“23–29 Jun: ‘Praes blong Olgeta I Moa Bigwan Bitim Ol Rij Samting blong Ful Wol Ia’: Doktrin mo Ol Kavenan 67–70,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 67–70,” Kam Folem Mi—Blong Hom mo Jos: 2025
23–29 Jun: “Praes blong Olgeta I Moa Bigwan Bitim Ol Rij Samting blong Ful Wol Ia”
Doktrin mo Ol Kavenan 67–70
Stat long 1828 kasem 1831, Profet Josef Smit i bin kasem plante revelesen we i kam long Lod, we i tekem tu, ol tabu kaonsel blong wanwan man o woman, ol instraksen blong stap lukaot long Jos, ol visen blong ol las dei mo plante trutok we i givim insperesen blong taem we i no save finis. Be plante long Ol Sent oli no bin ridim olgeta. Ol revelesen ia, oli no bin pablisim olgeta yet, mo samfala kopi nomo we i bin stap, oli bin raetem long ol pej we oli stap wanwan, mo oli bin pasem raon long ol memba mo ol misinari nao oli bin stap pasem raon.
Afta, long Novemba 1831, Josef i bin singaotem wan kaonsel blong ol lida blong Jos, blong toktok raon long ol revelesen we oli bin stap pablisim. Afta we oli bin askem tingting blong Lod, ol lida ia oli bin mekem ol plan blong pablisim Buk blong Olgeta Komanmen—wanem we i kam fastaem long Doktrin mo Ol Kavenan blong tedei. I no longtaem afta, evriwan i bin save ridim blong olgetawan, toktok ia blong God, we Hem i talemaot tru long wan profet we i stap laef, tru pruf se “ol ki blong ol sikret blong kingdom blong Sevya blong yumi oli stap bakegen long han blong man.” From ol risen ia, mo plante moa risen, Ol Sent blong bifo, mo blong naoia, oli tekem se ol revelesen ia, “praes blong hem i moa bigwan bitim ol rij samting blong ful Wol ia” (Doktrin mo Ol Kavenan 70, seksen heding).
Luk long Saints, 1:140–43.
Ol aedia blong Lanem Samting long Hom mo long Jos
Doktrin mo Ol Kavenan 67:1–9; 68:3–6
Ol wokman blong Lod oli talemaot tingting blong Hem, taem Tabu Spirit i lidim olgeta.
Desisen ia, blong pablisim ol revelesen we Josef Smit i bin kasem, i luk olsem i wan isiwan, be sam fasfala lida blong Jos oli no bin save gud se i wan gudfala aedia o nogat. Wan wari i long saed blong ol samting we oli no go stret evriwan long wei we Josef Smit i bin raetem ol revelesen. Revelesen we i stap long seksen 67 i kam olsem ansa blong wari ia. ?Wanem nao yu lanem abaot ol profet blong Lod mo revelesen we i stap long ol ves 1–9? ?Wanem nao sam moa niu tingting we yu kasem aot long seksen 68:3–6
?Olsem wanem nao yuwan yu kam blong save se ol revelesen we God i stap givim long ol wokman blong Hem, oli tru? Mo tu, yu save tingting hevi long ol eksperiens blong taem we yu filim Lod i stap toktok long yu tru wan long ol wokman blong Hem (luk long Doktrin mo Ol Kavenan 68:4). ?Wetaem nao yu bin filim se “Tabu Spirit i lidim [yu]” (ves 3) blong talem wan samting? ?Olsem wanem nao Lod i “stanap wetem yufala”? (ves 6).
Bifo oli printim Buk blong Olgeta Komanmen, samfala lida blong Jos oli bin saenem wan testemoni, we oli bin raetem, se ol revelesen insaed long buk ia oli tru. Blong luk wan kopi blong testemoni blong olgeta, luk long “Testimony, circa 2 November 1831,” Revelation Book 1, 121, josephsmithpapers.org.
Doktrin mo Ol Kavenan 67:10–14
“Gohed wetem fasin blong stap wet longtaem.”
