Reirei ao Berita aika Tabu 49–50

I mwain kaainakin te aro, e a tia Leman Copley ni kaaina te kurubu n aro ae kinaaki bwa the United Society of Believers in Christ’s Second Appearing, e kinaaki naba bwa te Shakers. I mwiin te marooro ma Leman, e ukora te kamataata Iotebwa Timiti mairoun te Uea ibukin tabeua ana reirei te Shakers. E kaeka te Uea ma te kaotioti i nanon mwakoro 49. Tabeua koaua man te Shakers a taekinaki n atuun te mwakoro.

Tera ae anga reirei iai te Uea n mwakoro 49 n kaeta aia koaua kaain te Shakers? Tera te kakoaua ae ko nooria n te kaotioti aei n Ana tangira ao ana raraoma ibukiia ana aomata ake aki karekea bwaninin Ana koaua? Ko na kanga n kawariia ma te tangira ao te raraoma?

Tera ae kakukureia nanom ibukin ana nonori te Uea i nanon kibu 2? Ko kona ni kabotaua aio nakon are e riki ngkana ko ti matakuakina mwakoron te birim, n noora teutana man te kamwaninga, ke n ongo ni iteran teuana te kauntaeka. E kanga aron ana kauring te Uea n irekereke nakon Reirei ao Berita aika Tabu 50:24? Iangoa are ko karaoia ni karekea riki te oota mairoun te Uea.

Taraa naba “Leman Copley and the Shakers,” n Revelations in Context, 117–21.

N ana mwakuri n kamemerea ana babaire Tamara are i Karawa, e ukora ni karekea te aki oota ibukin te mare Tatan. Ma e reitanako kaotan te koaua ibukin te mare te Uea irouia Ana burabeti. Ko kona ni kunea tabeua koaua i nanon Reirei ao Berita aika Tabu 49:15–17; Karikani Baai 2:20–24; 1 I-Korinto 11:11; and “Te Utu: Te Katanoata nakon te Aonaaba.” Iangoia ni karinanii koaua ake ko kunei. Bukin tera e rangi ni kakawaki te mare n ana babaire Tamara are i Karawa?

E reirei Unimwaane Ulisses Soares bwa “e katanoataaki n ana euangkerio Iesu Kristo are e a tia ni kaokaki te reirei n te reitaki i marenan te aine ao te mwaane ae tabwanin raoi, n te maiu aei ao n te maiu ae akea tokina” (“Te Reitaki ma te Uea,” Riaona, Nobembwa 2022, 42). Ko kona ni kamatebwaia ana rongorongo, n tarai moan tuua ao reirei “are e kakorakora te reitaki i marenan te mwaane ao te aine.” Ko na kanga ni kabonganai moan tuaa aikai ni maium? Ngkana e titirakiniko temanna man te koaua teuana bwa bukin tera e kakawaki te mare, ko na kangaa ni kaekaa? Bukin tera ko kakaitau ibukin te mataata aei?

Taraa naba Topics and Questions, “Marriage,” “Family,” Gospel Library; David A. Bednar, “Marriage Is Essential to His Eternal Plan,” Ensign, Tuun 2006, 83–84; “Renaissance of Marriage” (video), Gospel Library.

2:36

A ingainga kaain te Ekaretia aika a boou i Ohio ni karekea kakoaua n tamnei ake a beritanaki i nanon koroboki aika tabu. Ma, e ingainga nanon Tatan ni keweniia. Ngkana ko titirakinaki bwa ko na buokiia memwa aikai n mataata bwa ana kanga ni kina koauan te Tamnei ae Raoiroi, tera te reirei i nanon Reirei ao Berita aika Tabu 50 ae ko kona n tibwaia? (taraa riki kiibu 22–25, 29–34, 40–46). E na kanga ni buokiko te tia Kamaiu n ataa te kaokoro i marenan te koaua ao te kairua?

Taraa naba 1 I-Korinto 14:1–28; 2 Timoteo 3:13–17.

