“Tuun 23–29: ‘Kakawaki … Kaubwain te Aonaaba ae Bwanin’: Reirei ao Berita aika Tabu 67–70.” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Reirei ao Berita aika Tabu 67–70,” Nakomai, Irirai—Ibukin te Mweenga ao te Taromauri: 2025
Tuun 23–29: “Kakawaki … Kaubwain te Aonaaba ae Bwanin”
Reirei ao Berita aika Tabu 67–70
Man 1828 nakon 1831, e karekei kaotioti aika mwaiti te Burabeti Iotebwa Timiti mairoun te Uea, n ikotaki ma reirei aika tabu ibukiia tabeman, kaetieti n aron kairan te Ekaretia, kaotioti ibukin boong aika kaitira, ao koaua aika kaunganano aika akea tokiia. Ma a mwaiti Aika Itiaki ake a tuai warekii. Kaotioti aikai a bon tuai boretiaki, ao tabeua kaobi ake a tauraoi a koreaki ni bon te bai i aon beeba aika a aki kanimaki ake a tibwaaki i buakoia membwa ao n uouotaki irouia mitinare.
Ngkanne, n Nobembwa 1831, e tewea te bowi ma taan kairiiri n te Ekaretia Iotebwa n marorooakina boretian kaotioti aikai. I mwiin ukoran ana kantaninga te Uea, taan kairiiri aikai a karaoa te baire ibukin Boretian te Boki n Tua—are bon arana i mwaain kinaakina bwa Reirei ao Berita aika Tabu. N te tai ae tawe a na kona aomata ni kabane ni wareki ana taeka te Atua are kaotaki rinanon te burabeti, kakoaua aika mataata bwa “kiingin bwaai aika raba n abanuean ara Tia Kamaiu a manga onimakinaki iai aomata.” Ibukin aei ao tabeua riki bukina, Aomata aika Itiaki ngkekei ao ngkai a tarai kaotioti aikai bwa “kakawakiia bon… kaubwain te Aonaaba ae bwanin” (Reirei ao Berita aika Tabu 70, atuun te mwakoro).
Taraa Saints, 1:140–43.
Iango ibukin te Kamatebwai n te Mweenga ao n te Taromauri
Reirei ao Berita aika Tabu 67:1–9; 68:3–6
A taetae Ibukina ana toro te Uea ngkana a kairaki iroun te Tamnei ae Raoiroi.
Te moti bwa a na boretiaki kaotioti ake e karekeaki iroun Iotebwa Timiti a taraa n ae a bebete, ma tabeman taan kairiiri n te Ekaretia n taai akekei a taku bwa tiaki te iango ae tamaroa. Teuana te tabeaianga bon te mwaarara n aki nakoraoin tuan te koroboki ngke e korei kaotioti aikai Iotebwa Timiti. Te kaotioti n te mwakoro 67 e kaoti ni kaekaa te raraoma anne. Tera ae kam reiakinna ibukiia ana burabeti te Uea ao te kaotioti man kiibu 1–9? Tera riki nonoori ae ko karekei man 68:3–6?
Ko kanga n ataia i bon iroum bwa a bon koaua taian kaotioti ake e anga te Atua nakoia Ana toro? Ko na bae ni iangoa te taneiai ngke ko namakinna ae e taetae te Uea nakoim rinanon temanna Ana toro (taraa Reirei ao Berita aika Tabu 68:4). Ningai ae ko a tia iai ni “kairaki iroun te Tamnei ae Raoiroi” (kibu 3) n taekina te bwai teuana? E kanga te Uea n “tei ibukim”? (kibu 6).
I mwaain ae e booretiaki te Boki n Tua, tabeman taan kairiiri n te Ekaretia a tiaaina te kakoaua ae koreaki bwa a bon koaua kaotioti ake n te boki. N nooran kaobiin aia kakoaua, taraa “Testimony, circa 2 November 1831,” Revelation Book 1, 121, josephsmithpapers.org.
Reirei ao Berita aika Tabu 67:10–14
“Waakinako ma te taotaonaki n nano.”
