Сургаал ба Гэрээ 51–57

Хэрэв та 1831 онд сүмийн гишүүн байсан бол таныг өмч хөрөнгөө бишопоор дамжуулан Сүмд өгөх замаар өргөлийн хуулийн дагуу амьдрахыг урих байсан. Харин тэр ихэнх тохиолдолд хариуд нь өргөл болгон өгсөн зүйлийг тань эргүүлэн, заримдаа бүр илүү ихийг нэмж өгөх байсан. Гэхдээ өргөл болгон өгсөн өмч хөрөнгө тань зөвхөн таных биш, харин таны ажил үүрэг болох байв.

Өнөөдөр үйл явц нь өөрчлөгдсөн ч уг зарчмууд Их Эзэний ажилд амин чухал хэвээрээ. Та 51-р хэсэг-ийг уншихдаа, Бурханы танд итгэл хүлээлгэн өгсөн зүйлийн тухай бод. “Даамал” (19-р шүлэг) болон “ариулан адисалсан” (5-р шүлэг) гэдэг үгс Бурханы танаас хүсэн хүлээдэг зүйлийн талаар юуг илэрхийлдэг вэ?

Ерөнхийлөгч Спэнсэр В.Кимбалл: “Сүм дэх ажил үүрэг нь ариун нандин сүнслэг эсвэл материаллаг зүйлсийг хариуцлагатайгаар дааж авах явдал юм. Бүх зүйл Их Эзэнд харьяалагддаг учраас бид өөрсдийн махбод, оюун ухаан, гэр бүл, өмч хөрөнгийн даамал юм. (Сургаал ба Гэрээ 104:11–15-ыг үзнэ үү.) Үнэнч даамал нь зөв шударгаар хянаж, өөрийнхнийгөө халамжлан, ядуус болон тусламж хэрэгтэй хүмүүсийг харж ханддаг хүн юм” (“Welfare Services: The Gospel in Action,” Ensign, Nov. 1977, 78).

Gospel Library дахь “The Law of Consecration” (видео)-ийг мөн үзнэ үү.

5:1

Их Эзэн Сүмийн хэдэн удирдагчийг Миссури рүү илгээхдээ тэдэнд аялах цагаа ашиглан “замдаа номло” (25–27-р шүлэг) хэмээн хэлжээ. Та сайн мэдээг “замдаа” эсвэл амьдралынхаа энгийн үеүдэд хэрхэн бусадтай хуваалцаж чадах вэ?

Олон хүн сүнслэг илэрхийлэл авсан гэх болсон тул эхэн үеийн гэгээнтнүүд хууртагдах вий хэмээн санаа зовниж байлаа. Сургаал ба Гэрээ 52:14-т Их Эзэн тэдэнд ямар анхааруулга өгсөн бэ? Түүний шийдэл юу байсан бэ? (14–19-р шүлэг-ийг үзнэ үү).

Загвар гэдэг нь тогтмол, урьдчилан таамаглахуйц байдлаар давтагддаг зүйлийг хэлдэг. Жишээлбэл: Тэгш тоогоор тоолох эсвэл өдөр бүр нар мандаж, жаргах гэх мэт. Та өөр ямар жишээг бодож чадах вэ? Та Сургаал ба Гэрээ 52:14–19-ийг судлахдаа, мэхлэгдэхгүй байх Их Эзэний загварыг олоорой. “Гэмших” гэдэг нь даруу байдал, наманчлалыг, “даруу төлөв” гэдэг нь эелдэг байдал, өөрийгөө хянах чадварыг илэрхийлдэг ба “сэнхрүүлэх” гэдэг нь зааварлах, сайжруулах, бэхжүүлэх гэсэн утгатай гэдгийг ойлгох хэрэгтэй. Та Их Эзэний загвар яагаад эдгээр шинж чанарыг мөн дуулгавартай байдлыг агуулсан гэж бодож байна вэ? Та мэхлэгдэхгүйн тулд энэ загварыг амьдралдаа хэрхэн хэрэгжүүлж болох вэ?

Өнөөдөр бидэнд хууран мэхлэлтийн ямар жишээнүүд байна вэ? Бид мэхлэгдэж буйгаа хэрхэн мэдэх вэ?

Жишээ нь, та кино, дуу хөгжим, мэдээллийн хэрэгсэлтэй холбоотой өөрийн сонголтуудыг Өсвөр үеийнхний бат бөх байдлын төлөө: Сонголт хийхэд туслах хөтөч-ийн “Бурханы гэрэлд алх” (16–21-р хуудас) хэсэг дээрх жишгийн дагуу үнэлж үзэж болно.

Түүнчлэн Гари Э.Стивэнсоны “Намайг бүү мэхэл” үгийг 2019 оны 10-р сарын Ерөнхий чуулган, х.103–107-оос мөн “Guide Me to Thee,” Hymns, no. 101; Topics and Questions, “Seeking Truth and Avoiding Deception,” Gospel Library-г үзнэ үү.

