“Tuun 9–15: ‘I Mena irouia Taan Kakaonimaki n Taai Nako’: Reirei ao Berita aika Tabu 60–63.” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Reirei ao Berita aika Tabu 60–63,” Nakomai, Irirai—Ibukin te Mweenga ao te Taromauri: 2025
Te kabwarabwara man Te Bootaki i Taun te Ai i Missouri,, iroun Bryan Mark Taylor
Tuun 9–15: “I Mena irouia Taan Kakaonimaki n Taai Nako”
Reirei ao Berita aika Tabu 60–63
Ni moan Aokati 1831, Iotebwa Timiti ao tabeman unimwaane n te Ekaretia a kakatauraoi ibukin okiia nako Kirtland i mwiin kawaran “aban Tion” n te tai ae uarereke (Reirei ao Berita aika Tabu 59:3). E tangiria te Uea bwa a na tataekina te euangkerio i nanon aia tai ni mwananga (taraa Reirei ao Berita aika Tabu 52:10), ao tabeman a rangi ni botumwaaka ni karaoia. Ma iai tabeman aika aki kan karaoia. “A karabai aia tarena are I a tia n anganiia,” e taku te Uea, “ibukin maakan te aomata” (Reirei ao Berita aika Tabu 60:2). A mwaiti mai ibuakora ae ti ataa te bwai are a namakinna unimwaane aikai. E ngae ngke ti tangira te euangkerio, te maaku ao te nanououa a kona n tukiira man tibwauakina. Ma e nanoanga te Uea. E “atai mamaran te aomata ao bwa e na kanga ni buokii[ra]” (Reirei ao Berita aika Tabu 62:1). Rinanon nako kaotioti aikai ake nakoia mitinare n taai ake ngkoa bon te karaunano are e kona ni buokiira n tokanikai i aon maakura ao kabwakara: “Bwa I kona ni karaoiko bwa ko na tabu.” “Rabwata ni kabane a mena i nanon baiu.” “I mena irouia taan kakaonimaki n taai nako.” Ao “Ane e kakaonimaki ao n teimatoa e na tokanikai i aon te aonaba.” (Reirei ao Berita aika Tabu 60:7; 61:6; 62:9; 63:47.)
Iango ibukin te Kamatebwai n te Mweenga ao n te Taromauri
Reirei ao Berita aika Tabu 60; 62
I kona n tibwauaa au tangira ao au koaua i aon Iesu Kristo.
E kanga am koaua n te euangkerio bwa kanga ai aron te “tarena,” ke te kaubwai mairoun te Atua? N aanga ra ae n tabetai ti “karabai [ara] tarena”? (Reirei ao Berita aika Tabu 60:2; taraa naba Mataio 25:14–30).
Tera rongorongo aika a kaunganano mai iroun te Uea aika ko kunei ni mwakoro 60 ao 62? A kanga rongorongo aikai ni karikirakea am nanomatoa n tibwaan te euangkerio? Ngkai ko tarai titiraki aikai, iangoia n anenea ke ni warekii taekan “I Want to Be a Missionary Now” (Aia Boki n Anene Ataei, 168). Tera ae ko reiakinna man aia anene ataei aio i aon tibwaakin te euangkerio?
Taraa naba “Sharing the Gospel” ake a bobotaki n te Gospel Library.
I kona n rangi ni kukurei n tibwaakin au onimaki iroun Kristo.
Reirei ao Berita aika Tabu 60:2–4; 61:1–2, 20, 36–38; 62:1, 6
A reirei i aon Iesu Kristo Koroboki aika tabu.
N aron are e anga kaetieti nakoia Ana mitinare, e kaotii koaua aika a kakawaki te Uea i bon Ibukina. Kakaei koaua aikai i nanon Reirei ao Berita aika Tabu 60:2–4; 61:1–2, 20, 36–38; 62:1, 6. Tera karaki man koroboki aika tabu ae a kaotii taben ao anuan maiun te tia Kamaiu ae ko kunei? (taraa, te katooto, Ioane 8:1–11; Ita 2:14–15).
E riai au babaire ni kabaeranta “te motiki taeka ao ana kaetieti te Tamnei.”
