“Meei 26–Tuun 1: ‘Te tia Tararua ae Wanawana, e Kakaonimaki, ao e Raoiroi’: Reirei ao Berita aika Tabu 51–57,” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Reirei ao Berita aika Tabu 51–57,” Nakomai, Iriirai—Ibukin te Mweenga ao te Taromauri: 2025
First Furrow, iroun James Taylor Harwood
Meei 26–Tuun 1: “Te tia Tararua ae Wanawana, e Kakaonimaki, ao e Raoiroi”
Reirei ao Berita aika Tabu 51–57
Irouia kaain te Ekaretia n te 1830 tabun, bootakiia Aomata aika Itiaki ao katean te kaawa ae Tion bon te mwakuri n te maiu n tamnei ao n rabwata naba, ma taobaraan waaki aika a riki: E kainnanoaki temanna bwa e na kabooa te aba are a na kona n maeka iai Aomata aika Itiaki. E kainnanoaki temanna bwa e na boretii booki ao baike a na boretiaki. Ao e kainnanoaki temanna bwa e na katea te titooa ni katauraoi amwarake ibukin kaain Tion. N te kaotioti are e tauaki mwiia n Reirei ao Berita aika Tabu 51–57, e anganiia ao n anga te kaetieti te Uea nakoia aomata bwa a na karaoi beeku aikai.
Ma e ngae ngke a kainnanoaki konabwai aikai i Tion, a reireia naba kaotioti aikai bwa E tangiriia Ana Aomata aika Itiaki te Uea bwa a na tau n maiuia n tamnei n atongaki bwa kaain Tion—Ana botanaomata. E weteira ngaira n tatabemaniira n riki bwa “te tia tararua ae wanawana, e kakaonimaki, ao e raoiroi,” are iai irouna te tamnei ae raraoma, “[tei] ni matoatoa” n nakoara are ti rineaki nako iai (taraa Reirei ao Berita aika Tabu 51:19; 52:15; 54:2). Ngkana ti kona ni karaoa anne—n aki tarai konabwai n rabwata—e kona ni kabonganaira te Uea ni katea Tion.
Iango ibukin te Kamatebwai n te Mweenga ao n te Taromauri
E tangirai te Uea bwa N na riki bwa te tia mwakuri ae kakaonimaki, raoiroi, man wanawana.
Ngke arona bwa ngkoe kaain te Ekaretia n 1831, ko na bon bae naba ni kaoaki bwa ko na kawakina tuan te angabwai man am anga bwai nakon te Ekaretia mairoun te Bitiobi. E na manga kaoka nakoim, n angin te tai, baike ko anga, n tabetai iai rakana. Ma ai tiaki am bwai—ma e mena iaan am tararua.
Ni bong aikai e kaokoro aron te waaki, ma a tiku ni kakawaki tuua n ana mwakuri te Uea. Ngkai ko wareka mwakoro 51, iangoi baike e a tia n onimakiniko iai te Atua. Tera nanon taeka aika “te tia tararua” (kibu 19) ao “katabuaki” (te kibu 5) ae e kaotia ae kaantaningaia te Atua mai iroum?
E kabwarabwara Beretitenti Spencer W. Kimball: “I nanon te Ekaretia te mwioko ni karaoan te beku bon te onimakinaki ae tabu n te maiu n tamnei ke n te maiu n rabwata bwa ko na bukintaeka iai. Ibukina ngkai bwaai ni kabane bon ana bwai te Atua, ti mwiokoaki ibukin tararuai rabwatara, ara iango, ara utu, ao ara bwai. (Taraa Reirei ao Berita aika Tabu 104:11–15.) Te tia tararua ae kakaonimaki bon temanna are e mwakuriia te tamaroa n tautaeka, n tabeakina arona, ao ni buokiia kainnano ao rarikin” (“Welfare Services: The Gospel in Action,” Ensign,,Nobembwa. 1977, 78).
Taraa naba “The Law of Consecration” (witeo), Gospel Library.
The Law of Consecration
Reirei Ao Berita aika Tabu 52:9–11, 22–27
I kona n kaoiia tabeman n taabo ake I nako iai bwa a na roko nakon Kristo.
