Lus Qhuab Qhia thiab Kev Khi Lus 71–75

Yeej ntxhov siab thaum tib neeg thuam los sis luag txog koj txoj kev ntseeg tus Cawm Seej, Nws txoj moo zoo, los sis Nws lub Koom Txoos. Thaum muaj li ntawd, koj ua li cas? Muaj xwm txheej zoo li ntawd nyob hauv Ohio nyob rau xyoo 1831 (saib zaj piav txog tshooj Lus Qhuab Qhia thiab Kev Khi Lus 71). Tus Tswv hais kom Joseph Smith thiab Sidney Rigdon ua li cas nyob hauv phau Lus Qhuab Qhia thiab Kev Khi Lus 71? Tej zaum koj yuav xav sau ntawv txog tej yam uas tus Tswv qhia lawv nkawd thiab Nws tau cog lus tias yuav muab tej koob hmoov twg rau nkawd.

Ntxiv rau kev kawm tshooj 71, tej zaum koj yuav xav nrhiav seb tus Cawm Seej teb cov neeg uas thuam Nws li cas thaum Nws tau ua hauj lwm qhuab qhia hauv lub ntiaj teb. Piv txwv hais tias: Mathais 22:15–22; 26:59–64; Yauhas 10:37–38. Koj kawm dab tsi los ntawm Nws? Koj kawm dab tsi ntxiv los ntawm Mathais 18:15; Efexus 4:31–32; 2 Timautes 3:12; Yakaunpaus 1:19?

Yuav ua li cas kom ua raws li Nws cov lus ntuas thaum raug xwm txheej niaj hnub no? Tej zaum koj yuav nyiam xav txog tej yam uas koj ua tau raws li kev kaj siab kom kho tej lus cuav hauv koj tej lus. Piv txwv tias, tej zaum koj yuav xav pib saib taus lwm tus txoj kev xav, ces koj mam li txo hwj chim thiab ua siab zoo qhia tej yam uas koj ntseeg txog Yexus Khetos thiab Nws tej lus qhia. Kom npaj rau tej lub sij hawm no, tej zaum koj xyaum nrog phooj ywg los sis tsev neeg.

Kuj saib Tej Ntsiab Lus thiab tej Lus Nug, “Pab Lwm Tus uas Muaj Lus Nug,” Txoj Moo Zoo cov Ntawv; Dallin H. Oaks, “Kev Hlub Lwm Tus thiab Ua Neej Nyob Sib Txawv,” Liyahaunas, Kaum Ib Hlis Ntuj 2014, 25–28; Jörg Klebingat, “Kev Rau Siab Ua cov Thwj Tim hauv Hnub Nyoog Kawg,” Liyahaunas, Tsib Hlis Ntuj 2022, 107–10.

Thaum tus Tswv tau hu Newel K. Whitney ua tus npisov thib ob hauv lub Koom Txoos, nws tej dej num yeej txawv me ntsis ntawm tej yam uas cov npisov ua niaj hnub nim no. Piv txwv hais tias, Npisov Whitney tau saib xyuas kev muab tej teej tug fij tseg thiab kev tso cai tsiv mus rau Missouri, nyob hauv thaj av Xi-oos. Tiam sis thaum koj nyeem txog nws txoj kev hu thiab tej dej num nyob hauv Lus Qhuab Qhia thiab Kev Khi Lus 72, tej zaum koj yuav pom tej yam uas cov npisov ua niaj hnub nim no—tej zaum tsis yog tib yam li ntawd, tiam sis lub ntsiab ntawm lawv tej dej num.

Piv txwv hais tias, koj ua li cas kom “ceev ib zaj” rau koj tus npisov? (nqe 5). Nyob hauv peb lub caij nyoog, “tus Tswv lub tsev rau khoom” muaj nyiaj uas tib neeg foom pub, te jkev pab, thiab tej txuj ci ntawm peb pawg ntseeg cov mej zeej (saib nqe 10, 12). Koj yuav ua li cas kom pab lub tsev rau khoom ntawd?

Tus Cawm Seej tau foom cov koob hmoov twg rau koj thiab koj tsev neeg los ntawm ib tug npisov txoj kev pab?

Kuj saib Quentin L. Cook, “Cov Npisov—Cov Neeg uas Saib Xyuas tus Tswv Pab Yaj,” Liyahaunas, Tsib Hlis Ntuj 2021, 56–60.

Tom qab Joseph Smith thiab Sidney Rigdon tau mus tshaj tawm txoj moo zoo (saib Lus Qhuab Qhia thiab Kev Khi Lus 71), tus Tswv qhia kom nkawd txhais phau Npaivnpaum ntxiv (saib Phau Qhia txog Vaj Lug Kub, “Joseph Smith Kev Txhais (JST),” Txoj Moo Zoo cov Ntawv). Tiam sis qhov ntawd tsis txhais tias Nws xav kom lawv tsum tsis tshaj tawm txoj moo zoo ntxiv. Qhov ntawd yeej yog ib feem ntawm ib tug thwj tim lub neej.

