Fotopampianarana sy Fanekempihavanana 51–57

Raha toa ianao ka mpikamban’ny Fiangonana tamin’ny taona 1831 dia mety ho voasa hiaina ny lalàn’ny fanokanana tamin’ny alalan’ny fanolorana ny fanananao ho an’ny Fiangonana tamin’ny alalan’ny eveka. Avy eo izy dia mazàna no haveriny aminao ny zavatra natolotrao, ary miampy tombony aza indrindray. Saingy tsy hoe fanananao fotsiny ilay izy amin’izay, fa lasa fitantanan-draharahanao.

Ankehitriny dia tsy mitovy amin’izany ny fomba fiasa, kanefa mbola zava-dehibe hatrany ho an’ny asan’ny Tompo ireo fitsipika. Rehefa mamaky ny fizarana 51 ianao, dia eritrereto hoe inona no nampiandraiketan’ Andriamanitra anao. Inona no tian’ny teny hoe “mpitantan-draharaha” (andininy 19) sy ny hoe “natokana” (andininy 5) lazaina mikasika ny zavatra andrasan’ Andriamanitra aminao?

Ny Filoha Spencer W. Kimball dia nanazava hoe: “Ato amin’ny Fiangonana ny fitantanan-draharaha dia fahatokisana masina ara-panahy na ara-batana izay hitakiana ny maha-tompon’andraikitra. Satria ny zava-drehetra dia an’ny Tompo, dia mpitantana ny vatantsika, ny saintsika, sy ny fianakaviantsika ary ny fananantsika isika. (Jereo ny Fotopampianarana sy Fanekempihavanana 104:11–15.) Ny mpitantan-draharaha mahatoky dia olona izay mampihatra fanapahana amim-pahamarinana, mikarakara izay azy ary mijery ireo mahantra sy ny sahirana” (“Welfare Services: The Gospel in Action,” Ensign,, Nov. 1977, 78).

5:1

Rehefa nandefa mpitarika maro tao amin’ny Fiangonana ho any Missouri ny Tompo, dia niteny azy ireo Izy mba hampiasa ny fotoana lanin’izy ireo amin’ny diany ary “hitory eny an-dalana” (andininy 25–27). Ahoana no ahafahanao mizara ny filazantsara “eny an-dalana,” na mandritra ireo trangan-javatra mahazatra eo amin’ny fiainanao?

Koa satria maro no nilaza ho nisehoan-javatra ara-panahy dia sahiran-tsaina ireo Olomasina tany aloha sao ho voafitaka. Inona no fampitandremana nomen’ny Tompo azy ireo ao amin’ny Fotopampianarana sy Fanekempihavanana 52:14? Inona no vahaolana nomeny? (jereo ny andininy 14–19).

Ny lamina dia zavatra miverimberina tsy tapaka sy azo vinavinaina tsara. Ohatra amin’izany ny fanisana amin’ny isa ankasas (nombres pairs) na ny fiposahana sy ny filentehan’ny masoandro isan’andro. Inona koa ireo ohatra hafa azonao eritreretina? Rehefa mandalina ny Fotopampianarana sy Fanekempihavanana 52:14–19 ianao dia fantaro ny lamina nomen’ny Tompo hisorohana ny fitaka. Mety hanampy ny manamarika fa ny hoe “manenina” dia midika hoe fahatsapana fanetrentena sy fibebahana, ny hoe “fanetrentena” dia milaza hatsaram-panahy sy fahaizana mifehy tena, ary ny “mampiorina” dia midika hoe mampianatra na manatsara na mankahery. Nahoana ianao no mahatsapa fa tafiditra ao anatin’ny lamina nomen’ny Tompo ireo toetra tsara ireo mbamin’ny fankatoavana? Ahoana no ahafahanao mampihatra io lamina io mba hisorohana ny fitaka?

Inona avy ireo ohatra sasantsasany amin’ny fitaka amin’izao androntsika izao? Ahoana no ahafantarantsika hoe voafitaka isika?

Ohatra, azonao heverina ny manombantombana ny safidinao mahakasika ny sarimihetsika, ny hira ary ny tambajotran-tserasera mifototra amin’ireo fenitra ao amin’ny “Mandehana ao amin’ny fahazavan’Andriamanitra” ao amin’ny Ho zatovo mahery!: Torolalana amin’ny fanaovana safidy, 16–21.

Jereo koa ny Gary E. Stevenson, “Aza mamitaka ahy,” Liahona, nôv. 2019, 93–96.

Efa niaina fahadisoam-panantenana ve ianao rehefa tsy nihazona ny fanolorantenany ny olona izay niankinanao? Nitranga tamin’ireo Olomasina tao Colesville, New York izany, izay nanantena ny hipetraka tao amin’ny tanin’i Leman Copley tao Ohio. Mba hisintonana lesona avy amin’io zavatra niainana io dia hevero ny hamaky ny sasin-tenin’ny fizarana 54, (jereo koa ny “Un évêque pour l’Église,” ao amin’ny Révélations dans leur contexte, 78–79). Raha nanana namana teo anivon’ireo Olomasina tao Colesville ianao, dia inona no torohevitra mety ho hitanao ao amin’ny fizarana 54 mba hozarainao amin’izy ireo?

