Doktrin mo Ol Kavenan 51–57

Sapos yu bin wan memba blong Jos long 1831, maet bae oli invaetem yu blong stap laef folem loa blong konsekresen mo givim propeti blong yu, folem loa, i go long Jos tru long bisop. Afta long hemia, bae hem i givimbak long yu, long plante taem, wanem we yu bin givim, samtaem bae i ova. Be nomo se, propeti ia i nomo blong yu—bae yu stap lukaotem nomo.

Tedei, ol rod ia oli defren, be ol prinsipol oli impoten yet long wok ia blong Lod. Taem yu stap ridim seksen 51, tingbaot wanem we God i givim long yu wetem tras. ?Wanem nao ol toktok ia, “wokman” long (ves 19) mo “konsekretem” long (ves 5) i minim, abaot wanem we God i wantem luk yu yu mekem?

Presiden Spensa W. Kimbol i bin eksplenem: “Insaed long Jos, wan samting we yumi gat blong lukaot, i wan samting we oli givim wetem wan tabu tras long saed blong spirit o long saed blong laef long wol ia, we bambae yu mas ansa from. From se evri samting oli blong Lod, yumi, yumi stap lukaot nomo long ol bodi, ol maen, ol famli mo ol propeti. (Luk long Doktrin mo Ol Kavenan 104:11–15.) Wan fetful wokman blong lukaot long samting, i wan we i yusum stret fasin blong rul, blong kea long olgeta pipol blong hem, mo i lukaot long olgeta we oli pua mo olgeta we oli stap long nid” (“Welfare Services: The Gospel in Action,” Ensign, Nov. 1977, 78)

Luk tu long “The Law of Consecration” (vidio), Gospel Laebri.

5:1

Taem we Lod i sendem sam lida blong Jos i go long Misuri, Hem i talem long olgeta blong oli mas yusum gud ol taem ia we oli stap travel mo “prij folem rod” (ol ves 25–27 ?Long wanem wei nao yu save serem gospel “folem rod,” o long taem blong ol nomol samting we i stap hapen long laef blong yu?

Wetem plante pipol we oli stap klemem se Spirit i stap soemaot samting long olgeta, ol fasfala Sent oli bin wari, se nogud bae man i giaman long olgeta. ?Wanem woning Lod i givim long olgeta long Doktrin mo Ol Kavenan 52:14? ?Wanem nao i ansa blong Hem? (luk long ol ves 14–19).

Wan paten i wan samting we i stap ripripit long semmak fasin, oltaem long wan wei we man i save luksave bifo i hapen. Ol eksampol we i tekem tu, blong stap kaontem ol namba we oli save seraotem long tu mo tufala saed i semsemmak, o taem san i stap girap mo i stap godaon evri dei. ?Wanem narafala eksampol we yu save tingting long hem? Taem yu lukluk long Doktrin mo Ol Kavenan 52:14–19, faenem paten blong Lod blong stap longwe long fasin blong giaman. Bae i help blong tekem not se toktok ia “wantem sakem sin”i soem wan filing blong fasin blong putum tingting i stap daon mo fasin blong sakem sin; “sofsof” i talem blong stap kaen, kea mo save kontrolem yuwan; mo blong “leftemap tingting” i minim blong givim instraksen, kam moa gud o bildimap. ?From wanem yu ting se paten blong Lod i tekem tu, ol kwaliti ia, mo tu, fasin blong stap obei? ?Olsem wanem nao yu save yusum paten ia blong stap longwe long fasin blong giaman?

?Wanem nao sam long ol eksampol blong fasin blong giaman long ol dei blong yumi? ?Olsem wanem nao bae yumi save se oli trikim o giaman long yumi?

Eksampol, maet yu save tingting blong stap skelem mo givim fidbak folem ol joes blong yu long saed blong ol muvi, miusik mo sosol media we i folem ol standet long “Wokbaot long laet blong God” long Blong Ol Yut Oli Kam Strong: Wan Gaed blong Stap Mekem Ol Joes, 16–21.

Luk tu long Gary E. Stevenson, “Yu No Trikim Mi,” Liahona, Nov. 2019, 93–96; “Guide Me to Thee,” Hym, namba 101; Topics and Questions, “Seeking Truth and Avoiding Deception,” Gospel Laebri.

