Doktrin mo Ol Kavenan 64–66

Tingting long hemia taem yu stap stadi long Doktrin mo Ol Kavenan 64:1–11:

• Tingting abaot wan taem we Lod i bin fogivim yu. ?Yu bin filim olsem wanem?

• ?I gat wan we yu nidim blong yu fogivim hem? ?From wanem, taem blong fogivim ol narawan i stap had tumas? ?Wanem nao i helpem yu blong winim ol hadtaem ia?

• ?Wanem ol trutok abaot fasin blong fogiv long Doktrin mo Ol Kavenan 64:1–11 i impoten long yu? ?From wanem yu ting se Lod i givim oda long yumi “blong fogivim evriwan” (ves 10

Sapos yu stap traehad blong fogiv, tingting blong stap stadi long mesej blong Elda Jeffrey R. Holland long“The Ministry of Reconciliation” (Liahona, Nov. 2018, 77–79) o mesej blong Kristin M. Yee “Tanem Nogud I Kam Gud: Rod Ia blong Kasem Hiling Tru long Fasin blong Fogiv” (Liahona, Nov. 2022, 36–38). ?Wanem nao yu lanem abaot, olsem wanem Kraes i save helpem yu blong fogiv?

Ol rilesensip blong famli i save givim plante janis blong fogiv. Tingting long ol memba blong famli blong yu. ?Huia nao yu nidim blong fogivim hem? ?Olsem wanem nao yumi gat “hadtaem” (ves 8) taem yumi no fogivim wanwan long yumi? ?Long wanem wei nao fasin blong fogiv i save jenisim ol rilesensip blong famli blong yu?

Luk tu long Topics and Questions, “Forgiveness,” Gospel Laebri; “Forgiveness: My Burden Was Made Light” (vidio), Gospel Laebri.

8:24

?Yu yu bin harem se yu “taed” wetem evri “gud” samting we yu stap traem blong mekem? Lukaotem mesej we Lod i gat long yu long Doktrin mo Ol Kavenan 64:31–34. ?Wanem nao Lod i wantem yu blong mekem blong save mekem “bigfala wok” blong Hem.?

Tingting long wan samting blong yusum long lesen we i save soem ves 33—wan samting we i bigwan we oli mekemap long ol smosmol samting, olsem ol smosmol tael [o ston o glas] we oli putum tugeta blong mekem wan bigfala pikja o wan brikis blong bilding. ?Wanem “ol smol samting” we yu save mekem evri dei blong “[putum] fandesen” blong bigfala wok blong God? ?Wanem nao sam long ol eksampol blong “bigfala wok” ia we Lod i bin givim long yu?

Elda Donald L. Hallstrom

“Hat i simbol blong lav mo komitmen. Yumi mekem ol sakrifaes mo tekem ol hevi samting blong olgeta we yumi lavem; i no gat eni nara risen from wanem yumi mekem hemia. Sapos i no gat lav, bae komitmen blong yumi i no save strong. …

“Blong gat ‘wan hat we i wantem mekem samting’ i stap minim blong givim bes hadwok blong yumi, mo tingting ia we i nambawan evriwan, mo blong stap lukaotem waes tingting blong God. Hem i minim se, laeftaem stadi ia blong yumi we yumi mas givim tingting mo taem blong yumi long hem, hem i sapos blong stadi long ol samting we oli blong taem we i no save finis. Hem i minim se i mas gat wan rilesensip we i strong tumas bitwin fasin blong stap harem tok blong God mo fasin blong stap obei long tok ia” (“The Heart and a Willing Mind,” Ensign, June 2011, 31–32).

Wan ensaen i “wan flag o wan standet we ol pipol oli kam tugeta long hem we oli wan long wan stamba tingting, o wan aedentiti” (Gaed long Ol Skripja, “Flag,” olskripja.ChurchofJesusChrist.org ?Olsem wanem Saeon—o Jos blong Lod—i stap olsem wan flag o standet long yu? Tingting long ol narafala eksampol blong ol samting we oli stap holem antap, olsem wan flag, blong blesem ol pipol: Namba 21:6–9; Matiu 5:14–16; Alma 46:11–20. Lukaotem sam nara wei we Lod i tokbaot Saeon long Doktrin mo Ol Kavenan 64:41–43

Luk tu long “Let Zion in Her Beauty Rise,” Hym, namba 41.

Doktrin mo Ol Kavenan 65 i tokbaot klia, wetem insperesen, misin blong Jos blong Lod long ol las dei ia. Tingting blong stap lukaotem seksen ia, blong stap lukaotem ol ansa blong ol kwestin olsem hemia: ?Wanem nao Lod i wantem blong kingdom blong Hem i mekem i hapen long wol ia? ?Wanem nao Hem i wantem mi blong mekem blong save help?