Ao amin’ireo andininy ireo ny Tompo dia sady miresaka amin’ny manan-karena no miresaka amin’ny mahantra; mety ho mahaliana ny mampitaha ny torolalana nomeny ho an’ireo sokajin’olona roa ireo. Inona amin’ireo andininy ireo no tsapanao fa mihatra aminao manokana?

• Mba hanampiana ireo ankizy hianatra ny dikan’ny hoe marin-toetra, dia azonareo atao ny miara-mamaky ny Fotopampianarana sy Fanekempihavanana 51:9 sy mitantara tantaran’ankizy nila nandray fanapahan-kevitra mba ho marin-toetra. Afaka mampiasa sary, ba kiraro atao miendrika saribakoly ahetsiketsika, na saribakoly vita amin’ny taratasy ianao mba hahatonga ireo tantara hahaliana kokoa. Ahoana ny fomba hitahian’ny Tompo antsika rehefa miezaka ny ho marin-toetra isika?

• Hevero ny hanao kilalao miaraka amin’ny ankizy. Aorian’izay dia mifampiresaha mikasika ny hoe mety ho lasa niova toy ny ahoana ilay kilalao raha toa ka nisy olona namitapitaka. Nahoana no zava-dehibe ny “[m]ifampitondra amim-pahamarinana” ?

• Voalaza im-betsaka ao amin’ny Fotopampianarana sy Fanekempihavanana 51–57 ny fandraisana ny Fanahy Masina amin’ny alalan’ny fametrahan-tanana. Mety ho fotoana tsara hampianarana ny ankizy mikasika io ôrdônansy io izany. Ohatra, afaka maka sarina ankizy iray raisina ho mpikambana izy ireo ary mamariparitra ny zavatra mitranga eo amin’ilay sary. Angataho izy ireo mba hitehaka rehefa maheno ny hoe “hametra-tanana” na “fametrahan-tanana” eo am-pamakianap ny: Fotopampianarana sy Fanekempihavanana 52:10; 53:3; 55:1.

• Azonareo hiraina koa ny “Ny Fanahy Masina” (Bokin-kiran’ny ankizy, 56) na hira iray mitovitovy amin’izany. Ampio ny ankizy hitady teny sy andian-teny ao amin’ilay hira izay mampianatra momba ny fanomezana ny Fanahy Masina.

  

• Mba hampianarana ny lamina nomen’ny Tompo hisorohana ny fitaka, dia azonao atao ny manomboka amin’ny alalan’ny fanampiana ny ankizy hitady ohatra ana lamina, eo amin’ny zavaboary, eo amin’ireo bodofotsy maro loko na akanjo, na eo amin’ny fiainana isan’andro. Ampio izy ireo hahita ny lamina nomen’ny Tompo ao amin’ny Fotopampianarana sy Fanekempihavanana 52:14–15. Alaivo antoka fa azon’izy ireo ny teny tsy mahazatra rehetra ao amin’ireo andininy ireo. Ahoana no ahafahantsika mampiasa io lamina io mba hamantarana ny marina?

• Zarao amin’ny teninao manokana amin’ireo ankizy ny zavatra nitranga tamin’ireo Olomasina izay nandeha nipetraka teo amin’ny tanin’i Leman Copley (jereo ny sasin-tenin’ny fizarana 54). Azon’ny ankizy atao ny mody manao hoe mpikamban’ny Fiangonana tonga tao Ohio. Inona no mety ho tsapan’izy ireo taorian’ny nandravan’i Leman ny fanekena nataony? Inona no ampianarin’izany antsika momba ny fitandremana ireo fanekempihavanana na fampanantenana nataontsika? Iaraho mamaky ny Fotopampianarana sy Fanekempihavanana 54:6 mba hahafantarana ireo fitahiana ho an’ireo olona izay mitandrina ny fanekempihavanany.

• Mba hampidirana ny fizarana 55, dia azonao atao ny manazava fa mpamoaka gazety an-tsoratra izay nianatra momba ny filazantsara i William W. Phelps ary lasa mpikamban’ny Fiangonana. Iaraho mamaky amin’ny ankizy ny Fotopampianarana sy Fanekempihavanana 55:1–4, ary ampio izy ireo hahita ny zavatra tian’ Andriamanitra hataon’i William. Inona no drafitra nataony mba hampiasana ny talentan’i William? Izany dia mety hitarika ho any amina fifanakalozan-kevitra momba ny fomba mety hanasan’ Andriamanitra antsika hampiasa ny talentantsika mba hitahiana ireo zanany.