Найдаж байсан хүн тань амласандаа хүрээгүйн улмаас та сэтгэл санаагаар унаж байсан уу? Огайогийн Леман Коплигийн эдлэнд суурьшихаар төлөвлөж байсан Нью-Йоркийн Колесвиллын гэгээнтнүүдэд ийм явдал тохиолдсон юм. Энэ явдлаас суралцъя гэвэл 54-р хэсэг-ийн оршлыг харна уу (Saints, 1:125–128; “A Bishop unto the Church,” in Revelations in Context, 78–79-ийг мөн үзнэ үү). Хэрэв Колесвиллын гэгээнтнүүдийн нэг нь таны найз байсан бол та 54-р хэсэг дээрх ямар зөвлөгөөг найзтайгаа хуваалцаж болох вэ?

Эдгээр шүлэгт Их Эзэн баян, ядуу хүмүүсийн аль алинд нь хандан ярьсан бөгөөд энэ хоёр бүлэг хүнд өгсөн Түүний зөвлөгөөг харьцуулах нь сонирхолтой байж магадгүй. Эдгээр шүлэг дэх юу нь танд хамааралтай санагдсан бэ?

• Хүүхдүүддээ үнэнч шударга байна гэдэг нь юу гэсэн үг болохыг ойлгуулахын тулд Сургаал ба Гэрээ 51:9-ийг хамтдаа уншаад үнэнч байх шийдвэртэй тулгарсан хүүхдүүдийн тухай түүх ярьж болно. Та түүхээ илүү сонирхолтой болгохын тулд зураг, бээлийн хүүхэлдэй эсвэл цаасан хүүхэлдэй ашиглаж болох юм. Бид үнэнч шударга байхыг хичээх үед Их Эзэн биднийг хэрхэн адисалдаг вэ?

• Хүүхдүүдтэйгээ нэг тоглоом тоглоод үз. Дараа нь хэрэв хэн нэгэн булхайцсан бол тоглоом хэрхэн өөрөөр эргэж болох байсныг ярилцаарай. Нэг нэгэндээ “шударга хандах” нь яагаад чухал вэ?

• Сургаал ба Гэрээ 51–57-д Ариун Сүнсний бэлгийг гар тавилтаар авах талаар хэд хэдэн удаа дурдсан байдаг. Энэ нь уг ёслолын тухай хүүхдүүддээ заах сайхан боломж байж болох юм. Жишээлбэл: Гишүүнээр батлуулж буй хүүхдийн зургийг үзүүлээд, зураг дээр юу болж буйг тайлбарлуулж болно. Сургаал ба Гэрээ 52:10; 53:3; 55:1-ийг уншиж байхад “гар тавин” эсвэл “гар тавилт” гэж уншихыг сонсох бүрдээ алга ташихыг тэднээс хүс.

• Мөн “Ариун Сүнс” (Хүүхдийн дууны ном, д.56) эсвэл өөр төстэй дуу дуулж болно. Уг дуунаас Ариун Сүнсний бэлгийн талаар заасан үг, хэллэгийг олоход нь хүүхдүүддээ тусал.

  

• Хууран мэхлэлтээс зайлсхийхэд зориулсан Их Эзэний загварын талаар заахын тулд эхлээд хүүхдүүддээ байгаль, өнгөлөг хөнжил эсвэл хувцасны хээ, мөн өдөр тутмын амьдрал дахь загварын жишээг олоход тусалж болно. Тэдэнд Сургаал ба Гэрээ 52:14–15 дээрээс Их Эзэний загварыг олоход тусал. Эдгээр шүлэгт тэдний мэдэхгүй үгс байвал тайлбарлаж өгөөрэй. Бид хэрхэн энэ загварыг ашиглан үнэнийг таньж мэдэх вэ?

• Леман Коплигийн газар дээр амьдрахаар ирсэн гэгээнтнүүдэд юу тохиолдсоныг хүүхдүүддээ өөрийн үгээр тайлбарла (54-р хэсэг-ийн тоймыг үзнэ үү). Хүүхдүүд тань Огайод ирсэн сүмийн гишүүний дүрд тоглож болох юм. Леман гэрээгээ зөрчих үед тэдэнд ямар санагдах байсан бэ? Энэ нь гэрээгээ сахих эсвэл амлалтдаа хүрэх талаар бидэнд юу зааж байна вэ? Сургаал ба Гэрээ 54:6-г хамт уншаад, гэрээнүүдээ сахидаг хүмүүст зориулсан адислалуудыг олж мэд.

• Та 55-р хэсэг-ийг заахынхаа өмнө Виллям В.Фелпс хэвлэгч байсан бөгөөд сайн мэдээг сонсоод Сүмд нэгдсэн гэдгийг тайлбарлах хэрэгтэй байх. Сургаал ба Гэрээ 55:1–4-ийг хүүхдүүдтэйгээ уншаад, Их Эзэн Виллямаар юу хийлгэхийг хүссэнийг олоход нь тусал. Тэр Виллямын авьяас чадварыг хэрхэн ашиглахаар төлөвлөсөн бэ? Энэ нь Бурхан биднийг авьяас чадвараа ашиглан хүүхдүүдийг нь адислахыг урьдаг тухай ярилцахад хөтөлж болох юм.