“9–15 Jun: ‘Mi Stap Wetem Olgeta Fetful Oltaem’: Doktrin mo Ol Kavenan 60–63,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 60–63,” Kam Folem Mi—Blong Hom mo Jos: 2025
Wan smol pat blong pikja ia Kamp faea long saed blong Misuri Reva, i kam long Bryan Mark Taylor
9–15 Jun: “Mi Stap Wetem Olgeta Fetful Oltaem”
Doktrin mo Ol Kavenan 60–63
Long eli Ogis 1831, Josef Smit mo ol narafala elda blong Jos oli bin stap rere blong gobak long Ketlan afta long wan sot visit i go long “graon blong Saeon” (Doktrin mo Ol Kavenan 59:3). Lod i bin wantem olgeta blong prijim gospel long taem blong trip blong olgeta (luk long Doktrin mo Ol Kavenan 52:10), mo sam long olgeta oli bin wok wetem strong tingting. Be ol narawan oli no bin gat strong tingting. “Be oli haedem talen we mi bin givim long olgeta,” Lod i talem, “from se oli fraet long man” (Doktrin mo Ol Kavenan 60:2). Plante long yumi i save olsem wanem ol elda ia oli bin filim. Nomata se yumi lavem gospel, fraet mo tu tingting i save stopem yumi blong stap serem gospel ia. Be Lod i gat bigfala sore. Hem “i save ol samting we i no strong long man, mo i save olsem wanem blong givhan long [yumi]” (Doktrin mo Ol Kavenan 62:1). Truaot long revelesen ia yu save faenem ol fas misinari we oli gat bigfala hop we i save helpem yumi blong winim ol fraet mo ol mistek blong yumi: “Mi save mekem yufala i tabu.” “Evri samting we i laef i stap long han blong mi.” “Mi stap wetem olgeta fetful oltaem.” “Hem we i fetful mo i stap strong kasem en, bambae i winim wol.” (Doktrin mo Ol Kavenan 60:7; 61:6; 62:9; 63:47.)
Ol aedia blong Stap Lanem Samting long Hom mo long Jos
Mi save serem lav mo testemoni blong mi abaot Jisas Kraes.
?Olsem wanem testemoni blong yu long saed blong gospel i olsem wan “talen,” o wan rij samting we i kam long God? ?Wanem ol wei we samtaem yumi stap “haedem talen [blong yumi]”? (Doktrin mo Ol Kavenan 60:2; luk tu long Matiu 25:14–30).
?Wanem nao ol mesej blong leftemap tingting we i kam long Lod , we yu faenem long seksen 60 mo 62? ?Olsem wanem nao ol mesej ia oli bildim tras blong yu blong serem gospel ia? Taem yu stap tingting hevi long ol kwestin ia, tingting blong singsing o ridim ol toktok blong “I Want to Be a Missionary Now” (Children’s Songbook, 168). ?Wanem nao yu lanem aot long singsing blong ol pikinini ia abaot stap serem gospel?
Luk tu long “Sharing the Gospel” koleksen long Gospel Laebri.
Mi save rere oltaem blong stap serem fet blong mi long Kraes.
Doktrin mo Ol Kavenan 60:2–4; 61:1–2, 20, 36–38; 62:1, 6
Ol skripja oli tij abaot Jisas Kraes.
Lod i talemaot ol impoten trutok abaot Hemwan, taem Hem i givim ol instraksen blong Hem long ol misinari blong Hem. Lukaotem ol trutok ia long Doktrin mo Ol Kavenan 60:2–4; 61:1–2, 20, 36–38; 62:1, 6. ?Wanem ol stori insaed long ol skripja we oli soem ol wok mo ol fasin blong Sevya we yu faenem? (luk long, eksampol, Jon 8:1–11; Ita 2:14–15).
Desisen blong mi i mas balens wetem “jajmen mo ol daereksen blong Spirit.”