E kanga te bakantang, te maaku, ao te kainikatonga n tukiira man kaanian te Uea? Ti na kanga n tokanikai i aon “te aro n aomata” ke “te iango n rabwata” bwa ti aonga ni kona n [Noria] ao n ataia ae [bon Ngaia]”? (kibu 12; taraa naba Motiaea 3:19). Tera ae ko kunea n kiibu aikai aika a kaungako bwa ko na “reitinako n te tataonakin nano ni karokoa kam a kororaoi”? (kibu 13).
Reirei ao Berita aika Tabu 68:25–31
I kona ni buoka kabotoan mweengau i aon Iesu Kristo.
Ana taeka te Uea n Reirei ao Berita aika Tabu 68:25–31 a bon kaeineti riki nakoia kaaro, ma ngkana tao ngkoe ke tiaki te karo, ko kona ni kabonganaa ana taeka n reirei ni karaoa mwiokoam ni kabotoa mweengam i aon ana reirei Iesu Kristo. Tuua aika koreaki i nano bon tabeua ake e tua te Uea bwa a na reiakinaki n te mweenga. Iangoia bwa ko na kanga ni karikii aikai n tatabeua nako bwa mwakoron aan te mweenga ae boboto i aon Kristo—te mweenga ae ko maeka iai ngkai ke mweengam n taai aika a na roko. Bwaai n ibuobuoki ao titiraki aika a katauraoaki a kona n ibuobuoki.
-
Rairannano: Kamatebwaia Aramwa 36:17–20, ao noria bwa e kanga Aramwa ni kakabwaiaaki n te tai ni kangaanga ibukina bwa tamana e a tia n reireinna taekan ana mwakuri ni kamaiu te Tia Kamaiu. Ko na kanga ni kaungaia am utu n rairaki nakon Iesu Kristo ao n rairii nanoia? (taraa naba 2 Nibwaai 25:26).
-
Onimaki iroun Kristo: Warekii nimau ana iango Beretitenti Russell M. Nelson ake e anga i aon karikirakean te onimaki “E a Uti Kristo; A na Mwaing Maunga man te Onimaki Irouna” (Riaona, Meei 2021, 103). Iangoia bwa a kanga iango aikai ni kona ni katea te katei n te onimaki inanon am utu.
-
Bwabetito: Waaki n rinanoa te berita n te bwabetito are e kabwarabwaraki ni Motiaea 18:8–10, 13. E na kanga am kekeiaki ni kawakina te berita aei ni kakorakoraa am utu?
-
Ana Bwai n Tutuaraoi te Tamnei ae Raoiroi: Kamatebwaia te kakao are i aon iteraniba 17–19 man Ibukin Kakorakoraia Kairake: Te Kairi ibukin Karaoan Rinerine. Tera ae ko kaungaaki iai bwa ko na karaoia ni kaoa ana kairoro te Tamnei ae Raoiroi inanon mweengam?
-
Prayer: Tera ae ko reiakinna i aon mwaakan te tataro i nanon te mweenga n “Love Is Spoken Here”? (Aia Boki n Anene Ataei, 190–91). Tera kakabwaia ake e beritani te Tia Kamaiu n 3 Nibwaai 18:15–21?
-
Tuua riki tabeua ake ko kunei inanon Reirei ao Berita aika Tabu 68:25–31:
Tera taeka n ibuobuoki ae ko na angan temanna are kaain ana utu a aki boutokaia n ana kekeiaki ni karekea ana onimaki i aon Kristo?
Taraa naba “Te Utu: Te Katanoata nakon te Aonaaba,” Gospel Library; Topics and Questions, “Parenting,” Gospel Library; Dieter F. Uchtdorf, “Iesu Kristo Bon Korakoraia Kaaro,” Riaona, Meei 2023, 55–59.
Reirei ao Berita aika Tabu 69:1
Raoraou aika a “kokoaua ao a kakaonimaki” a buokai ni iriira Iesu Kristo.
E aera ko taku n am iango bwa bon te “wanawana iroun [te Uea]” ibukin temanna ae “kokoaua ao e kakaonimaki” n raona Oliver Cowdery i aon te mwiokoaki are e kabwarabwaraaki inanon te kibu aio? E na kanga te tua aei ni kaineti nakoim?