?Olsem wanem nao fasin blong stap jalus, stap fraet mo gat hae tingting oli holemtaet yumi blong gro i kam moa kolosap long Lod? ?Olsem wanem nao bae yumi winim “wan man we i folem fasin blong wol” o “wan maen we i folem fasin blong wol” blong mekem se yumi save “luk [Hem] mo save se [Hem ia]”? (ves 12; luk tu long Mosaea 3:19). ?Wanem nao yu faenem insaed long ol ves ia we i givim insperesen long yu blong “gohed wetem fasin blong stap wet longtaem gogo kasem taem yufala i kam stret evriwan”? (ves 13).
Doktrin mo Ol Kavenan 68:25–31
Mi save help blong mekem Jisas Kraes i senta long hom blong mi.
Ol toktok blong Lod long Doktrin mo Ol Kavenan 68:25–31 i stap go speseli long ol papa mo mama, be nomata sapos yu no wan papa o mama, yu save yusum kaonsel blong Hem blong mekem pat blong yu blong mekem doktrin blong Jisas Kraes i senta long hom blong yu. Lis we i stap daon ia, oli sam long ol prinsipol we Lod i talem se oli mas tijim insaed long hom. Tingting long olsem wanem yu save mekem wanwan long ol pat ia blong fandesen blong wan hom we Kraes i senta—hom we yu stap long hem naoia o blong fiuja hom blong yu. Ol risos mo ol kwestin we oli givim, oli save help.
-
Fasin blong Sakem Sin: Stadi long Alma 36:17–20, mo luk olsem wanem Alma i kasem blesing long wan impoten taem from we papa blong hem i bin tijim hem abaot atonmen misin blong Sevya. ?Olsem wanem nao yu save help blong givim insperesen long famli blong yu blong oli tanem olgeta i go long Jisas Kraes mo sakem sin? (luk tu long 2 Nifae 25:26).
-
Fet long Jisas Kraes: Ridim faevfala tingting we Presiden Russell M. Nelson i givim blong developem fet long “Kraes I Girap Finis; Bilif long Hem bae I Muvumaot Ol Bigfala Hil” (Liahona, Mei 2021, 103). Tingting hevi long olsem wanem ol tingting ia oli save krietem wan kalja blong fet insaed long famli blong yu.
-
Baptaes: Luklukbak long kavenan blong baptaes olsem we oli tokbaot long Mosaea 18:8–10, 13. ?Olsem wanem nao ol hadwok blong yu blong kipim ol kavenan i save mekem famli blong yu i kam moa strong?
-
Presen Ia we I Tabu Spirit: Stadi long ol invitesen long ol pej 17–19 blong Blong Ol Yut Oli Kam Strong: Wan Gaed Buk blong Mekem Ol Joes. ?Wanem nao yu filim blong mekem tru long insperesen blong invaetem paoa blong Tabu Spirit insaed long hom blong yu?
-
Prea: ?Wanem nao yu lanem abaot paoa blong prea insaed long hom long“Love Is Spoken Here”? (Children’s Songbook, 190–91). ?Wanem blesing nao Sevya i promes blong givim long 3 Nifae 18:15–21?
-
Ol narafala prinsipol yu faenem long Doktrin mo Ol Kavenan 68:25–31:
?Wanem kaonsel nao bae yu save givim long wan we memba blong famli blong hem oli no sapotem ol hadwok blong olgeta blong bildimap fet long Kraes?
Luk tu long “Famli: Wan Ofisol Toktok I Go long Wol,” Gospel Laebri; Topics mo Questions, “Parenting,” Gospel Laebri; Dieter F. Uchtdof, “Jisas Kraes I Paoa blong Ol Papa mo Mama,” Liahona, Mei 2023, 55–59.
Ol “Tru mo fetful” fren oli helpem mi blong folem Jisas Kraes.
?From wanem yu ting se hem i “waes blong [Lod]” blong wan we i “tru mo fetful” blong folem Oliva Kowdri long wan asaenmen we oli tokbaot insaed long ves ia? ?Olsem wanem nao prinsipol ia i blong yu?