E anga te Uea kaetieti i aon koaua aika akea tokiia ao tuua, ma E aki toki ni katikua nakoira bwa ti na iangoa raoi aron wakinana bwa ti na kanga ni mwakuri nakon tuua aikai. Ko kangaa n noora te tua aei ni kamatataaki n Reirei ao Berita aika Tabu 62? (taraa naba Reirei ao Berita aika Tabu 60:5; 61:22). Ko kanga n tia n noora te tua aei i nanon maium? Bukin tera e tamaroa ibukira bwa ti na karaoi tabeua babaire n aki kantaninga te Atua n tuangiira bwa tera raoi ae ti na karaoia?
Taraa naba Ita 2:18–25; Reirei ao Berita aika Tabu 58:27–28.
Reirei ao Berita aika Tabu 63:7–12
Kanikinaa aika a kaoti man te onimaki ao ana kaantaninga te Atua.
Ni kabanean te kabwarabwara aei, iai te kamataata n te kakai are e rangi n riinga nanon Ezra Booth: bain Elsa Johnson bon te kakai aron kamaoakina. I mwiin norakin aei, e a kukurei ni bwabetitoaki Ezra. Ma i mwiina, i nanon tabeua te namwakaina, E bua ana onimaki Booth ao e a riribaa te Burabeti. E kanga n riki aei, ngkai e a bon tia n noora te kakai?
Iangoa aei ngkai ko wareka Reirei ao Berita aika Tabu 63:7–12. Tera koaua aika ko reiakin i aon kanikina ao te onimaki?
Taraa naba Mataio 16:1–4; Ioane 12:37; Moomon 9:10–21; Ita 12:12, 18.
Reirei ao Berita aika Tabu 63:16
I kona ni itiaki n au iango ao n au mwakuri.
I nanon Reirei ao Berita aika Tabu 63:16, e a manga kamatoaa te Tia Kamaiu te bwai are E reireia n te Nu Tetemanti—bwa tuan te itiaki e riai ni kawakinaki tiaki n ti n ara mwakuri ma n ara iango naba (taraa Mataio 5:27–28). Ngkai ko wareka Reirei ao Berita aika Tabu 63:16, korei taian kauring are e anga te Tia Kamaiu i aon te kaibwabwaru n te iango. Ko kona naba ni iangoi kaitaraan kauring aikai n tatabeua nako. Te katooto, tera taeka ke kibu n taeka tabeua ake kaitaraan te maaku? Tera riki kakabwaia ake a roko man karekean te iango ao te mwakuri ae e itiaki?
A mwaiti aomata aika a iangoia bwa ana kainibaire te Uea i aon te itiaki n te iango ao te mwakuri a bane taia ke aikoa bwainaki. Tera te kaokoro ae e na riki ngkana ni kabane natin te Atua a kekeiaki ni maiuakina te tua aio? Ko kona n tarai kaekaan titiraki nakon te titiraki aei n ana rongorongo Unimwaane David A. Bednar “Ti Kakoaua ae ti Riai n Itiaki” (Riaona, Meei 2013, 41–44) ke “E Tabu Rabwatam” (Ibukin Kakorakoraia Kairake: Te Kairi ibukin Karaoan Rinerine, 23–26). Tera te rongorongo ae uota te kaantaninga ae ko kunea?
E ngae ngke ti ataa te kakabwaia ae reke man kawakinan te itiaki n ara iango ao n ara mwakuri, anne e aki nanonaki bwa e bebete. Ko na bae n anaa tabeua te tai ni iangoia bwa tera ae karika matoatoana ibukim ni kawakina ana kainibaire te Tia Kamaiu i aon te itiaki—ao tera ae karika bebetena. Tera ibuobuoki ae ko na tibwai ma tabeman i aon ae tera ae na karaoaki ngkana ko a kaririiaki ma iango aika aki raraoi?
Ibuobuoki i marenami. Teuana te kakabwaia ae korakora man bobotakira n te Ekaretia ao n taian kiraati bon reken te tai ni karekei boutoka mai irouia raora aika Aomata aika Itiaki i nanon ara kekeiaki ni iriira te Tia Kamaiu. A mwaiti mai ibuakora aika ti kaitaraaki ma kangaanga aika ti tearona, ao ara taneiai ae tabangaki e kona n riki bwa te kakorakora ae tamaroa. Tai maaku ni kaotia ae iai am kangaanga. Tibwaia ma tabeman bwa tera ae e buokiko ni maiuakina ana tua te Atua ao n tokanikai i aon te kaririaki.
Taraa naba Reirei ao Berita aika Tabu 121:45; Topics and Questions, “Virtue,” Gospel Library; “Standards: Sexual Purity and Modesty—True Confidence” (video), Gospel Library; AddressingPornography.ChurchofJesusChrist.org.