Thaum koj nyeem Lus Qhuab Qhia thiab Kev Khi Lus 73, cia li xav txog qhov uas koj yuav ua li cas kom qhia txog txoj moo zoo tsis tu tsis tseg, raws li koj “muaj peev xwm ua tau” (nqe 4)—los sis koj ua tau tiag li—thaum koj ua koj tej kev lav ris hauv koj lub neej txhua hnub.

Kev tshwm sim nyob hauv tshooj 75 yog hais rau cov neeg uas “muab [lawv] lub npe kom tawm mus tshaj tawm [tus Cawm Seej] txoj moo zoo” (nqe 2). Ib txoj kev kawm kev tshwm sim no yog kev sau ob daim ntawv: (1) yuav qhia txoj moo zoo li cas thiab (2) tus Tswv foom koob hmoov thiab txhawb nqa peb li cas thaum peb ua li ntawd.

Koj xav tias cov lus “nyob” los sis “tub nkeeg” txhais li cas thaum qhia txoj moo zoo? Koj xav tias “khwv ua hauj lwm nrog nej lub zog” zoo li cas? (nqe 3).

Kuj saib “Kuv Yuav Mloog Koj txoj Lus,” Cov Nkauj Qhuas Vajtswv, zaj 125.

• Tej zaum koj yuav xav siv zaj lus piav txog tshooj rau Lus Qhuab Qhia thiab Kev Khi Lus 71 los sis “Tshooj 25: Joseph Smith thiab Sidney Rigdon Mus Ua Tub Txib” (nyob hauv Cov Dab Neeg hauv phau Lus Qhuab Qhia thiab Kev Khi Lus, 96, los sis zaj vidi-aus nyob hauv Txoj Moo Zoo cov Ntawv) kom qhia koj cov me nyuam txog tej xwm uas muaj kom thiaj li txais tshooj 71. Ces cia lawv kawm seb tus Tswv xav kom Joseph thiab Sidney ua li cas txog “kev tsis sib raug zoo” tawm tsam lub Koom Txoos hauv nqe 1. Nws hais tias Nws yuav pab nkawd li cas? Peb yuav tsum ua li cas kom zoo li Joseph thiab Sidney?

  

  0:45

• Nej kuj hu tau ib zaj nkauj uas txhawb nqa lawv kom ua raws li tus Cawm Seej, ib yam li “Stand for the Right” (Children’s Songbook, 159). Pab koj cov me nyuam xyaum qhia tej yam uas lawv paub txog Yexus.

• Yog nej nyeem Lus Qhuab Qhia thiab Kev Khi Lus 72:2 ua ke ces tej zaum yuav ua rau nej xav sib tham yog vim li cas tus Tswv pub cov npisov rau peb (kuj saib “Tshooj 17: Thawj cov Npisov hauv lub Koom Txoos,” nyob hauv Cov Dab Neeg hauv phau Lus Qhuab Qhia thiab Kev Khi Lus, 64–66, los sis zaj vidi-aus nyob hauv Txoj Moo Zoo cov Ntawv). Tej zaum koj thiab koj cov me nyuam yuav xav nrhiav duab los sis tej khoom uas sawv cev rau tus npisov tej kev lav ris. Daim duab thiab phab ntawv ntxim ua nyob ntawm tus txheej txheem qhia no pab muab tswv yim. Ces tej zaum nej yuav xav sib tham ua ke txog cov npisov uas nej tau paub thiab qhia tias tus Tswv tau foom koob hmoov rau nej tsev neeg los ntawm lawv txoj kev pab.

  

  1:45

• Kom sib tham txog qhov uas kev “tub nkeeg” thiab “khwv ua hauj lwm nrog [peb] lub zog” txawv li cas, tej zaum koj yuav xav xaiv ob peb txoj hauj lwm uas ua hauv tsev thiab caw koj tsev neeg qhia ua tej hauj lwm ntawd zoo li lawv tub nkeeg thiab tom qab ntawd thaum lawv khwv nrog tag nrho lawv lub zog. Thaum koj nyeem “tsis txhob tub nkeeg” nyob hauv Lus Qhuab Qhia thiab Kev Khi Lus 75:3, tej zaum koj cov me nyuam yuav xav qhia tias lawv yuav ua tej hauj lwm ntawd li cas yog lawv tub nkeeg. Thaum koj nyeem “khwv ua hauj lwm nrog nej lub zog,” tej zaum lawv yuav xav qhia seb lawv siv zog ua hauj lwm li cas. Vim li cas peb yuav tsum ua zoo npaum li peb ua taus thaum peb ua hauj lwm rau tus Tswv?

• Hauv nws zaj lus “Two Principles for Any Economy” (Liyahaunas, Kaum Ib Hlis Ntuj 2009, 55–58), Thawj Tswj Hwm Dieter F. Uchtdorf piav ob zaj dab neeg txog kev ua hauj lwm. Tej zaum koj yuav xav piav rau koj cov me nyuam thiab sib tham seb zoo li cas thaum peb paub tias peb siv zog ua hauj lwm thiab ua zoo npaum li peb ua tau.