“2–8 Jun: ‘Wok Wetem Strong Tingting long Wan Gud Wok’: Doktrin mo Ol Kavenan 58–59,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 58–59,” Kam Folem Mi—Blong Hom mo Jos: 2025
Indipendens, Misuri long 1831, i kam long Al Rounds
2–8 Jun: “Wok Wetem Strong Tingting long Wan Gud Wok”
Doktrin mo Ol Kavenan 58–59
Taem we ol elda blong Jos oli bin luk ples blong siti blong Saeon blong fas taem—we i Indipendens, Misuri—i no bin wanem we oli stap tingting long hem. Sam oli tingting se bae oli faenem wan komuniti we i stap wok strong, i save mekem samting wetem wan strong grup blong Ol Sent. Be, oli faenem wan ples we i no gat fulap pipol long hem, we i no gat kaen fasin blong laef we oli bin save long hem, mo insaed long hem i gat ol man olbaot, be i no Ol Sent. I luk olsem se Lod i no bin stap askem olgeta blong kam nomo long Saeon—Hem i bin wantem olgeta blong bildimap Saeon.
Taem ol samting we yumi wet from oli no go stret wetem samting we i tru, yumi save tingbaot wanem Lod i bin talem long Ol Sent long 1831: “Yufala i no save luk wetem ae blong yufala nomo, long taem naoia, plan ia blong God blong yufala, … mo glori we bae i kam afta plante hadtaem” (Doktrin mo Ol Kavenan 58:3 Yes. Laef i fulap long ol hadtaem, iven ol fasin nogud, be yumi save “mekem plante stret mo gud wok oli kamtru, from paoa ia i stap long [yumi]” (ol ves 27–28).
Luk tu long Saints, 1:127–33.
Ol aedia blong Stap Lanem Samting long Hom mo long Jos
Doktrin mo Ol Kavenan 58:1–5; 59:23
“Afta plante hadtaem, ol blesing oli kam.”
Ol Sent oli bin hop tru, se, long taem blong laef blong olgeta, Jackson Kaonti bae i kam Saeon, wan ples we Ol Sent oli save kam tugeta long hem. Be, taem blong olgeta long Jackson Kaonti i bin fulap wetem ol hadtaem . Truaot long sam yia, oli fosem olgeta blong aot mo “wet blong smol taem blong putumbak Saeon” (Doktrin mo Ol Kavenan 105:9).
?Wanem nao yu lanem abaot ol hadtaem o ol jalenj long ol toktok blong Lod long Doktrin mo Ol Kavenan 58:1–5? ?Long tingting blong yu, from wanem sam blesing oli kam nomo afta long hadtaem? ?Wanem blesing nao yu bin kasem afta long hadtaem blong yu?
?Wanem nao yu lanem aot long Doktrin mo Ol Kavenan 59:23 we i givim hop long yu?
Doktrin mo Ol Kavenan 58:26–29
Mi save “mekem plante stret mo gud samting oli kamtru” long “tingting blong miwan nomo”.
Olsem pat blong stadi blong yu long ol ves ia, maet yu save mekem wan lis blong sam long ol samting we yu stap “wok wetem strong tingting” blong mekem olgeta. ?Evriwan ia, oli “ol gudfala wok”? Tingting hevi long wanem we yu save mekem blong “mekem plante stret mo gud samting oli kamtru”—mo tingting blong stap putum ol gol blong mekem.
?From wanem nao yu ting se Lod i wantem yu blong mekem “plante samting long tingting blong [yuwan]”? Sapos oli “fosem [yu] long evri samting,” ?Wanem nao risal blong hem? ? ?Wanem nao 2 Nifae 2:27 i ademap sam samting long andastaning blong yu abaot prinsipol ia?
Luk tu long Dale G. Renlund, “Naoia Yufala I Mas Jusumaot,” Liahona, Novemba 2018, 104–6.
Doktrin mo Ol Kavenan 58:42–43
Lod i fogivim mi taem mi sakem sin.