Lod i givim ol daereksen abaot ol trutok we i no save finis mo ol prinsipol, be oltaem Hem i lego long yumi blong faenemaot ol stret ditel abaot olsem wanem blong tekem aksen long ol prinsipol ia. ?Wanem nao tingting blong yu abaot prinsipol ia we oli tokbaot long Doktrin mo Ol Kavenan 62? (luk tu long Doktrin mo Ol Kavenan 60:5; 61:22). ?Olsem wanem yu bin luk prinsipol ia i wok insaed long laef blong yu? ?From wanem hem i gud long yumi blong mekem sam desisen, be i no blong stap wet se God blong i talem stret wanem blong yumi mekem?
Luk tu long Ita 2:18–25; Doktrin mo Ol Kavenan 58:27–28
Ol saen oli kam tru long fet mo tru long tingting blong God.
Long en blong aotlaen ia, i gat wan pikja blong wan merikel we i soem dip respek long Esra But: tru long bigfala merikel, han blong Elsa Jonson i kam oraet. Afta we oli luk hemia, Esra i wantem tumas blong kasem baptaes. Be yet, afta sam manis nomo, Esra i lusum fet blong hem mo i stap tokbaot Profet we i soem se hem i no agri. ?Olsem wanem hemia i save hapen, tingting long merikel ia we hem i witnesem?
Tingting hevi long hemia taem yu stap ridim Doktrin mo Ol Kavenan 63:7–12. ?Wanem ol trutok we yu lanem abaot ol saen mo fet?
Luk long Matiu 16:1–4; Jon 12:37; Momon 9:10–21; Ita 12:12, 18
Mi save stap klin long ol tingting mo ol aksen blong mi.
Long Doktrin mo Ol Kavenan 63:16, Sevya i talem strong bakegen wanem we Hem i bin tijim insaed long Niu Testeman—se loa blong jastiti i mas holem nomo ol aksen blong yumi be tu, ol tingting blong yumi (luk long Matiu 5:27–28). Taem yu ridim Doktrin mo Ol Kavenan 63:16, raetemdaon ol woning we i Sevya i givim abaot ol rabis tingting. Maet yu save tingting hevi tu long oposit blong wanwan woning ia. Eksampol, ?wanem sam long ol oposit toktok o sentens blong fraet? ?Wanem nao ol narafala blesing we oli save kam taem ol tingting mo aksen oli klin?
Plante pipol oli ting se, ol standet blong Lod blong fasin blong stap klin long tingting mo aksen oli ol stael blong bifo o oli strong tumas. ?Wanem nao bae i defren sapos evri pikinini blong God oli stap traehad blong laef folem loa ia? Maet yu save lukaotem ol ansa blong kwestin ia long mesej blong Elda David A. Bednar “We Believe in Being Chaste” (Liahona, Mei 2013, 41–44) o “Bodi blong yu i tabu.” (Blong Ol Yut Oli Kam Strong: Wan Gaed Buk blong Mekem Ol Joes, 23–26). ?Wanem nao ol mesej blong hop we yu faenem?
Nomata se yumi save ol blesing blong stap klin long tingting mo aksen blong yumi, hemia i no minim se hemia i isi. Yu save tekem smoltaem blong tingting hevi long wanem nao i stap mekem i had long yu blong kipim standet blong jastiti—mo wanem nao i mekem i moa isi. ?Wanem sam aedia we yu save serem wetem ol narawan abaot wanem blong mekem taem yu kasem temtesen blong gat ol tingting we oli no klin?
Sapotem yufala wanwan. Wan long ol bigfala blesing blong stap mit tugeta long ol Jos miting mo ol klas i janis ia blong save kasem sapot long Ol Sent long efot blong yumi blong folem Sevya. Plante long yumi i fesem ol semmak jalenj, mo ol semmak eksperiens blong yumi oli givim bigfala paoa. No fraet blong talemaot se yu gat ol jalenj. Serem wetem wanwan long yufala, wanem i stap helpem yu blong laef folem ol loa blong God mo blong winim ol temtesen.
Luk tu long Doktrin mo Ol Kavenan 121:45; Topics and Questions, “Virtue,” Gospel Laebri; “Standards: Sexual Purity and Modesty—True Confidence” (vidio), Gospel Laebri; AddressingPornography.ChurchofJesusChrist.org.
