Lus Qhuab Qhia thiab Kev Khi Lus 64–66

Xav txog tej yam no thaum koj kawm phau Lus Qhuab Qhia thiab Kev Khi Lus 64:1–11:

• Cia li xav txog ib lub sij hawm thaum tus Tswv tau zam txim pub rau koj. Koj tau xav li cas?

• Puas muaj leej twg uas koj yuav tsum zam txim rau nws? Vim li cas yuav nyuaj rau peb zam txim pub rau lwm tus? Muaj dab tsi uas pab tau koj kov yeej tej yam nyuaj no?

• Tej lus tseeb txog kev zam txim nyob hauv Lus Qhuab Qhia thiab Kev Khi Lus 64:1–11 los tej yam twg tseem ceeb rau koj? Vim li cas tus Tswv txib peb kom “zam txim rau txhua tus neeg”? (nqe 10).

Yog tias nyuaj rau koj zam txim rau lwm tus, xav seb puas kawm Txwj Laug Jeffrey R. Holland zaj lus “Kev Txhawb Pab Los ntawm Kev Rov Qab Sib Raug Zoo” (Liyahaunas, Kaum Ib Hlis Ntuj 2018, 77–79) los sis Kristin M. Yee zaj lus “Muab Kev Zoo Nkauj Pauj Tshauv: Kev Kho Mob Los ntawm Kev Zam Txim” (Liyahaunas, Kaum Ib Hlis Ntuj 2022, 36–38). Koj kawm dab tsi txog qhov uas Yexus Khetos yuav ua li cas kom pab koj zam txim pub rau lwm tus?

Koj tsev neeg ua rau koj muaj cib fim ntau kawm zam txim pub rau lwm tus. Cia li xav txog koj tsev neeg. Koj yuav tsum zam txim pub rau leej twg? Peb ho “raug txom nyem” (nqe 8) li cas thaum peb tsis zam txim pub rau lwm tus? Kev zam txim yuav ua li cas kom hloov koj txoj kev sib raug zoo nrog koj tsev neeg?

Kuj saib Tej Ntsiab Lus thiab tej Lus Nug, “Zam Txim,” Txoj Moo Zoo cov Ntawv; “Forgiveness: My Burden Was Made Light” (vidi-aus), Txoj Moo Zoo cov Ntawv.

8:24

Puas muaj tej lub sij hawm thaum koj “nkees” vim koj pheej sim “ua tej yam zoo”? Cia li nrhiav tus Tswv zaj lus rau koj uas nyob hauv Lus Qhuab Qhia thiab Kev Khi Lus 64:31–34. Tus Tswv xav kom koj ua dab tsi kom muaj raws li Nws “txoj hauj lwm tseem ceeb”?

Xav txog kev siv ib yam khoom kom qhia txog nqe 33—ib yam loj uas siv tej yam me me ua, xws li daim duab uas muaj ntau yam xim los yog ib lub tsev uas siv thwv cib ua. Koj ua tau “tej yam me” twg txhua hnub kom “ teeb lub hauv paus” ntawm Vajtswv txoj hauj lwm tseem ceeb? Muaj tej tug yam ntxwv twg txog “txoj hauj lwm tseem ceeb” uas tus Tswv tau muab rau koj?

Txwj Laug Donald L. Hallstrom hais tias tej zaum nov yog lub ntsiab ntawm tej lus “lub siab thiab kev txaus siab ua”:

“Lub siab yog ib lub cim txog kev hlub thiab kev cog lus. Peb ua kev txi thiab ris tej nra rau cov neeg uas peb hlub es peb yuav tsis nyiaj tej no rau lwm yam. Yog tias tsis muaj kev hlub, ces peb txoj kev rau siab ploj zuj zus. …

“Kev muaj ‘kev txaus siab ua’ txhais tias peb siv zog ua thiab xav ntau thiab nrhiav Vajtswv lub tswv yim. Qhov no txhais tias tej yam uas peb yuav tsum kawm kom tas peb lub neej yog tej yam uas nyob tau mus ib txhis li. Qhov no txhais tias qhov uas yus hnov Vajtswv txoj lus thiab qhov uas yus mloog Vajtswv txoj lus los yeej sib txuas” (“The Heart and a Willing Mind,” Ensign, Rau Hli Ntuj 2011, 31–32).

Yog “ib tug chij los sis ib lub cim uas tib neeg sib koom siab los muaj ib lub ntsiab los sis ua ib xeem neeg” (Phau Qhia txog Vaj Lug Kub, “Chij,” Txoj Moo Zoo cov Ntawv). Vim li cas Xi-oos—los sis tus Tswv lub Koom Txoos—zoo li ib tug chij rau koj? Cia li xav txog lwm yam no uas yus tsa tau, zoo li ib tug chij, kom foom koob hmoov rau tib neeg: Teev Npe 21:6–9; Mathais 5:14–16; Amas 46:11–20. Cia li nrhiav lwm yam uas tus Tswv hais kom piav txog Xi-oos nyob hauv Lus Qhuab Qhia thiab Kev Khi Lus 64:41–43.

Kuj saib “Let Zion in Her Beauty Rise,” Hymns, zaj 41.