Ngke e kamwanangaia mataniwin te Ekaretia aika mwaiti te Uea nako Missouri, e tuangiia bwa a na kabongana raoi aia tai ni mwanangaia ao “n tataekin i aon kawaia” (kiibu 25–27). Ko na kangaa n tibwa te euangkerio “n te kawai,” ke i nanon waaki aika teimatoa n riki n maium?
Reirei ao Berita aika Tabu 52:14–19
E buokai te Uea n totokoa te mwamwanaaki.
Ngkai e mwaiti aomata ake a taku bwa iai irouia kaotan kaotioti aika tabu, a tabeaianga ibukin te mwamwanaaki Aomata aika Itiaki n taai ake ngkoa. Tera kauring are e anga nakoia te Uea n Reirei ao Berita aika Tabu 52:14? Tera aron katokan te kangaanga Irouna? (tarai kiibu 14–19).
Te banna ni katooto bon te bwai ae kaokiokaki n taainako, n te aro ae kaman ataaki. Katooto n aron te wareware n numbwa aika a toaraoi ke moan otin taai ao bungina ni katoabong. Tera katooto riki tabeua aika ko kona n iangoi? Ngkai ko ukora Reirei ao Berita aika Tabu 52:14–19, kina ana katooto te Uea n te aro bwa ko na totokoa te mwamwanaaki. E na ibuobuoki ataakina bwa “te raraoma” e kaota namakinan te nanorinano ao te rairannano; te “nimamannei” bairea te maam ao te taotaonannano; ao n “karikirakea” nanona n anga te kaetieti, kanakoraoa, ke rikiraken te maiu. Bukin tera ko namakinna bwa ana banna ni katooto te Uea e kairaki n anuan maiu aikai, n raonaki ma te ongeaba? Ko na kanga n maiuakina te banna ni katooto aei n totokoa te mwamwanaaki?
Kabwaranakoi nanon taeka aika a kangaanga. N te app n te Gospel Library, ko kona n taona ao taua te taeka ao i mwiina rinea “Kakaea nanona.” Ko na karokoaki n te tabo ae kaota nanon te taeka. Kataa aio ngkana ko kaitiboo ma te taeka ae ko aki ataia—ke taeka aika kanga ko atai aika ko kan mataata riki iai.
Tera katooto tabeua n te mwamwanaaki n ara bong? Ti na kanga n ataia bwa ti mwamwanaaki?
Te katooto, ko kona n iangoa rinanoan am rinerine n taian tamnei, anene, ao bwaai n reitaki ni kaineti ma kainibaire i nanon, “Nakonako n Ootan te Atua” i nanon Ibukin Kakorakoraia Kairake: Te Kairi ibukin Karaoan Rinerine., 16–21.
Taraa naba Gary E. Stevenson, “Tai Mwamwanaai,” Riaona, Nobembwa 2019, 93–96; “Guide Me to Thee,” Te Boki n Anene n Taromauri, nambwa. 101; Topics and Questions, “Seeking Truth and Avoiding Deception,” Gospel Library.
I kona n rairaki nakon te Uea ngkana I maraki man aia rinerine tabeman.
Ko a tia n rinanon te un ngke e aki kawakina ana motinnano temanna ae ko katan i aona? Aio ae e riki nakoia Aomata aika Itiaki mai Colesville, New York, ake a kantaingaia bwa a na maeka n aban Leman Copley i Ohio. N reiakinaki man te taneiai aei, iangoia n rinanon te atuu n rongorongo n mwakoro 54 (taraa naba Saints, 1:125–28; “A Bishop unto the Church,” i nanon Revelations in Context, 78–79). Ngkana iai raoraom irouia Aomata aika Itiaki i Colesville, tera te reirei ae ko kona n kunea i nanon mwakoro 54 ae kona tibwaia ma ngaiia?
Ana tabo n ununiki ao n manman Leman Copley
Reirei ao Berita aika Tabu 56:14–20
A kabwaia akana a itiaki nanoia.
Ni kiibu aikai, e taetae te Uea nakoia kaubwai ao ake aki kaubwai naba; e na kakaongora kabotauan Ana reirei nakoia kurubu aika uoua aikai. Tera ae iai ni kiibu aikai are e kona n uaana nakoim?
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Reirei ao Berita aika Tabu 51:9
I kona ni bwaina te kokoaua.