E katauraoi aaro aika a bati maiuakinan ana euangkerio Iesu Kristo n riki bwa taan reirei ao taan reiakinaki, n te mweenga ao n te taromauri. Teuana te kawai n kamatebwaia Reirei ao Berita aika Tabu 50:13–24 bon korean tamnein te tia reirei ao te tia reiakinaki. N kaan ma are i rarikim, karaoa karinanan taeka ao mwakoro n taeka man kiibu aikai ake a reiakiniko taekan reiakinan te euangkerio ao te angareirei. Nningai taai ake a riki nakoim ae reireiniko kakaawakin te Tamnei n te reirei ao te anga reirei? Iangoi baikai ko na ni karaoi n katamaroa am waaki bwa te tia kamatebwai ao te tia reirei.

Ngkai ko iangoa ana taeka te tia Kamaiu n Reirei ao Berita aika Tabu 50: 23– 25, iangoia bwa ko na kanga n karekea ootan te Atua ni maium ao arom n “kakionakoa te roo”. N aron, a kanga ni kaira am rinerine kiibu aikai i nanon kabanean am tai? tera kakukurei ke kareke rongorongo ae ukoraki? tera marooro ae riai n kabaneaki te tai iai? Tera iango riki tabeua ae konaa ni ibuobuoki iai kiibu aikai? Te anene n aron “The Lord Is My Light” (Boki n Anene n Taromauri, nambwa. 89) a kona ni kaungaa riki iango.

Taraa naba “Walk in God’s light,” Ibukin Kakorakoraia Kairake: Te Kairi ibukin Karaoan Rinerine, 16–21.

• N reiakiniia am ataei moan tuua ke reirei n kiibu aikai, ko kona ni katauraoa aua beebwa ao aua tamnei aika a tei ibukin te onimaki iroun Iesu Kristo, te rairannano, bwabetito, ao karekean te Tamnei ae Raoiroi (taraa te tamnei i nanon te iteraniba ni kakukurein te wiiki aei). A kona ni katuki beebwa i aon te timati am ataei ma tamnei i rarikiia. I mwiina a kona n ikaruoruo n nakonako i aon beebwa ngke ko wareware Reirei ao Berita aika Tabu 49:12–14. Buokiia bwa a na mataata bwa ngkana ti karaoi bwaai ake n te tamnei, ti iriira Iesu Kristo.

• Ko kona naba n kaoiia am ataei bwa a na katitebooa Reirei ao Berita aika Tabu 49:12–14 ma Mwakuri 2:38 ao ma te kaaua n onimaki. Tera bwaai aika a kunei aika a titebo? Bukin tera a kakawaki koaua aikai?

• N kabwarabwarai kiibu aikai, ko kona ni kabwarabwara bwa te Shakers bon te bootaki n aro ae a kakoauaa bwa aomata a riai n aki mareaki (taraa atuun te rongorongo n Reirei ao Berita aika Tabu 49). Kaoiia am ataei bwa a na kakaei bwaai ae reirei te Uea ibukin te mare n Reirei ao Berita aika Tabu 49:15–17. Tera ae nanonaki bwa “e katabuaki te mare iroun te Atua”? Tao kam kona ni bootaki ni wareka te moan teniua ni barakirabu n“Te Utu: Te Katanoata nakon te Aonaaba.” I mwiina marooakinna bwa bukin tera e kakawaki te mare ao te utu iroun Tamara are i Karawa.

• Ni kabwarabwara Reirei ao Berita aika Tabu 50:23–25, marooro ma am ataei te kaokoro i marenan te oota ao te roo. Bukin tera bwa ti kainnanoa te ota? Kam kona ni bootaki ni wareka te moan barakirabu n “Nakonako n ootan te Atua” i nanon Ibukin Kakorakoraia Kairake: Te Kairi ibukin Karaoan Rinerine (iteraniba 17) ao Reirei ao Berita aika Tabu 50:23–25. Maroroakinii kawai ake ti karekea iai ootan te Atua ao kawai are ti kona n kabirinakoa iai te roo. Aneneia ma ataei te anene ibukin otaia n tamnei, n aron “Shine On” (Aia Boki n Anene Ataei,144).

• I mwiin warekan Reirei ao Berita aika Tabu 50:40–46 ni bootaki, ko kona n kaota tamnein te tia Kamaiu n kabanean ae kaotaki ikai ao titiraki taian titiraki n aron aikai: E kanga aron ana namakin te tia kawan tiibu ibukia Ana tiibu? N te aro raa ae riki iai te Tia Kamaiu bwa ara tia kawakin tiibu?