Luk tu long “Prepare Today for the Second Coming” (vidio), ChurchofJesusChrist.org.

1:7

I no longtaem afta we hem i joenem Jos, William E. McLellin i bin askem long Josef Smit blong talemaot tingting we God i gat long hem. Josef i no bin save, be William i gat faevfala kwestin we hem i bin hop se bae Lod i ansarem hem tru long Profet blong Hem. Yumi no save se wanem nao ol kwestin blong Wiliam, be yumi save se revelesen ia, i go long hem, we naoia i stap long Doktrin mo Ol Kavenan 66, mo i bin ansarem evri kwestin blong Wiliam, we hem i “glad fulwan long hem” (“William McLellin’s Five Questions,” long Revelations in Context, 138).

Taem yu stap ridim seksen 66, tingbaot wanem we Lod i bin save abaot William MakLelin mo ol wari mo ol tingting blong hat blong hem. ?Long wanem wei nao Lod i bin soem long yu se Hem i lavem yu? Sapos yu gat wan petriakel blesing, tingting blong stadi long hem. Taem yu stap stadi long hem, ?wanem nao Tabu Spirit i stap helpem yu blong andastanem abaot tingting we God i gat long yu?

Not: Taem yu tijim ol pikinini blong yu abaot ol komanmen blong Lod “blong fogivim evriwan,” bae yu wantem blong mekem i klia se blong stap fogiv i no minim se blong stap letem ol pipol blong oli stap mekem yu yu harem nogud. Leftemap tingting blong olgeta blong talemaot long wan adalt we oli trastem, sapos wan i mekem olgeta i harem nogud o i tajem olgeta long wei we i no stret.

• Afta we yufala i ridim Doktrin mo Ol Kavenan 64:10 wetem ol pikinini blong yu, toktok wetem olgeta abaot wanem i minim blong fogivim wan narawan. Maet yu save serem samfala simpol eksampol. Maet oli save mekem wan drama abaot ol eksampol ia blong praktis blong stap fogiv.

• Maet yu save askem ol pikinini blong yu blong mekem plan blong olsem wanem oli save tijim wan—olsem wan yangfala brata o sista—abaot fasin blong stap fogivim ol narawan. Helpem olgeta blong faenem ol toktok long Doktrin mo Ol Kavenan 64:7–10 we oli save yusum taem oli tij.

• Singsing wan singsing abaot fasin blong fogiv, olsem “Help Me, Dear Father” (Children’s Songbook, 99). ?Wanem nao singsing ia i stap tijim yumi long saed blong fasin blong fogivim narafala man?

• Yu save soem long ol ol pikinini blong yu sam samting we oli mekem long ol smol samting, olsem wan pasel o wan doa mat. Afta, tugeta, yufala i save ridim Doktrin mo Ol Kavenan 64:33. ?Wanem nao i “bigfala wok ia” blong God? ?Wanem nao “ol smol samting” we yumi save mekem we bae i help?

• Taem yu ridim long ol pikinini blong yu Doktrin mo Ol Kavenan 64:34, yu save poen i go long hat mo hed blong yu taem yu ridim “hat” mo “maen” mo invaetem ol pikinini blong mekem hemia wetem yu. ?Olsem wanem nao yumi givim hat (ol tingting blong hat) mo maen (ol tingting) i go long Sevya?

• Helpem ol pikinini blong andastanem se William E. McLellin i bin gat faef kwestin blong Lod. Josef i kasem ol ansa blong ol kwestin ia nomata hem i no save wanem ol kwestin blong Wiliam. Talem long ol pikinini blong yu abaot wan taem we Lod i bin soem long yu wanem Hem i wantem yu blong mekem, mo tokbaot ol blesing we bae i kam taem yu stap folem daereksen blong Hem. Afta, yufala i save ridim Doktrin mo Ol Kavenan 66:4 tugeta mo invaetem ol pikinini blong yu blong lukaotem ol janis blong andastanem wanem Lod i wantem olgeta blong mekem.

  

• Taem ol pikinini blong yu oli lukluk long wan pikja blong Seken Kaming blong Sevya, askem olgeta blong tokbaot wanem oli luk o wanem nao oli save abaot wanem we bae i hapen long taem ia. Mo tu, yu save givim long ol pikinini blong yu ol toktok mo ol sentens abaot Seken Kaming blong faenem long Doktrin mo Ol Kavenan 65. ?Wanem nao ol toktok mo ol sentens ia oli tijim yumi abaot? ?Olsem wanem nao yumi save rere from taem we Sevya bae i kambak?