Lus Qhuab Qhia thiab Kev Khi Lus 51–57

Yog tias koj yog ib tug mej zeej hauv lub Koom Txoos thaum xyoo 1831, tej zaum yuav muaj neeg caw koj ua raws li txoj kev cai fij tseg tso cai rau lub Koom Txoos txais tau koj tej teej tug los ntawm tus npisov. Ces feem ntau, nws yuav muab tej yam uas koj tau pub lawm rov qab los rau koj, tej lub sij hawm pub ntau tshaj. Tiam sis tsis yog koj tej teej tug lawm xwb—yog tej yam uas koj yuav saib xyuas.

Hnub no tej txheej txheem txawv tas lawm, tiam sis lub ntsiab cai no yeej tseem ceeb rau tus Tswv txoj hauj lwm. Thaum koj nyeem tshooj 51, cia li xav seb Vajtswv tau muab hauj lwm dab tsi rau koj ua. Tej lus “saib xyuas” (nqe 19) thiab “fij tseg” (nqe 5) qhia dab tsi rau koj txog tej yam uas Vajtswv xav kom koj ua?

Thawj Tswj Hwm Spencer W. Kimball tau piav hais tias: “Nyob hauv lub Koom Txoos kev saib xyuas yog kev tso siab ntawm sab ntsuj plig los sis sab cev nqaij daim tawv uas muaj kev lav ris. Vim txhua yam yog tus Tswv li, peb yog cov uas saib xyuas peb lub cev, peb lub siab, tsev neeg, thiab tej khoom. (Saib Lus Qhuab Qhia thiab Kev Khi Lus 104:11–15.) Ib tug saib xyuas uas rau siab ntseeg yog ib tug uas ua hauj lwm raws li kev ncaj ncees, tu cov neeg uas yog nws li, thiab saib xyuas cov pluag thiab cov xav tau” (“Welfare Services: The Gospel in Action,” Ensign, Kaum Ib Hlis Ntuj 1977, 78).

Kuj saib “The Law of Consecration” (vidi-aus), Txoj Moo Zoo cov Ntawv.

5:1

Thaum tus Tswv txib ob peb tug thawj coj ntawm lub Koom Txoos mus rau Missouri, Nws qhia lawv kom siv sij hawm “tshaj tawm txoj moo zoo thaum taug kev mus” (nqe 25–27). Koj yuav ua li cas kom tshaj tawm txoj moo zoo “thaum taug kev mus,” los sis thaum koj ua neej txhua hnub?

Vim muaj neeg coob uas hais tias lawv tau txais kev tshwm sim ntawm sab ntsuj plig, Haiv Neeg Ntseeg thaum ub tau txhawj tias lawv yuav raug ntxias. Tus Tswv tau ceeb toom lawv txog dab tsi nyob hauv Lus Qhuab Qhia thiab Kev Khi Lus 52:14? Nws txoj kev kho teeb meem no yog dab tsi? (saib nqe 14–19).

Ib tug txheej txheem yog ib yam uas ua zoo ib yam yuav luag txhua zaus. Tej yam piv txwv txog ib tug txheej txheem yog kev suav tej najnpawb los sis qhov uas lub hnub tuaj thiab poob txhua hnub. Koj xav txog tej yam dab tsi ntxiv? Thaum koj kawm Lus Qhuab Qhia thiab Kev Khi Lus 52:14–19, cia li xav seb tus Tswv txheej txheem kom txhob raug ntxias yog dab tsi. Tej zaum yuav pab koj yog koj nco ntsoov tias “lub siab xav ua zoo” txhais tias yus txo hwj chim thiab hloov siab lees txim; “mos muag” txhais tias yus tswj tau yus tus kheej thiab muaj lub siab zoo; thiab “txhawb zog” txhais tias yus qhia, txhawb nqa, thiab ua zoo dua. Koj xav tias yog vim li cas tus Tswv tus txheej txheem muaj tej cwj pwm no, thiab kev mloog lus? Koj yuav ua li cas kom siv tus txheej txheem no thiaj li tsis txhob raug ntxias.

Koj puas paub txog tej lub sij hawm thaum tib neeg hauv peb lub caij nyoog no raug ntxias? Peb yuav ua li cas kom paub thaum twg peb raug ntxias?

Piv txwv hais tias, tej zaum koj yuav xav ntsuam xyuas tej yam uas koj xaiv hais txog cov movie, cov nkauj, thiab kev sib thaum saum huab cua raws li tej kev cai nyob hauv “Taug kev hauv Vajtswv txoj kev kaj” nyob hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv, 16–21.

Kuj saib Gary E. Stevenson, “Tsis Txhob Dag Ntxias Kuv,” Liyahaunas, Kaum Ib Hlis Ntuj 2019, 93–96; “Guide Me to Thee,” Hymns, zaj 101; Tej Ntsiab Lus thiab tej Lus Nug, “Nrhiav Qhov Tseeb thiab Kev Ua Kom Txhob Raug Ntxias,” Txoj Moo Zoo cov Ntawv.