Helpem olgeta we oli stap lanem samting blong leftemap wanwan long olgeta. Wanwan man mo woman long klas o famli blong yu, oli wan rij ples blong kasem testemoni, ol niu tingting mo ol eksperiens blong stap laef folem gospel. Invaetem olgeta blong serem ol ansa blong olgeta long wanwan long olgeta, mo blong oli leftemap tingting blong wanwan long olgeta.
Mi mi akaontebol long ol revelesen we Lod i bin givim.
Lod i bin givim, long samfala elda, responsabiliti ia blong lukluk ova long wok blong stap pablisim ol revelesen. Nomata se yu no gat semmak responsabiliti ia, ?wanem nao hem i wok o responsabiliti blong yu blong “lukaotem gud ol revelesen mo ol komanmen”? (ves 3).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Doktrin mo Ol Kavenan i tijim mi abaot Jisas Kraes.
-
Talem long ol pikinini blong yu abaot olsem wanem oli printim i kam wan buk ol revelesen we Josef Smit i bin kasem (luk long “Japta 23: Doktrin mo Ol Kavenan,” long Ol Doktrin mo Ol Kavenan Stori, 90–92, o vidio we i go wetem long Gospel Laebri). Helpem olgeta blong tingbaot sam long ol samting we yu bin lanem finis abaot Jisas Kraes aot long Doktrin mo Ol Kavenan long yia ia. Yu save serem tu wetem wanwan long olgeta, sam long ol fevret ves blong yu insaed long Doktrin mo Ol Kavenan.
2:2Chapter 23: The Doctrine and Covenants: August–November 1831
-
Yu save soem tu long ol pikinini blong yu, Baebol, Buk blong Momon, Doktrin mo Ol Kavenan, mo Perel we I Gat Bigfala Praes mo tokbaot wetem olgeta olsem wanem oli defren mo olsem wanem oli semsemmak (luk long toktok we oli talem blong tokbaot ol buk ia long Gaed long Ol Skripja). ?Olsem wanem nao bae yu save se ol skripja oli tru? ?Wanem nao yumi lanem aot long Doktrin mo Ol Kavenan 67:4, 9 abaot ol revelesen we Lod i bin givim long Josef Smit?
Doktrin mo Ol Kavenan 68:25–31
Mi save kasem baptaes taem mi gat eit yia.
-
Insaed long Doktrin mo Ol Kavenan 68:27, Lod i talem i klia, hamas yia wan man o woman i mas gat blong kasem baptaes. Helpem ol pikinini blong yu blong fanemaot wanem we Hem i bin talem. ?From wanem nao Jisas i wantem yumi blong kasem baptaes? Wan singsing olsem “Baptism” (Children’s Songbook, 100–101) i save help. Blong stap yusum ol pikja o ol ves 25–31 (o tugeta), i helpem ol pikinini blong yu blong faenemaot ol samting we Lod i wantem ol pikinini blong lanem.
-
Rid wetem ol pikinini blong yu abaot asaenmen we Lod i bin givim long Oliva Kowdri long seksen heding blong Doktrin mo Ol Kavenan 69. ?Wanem kaonsel nao Lod i bin givim long ves 1? ?From wanem i impoten blong stap wetem ol pipol “we bae i tru mo fetful”? Maet bae ol pikinini blong yu oli save talem abaot wan we oli save we i stap “tru mo fetful.” Singsing tugeta wan singsing we i leftemap tingting blong ol pikinini blong stap tru mo fetful olsem Sevya, olsem “Mi Traem blong Kam Olsem Jisas” (Liahona,Epril 2012, 64). ?Long wanem wei nao yumi save mekem sua se yumi stap tru mo fetful long Lod? ?Long wanem wei nao Hem i save yusum yumi blong blesem ol narawan taem yumi stap tru mo fetful?
Blong kasem moa aedia, luk long magasin blong Fren blong manis ia.