Lus Qhuab Qhia thiab Kev Khi Lus 58–59

Cov Neeg Ntseeg cia siab tias ua ntej lawv tas sim neej, Jackson County yuav vam meej tawg paj txi txiv los ua Xi-oos, ib qhov chaw rau txhua tus Neeg Ntseeg sau los ua ke. Tiam sis, lawv lub sij hawm hauv Jackson County muaj kev txom nyem ntau. Ob peb xyoos xwb, lawv tau raug ntiab tawm thiab “tos ib nyuag ntus rau txoj kev txhiv Xi-oos dim” (Lus Qhuab Qhia thiab Kev Khi Lus 105:9).

Koj kawm tau dab tsi txog kev txom nyem los sis kev sim siab los ntawm tus Tswv cov lus nyob hauv phau Qhuab Qhia thiab Kev Khi Lus 58:1–5? Koj xav tias vim li cas muaj tej koob hmoov uas los tom qab yus raug txom nyem xwb? Koj twb tau txais cov koob hmoov twg tom qab koj raug txom nyem?

Koj kawm dab tsi los ntawm phau Lus Qhuab Qhia thiab Kev Khi Lus 59:23 uas ua rau koj cia siab?

Thaum koj kawm txog tej nqe no, tej zaum koj yuav xav sau txog tej yam uas koj “mob siab ua.” Tag nrho tej ntawd puas yog “tej yam zoo”? Cia li xav seb koj yuav ua li cas “coj kom muaj kev ncaj ncees ntau los”—thiab xav seb koj puas xav cuab hom phiaj ua li ntawd.

Koj xav tias yog vim li cas tus Tswv xav kom koj ua “ntau yam los ntawm [koj] tus kheej txoj kev ywj siab xaiv”? Yuav muaj xwm txeej dab tsi yog tias koj “raug yuam mus ua txhua yam”? 2 Nifais 2:27 pab tau koj to taub lub ntsiab cai no li cas?

Kuj saib Dale G. Renlund, “Nej Cia Li Xaiv Hnub No,” Liyahaunas, Kaum Ib Hlis Ntuj 2018, 104–6.

Tus Tswv cov lus cog tseg nyob hauv phau Lus Qhuab Qhia thiab Kev Khi Lus 58:42 kom zam txim tag nrho rau tus uas hloov siab lees txim yeej tshoov yus lub siab, tiam sis kuj muaj tej lus nug li: kev hloov siab lees txim txhais li cas? Kuv yuav ua li cas kom paub tias kuv tau hloov siab lees txim? Tiam sis, tus Tswv hais tias, “Zoo li no nej thiaj yuav paub…” (nqe 43).

Nov yog tej lus nug ntxiv uas tej zaum tib neeg xav nug txog kev hloov siab lees txim. Tus Ntsuj Plig qhia koj dab tsi thaum koj kawm cov ntaub ntawv pab uas nyob nram qab no?

Qhov uas kuv lees kuv tej kev txhaum pab kuv li cas kom hloov siab lees txim? Saib Phau Ntawv Nkauj 32:1–5; Paj Lug 28:13; Mauxiyas 27:34–37; Amas 39:12–13.

Kuv sim tso kuv tej kev txhaum tseg, tiam sis kuv pheej ua yuam kev. Kuv txoj kev hloov siab lees txim puas tseem muaj nqi? Saib Bradley R. Wilcox, “Kev Tsim Nyog Tsis Yog Kev Zoo Tag Nrho,” Liyahaunas, Kaum Ib Hlis Ntau. 2021, 61–67; “Daily Restoration” (vidi-aus), Txoj Moo Zoo cov Ntawv.

5:27

Kuv yuav ua li cas kom paub tseeb tias tus Cawm Seej tau zam txim rau kuv? Saib Tad R. Callister, “Yexus Khetos txoj Kev Theej Txhoj,” Liyahaunas, Tsib Hlis Ntuj 2019, 85–87, qhov tseem ceeb saib feem hu ua “2. Kev Txhaum.”

Koj nrhiav tau kev nkag siab ntxiv nyob hauv “Tej Lus Nug thiab tej Lus Teb” txog kev hloov siab lees txim nyob hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (nplooj 8–9).

Kuj saib Tej Ntsiab Lus thiab tej Lus Nug, “Kev Hloov Siab Lees Txim,” Txoj Moo Zoo cov Ntawv.

Polly Knight thiab nws tus txiv, Joseph Knight tus Laus, yog ob tug hauv thawj pawg uas ntseeg tias Joseph Smith yog ib tug yaj saub. Polly thiab Joseph twb txhawb nqa tus Yaj Saub thaum nws ua hauj lwm txhais Phau Ntawv Maumoos. Tsev neeg Knight twb ncaim Colesville, New York mus kom koom nrog Haiv Neeg Ntseeg nyob hauv Ohio thiab tus Tswv txib nkawd tsiv mus rau Ciaj Ciam Av Jackson, Missouri. Thaum nkawd taug kev mus, Polly tsis nyob zoo zuj zus, tiam sis nws tso siab tias nws yuav pom Xi-oos ua ntej nws tuag. Nws twb nyob hauv Missouri ob peb hnub xwb ces nws tau tso lub ntiaj teb no tseg (saib Saints, 1:127–28, 132–33). Tau txais Lus Qhuab Qhia thiab Kev Khi Lus 59 thaum hnub uas nws tas sim neej no, thiab zoo li nqe 1 thiab 2 hais txog nws.

