Сургаал ба Гэрээ 30–36

Номлогч байх албан ёсны дуудлагаасаа үл хамааран та “ямар ч цагт мөн бүх зүйлд мөн өөрийн байж болох хаана ч гэсэн” (Мозая 18:9) Есүс Христийн гэрч байж чадна. Та Сургаал ба Гэрээ 30–36-г судалж байхдаа, сайн мэдээг хуваалцах боломжийнхоо талаар мэдэж авсан зүйлээ тэмдэглээрэй. Та Их Эзэний танаас хүссэн зүйлсийн жагсаалтыг мөн таныг сайн мэдээг хуваалцахад Их Эзэний өгсөн амлалтуудын жагсаалтыг гаргаж болно (жишээлбэл: Сургаал ба Гэрээ 30:8; 31:3–5; 32:1, 5; 35:13–15, 24). Мөн сайн мэдээг хуваалцахад тань туслах зарчмуудыг олж мэд. Таныг “агуу баяр хөөрийн баярт мэдээг тунхаглахад” юу өдөөж өгдөг вэ? (Сургаал ба Гэрээ 31:3).

Ахлагч Гари Э.Стивэнсон сайн мэдээг тунхаглах нь “бид бүгдийн багаасаа заалгасан хайрла, хуваалц, урь хэмээх энгийн, ойлгомжтой зарчмуудын тусламжтайгаар гүйцэлдэх боломжтой” хэмээн заасан (“Хайрла, хуваалц, урь,” Лиахона, 2022 оны 5-р сар, 85). Түүний захиасыг судлахдаа өөрийн танил, гэр бүл, найз нөхдийнхөө талаар бод. “Есүс Христийн сайн мэдээний талаар дуртай зүйлсээ” тэдэнтэй хэрхэн хуваалцах талаар танд ямар санаа төрсөн бэ? Тэднийг “ирээд, харахад,” “ирээд, үйлчлэхэд” мөн “ирээд, нэгдэхэд” ямар ямар арга замаар урьж болох вэ? “Хаа дуудсан ч би явах болно” (Дуулал, д. 139) эсвэл үүнтэй хамааралтай дууг сонсох юм уу дуулахдаа “Их Эзэн Өөрийн сайн мэдээг хуваалцахын тулд надаас юу хэлээсэй, ямар байгаасай гэж хүсдэг вэ?” гэж өөрөөсөө асууж болно.

Мөн Маркос А.Айдукайтисын “Зүрх сэтгэлээ өргөж мөн баясагтун” захиасыг 2022 оны 5-р сарын Лиахонагийн х. 40–43-аас үзнэ үү.

4:30

1830-аад оны гэр бүлүүдэд өнөөгийн бидэнд тулгарч байгаа шиг олон асуудал тулгардаг байсан. Их Эзэн Томас Б.Маршид гэр бүлийнх нь талаар ямар удирдамж, амлалтуудыг Сургаал ба Гэрээ 31 дээр өгсөн бэ? (ялангуяа 1–2, 5–6, 9, 13-р шүлгүүдийг үзнэ үү). Түүний үгс гэр бүлийн тань харилцаанд хэрхэн тус болж чадах вэ?

Томас Б.Маршийн тухай илүү дэлгэрэнгүй мэдэхийг хүсвэл Гэгээнтнүүд номын 1:79–80, 119–120-ийг үзнэ үү.

Сургаал ба Гэрээ 32–33; 35-д дурдагдсан хүмүүсийн амьдралын талаар ярилцах нь Их Эзэн таныг Өөрийн ажилд хэрхэн бэлтгэж байгааг таньж мэдэхэд туслах болно. Жишээлбэл: Сэргээлтийн дуу хоолой: Эхэн үеийн хөрвөгчид хэсгээс Парлей П.Пратт, Сидней Ригдон хоёрын харилцааны талаар уншиж болно. Энэхүү харилцаа нь Бурханы хүүхдүүдийг хэрхэн адисалсан бэ? (Сургаал ба Гэрээ 35-ыг үзнэ үү).