Lus Qhuab Qhia thiab Kev Khi Lus 65 piav zoo txog tus Tswv lub Koom Txoog ntiag tug hauj lwm hauv hnub nyoog kawg. Xav seb puas nrhiav hauv tshooj no seb puas muaj lus teb rau tej lus nug zoo li no: Tus Tswv xav kom Nws lub nceeg vaj hauv lub ntiaj teb no ua dab tsi? Nws xav kom kuv ua dab tsi pab?

Kuj saib “Prepare Today for the Second Coming” (vidi-aus), ChurchofJesusChrist.org.

1:7

Tsis ntev tom qab nws koom lub Koom Txoos, William E. McLellin thov Joseph Smith qhia Vajtswv lub siab nyiam rau nws. Joseph tsis tau paub li no, tiam sis William muaj tsib txoj lus nug uas nws cia siab tias tus Tswv yuav teb los ntawm tej uas Nws tus Yaj Saub hais. Peb tsis paub William tau nug li cas, tiam sis peb paub tias kev tshwm sim uas tau muab rau nws, uas tam sim no yog phau Lus Qhuab Qhia thiab Kev Khi Lus 66, tau teb txhua txoj lus nug kom William txaus siab tag nrho (“William McLellin’s Five Questions,” Revelations in Context,, 138).

Thaum koj nyeem tshooj 66, cia li xav txog qhov uas tus Tswv paub William McLellin thiab paub tias nws lub siab xav li cas thiab nws txhawj txog dab tsi. Tus Tswv tau ua li cas kom koj kawm tias Nws paub koj lawm? Yog koj muaj tus yawg suab txoj koob hmoov lawm, xav seb koj puas kawm. Thaum koj ua li ntawd, tus Vaj Ntsuj Plig Dawb Huv pab koj to taub dab tsi txog Vajtswv lub siab nyiam rau koj.

Lus cim: Thaum koj qhia koj cov me nyuam txog tus Tswv txoj lus txib kom “zam txim rau txhua tus neeg,” tej zaum koj yuav xav qhia meej tias kev zam txim tsis txhais tias yus cia neeg ua rau peb mob. Yaum lawv kom qhia ib tug neeg laus uas lawv tso siab rau yog tias lwm tus ua rau lawv mob los yog kov lawv.

• Tom qab koj nyeem Lus Qhuab Qhia thiab Kev Khi Lus 64:10 nrog koj cov me nyuam, nrog lawv tham seb yuav tsum ua li cas kom zam txim pub rau lwm tus. Tej zaum koj yuav xav hais ob peb zaj lus piv txwv. Tej zaum lawv yuav xav ua yeeb yam txog tej lus piv txwv no kom xyaum zam txim pub rau lwm tus.

• Tej zaum koj yuav xav hais kom koj cov me nyuam qhia tias lawv yuav qhia lwm tus—xws li ib tug kwv los sis niam hluas—txog kev zam txim. Pab lawv nrhiav tej kab lus nyob hauv Lus Qhuab Qhia thiab Kev Khi Lus 64:7–10 uas lawv siv tau thaum lawv qhia.

• Hu ib zaj nkauj txog kev zam txim, xws li “Help Me, Dear Father” (Children’s Songbook, 99). Zaj nkauj no qhia dab tsi rau peb txog kev zam txim pub rau lwm tus?

• Tej zaum koj yuav xav muab tej yam me rau koj cov me nyuam saib, xws li daim duab uas muab dhos ua ke los sis ib daim ntaub pua av. Ces, nej nyeem tau Lus Qhuab Qhia thiab Kev Khi Lus 64:33 ua ke. Vajtswv “txoj hauj lwm tseem ceeb” yog dab tsi? Peb yuav ua “tej yam me” twg uas pab tau?

• Thaum koj nyeem Lus Qhuab Qhia thiab Kev Khi Lus 64:34 rau koj cov me nyuam, tej zaum koj yuav xav taw tes rau koj lub siab thaum koj nyeem “lub siab” thiab caws koj cov me nyuam nrog koj ua li ntawd. Peb yuav ua li cas kom muab peb lub siab (tej yam uas peb xav) rau tus Cawm Seej?

• Pab koj cov me nyuam to taub tias Wililam E. McLellin muaj tsib lo lus nug rau tus Tswv. Joseph Smith txais lus teb rau tej lus nug no txawm yog nws tsis paub William tej lus nug yog dab tsi. Cia li qhia koj cov me nyuam txog ib lub sij hawm thaum tus Tswv qhia koj tias Nws xav kom koj ua dab tsi, thiab hais txog cov koob hmoov uas los ntawm kev ua raws li Nws qhia. Ces tej zaum nej yuav xav nyeem Lus Qhuab Qhia thiab Kev Khi Lus 66:4 ua ke thiab caw koj cov me nyuam nrhiav cib fim kom to taub tias tus Tswv xav kom lawv ua dab tsi.

  

• Thaum koj cov me nyuam saib ib daim duab ntawm tus Cawm Seej txoj Kev Los Zaum ob, thov lawv piav txog tej yam uas lawv pom los sis tej yam uas lawv paub txog lub sij hawm no. Tej zaum koj kuj yuav xav hais tej lus txog txoj Kev Los Zaum Ob uas lawv nrhiav tau nyob hauv Lus Qhuab Qhia thiab Kev Khi Lus 65. Tej lus no qhia dab tsi rau peb? Peb yuav ua li cas kom npaj rau tus Cawm Seej txoj kev rov qab los?