Сургаал ба Гэрээ 49–50

Сүмд нэгдэхээсээ өмнө Леман Коплей Христийн Хоёр дахь ирэлтэд Итгэгчдийн Нэгдсэн Нийгэмлэг буюу Шейкерүүд гэгддэг шашны бүлэгт харьяалагддаг байжээ. Иосеф Смит Лемантай ярилцсаныхаа дараа шейкерийн сургаалын талаар Их Эзэнээс тодруулга авахыг эрэлхийлсэн юм. Их Эзэн хариуд нь 49-р хэсэг дэх илчлэлтийг өгчээ. Уг хэсгийн оршилд шейкерүүдийн зарим итгэл үнэмшлийг дурдсан байдаг.

49-р хэсэг-т Их Эзэн шейкерүүдийн итгэл үнэмшлийг засаж залруулахын тулд юу гэж заасан бэ? Өөрийнх нь үнэний бүрэн байдал байхгүй хүмүүсийг гэх Түүний хайр, халамж энэхүү илчлэлтэд хэрхэн илэрч байна вэ? Та тэдэнтэй хайр халамжаар хэрхэн харилцаа тогтоож чадах вэ?

2-р шүлэг дээрх Их Эзэний ажигласан зүйлийн юу нь танд сэтгэгдэл төрүүлж байна вэ? Та үүнийг киноны зөвхөн нэг хэсгийг үзсэн, эвлүүлдэг зургийн зөвхөн нэг хэсгийг харсан, эсвэл маргааны зөвхөн нэг талыг сонссон үед ямар байх бол гэдэгтэй харьцуулж болно. Их Эзэний энэхүү анхааруулга Сургаал ба Гэрээ 50:24-тэй хэрхэн холбогдож байна вэ? Та Их Эзэнээс илүү их гэрэл хүлээн авахын тулд юу хийж буйгаа бодож үз.

Тэнгэрлэг Эцэгийн төлөвлөгөөг сүйтгэхийн тулд Сатан гэрлэлтийн талаар эргэлзээ төрүүлэхийг оролддог. Харин Их Эзэн бошиглогчдоороо дамжуулан гэрлэлтийн талаарх үнэнийг үргэлжлүүлэн илэрхийлсээр байдаг. Та энэхүү үнэний заримыг Сургаал ба Гэрээ 49:15–17; Эхлэл 2:20–24; 1 Коринт 11:11; мөн “Гэр бүл: Дэлхий дахинаа өргөх тунхаг”-аас олох боломжтой. Олж мэдсэн үнэнүүдээ жагсаан бич. Яагаад Бурханы төлөвлөгөөнд гэрлэлт тийм чухал байдаг вэ?

Ахлагч Үлиссэс Соарэс “Есүс Христийн сэргээгдсэн сайн мэдээ мөнх бус амьдрал, мөнх амьдралын аль алинд нь эмэгтэй, эрэгтэй хүмүүсийн хоорондын бүрэн хамтран ажиллах зарчмыг тунхагладаг” хэмээн заасан (“Их Эзэнтэй хамтрах,” Лиахона, 2022 оны 11-р сар, 42). Та түүний захиасыг уншин “эрэгтэй, эмэгтэй хүмүүсийн хоорондын хамтын ажиллагааг бэхжүүлдэг” зарчмуудыг судалж болох юм. Та эдгээр зарчмыг амьдралдаа хэрхэн хэрэгжүүлж чадах вэ? Хэрэв танаас өөр сүсэг бишрэлтэй хүн гэрлэлт яагаад чухал болох талаар асуувал та юу гэж хариулах вэ? Та энэ ойлголтод яагаад талархдаг вэ?

2:36

Огайо дахь сүмийн шинэ гишүүд судруудад амлагдсан сүнслэг илэрхийллийг хүлээн авахыг хүсэн хүлээж байлаа. Гэвч Сатан тэднийг хууран мэхлэхэд бэлэн байв. Хэрэв танаас эдгээр гишүүнд Ариун Сүнсний жинхэнэ илэрхийллийг ялган танихад нь туслаач гэж хүсвэл та Сургаал ба Гэрээ 50 дээрх ямар ямар зарчмыг хуваалцах вэ? (22–25, 29–34, 40–46-р шүлгүүдийг онцлон үзнэ үү). Аврагч танд үнэн ба ташаарлын ялгааг мэдэхэд хэрхэн тусалсан бэ?

1 Коринт 14:1–28; 2 Tимот 3:13–17-г мөн үзнэ үү.

Есүс Христийн сайн мэдээний дагуу амьдарснаар гэр орондоо болон Сүм дээр багш ба суралцагч байх олон боломж ирдэг. Сургаал ба Гэрээ 50:13–24-ийг судлах нэг арга нь багш, суралцагч хоёрыг зурах байж болно. Зураг тус бүрийн хажууд сайн мэдээнээс суралцах, заах талаар ямар нэгэн зүйлийг танд сургамжилж байгаа үг хэллэгийг энэ шүлгүүдээс олж, жагсаан бич. Заах болон суралцахад Сүнсний ач холбогдлыг ойлгуулсан үйл явдал хэзээ танд тохиолдож байсан бэ? Та сайн мэдээний суралцагч болон багшийн хувьд гаргаж буй хичээл зүтгэлээ сайжруулахын тулд юу хийж болохоо бод.

