Сургаал ба Гэрээ 64–66

Сургаал ба Гэрээ 64:1–11-ээс суралцаж байхдаа дараах зүйлсийг бодож үзээрэй.

• Их Эзэн таныг уучилж байсан үеийг бод. Танд ямар санагдсан бэ?

• Танд уучлах хэрэгтэй байгаа хэн нэгэн байна уу? Яагаад бусдыг уучлахад их хэцүү байдаг вэ? Тэдгээр саад бэрхшээлийг даван туулахад танд юу тусалдаг вэ?

• Сургаал ба Гэрээ 64:1–11 дээрх ямар ямар үнэн танд чухал гэж санагдсан бэ? Их Эзэн яагаад “бүх хүмүүнийг уучлахыг” бидэнд зарлигласан гэж та бодож байна вэ? (10-р шүлэг).

Хэрэв танд хэн нэгнийг уучлахад хэцүү байвал ахлагч Жэффри Р.Холландын хэлсэн “Эвлэрлийн тохинуулал” үгийг (2018 оны 10-р сарын Ерөнхий чуулган, х.71–74) эсвэл Кристин М.Еийгийн “Үнсний оронд гоёл чимэг: Уучлалын эдгээх зам” (Лиахона, 2022 оны 11-р сар, 36–38) захиасыг судлаад үзээрэй. Бусдыг уучлахад танд Христ хэрхэн тусалж чадах талаар та юу сурч мэдсэн бэ?

Гэр бүлийн харилцаанаас уучлах олон боломж гарч ирдэг. Гэр бүлийн гишүүдээ бод. Та хэнийг уучлах хэрэгтэй байна вэ? Бид бие биеэ уучлахгүй байснаар хэрхэн “зовлонд унадаг” (8-р шүлэг) вэ? Уучлал таны гэр бүлийн харилцаанд хэрхэн нөлөөлж болох вэ?

8:26

Та хийхийг хичээж байгаа бүх “сайн үйлдээ” “шантарч” байсан уу? Сургаал ба Гэрээ 64:31–34 дээрх Их Эзэний танд зориулсан захиасыг олж мэд. Их Эзэн танаас Өөрийнх нь “агуу ажлыг” гүйцэлдүүлэхийн тулд юу хийгээсэй гэж хүсдэг вэ?

33-р шүлэг-ийг дүрслэн үзүүлэх бодит жишээ буюу шигтгэмэл зураг, тоосгон барилга гэх мэт жижиг зүйлсээс бүрдсэн том зүйлийн талаар бод. Их Эзэний агуу ажлын “суурийг тав[ихын]” тулд бид өдөр бүр ямар “жижиг зүйлүүд” хийж чадах вэ? Их Эзэний танд өгсөн “агуу ажлын” зарим жишээ юу вэ?

Ахлагч Доналд Л.Холлстром “зүрх сэтгэл ба эрмэлзэгч оюун” гэдэг үгсийн байж болох дараах утгыг санал болгосон.

“Зүрх сэтгэл нь хайр болон амлалтын бэлгэдэл юм. Бид өөр ямар ч шалтгаанаар биш, харин хайртай хүмүүсийнхээ төлөө золиос гаргаж, ачаа дарамт үүрдэг. Хэрвээ хайр үгүй бол бидний амлалт багасдаг. …

“Эрмэлзэгч оюунтай байх” гэдэг нь чадахаараа хичээж, сайн бодож мөн Бурханы мэргэн ухааныг эрэлхийлэхийг хэлдэг. Энэ нь амьдралын турш суралцах зүйл маань мөнхийн шинж чанартай зүйлс байх ёстойг илэрхийлдэг. Энэ нь Бурханы үгийг сонсох болон үүнийг дагах байдлын хооронд салшгүй холбоо харилцаа байх ёстой гэсэн үг юм” (“The Heart and a Willing Mind,” Ensign, June 2011, 31–32).

Туг гэдэг нь “зорилго буюу үзэл санаанд хүмүүс нэгдэн цугларч хүрээлдэг туг буюу далбаа” юм (Судруудын удирдамж, “Туг,” Gospel Library). Сион эсвэл Их Эзэний Сүм таны хувьд хэрхэн туг мэт байдаг вэ? Хүмүүсийг адислахаар туг гэх мэт дээш өргөдөг бусад зүйлийн жишээг Тооллого 21:6–9; Матай 5:14–16; Алма 46:11–20-оос эргэцүүлэн бод. Их Эзэний Сионыг дүрсэлсэн бусад тайлбарыг Сургаал ба Гэрээ 64:41–43 дээрээс олж мэд.

Мөн “Гоо үзэсгэлэнт Сион сэр”, Дуулал, д.27-г үзнэ үү.

Сургаал ба Гэрээ 65 нь хожмын өдрүүд дэх Их Эзэний Сүмийн зорилгыг сүнслэгээр тайлбарладаг. Энэ хэсгийг судлахдаа дараахын адил асуултуудын хариултыг олоорой. Их Эзэн Өөрийн хаант улсыг энэ дэлхий дээр юуг хийж гүйцээгээсэй хэмээн хүсдэг вэ? Тэр надаас юу хийж туслахыг хүсдэг вэ?

