Bwanaa man Kaokan Bwaai

Mai ibuakoia Aomata aika Itiaki ake a ikotako nako Ohio n te 1830 bon Phebe Carter. E kaina te Ekaretia i meang mainikun United States ngke kauabui tabun n ririki, e ngae ngke aki kainna ana karo. E korea rimwi ana babaire ni mwaing nako Ohio ni botaki ma aika Itiaki:

“A miimi raraou n te bwai are I karaoia, ao ngai naba, ma iai te bwai i nanou ae e kaungaai ni waaki nako. I bon kuri aki kona nooran rawawatan nanon tinau ngke I kitana mweengara; ma ngke tao arona bwa tiaki te tamnei are i nanou tao N na bon konaaki n te kabanea. E tuangai tinau bwa e raoiroi riki ngke e norai n taunaki nakon ae n na nako n ti ngai nakon te tabo ae aki ataaki arona.

“‘[Phebe],’ e taku tinau, ma nanona, ‘ko kona n okirai ngkana ko kunea bwa e kewe te Aro ni Moomon?’

“I kaeka, ‘eng, tinau; N na karaoa anne.’ … E katoka raraoman nanona au kaeka; ma e karekea nakoira te nanokawaki ae korakora raurenakora. Ngke e a roko te tai are n nang nako iai e a rootai n te aro are I aki kona n taekina au kaboo; ngaia are I a korea au kabo nakoia ni kabane, ao ni katukua i aon au taibora, I biri rikaaki n te kaintamarake ao ni kiba n rin i nanon te kaa are e kokokaki. Ngaia are I a kitana mweengau ae tangiraki are I rikirake iai ni katiteuana maiu ma Ana Aomata aika Itiaki te Atua.”

I nanon teuana ana taeka ni karaure, e koreia Phebe:

“Kaaro aika a Tangiraki—I aon kawaiu ngkai ni kiitana mweengaia au karo i nanon tabeua te tai … I aki ataia bwa maanra—ma N na aki nako man aki kaota nanou ni kakaitau ibukin te akoi are I karekea ma ngke I uarereke ni karokoa te tai aei—ma te bwai ae e Katauaki Ibukiu e a bon tia ni baireaki ae tao ngaia ngkai n aron ae e a riki. Ti a katikui bwaai ni kabane i nanon bain te tia Bairei Bwaai ao ti na karabwarabwa ngkai ti a tia ni kariaiakaki ni maeka ni kabane n te tai ae e maan ao n te aro ae e kakukurei, I kakoauaa bwa bwaai nikabane a na bane n nakoraoi ngkana ti tangira te Atua ni koaua. Ti na ataia bwa ti kona n tataro nakon temanna te Atua ae e kona n ongo te tataro ae e koaua raoi irouiia ana aomata ni kabane ao n anganiira are e tamaroa ibukira. …

“Tinau, I kakoauaa bwa bon nanon te Atua ibukiu bwa N na nako maeao ao I a kaman namakina aei i nanon te tai ae e maan. E a uki ngkai te kawai … , I kakoauaa bwa bon tamnein te Uea ae e karaoa aei ae e bon riai ibukin bwaai ni kabane. O tai raraoma ibukin natimi; e na karaua nanou te Uea. I kakoauaa bwa e na kawakinai te Uea ao n anganai ae te kabanea n tamaroa ibukiu. … I nako ibukina bwa e wewete te Mwatita—e a tia ni karaoa au beku ni mataata.”