Reirei ao Berita aika Tabu 58–59

A kaantaningaia Aomata aika Itiaki bwa i nanon aia tai ni maiu, e na riki Jackson County bwa Tion, te tabo are a na kona ni ikotaki iai Aomata aika Itiaki. Ma i rarikina, e onrake n te karawawataaki aia tai i Jackson County. I nanon tabeua te ririki, a kairoroaki bwa a na kitanna ao n “tataninga i nanon te tai ae uarereke ibukin kaboakin Tion” (Reirei ao Berita aika Tabu 105:9).

Tera ae ko reiakinna i aon te karawawataaki ke te kangaanga man ana taeka te Uea n Reirei ao Berita aika Tabu 58:1– 5? Ngkoe iroum bukin tera tabeua kakabwaia a roko i mwiin te kangaanga? Tera kakabwaia ake ko a tia ni karekei i mwiin te kangaanga?

Tera ae ko reiakinna n Reirei ao Berita aika Tabu 59:23 are e uota nakoim te kaantaninga?

N riki bwa mwakoron am kamatebwai ni kiibu aikai, ko kona ni korei ni karinani tabeua bwaai ake ko “ingainga ni kan karaoia”. Baikanne a bwaka iaan “waaki [nako] aika raoiroi”? Iangoia bwa tera ae ko kona ni “karaoia ni kakoroa bukin te raoiroi ae e mwaiti”—ao iangoia ni katea te kouru ni karaoia.

Bukin tera ngkai te Uea e tangiriko bwa ko na “karaoi bwaai aika a mwaiti n oin [nanom]”? Tera ae e na riki ngkana ko “kairoroaki ni bwaai ni kabane”? Tera mataatam ae reke n 2 Nibwaai 2:27 i aon te tua aio?

Taraa naba Dale G. Renlund “Rineia n te Bong Aei,” Riaona, Nobembwa 2018, 104–6.

E berita te Uea i nanon Reirei ao Berita aika Tabu 58:42 ni kabwarai raoi aia bure naake a rairii nanoia e anga te kaunganano, ma e karekei naba tabeua titiraki: Tera ae nanonaki n te rairannano? N na kanga n ataia ngkana I a tia n rairannano? Kakukureina, e reitia te Uea, “Ao n te aro aei kam na ataa…” (te kibu 43).

Aikai tabeua riki titiraki ae n tabetai a anga aomata i aon te rairannano. Tera ae e reireiniko te Tamnei ngkai ko kamatebwai booki aika a rineaki aika a katauraoaki i nano?

E kanga kaotakin au bure ni buokai n rairannano? Taraa Taian Areru 32:1–5; Taeka n Rabakau 28:13; Motiaea 27:34–37; Aramwa 39:12–13.

I kekeiaki ni kitani au bure, ma I bon reitinako ni karaoi kairua. E na bon bwainaki au rairannano? Taraa Bradley R. Wilcox, “Te Aro n Tau Bon Tiaki ae A na Akea Barekam,” Riaona, Nobembwa 2021, 61–67; “Daily Restoration” (witeo), Gospel Library.

5:27

N na kanga ni kakoauaa raoi bwa e kabwarai au bure te Tia Kamaiu? Taraa Tad R. Callister, “Ana Mwakuri ni Kamaiu Iesu Kristo,” Riaona, Meei 2019, 85–87, riki te mwakoro ae atunaki “2. Te Bure.”

Ko kona ni kunei riki nonoori i nanon “Titiraki ao Kaekaaia” i aon te rairannano i nanon Ibukin Kakorakoraia Kairake: Te Kairi ibukin Karaoan Rinerine (iteraniba 8–9).

Taraa naba Topics and Questions, “Repentance,” Gospel Library.

Polly Knight ao kainnabana, Joseph Knight Sr., bon tabeman mai buakoia nake a moan kakoaua te wewete ni burabeti nakon Iotebwa Timiti. A anga te boutoka ae kakaawaki nakon te Burabeti Polly ao Joseph n mwakurian rairan Ana Boki Moomon. Te utu ae te Knight a kitana Colesville, Nu Ioki, ni bootaki ma kaain te aro i Ohio ao i mwiin anne a tuangaki bwa a na mwaing nako Jackson County, Missouri. N aia tai ni mwananga, e kekerikaki marurungin Polly, ma e nanomatoa ni kan noora Tion i mwaain matena. Tabeua te bong i mwiin rokona i Missouri ngke e a motirawa (taraa Saints,, 1:127–28, 132–33). Reirei ao Berita aika Tabu 59 e reke n te bong are e motirawa iai, ao kiibu 1 ao 2 kanga e bon kaeineti raoi nakoina.