Puas muaj lub sij hawm thaum koj poob siab vim ib tug uas koj tso siab rau tsis tau ua raws li lawv cog lus? Twb muaj li no rau Haiv Neeg Ntseeg los ntawm Colesville, New York, uas xav tias lawv yuav nyob hauv Leman Copley thaj av nyob hauv Ohio. Yog xav kawm los ntawm qhov no, xav seb koj puas nyeem zaj lus piav txog tshooj 54 (kuj saib Saints, 1:125–28; “A Bishop unto the Church,” nyob hauv Revelations in Context, 78–79). Yog koj muaj ib tug phooj ywg nyob hauv Haiv Neeg Ntseeg hauv Colesville, ces koj nrhiav tau tej lus ntuas twg nyob hauv tshooj 54 kom qhia rau lawv?

Nyob hauv tej nqe no, tus Tswv hais lus rau cov neeg nplua nuj thiab cov neeg pluag; tej zaum yuav zoo muab Nws tej lus ntuas rau ob pawg no sib piv. Muaj dab tsi hauv tej nqe no uas koj siv tau koj tus kheej?

• Kom pab koj cov me nyuam kawm tias kev ua siab ncaj txhais li cas, tej zaum koj yuav xav nrog lawv nyeem Lus Qhuab Qhia thiab Kev Khi Lus 51:9 ua ke thiab hais dab neeg txog cov me nyuam uas yuav tsum txiav txim siab seb lawv puas ua siab ncaj. Tej zaum koj siv tau cov duab, tej me nyuam roj hmab, los sis cov me nyuam ntawv kom lawv xav mloog koj tej zaj dab neeg. Tus Tswv ua li cas kom foom koob hmoov rau peb thaum peb siv zog ua siab ncaj?

• Xav seb puas nrog koj cov me nyuam ua si. Tom qab ntawd, sib tham seb qhov uas nej ua si ntawd puas txawv yog tias ib tug neeg tau khib lab. Vim li cas peb yuav tsum “coj ncaj ncees” ib leeg rau ib leeg?

• Kev txais tus Vaj Ntsuj Plig Dawb Huv los ntawm kev tso tes rau saum taub hau los twb hais ob peb zaug nyob hauv Lus Qhuab Qhia thiab Kev Khi Lus 51–57. Tej zaum nov yog ib lub cib fim zoo kom qhia koj cov me nyuam txog txoj kab ke no. Piv txwv hais tias, tej zaum lawv yuav xav saib ib daim duab txog ib tug me nyuam uas txais kev pom zoo thiab piav tias lawv ua dab tsi nyob hauv daim duab ntawd. Thov kom lawv npuaj tes thaum lawv hnov lo lus “tso tes rau saum taub hau” thaum koj nyeem Lus Qhuab Qhia thiab Kev Khi Lus 52:10; 53:3; 55:1.

• Tej zaum nej kuj yuav xav nyeem “The Holy Ghost” (Children’s Songbook, 105) los sis lwm zaj nkauj uas zoo li ntawd. Pab koj cov me nyuam nrhiav tej lus nyob hauv zaj nkauj uas qhia lawv txog lub txiaj ntsim Vaj Ntsuj Plig Dawb Huv.

  

• Kom pab qhia txog tus Tswv tus txheej txheem kom txhob raug ntxias, tej zaum koj yuav xav pab cov me nyuam nrhiav tej tug yam ntxwv txog tej txheej txheem—nyob hauv lub ntiaj teb, cov pam los yog ris tsho, los sis thaum ua neej txhua hnub. Cia li pab lawv nrhiav tus txheej txheem uas tus Tswv qhia nyob hauv Lus Qhuab Qhia thiab Kev Khi Lus 52:14–15. Ua tib zoo kom lawv to taub tej lo lus uas lawv tsis paub zoo nyob hauv tej nqe no. Peb yuav ua li cas kom siv tus txheej txheem no thiaj li paub qhov tseeb?

• Piav rau koj cov me nyuam txog tej yam uas Haiv Neeg Ntseeg uas los nyob hauv Leman Copley thaj av raug (saib zaj lus piav tshooj 54). Tej zaum koj cov me nyuam yuav xav ua yeeb yam hais tias lawv yog ib tug mej zeej hauv lub Koom Txoos uas tuaj rau Ohio. Lawv yuav xav li cas tom qab Leman tsis ua raws li nws txoj kev khi lus? Qhov no qhia dab tsi rau peb txog txoj kev ua raws li peb tej kev khi lus los sis tej lus cog tseg? Cia li nyeem Lus Qhuab Qhia thiab Kev Khi Lus 54:6 ua ke kom nrhiav tau cov koob hmoov ntawm cov neeg uas ua raws li lawv tej kev khi lus.

• Kom piav txog tshooj 55, tej zaum koj yuav xav piav hais tias William W. Phelps yog ib tug neeg uas tshaj tawm xov xwm uas kawm txog txoj moo zoo thiab koom lub Koom Txoos. Nrog koj cov me nyuam nyeem Lus Qhuab Qhia thiab Kev Khi Lus 55:1–4 ua ke, thiab pab lawv kawm tias Vajtswv xav kom William ua dab tsi. Nws tau ua li cas kom npaj siv William tej txuj ci? Tej zaum qhov no yuav ua rau nej xav sib tham seb Vajtswv yuav caw peb li cas kom siv peb tej txuj ci kom foom koob hmoov rau Nws cov me nyuam.