Buokiia taan kamatebwai bwa a na boutokaiia i bon i marenaia. Aomata nako i nanon am kiraati ke am utu bon oin kakoaua aika korakora, nonoori, ao taneiai ni maiuakinan te euangkerio. Kaoiia bwa a na ibuobuoki ao n tabekiia rake i bon i marenaia.
Reirei ao Berita aika Tabu 70:1–4
I bukintaeka ibukin kaotioti ake e anga te Uea.
E anganiia tabeman unimwaane te katabeaki te Uea n tararua boretian kaotioti. E ngae ngke akea katabeam ae onoti n aekan anne, tera te mwiokoaki ke te katabeaki “i aon taian kaotioti ao tuua”? (kibu 3).
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Reirei ao Berita aika Tabu a reireinai taekan Iesu Kristo.
-
Tuangiia am ataei bwa a kanga ana kaotioti Iotebwa Timiti ni boretiaki bwa te boki (taraa “Mwakoro 23: Reirei ao Berita aika Tabu,” inanon Karaki man Reirei ao Berita aika Tabu, 90–92, ke witeo ake a irekereke i aon te Gospel Library). Buokiia bwa a na uring tabeua bwaai ake ko a tia n reiakin i aon Iesu Kristo ma ngkekei ni karokoa ngkai man Reirei ao Berita aika Tabu n te ririki aei. Ko kona naba n tibwaia i marenami tabeua kiibu ae mamaten nanom man Reirei ao Berita aika Tabu.
2:2Chapter 23: The Doctrine and Covenants: August–November 1831
-
Ko kona naba ni kaotia nakoia am ataei te Baibara, Ana Boki Moomon, Reirei ao Berita aika Tabu, Te Bwaeao ae Bati Boona ao marooro ma ngaiia bwa a kanga ni kaokoro ao a kanga n ae a titebo (tarai kabwarabwara i aon booki aikai n Bwai ni Kairi nakon Koroboki aika Tabu). Ti na kanga n ataia ae koroboki aika tabu a bon koaua? Tera ae ti reiakinna man Reirei ao Berita aika Tabu 67:4,9 i aon kaotioti ake e anga te Uea nakon Iotebwa Timiti?
Reirei ao Berita aika Tabu 68:25–31
I kona ni bwabetitoaki ngkana e koro waniua au ririki.
-
N Reirei ao Berita aika Tabu 68: 27, e kaotia raoi te Uea bwa rorora te aomata are e riai ni bwabetitoaki. Buokiia am ataei ni kunea bwa tera ae E taekinna. Bukin tera e tangiria Iesu bwa ti na bwabetitoaki? Te anene n aron “Baptism” (Aia Boki n Anene Ataei, 100–101) e kona ni ibuobuoki. Kabonganakin tamnei ke kiibu 25–31 (ke ni kauoua), e buokiia am ataei ni kunei bwaai ake e tangiria te Uea bwa a na reiakinna ataei.
-
Warekia ma am ataei taekan te mwioko are te Uea e angan Oliver Cowdery i aon atuun te mwakoro n Reirei ao Berita aika Tabu 69. Tera te reirei are e anga te Uea n te kibu 1? Bukin tera e kakaawaki bwa ti na raoniia aomata “ake a kokoaua ao ni kakaonimaki”? Tao a kona am ataei ni karakina aron temanna are a kinaa ae e “kokoaua ao ni kakaonimaki.” Ikotaki anenea te kuna are e kaungaia ataei bwa a na kokoaua ao ni kakaonimaki n aron te Tia Kamaiu, n aron “I’m Trying to Be like Jesus” (Aia Boki n Anene Ataei, 78–79). Ti na kanga ni kakoauaa raoi ae ti kokoaua ao ni kakaonimaki nakon te Uea? E na kanga ni kabonganaira ni kakabwaiaia tabeman aomata ngkana ti kokoaua ao ni kakaonimaki?
Ibukin iango riki tabeua, taraa te beeba ni kaongora n te namwakaina aio n te Te Rao maekatiin.