?Yu bin eva safa long tingting we i kam slak, taem wan we yu dipen long hem i no kipim komitmen blong olgeta? Hemia i bin hapen long Ol Sent long Kolesvil, Niu Yok, we oli bin ting se bae oli stanemap haos long graon blong Leman Kopli long Ohaeo. Blong lanem samting aot long eksperiens ia, tingting blong luklukbak long heding blong seksen 54 (luk tu long Saints, 1:125–28; “A Bishop unto the Church,” long Revelations in Context, 78–79). ?Sapos yu gat wan fren long medel blong Ol Sent blong Kolesvil, ?wanem kaonsel nao we yu save faenem long seksen 54 blong serem wetem olgeta?

Long ol ves ia, Lod i toktok long tugeta, olgeta we oli rij mo olgeta we oli pua; bae i intresting blong komperem kaonsel blong Hem long tufala grup ia. Long ol ves ia, ?wanem nao yu filim se i stret long yuwan?

• Blong helpem ol pikinini blong yu blong lanem wanem i minim blong stap ones, tugeta, yufala i save ridim Doktrin mo Ol Kavenan 51:9 mo serem ol stori blong ol pikinini abaot fasin blong stap ones. Yusum ol pikja, ol stoking papet, o ol pepa doli blong mekem ol stori ia oli moa intresting. ?Long wanem wei nao Lod i trastem yumi taem yumi stap traehad blong stap ones?

• Tingting blong plei wan gem wetem ol pikinini blong yu. Afta long hemia, toktok raon long olsem wanem gem ia bae i defren sapos wan i bin giaman. ?From wanem i impoten blong “mekem samting wetem ones fasin” wetem wanwan long yufala?

• Blong stap kasem Tabu Spirit tru long fasin blong man i putum han antap long hed, oli tokbaot plante taem long Doktrin mo Ol Kavenan 51–57 Maet hemia i wan gudfala janis blong tijim ol pikinini blong yu abaot odinens ia. Eksampol, oli save lukluk long wan pikja blong wan pikinini we oli konfemem hem, mo tokbaot wanem i stap hapen long pikja. Askem olgeta blong klapem han blong olgeta taem oli harem “putum han antap long hed” taem yu ridim Doktrin mo Ol Kavenan 52:10; 53:3; 55:1.

• Mo tu, yufala i save singsing “The Holy Ghost” (Children’s Songbook, 105) o wan singsing we i kolosap semmak. Helpem ol pikinini blong yu blong faenem ol toktok mo ol sentens insaed long singsing ia we i tij abaot presen ia we i Tabu Spirit.

  

• Blong tij abaot paten blong Lod, blong stap longwe long fasin blong giaman, maet yu save stat taem yu stap helpem ol pikinini blong faenem ol eksampol blong ol paten—long neja, insaed long ol blangket o klos we i gat plante kala, o long evri dei laef. Helpem olgeta blong faenem paten we Lod i bin givim long Doktrin mo Ol Kavenan 52:14–15. Mekemsua se oli andastanem eni toktok we oli no save insaed long ol ves ia. ?Olsem wanem nao yumi save yusum paten ia blong luksave trutok?

• Long toktok blong yuwan, serem wetem ol pikinini blong yu wanem i bin hapen long Ol Sent we oli bin kam blong stap long graon blong Leman Kopli (luk long heding blong seksen 54). Ol pikinini blong yu oli save priten blong stap olsem wan memba blong Jos we i bin kam long Ohaeo. ?Bae oli bin filim olsem wanem afta we Leman i brekem kavenan blong hem? ?Wanem nao hemia i tijim yumi abaot, blong stap kipim ol kavenan o ol promes blong yumi? Tugeta, ridim Doktrin mo Ol Kavenan 54:6 blong faenemaot ol blesing blong ol pipol we oli stap kipim ol kavenan blong olgeta.

• Blong introdiusum seksen 55, bae yu wantem blong eksplenem se Wiliam W. Felps i bin wan man blong pablisim niuspepa we hem i bin lanem abaot gospel mo joenem Jos. Ridim wetem ol pikinini blong yu Doktrin mo Ol Kavenan 55:1–4, mo helpem olgeta blong faenemaot wanem nao God i wantem Wiliam blong mekem. ?Olsem wanem nao Hem i mekem plan blong yusum ol talen blong Wiliam? Hemia i save lid i go long wan storian blong toktok raon abaot olsem wanem God i save invaetem yumi blong yusum ol talen blong yumi blong blesem ol pikinini blong Hem.