Promes blong Lod long Doktrin mo Ol Kavenan 58:42 blong fogivim fulwan olgeta we oli sakem sin i givim insperesen, nomata long hemia, sam kwestin we oli kamkamaot hem i: ?Wanem nao i minim blong sakem sin? ?Olsem wanem nao bae mi save sapos mi bin sakem sin? I gud tumas, Lod i gohed blong talem, “Long wei ia bae yufala i save…” (ves 43).
Hemia sam moa kwestin we samtaem ol pipol oli gat abaot fasin blong sakem sin. ?Wanem nao Spirit i tijim long yu taem yu stadi long ol risos we oli givim we oli stap andanit ia?
Taem mi stap talemaot ol sin blong mi, ?Olsem wanem nao wei i helpem mi blong sakem sin? Luk long Sam 32:1–5; Ol Proveb 28:13; Mosaea 27:34–37; Alma 39:12–13.
Mi stap traem blong sakemaot ol sin blong mi, be mi stap gohed blong mekem ol mistek. ?Fasin blong mi blong sakem sin i wok yet? Luk long Bradley R. Wilcox, “Worthiness Is Not Flawlessness,” Liahona, Nov. 2021, 61–67; “Daily Restoration” (vidio), Gospel Laebri.
Daily Restoration
?Olsem wan nao bae mi save stret se Sevya i bin fogivim mi? Luk long Tad R. Callister, “Atonmen blong Jisas Kraes,” Liahona, Mei 2019, 85–87, speseli taetol seksen “2. Sin
Yu save faenem moa niu tingting long“Questions and Answers” abaot fasin blong sakem sin long Blong Ol Yut Oli Kam Strong: Wan Gaed blong Stap Mekem Ol Joes (ol pej 8–9).
Luk tu long Topics and Questions, “Repentance,” Gospel Laebri.
?Huia i Poli Naet?
Poli Naet mo hasban blong hem, Josef Naet Senia, oli bin sam long ol fas man mo woman blong biliv long koling blong Josef Smit olsem wan profet. Poli mo Josef, tufala i givim strong sapot long Profet long wok ia blong stap transletem Buk blong Momon. Naet famli i aot long Kolesvil, Niu Wok blong kam tugeta wetem Ol Sent long Ohaeo, mo afta, oli kasem komanmen blong muv i go long Jakson Kaonti, Misuri. Taem oli bin travel i go, helt blong Poli i stat blong godaon, be hem i bin gat strong tingting blong luk Saeon bifo hem i ded. Hem i bin stap long Misuri blong sam dei nomo taem hem i pasawe (luk long Saints, 1:127–28, 132–33). Oli bin kasem Doktrin mo Ol Kavenan 59 long dei we hem i pasawe mo ol ves 1 mo 2 speseli, i stap tokbaot hem.
Ol komanmen oli ol blesing.
?Wanem nao yu ting se i minim blong putum “antap long hed … ol komanmen”? (ves 4). Tingting long olsem wanem Lod i blesem yu taem yu traehad blong obei wanwan long ol komanmen long ol ves 5–19.
Serem wanem we yu stap lanem. Long plante situesen, ol niu tingting long saed blong spirit we yu kasem taem yu stadi long ol skripja, i save mekem fet blong famli blong yu, ol fren mo ol memba blong wod oli kam moa strong. Serem ol eksperiens blong yu wetem olgeta, ol filing mo testemoni abaot Jisas Kraes.
Sabat i dei ia blong Lod.
Afta we Hem i bin promesem Ol Sent long Saeon “plante komanmen,” Lod i bin tokbaot bigwan wan komanmen: oda ia blong givim ona long “tabu dei” blong Hem (Doktrin mo Ol Kavenan 59:4, 9). Taem yu stap stadi long Doktrin mo Ol Kavenan 59: 9–19, tingting hevi se from wanem, blong stap kipim Sabat dei, i bin impoten tumas long Ol Sent ia taem oli bin stap lukaot blong bildimap Saeon. ?From wanem hemia i impoten long yu?