Tera n am iango ae nanonaki n “baunaki … ma tuua”? (te kibu 4). Iangoia bwa e kanga te Uea ni kakabwaiako ngkai ko kekeiaki n ongeaba nakon tuua n tatabeua nako ake ni kiibu 5–19.

I mwin ana berita bwa e na kakabwaiaia kaain te aro i Tion “ao tua aika tiaki ti tabeua,” te Uea e anga ana kamataata ae onoti n teuana te tua: te tua n karinea Ana “bong ae e tabu” (Reirei ao Berita aika Tabu 59:4, 9). Ngkai ko kamatebwaia Reirei ao Berita aika 59:9–19, iangoa bukina ngkai e rangi ni kakaawaki karinean te Tabati nakoia kain te aro aikai ngkai a ukora katean Tion. Bukin tera e kakawaki iroum?

Ko kona naba n iangoia bwa tao ko kabongana te bong ae te Tabati n te kawai are e kataua te Uea. E na kanga kawakinan te bong ae te Tabati ni buokiko n tiku ni itiaki man “barekan te aonaba”? (te kibu 9). Tera ae ko kona n karaoia n anga am “nebo nakon Teuare Moan te Rietaata”? (te kibu 10).

Ko na noria bwa te Uea e kabonganai taeka n aron “kimwareirei,” “kukurei n nano,” ao “kukurei” n reirei i aon te bong ae te Tabati. Tera ae karika te Tabati bwa e na kakukurei ibukim? Ko na kanga ni kabwarabwaraa nakon temanna bwa bukin tera ko karinea ana bong te Uea ae te Tabati?

Tera ae ko reiakinna man te anene n taromauri “Gently Raise the Sacred Strain” (Anene n Taromauri, nambwa 146) i aon te kantaninga ao te kakabwaia n te Tabati?

Tara naba Karikan Bwaai 2:2–3; Itaia 58:13–14; Russell M. Nelson, “Te Tabati bon te Bong ni Kakukurei,” Riaona, Meei 2015, 129–32.

• Te uaia ni wareka Reirei ao Berita aika Tabu 58:26-28 e kona n anganiko ao am ataei te tai ni marooro i aon mwaakan Tamara are i Karawa are e anganiira n rinea karaoan ae tamaroa. Ko na bae n tuangiia n tatabemaniia nako aron kawai n rinerine ake ko a tia ni karaoi ao tera ae e reke mai iai. Tao a na tangiria am ataei ni korea tamnein te bwai are a tia n rinanona.

• Ko kona ni korea rinerine ni iteran te mwakoro ni beeba ao mwiina ae riki ni iterana are teiterana ao kabongana te beeba aei ni katamneia bwa ara rinerine ao mwiina are e reke mai iai aki maenako. Tao a kona am ataei ni korei ni karinanii tabeua rinerine ao marooro i aon mwiina ae na riki mai iai. I mwiina kam kona ni bane ni wareka Reirei ao Berita aika Tabu 58:27–28 ao marooro i aon rinerine ake a “kakoroa bukin te raoiroi ae e mwaiti” ke uaana aika a tamaroa. E kanga Tamara are i Karawa ni “kaniwanganiira” ke ni kakabwaiaira ngkai ti kekeiaki ni karaoa ae tamaroa? (te kibu 28).

• Iangoia ni wareki kiibu aikai ngkai ngkoe ao am ataei kam nako n nakonako ke n tarai tamnein bwain te aonaaba, n tarai bwaai ake a na “kakukureia te mata ao … te nano naba” (te kibu 18). Ko kona naba n noorii bwaai aika titebo n te anene n aron “My Heavenly Father Loves Me” (Aia Boki n Anene Ataei,, 228–29). Ke ko kona ni kaoiia am ataei bwa a na korea tamnein bwaai ake a kakaitau ibukiia ao kariaia bwa a na tuangko taekan aia tamnei. Ti na kanga ni kaota ara kakaitau ibukin bwaai aikai?

• Tera ae ti kona ni karaoia n te Tabati n neboa te Uea ao ni kunea te kimwareirei? Buokiia am ataei ni kunei iango i nanon Reirei ao Berita aika Tabu 59:9–12 ao i nanon te iteraniba n te waaki ni kakukurein te wiiki aei. Tao a kona naba ni kunei tamnei ke bwaai ake a tei ibukin baike ti karaoi n te Tabati (n aron tamnein te botaki n toa are inanon te kabwarabwara aei). A kanga bwaai aikai ni buokiira n namakinna ae ti a kaaniaki riki nakon Tamara are i Karawa ao Iesu Kristo?