Thaum kuv muaj yim xyoo kuv ua tau kev cai raus dej.
-
Nyob hauv Lus Qhuab Qhia thiab Kev Khi Lus 68:27, tus Tswv qhia tias ib tug neeg yuav tsum muaj hnub nyoog li cas kom ua kev cai raus dej. Pab koj cov me nyuam nrhiav seb Nws hais li cas. Vim li cas Yexus xav kom peb ua kev cai raus dej? Ib zaj nkauj zoo li “Baptism” (Children’s Songbook, 100–101) pab tau lawv. Siv duab los sis nqe 25–31 (los sis ob yam), kom pab koj cov me nyuam kawm tej yam uas tus Tswv xav kom cov me nyuam kawm.
-
Cia li nyeem txog txoj hauj lwm uas tus Tswv txib kom Oliver Cowdery ua nyob hauv zaj lus piav txog tshooj nyob hauv phau Lus Qhuab Qhia thiab Kev Khi Lus 69 nrog koj cov me nyuam. Tus Tswv tau muab tej lus qhia twg hauv nqe 1? Vim li cas qhov uas nej koom nrog tib neeg uas “yuav ncaj thiab rau siab ntseeg” yog ib qho tseem ceeb? Tej zaum koj cov me nyuam yuav xav qhia txog ib tug neeg lawv paub uas “ncaj thiab rau siab ntseeg.” Hu ib zaj nkauj ua ke uas txhawb pab cov me nyuam kom ua ncaj thiab rau siab ntseeg li tus Cawm Seej, ib yam li “I’m Trying to Be like Jesus” (Children’s Songbook, 78–79). Peb yuav tsum ua li cas kom peb thiaj ncaj thiab rau siab ntseeg tus Tswv? Nws siv peb li cas kom foom koob hmoov rau lwm tus thaum pab ncaj thiab rau siab ntseeg?
Yog xav tau tswv yim ntxiv, saib phau xov xwm Phooj Ywg rau lub hlis no.