-
N buokiia am ataei n reiakinna bwa tera ae nanonaki n te kokoua, kam kona n bootaki ni wareka Reirei ao Berita aika Tabu 51:9 ao tibwai karakinaia ataei ake a kaitaraaki ma iango ibukin karaoan te kokoaua. Ko kona n kabonganai tamnei, bwabete n titaokin, ke taore aika a karaoaki man te beebwa ni karaoi karaki aika a kakaongora riki. E kanga te Uea ni kakabwaiaira ngkana ti kekeiaki ni bwaina te kokoaua?
-
Baireia n takakaro ma am ataei. I mwiina, marooroakinna bwa e na kanga ni kaokoro te takakaro ngke arona bwa temanna e aki kokoaua. Bukin tera e kakaawaki “maiuakinan te kokoaua” i bon i marenara?
Reirei ao Berita aika Tabu 52:10; 53:3; 55:1
I karekea ana bwai n tituaraoi te Tamnei ae Raoiroi man te katoka bai.
-
Karekean te Tamnei ae Raoiroi man te katokabai e taekinaki tabeua te tai i nanon Reirei ao Berita aika Tabu 51–57. Aio e kona n reke iai am tai ae tamaroa n reireiniia ataei taekan te otenanti aei. Te katooto, a kona n taraa tamnein te ataei ae kamatoaaki ao n kabwarabwaraa bwa tera ae riki n te tamnei. Tuangiia bwa a na uboi baia ngkana a ongo te taeka ae “katoka bai” ke “katoka bai” n am tai n wareware Reirei ao Berita aika Tabu 52:10; 53:3; 55:1.
-
Kam kona n anenea naba “The Holy Ghost” (Aia Boki n Anene Ataei, 105) ke ae titebo ma te anene anne. Buokiia am ataei n kunei taeka ke mwakoro n taeka n te anene are e reiakina taekan ana bwai n tituaraoi te Tamnei ae Raoiroi.
Reirei ao Berita aika Tabu 52:14–19
Iai ana banna ni katooto te Atua ae na buokira bwa ti naaki keweaki ke ni mwamwanaaki.
-
Ko kona n anga te reirei n taekan ana banna ni katooto te Uea n totokoa te mwamwanaaki, ko kona ni moanna man buokakia ataei n kunei banna ni katooto—n te karikibwai, burangketi aika a kirimatamata ke kunikai, ke i nanon te maiu ni katoabong. Buokia bwa a na kunea te banna ni katooto are e anga te Uea n Reirei ao Berita aika Tabu 52:14–15. Kakoaua raoi bwa a bon mataata n taeka aika a boou nakoia n kiibu aikai. Ti na kanga ni kabongana te banna ni katooto aei n kinaa te koaua?
Reirei ao Berita aika Tabu 54:4–6
I riai n taainako ni kawakina au berita ae tabu.
-
N oin am taeka, tibwaia nakoia am ataei bwa tera ae riki nakoia Aomata aika Itiaki ake a roko ni maeka n aban Leman Copley (taraa atuun te rongorongo n mwakoro 54). A kona n riki am ataei bwa aongkoa kaain te Ekaretia ake a roko i Ohio. Tera aron aia namakin i mwiin uruan ana berita ae tabu Leman? Tera ae ti reireinaki iai ibukin kawakinan ara berita aika a tabu ke taian berita? Bootaki ni wareka Reirei ao Berita aika Tabu 54:6 ao kunea kakabwaia ibukiia aomata ake a kawakin aia berita aika a tabu.
Reirei ao Berita aika Tabu 55:1–4
I kona ni kabonganai kakabwaia ake e anganai te Atua ni kakabwaiaia tabeman.
-
N kabwarabwaraan mwakoro 55, ko kona n kabwarabwara bwa William W. Phelps bon te tia boreti n te beebwa ni kaongora are e reiakina taekan te euangkerio ao i mwain kainakin te Ekaretia. Bootaki ma am ataei ni wareka Reirei ao Berita aika Tabu 55:1, 4, ao buokia n kunea bwa tera ae tangiria te Atua bwa e na karaoia John Whitmer. E kanga arona n baairea kabonganaan ana taarena William? E kona ni kairiiri aio nakon marooroakinan aron te Atua ni kaoiira n kabonganaa ara taarena ni kakabwaiaia Natina.
Ibukin iango riki tabeua, taraa te beeba ni kaongora n te namwakaina aio n te Te Rao maekatiin.