Та Сургаал ба Гэрээ 50:23–25 дээрх Аврагчийн үгсийг тунгаах үедээ хэрхэн Бурханы гэрлийг амьдралдаа хүлээн авч, “харанхуйг үлдэн хөө[дөг]” талаараа бод. Тухайлбал, эдгээр шүлгүүд цагаа яаж өнгөрөөх, ямар үзвэр үйлчилгээ, мэдээллийн хэрэгсэл хэрэглэх, мөн ямар төрлийн харилцан ярианд оролцох зэрэг сонголтыг тань хааш хөтөлж байна вэ? Өөр ямар ямар шийдвэрт тань энэ шүлгүүд тусалж чадах вэ? “Эзэн бол гэрэл” (Дуулал, д.42) гэх мэт дуулал танд илүүг бодуулж магадгүй.

“Бурханы гэрэлд алх,” Өсвөр үеийнхний бат бөх байдлын төлөө: Сонголт хийхэд туслах хөтөч (16–21)-ийг мөн үзнэ үү.

• Хүүхдүүддээ эдгээр шүлэг дээрх зарчмуудыг заахын тулд та 4 ширхэг хөлийн мөрийн хэлбэртэй цаас болон Есүс Христэд итгэх итгэл, наманчлал, баптисм, Ариун Сүнсийг хүлээн авах зэргийг илэрхийлсэн 4 зураг бэлтгэж болно (энэ долоо хоногийн үйл ажиллагааны хуудас-ыг үзнэ үү). Хүүхдүүд тань хөлийн мөрүүдийг зургуудын хамтаар газарт тавина. Дараа нь тэд таныг Сургаал ба Гэрээ 45:12–14-ийг уншиж байх хооронд нэг нэгээрээ ээлжлэн хөлийн мөрүүд дээр алхана. Тэдэнд эдгээр зурган дээрх зүйлсийг хийснээр бид Есүс Христийг дагадаг гэдгийг ойлгоход тусал.

• Та мөн хүүхдүүдээ Сургаал ба Гэрээ 49:12–14-ийг Үйлс 2:38 болон итгэлийн дөрөв дэх тунхагтай харьцуулахыг хүсэж болно. Тэд ямар адил төстэй талуудыг олж харсан бэ? Эдгээр үнэн яагаад чухал вэ?

• Эдгээр шүлгийг судлахын өмнө шейкер гэх хүмүүс гэрлэх ёсгүй гэдэгт итгэдэг нэгэн шашны бүлэг байсныг тайлбарла (Сургаал ба Гэрээ 49-ийн оршлыг үзнэ үү). Сургаал ба Гэрээ 49:15–17-д гэрлэлтийн талаар Их Эзэний заасан зүйлсийг хүүхдүүдээрээ олуулаарай. “Гэрлэлт нь Бурханаас томилогдсон” гэдэг нь юу гэсэн утгатай вэ? Та нар хамтдаа “Гэр бүл: Дэлхий дахинаа өргөх тунхаг”-ийн эхний гурван догол мөрийг уншиж болох юм. Дараа нь гэрлэлт ба гэр бүл Тэнгэрлэг Эцэгт яагаад чухал болох талаар ярилц.

• Сургаал ба Гэрээ 50:23–25 руу орохын өмнө хүүхдүүдтэйгээ гэрэл болон харанхуйн ялгааны талаар ярилц. Бидэнд яагаад гэрэл хэрэгтэй вэ? Өсвөр үеийнхний бат бөх байдлын төлөө: Сонголт хийхэд туслах хөтөч-ийн “Бурханы гэрэлд алх, (17-р хуудас) хэсгийн эхний догол мөр болон Сургаал ба Гэрээ 50:23–25-ыг хамтдаа уншиж болно. Бурханы гэрлийг хүлээн авах мөн харанхуйг үлдэн хөөж болох арга замуудын талаар ярилцаарай. Дараа нь хүүхдүүдтэйгээ “Үргэлж гэрэлт” (Хүүхдийн дууны ном, 96) гэх мэт тэдний сүнслэг гэрлийн тухай дуу дуулж болно.

• Сургаал ба Гэрээ 50:40–46-г уншсаныхаа дараа энэ тоймын төгсгөлд буй Аврагчийн зургийг үзүүлээд, дараахтай адил асуултуудыг тавьж болно. Үүнд: Хоньчин Өөрийн хоньдын талаар ямар сэтгэгдэлтэй байдаг вэ? Бидний хувьд Аврагч хоньчинтой юугаараа төстэй вэ?