Standards: Sexual Purity and Modesty - True Confidence
Reirei ao Berita aika Tabu 63:58–64
Bwaai aika tabu a na riai n taraaki raoi ma te karinerine.
Tuua ake n Reirei ao Berita aika Tabu 63:58–64 e riaon riki ae anaan aran te Uea ni bakanrereia. Tera riki baika a tabu ake a roko “mai eta,” ke mairoun te Atua? Tera nanon ae ko na taekini bwaai aikai “ma te karaurau”?
Ibukin iango riki tabeua, taraa te beebwa ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Reirei ao Berita aika Tabu 60:4; 61:1–2, 36; 62:1
A reirei taekan Iesu Kristo koroboki aika tabu
-
Tao ko kona ni korei tabeua rongorongo i aon te Tia Kamaiu ake a kuneaki n Reirei ao Berita aika Tabu 60–62 i aon mwakoro ni beeba. A kona am ataei ni katomatomai rongorongo aikai nakon tamnein Iesu ngke e karaoa Ana mwakuri i aon te aba (taraa Gospel Art Book, nambwa 34–61) ake a kaotii aron anua aikai. E kanga Arona ni kaotia nakoira n te bong aei?
Kabwarabwara man Ibukin te Kantaninga Aei, iroun Yongsung Kim
Reirei ao Berita aika Tabu 60:7; 61:1–2; 62:1
E na kabwarai au bure te Uea ngkana I raira nanou.
-
Ngkai ko wareka Reirei ao Berita aika Tabu 60:7; 61:2 ma am ataei, buokiia ni kunei taeka aika titebo n taian kibu aikai. Kauringiia ataei bwa kaotioti aikai e anganaki Iotebwa Timiti ao taan kairiiri ake tabeman n te Ekaretia. Tera ae e tangiria te Uea bwa a na ataia? Ko kona naba ni marooro i aon ae tera ana namakin te Tia Kamaiu ibukira ngkana ti karaoi kaairua ao tera nanon ae ti rairi nanora. Ni kaineti ma Reirei ao Berita aika Tabu 62:1, e na kanga n ibuobuoki Iesu ngkana ti kaririaki?
Reirei ao Berita aika Tabu 62:3, 9
E tangirai Iesu Kristo bwa N na tibwaa Ana euangkerio.
-
Ko na bae n titirakiniia am ataei bwa tera ae a na taekinna ngkana temanna e titirakiniia bwa tera ae a tangiria i aon Iesu Kristo ao Ana Ekaretia. Bootaki n annenea te anene i aon tibwaan te euangkerio, n aron “I Want to Be a Missionary Now” (Aia Boki n Anene Ataei,, 168), e kona n anganiia tabeua iango. Ko kona ni wareka ngkanne Reirei ao Berita aika Tabu 62:3 ao tuangiia am ataei bwa a na ongora bwa tera ae e riki ngkana ti tibwaa ara koaua. E na kanga te berita are n te kibu 9 n ibuobuoki ngkana ti namakina te nakonnano?
Reirei ao Berita aika Tabu 63:64
I kona ni karinerine.
-
I mwaain taekinan Reirei ao Berita aika Tabu 63:64, kam kona n anene i aon te karinerine ma am ataei, n aron “Reverence Is Love” (Aia Boki n Anene Ataei, nambwa. 31). I mwiina ko kona ni marooro i aon kawai aika a kakaokoro ni kaota te karinerine ibukin Tamara are i Karawa ao Iesu Kristo.
-
Ko kona ni buokiia am ataei ni kamatataa bwa tera te karinerine man maroroakinan te bwai teuana ae e rangi ni kakawaki irouia, n aron te bwai n takakaro ae a tatangiria, te boki, ke te burangketi. Titirakiniia bwa a kanga n tararuaa raoi ao ni kawakina te bwai are e rangi ni kakawaki nakoia. Kam kona ngkanne n uaia ni botaki ni wareka Reirei ao Berita aika Tabu 63:64. Tera bwaai aika a kakawaki—ke n tabu—iroun Tamara are i Karawa? (taraa, te katooto, kibu 61 ao i nanon te iteraniba n te waaki ni kakukurein te wiiki aei). Ti na kanga ni mutiakin baikai—n ara taetae ao n ara mwakuri?
Ibukin iango riki tabeua, taraa te beebwa ni kaongora n te namwakaina aio n te Te Rao maekatiin.