Mo tu, yu save tingting hevi sapos se yu stap yusum Sabat dei long wei we Lod i wantem. ?Olsem wanem nao, blong kipim Sabat dei i tabu i save helpem yu blong “lukaot gud blong ol samting blong wol oli no spolem yu? (ves 9). ?Wanem nao yu save mekem blong “mekem wosip blong leftemap nem blong Hae God we I Hae Olgeta”? (ves 10).
Maet bae yu save luk se Lod i yusum ol toktok olsem “blong stap glad,” “hat we i hapi,” mo “glad” blong tij abaot Sabat dei. ?Wanem i mekem Sabat i kam wan glad blong yu? ?Olsem wanem nao bae yu eksplenem long wan, from wanem yu jusum blong respektem dei blong Lod?
?Wanem nao yu lanem aot long hym blong “Gently Raise the Sacred Strain” (Hym, namba 146) abaot stamba tingting mo ol blesing blong Sabat?
Luk tu long Jenesis 2:2–3; Aesea 58:13–14; Russell M. Nelson, “The Sabbath Is a Delight,” Liahona, Mei 2015, 129–32.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Doktrin mo Ol Kavenan 58:26–28
Papa long Heven i bin givim mi paoa blong jusum samting.
-
Blong stap ridim tugeta Doktrin mo Ol Kavenan 58:26–28 i save givim long yu mo ol pikinini blong yu wan janis blong tokbaot paoa we Papa long Heven i bin givim long yumi blong jusum blong mekem gud. Maet yu save talem long olgeta abaot ol defdefren joes we yu bin mekem mo wanem i hapen olsem wan risal blong olgeta. Maet ol pikinini blong yu bae oli wantem blong droem wan pikja blong eksperiens blong olgeta.
-
Yu save raetem joes long wan saed blong wan pis blong pepa mo risal long narasaed mo yusum pepa ia blong soem se yumi no save seraotem ol joes mo ol risal. Maet ol pikinini blong yu oli save mekem lis blong sam long ol joes mo tokbaot ol risal we i kam from olgeta. Afta, tugeta, yufala save ridim Doktrin mo Ol Kavenan 58:27–28 mo tokbaot ol joes we oli “mekem plante stret mo gud samting oli kamtru” o ol gudfala risal. ?Olsem wanem nao Papa long Heven i givim “praes” o blesem yumi taem yumi traehad blong mekem gudfala samting? (ves 28).
Doktrin mo Ol Kavenan 59:7, 18–21
“Tangkyu long Lod, God blong yu long evri samting.”
-
Tingting blong stap ridim ol ves ia taem yu mo ol pikinini blong yu i go wokbaot o lukluk long wan pikja blong neja, luksave ol samting we i “luk naes long ae mo … mekem hat i glad.” (ves 18). Mo tu, yu save luksave ol semmak samting insaed long wan singsing olsem “My Heavenly Father Loves Me” (Children’s Songbook, 228–29). O yu save askem ol pikinini blong yu blong droem ol pikja blong ol samting we oli wantem talem tangkyu from mo letem olgeta oli talem long yu abaot ol pikja blong olgeta. ?Olsem wanem nao yumi save soem tangkyu blong yumi from ol samting ia?
Lod i krietem plante naesfala samting we oli givim glad long yumi.
Sabat i dei ia blong Lod.
-
?Wanem nao yumi save mekem long Sandei blong wosipim Lod mo faenem glad? Helpem ol pikinini blong yu blong faenem ol aedia long Doktrin mo Ol Kavenan 59:9–12 mo long aktiviti pejblong wik ia. Maet oli save faenem tu ol pikja o ol samting blong ripresentem ol samting we yumi mekem long Sabat (olsem ol pikja blong sakramen long aotlaen ia). ?Olsem wanem nao ol samting ia oli helpem yumi blong filim moa kolosap long Papa long Heven mo Jisas Kraes?
Blong kasem moa aedia, luk long magasin blong Fren blong manis ia.