Мөн “Prepare Today for the Second Coming” видеог ChurchofJesusChrist.org-оос үзнэ үү.

1:7

Сүмд нэгдээд удаагүй байхдаа Виллям Э.Маклелин өөрт нь зориулсан Бурханы тааллыг илчлэхийг Иосеф Смитээс хүссэн. Их Эзэн Өөрийн бошиглогчоор дамжуулан таван асуултад нь хариулна гэж Виллям найдаж байсныг Иосеф мэдээгүй байв. Бид Виллямд яг ямар ямар асуулт байсныг мэдэхгүй ч Сургаал ба Гэрээ 66 дээрх илчлэл түүнд зориулагдсан байсан бөгөөд Виллямын асуулт бүрд “хангалттай бүрэн дүүрэн” хариулсан (“William McLellin’s Five Questions,” Revelations in Context, 138).

Та 66-р хэсэг-ийг уншихдаа, Их Эзэн хэрхэн Виллям Маклелиныг болон түүний зүрх сэтгэл дэх асуудал, мөн зорилгын талаар мэдэж байсан тухай бод. Их Эзэн таныг хэн гэдгийг мэддэгээ хэрхэн харуулсан бэ? Танд патриархын адислал байдаг бол түүнийгээ судал. Судалж байхад тань Бурханы таныг гэсэн тааллыг ойлгоход Ариун Сүнс хэрхэн тусалсан бэ?

Тайлбар: Та хүүхдүүддээ Их Эзэний “бүгдийг уучлах” зарлигийн талаар заахдаа уучилна гэдэг нь хүмүүст биднийг гомдоохыг зөвшөөрнө гэсэн үг биш гэдгийг тодруулж болох юм. Хэрэв хэн нэгэн тэднийг гомдоосон эсвэл тэдэнд зохисгүйгээр хүрсэн бол итгэж болох насанд хүрсэн хүнд хэлэхийг урамшуулан дэмж.

• Сургаал ба Гэрээ 64:10-ыг хүүхдүүдтэйгээ хамт уншаад, хэн нэгнийг уучилна гэдэг нь юу гэсэн үг болох талаар ярилц. Та хэдэн энгийн жишээ хуваалцаж болно. Магадгүй тэд эдгээр жишээг жүжигчлэн үзүүлж, хэн нэгнийг уучлах дадлага хийж болох юм.

• Та хүүхдүүдээсээ хэн нэгэнд, тухайлбал, дүүдээ бусдыг уучлах талаар хэрхэн заахаа төлөвлөхийг хүсэж болно. Заах үедээ ашиглаж болох үг хэллэгийг Сургаал ба Гэрээ 64:7–10 дээрээс олоход нь тусал.

• “Эцэг минь гуйя, надад туслаач” (Хүүхдийн дууны ном, д.52) гэх мэт уучлал, өршөөлийн тухай дуу дуул. Энэ дуу бусдыг уучлах талаар бидэнд юу зааж байна вэ?

• Та эвлүүлдэг тоглоом, хивс гэх мэт олон жижиг хэсгээс бүрддэг зүйлсийг хүүхдүүддээ үзүүлж болно. Дараа нь Сургаал ба Гэрээ 64:33-ыг хамтдаа унш. Бурханы “агуу ажил” гэж юу вэ? Бид туслахын тулд ямар “жижиг зүйлүүд” хийж болох вэ?

• Та Сургаал ба Гэрээ 64:34-өөс хүүхдүүддээ уншиж өгөхдөө “зүрх сэтгэл”, “оюун” гэх үгсийг уншихдаа зүрх, мөн толгой руугаа зааж, хүүхдүүдээрээ мөн адил хийлгэ. Бид хэрхэн зүрх сэтгэл (хүсэл), оюун ухаанаа (бодлоо) Аврагчид зориулж болох вэ?

• Виллям Э.Маклелинд Их Эзэнд хандсан тодорхой таван асуулт байсан гэдгийг хүүхдүүддээ тайлбарла. Иосеф Смит Виллямд ямар асуулт байсныг мэдээгүй ч тэдгээр асуултын хариултыг хүлээн авсан юм. Их Эзэн танаас юу хийхийг хүсэж байгаагаа харуулсан тэр үеийн тухай мөн Түүний удирдамжийг дагаснаар ирсэн адислалуудын талаар хүүхдүүддээ ярь. Дараа нь Сургаал ба Гэрээ 66:4-ийг хамтдаа уншаад Их Эзэн тэднээс юу хийхийг хүсдэгийг ойлгох боломжийг эрэлхийлэхийг хүүхдүүдээсээ хүс.

  

• Аврагчийн Хоёр дахь ирэлтийн зургийг хүүхдүүддээ үзүүлээд, юу харж байгаагаа мөн энэ үйл явдлын талаар юу мэдэхээ хэлэхийг хүүхдүүдээс хүс. Та мөн Сургаал ба Гэрээ 65 дээрээс Хоёр дахь ирэлтийн талаарх үг хэллэгийг хүүхдүүддээ хэлж олуулж болно. Эдгээр үг, хэллэг бидэнд юу зааж байна вэ? Бид Аврагчийн ирэлтэд хэрхэн бэлтгэж болох вэ?