Koj xav hais tias “yuav tau tej koob hmoov … nrog rau tej lus txib” txhais li cas? (nqe 4). Cia li xav txog qhov uas tus Tswv ua li cas kom foom koob hmoov rau koj thaum koj sim ua raws li tej lus txib nyob hauv nqe 5–19.

Tom qab tus Tswv cog lus tias Nws yuav foom koob hmoov rau Haiv Neeg Ntseeg nyob hauv Xi-oos “nrog rau tej lus txib uas tsis yog tsawg,” tus Tswv hais txog ib txoj lus txib tseem ceeb; yog txoj lus txib kom hwm Nws “hnub dawb huv” (Lus Qhuab Qhia thiab Kev Khi Lus 59:4, 9). Thaum koj kawm phau Lus Qhuab Qhia thiab Kev Khi Lus 59:9–19, cia li xav seb vim li cas kev hwm Hnub Caiv yuav tseem ceeb rau Haiv Neeg Ntseeg thaum lawv xav txhim tsa Xi-oos. Vim li cas qhov no tseem ceeb rau koj?

Tej zaum koj kuj yuav xav seb koj puas siv Hnub Caiv raws li tus Tswv xav kom koj ua. Hnub Caiv pab koj li cas kom “tej yam ntawm lub ntiaj teb txhob ua rau [koj] ceb”? (nqe 9). Koj yuav ua li cas kom muab koj “tej kev hwm pub rau tus uas Siab Tshaj Plaws”? (nqe 10).

Tej zaum koj yuav nco txog tej lus xws li “xyiv fab,” “zoo siab,” thiab “luag ntxhi” uas tau siv kom piav txog txoj lus txib hais tias yuav tsum hwm Hnub Caiv. Hnub Caiv ua rau koj muaj kev xyiv fab li cas? Koj yuav hais dab tsi kom piav vim li cas koj xaiv hwm tus Tswv Hnub?

Koj kawm dab tsi los ntawm zaj nkauj qhuas Vajtswv “Maj Mam Hu Ib zaj Dawb Huv” (Nkauj Qhuas Vajtswv, zaj 61) txog lub hom phiaj thiab cov koob hmoov uas los ntawm Hnub Caiv?

Kuj saib Chiv Keeb 2:2–3; Yaxayas 58:13–14; Russell M. Nelson, “Hnub Caiv Yog Ib Hnub Zoo Siab,” Liyahaunas, Tsib Hlis Ntuj 2015, 129–32.

• Nyeem phau Lus Qhuab Qhia thiab Kev Khi Lus 58:26–28 ua ke kom pab koj thiab koj cov me nyuam muaj ib lub sij hawm sib tham txog lub hwj chim uas Leej Txiv Saum Ntuj Ceeb Tsheej tau muab rau peb xaiv ua qhov zoo. Tej zaum nej ib leeg yuav xav qhia ib leeg txog tej yam uas nej tau xaiv ua thiab tau muaj xwm txheej dab tsi los ntawm qhov ntawd. Tej zaum koj cov me nyuam yuav xav kos duab txog tej lub sij hawm no.

• Koj kuj sau lo lus kev xaiv rau ib daim ntawv ib sab thiab lo lus xwm txheej rau lwm sab los tau thiab siv daim ntawv no qhia txog peb tej kev xaiv thiab lawv tej xwm txheej yeej nyob ua ke. Tej zaum koj cov me nyuam yuav xav sau txog tej yam uas lawv xaiv thiab qhia txog tej xwm txheej uas los ntawm tej yam uas lawv xaiv ntawd. Ces tej zaum koj yuav xav nyeem phau Lus Qhuab Qhia thiab Kev Khi Lus 58:27–28 ua ke thiab tham txog tej kev xaiv uas ua kom “muaj kev ncaj ncees ntau” los sis kom muaj tej xwm zoo. Tus Tswv muab “nqi zog” los sis foom koob hmoov rau peb li cas thaum peb rau siab ua qhov zoo? (nqe 28).

• Xav seb puas nyeem tej nqe no thaum koj thiab koj cov me nyuam mus taug kev los sis saib tej daim duab txog lub ntiaj teb, pom tej yam uas “ua kom qhov muag nyiam thiab … kom zoo lub siab” (nqe 18). Koj kuj pom tej yam zoo li ntawd nyob hauv zaj nkauj xws li “My Heavenly Father Loves Me” (Children’s Songbook, 228–29). Los sis koj caw tau koj cov me nyuam kos duab txog tej yam uas lawv zoo siab ua Vajtswv tsaug thiab cia lawv qhia koj txog lawv cov duab. Peb yuav ua li cas qhia tias peb ua Nws tsaug rau tej yam no?

• Peb yuav ua li cas nyob rau Hnub Caiv kom hwm tus Tswv thiab nrhiav kev xyiv fab? Pab koj cov me nyuam nrhiav tswv yim nyob hauv phau Lus Qhuab Qhia thiab Kev Khi Lus 59:9–12 thiab phab ntawv ntxim ua rau lub lim tiam no. Tej zaum lawv kuj yuav xav nrhiav cov duab los sis tej yam kom piv txog tej yam uas peb ua thaum Hnub Caiv (xws li cov duab txog lub cim nco txog uas nyob hauv tshooj no). Tej yam no pab peb li cas kom sib raug zoo ntxiv nrog Leej Txiv Saum Ntuj Ceeb Tsheej thiab Yexus Khetos?