Standards: Sexual Purity and Modesty - True Confidence
Doktrin mo Ol Kavenan 63:58–64
Ol tabu samting, oli mas tritim olgeta wetem respek.
Ol prinsipol long Doktrin mo Ol Kavenan 63:58–64 i go bitim blong yusum nogud nem blong Lod. ?Wanem ol narafala tabu samting we oli “kam long antap,” o i kam long God? ?Wanem nao i minim long yu blong talem ol samting ia wetem fasin blong “lukaot gud”?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Doktrin mo Ol Kavenan 60:4; 61:1–2, 36; 62:1
Ol skripja oli tij abaot Jisas Kraes
-
Maet yu save raetemdaon sam long ol stetmen abaot Sevya we i stap long Doktrin mo Ol Kavenan 60–62 long ol smol pis blong pepa. Afta, ol pikinini blong yu oli save majem ol stetmen ia wetem ol pikja blong Jisas long taem blong seves blong Hem long wol ia (luk long Gospel Art Buk, ol namba 34–61) we oli soemaot ol fasin ia. ?Long wanem wei nao Hem i soemaot Hemwan long yumi tedei?
Wan smol pat blong pikja ia Blong Stamba Tingting Ia, i kam long Yongsung Kim
Doktrin mo Ol Kavenan 60:7; 61:1–2; 62:1
Lod bae i fogivim mi sapos mi sakem sin.
-
Taem yu ridim Doktrin mo Ol Kavenan 60:7; 61:2 wetem ol pikinini blong yu, helpem olgeta blong faenem ol toktok we ol ves ia oli gat we oli semsemmak. Rimaenem olgeta se ol revelesen ia, God i bin givim long Josef Smit, mo ol nara lida blong Jos. ?Wanem nao Lod i wantem olgeta blong save? Mo tu, yu save tokbaot wanem Sevya i bin filim abaot yumi taem yumi mekem ol mistek mo wanem i minim blong sakem sin. Folem wanem we i stap long Doktrin mo Ol Kavenan 62:1, ?olsem wanem nao Jisas i save help taem yumi kasem temtesen?
Jisas Kraes i wantem mi blong serem gospel blong Hem.
-
Maet yu save askem ol pikinini blong yu wanem nao bae oli talem sapos wan i askem olgeta abaot wanem oli laekem abaot Jisas Kraes mo Jos blong Hem. Tugeta, singsing wan singsing abaot stap serem gospel olsem “I Want to Be a Missionary Now” (Children’s Songbook, 168), i save givim aedia long olgeta. Afta, yu save ridim Doktrin mo Ol Kavenan 62:3 mo askem ol pikinini blong yu blong lisin long wanem bae hapen taem yumi serem testemoni blong yumi. ?Olsem wanem nao promes ia long ves 9 i help taem yumi filim fraet?
Mi save stap gat respek.
-
Blong introdiusum Doktrin mo Ol Kavenan 63:64, yu save singsing wan singsing abaot fasin blong stap gat respek wetem ol pikinini blong yu olsem “Reverence Is Love” (Children’s Songbook, namba 31). Afta, yu save tokbaot ol defdefren wei blong soem respek long Papa long Heven mo Jisas Kraes.
-
Yu save helpem ol pikinini blong yu oli andastanem wanem hem i fasin blong stap soem respek taem yu stap toktok long olgeta abaot wan aetem we i spesel long olgeta, olsem wan fevret doli, o buk o blangket. Askem olgeta olsem wanem nao oli stap lukaot gud mo protektem ol samting we oli spesel long olgeta. Afta, tugeta, yufala i save ridim Doktrin mo Ol Kavenan 63:64. ?Wanem ol samting we oli spesel—o tabu—long Papa long Heven? (luk long, eksampol, ves 61 mo aktiviti pejblong wik ia). ?Olsem wanem nao yumi mas tritim ol samting ia—wetem ol toktok mo ol aksen blong yumi?
Blong kasem moa aedia, luk long magasin blong Fren blong manis ia.