Өөр нэгэн жишээ дурдъя. Эзра Тайер баптисм хүртэхийнхээ өмнөхөн нэгэн үзэгдэл үзсэн бөгөөд уг үзэгдэлд “Нэгэн эр ирэн, боодол цаас худалдаж авч, надад бүрээтэй хамт гардуулж өгөөд, үлээ гэлээ. Би түүнд амьдралдаа бүрээ үлээж үзээгүй гэв. Харин тэр надад чи чадна, үлээгээд үз гэлээ. … Түүнээс миний сонсож байсан хамгийн сайхан эгшиглэнт дуу гарч байв” гэдэг” (“Revelation, October 1830–B, Revelation Book 1,” historical introduction, josephsmithpapers.orgjosephsmithpapers.org). Сүүлд Иосеф Смит Эзра Тэйер, Нортроп хоёрт зориулсан илчлэлт хүлээн авсан нь одоо Сургаал ба Гэрээ 33-т цэдэглэгдсэн байдаг ба Эзра уг илчлэлтийг үзэгдлээр харах үед хуйлмал цаас байсан хэмээн тайлбарласан байдаг. Сургаал ба Гэрээ 33:1–13 дээр Их Эзэн Эзрагаар хийлгэхийг хүсэж байсан ажилдаа түүнийг хэрхэн бэлтгэсэн бэ?

Эхэн үеийн эдгээр Сүмийн гишүүний амьдралд Их Эзэний мутар оролцсон ямар нотолгоог бид харж болох вэ? Их Эзэн Христэд ирэхэд тань туслах хэнийг таны амьдралд илгээсэн бэ? Итгэлтэй байдал, хайр, урилгаар тань дамжуулан бусдыг адислахад Их Эзэн таныг хэрхэн бэлтгэж байна вэ?

Сургаал ба Гэрээ 33 нь Сүмийн шинэ гишүүд болох Нортроп Свийт, Эзра Тайер хоёрт хандсан байв. Нортроп энэ илчлэлт өгөгдсөний дараа удалгүй Сүмийг орхин явжээ. Эзра хэсэг хугацаанд итгэлтэй үйлчилсэн боловч сүүлдээ бас харагдахаа болив. Энэ хэсгээс тэдний тухай унших нь танд сайн мэдээний “хадан дээр” (13-р шүлэг) хэр бат бөх босгогдсоноо бодоход түлхэц болох юм. Эдгээр шүлэг дээрх ямар үнэнүүд Аврагчид итгэлтэй хэвээр үлдэхэд тань тусалж чадах вэ?

Мөн Хиламан 5:12-ыг үзнэ үү.

• Хүүхдүүдээс гэр бүлийн гишүүдийн нэрийг бичиж байхдаа дуртай дууныхаа үгийг унших гэх мэт хоёр үүрэг даалгаврыг нэгэн зэрэг гүйцэтгэхийг оролдоод үзэх нь зугаатай байх болно. Хоёр зүйлийг нэгэн зэрэг хийх нь яагаад хэцүү байдаг вэ? Дараа нь Сургаал ба Гэрээ 30:1–2-ыг хамтдаа уншиж болно. Есүс Христ болон Түүний сайн мэдээг дурсан санахад бидэнд саад болдог “дэлхийн зүйлүүд”-ийн зарим нь юу вэ? Бид хэрхэн Түүнд анхаарлаа төвлөрүүлж болох вэ?

• Хүүхдүүдэд Сургаал ба Гэрээ 33:8–10-ыг ойлгоход нь туслахын тулд та хэсэг хүүхдийг амаа хаасан байдалд нэг үг хэллэг хэлэхийг оролдох үед та өөрөө таах юм уу юу хэлж байгааг нь таахад бусад хүүхдийг урьж болно. 8–10-р шүлгийг уншаад, “амаа нээгтүн” гэдэг хэллэг давтагдах бүрд тэднээс амаа нээхийг хүс. Тэнгэрлэг Эцэг яагаад биднээс амаа нээж, бусадтай сайн мэдээг хуваалцаасай гэж хүсдэг вэ? Аврагчийн талаар эсвэл Түүний сайн мэдээний тухай бид гэр бүл, найз нөхдөдөө юу хэлж болох вэ? Та нар мөн “Бид Түүний үнэнийг дэлхийд авчирна” (Хүүхдийн дууны ном, 92–93) хэмээх сайн мэдээг хуваалцах тухай дууг дуулж болно.

• Сургаал ба Гэрээ 30–34 дээрх зарчим, амлалтуудтай холбоотой туршлагаа хуваалцахыг бодож үз. Та Аврагчид үйлчилснээр Түүний болон Түүний ажлын талаар юу сурч мэдэж, мэдэрсэн бэ?

• Гэрийнхээ юм уу Сүмийн суурийг харуулахын тулд хүүхдүүдээ гадагш авч гараад, дүрслэн хэлэхийг тэднээс хүс. Яагаад барилгад чанартай, бат бөх суурь хэрэгтэй байдаг вэ? Сургаал ба Гэрээ 33:12–13-ыг тэдэнтэй хамт уншаад, Их Эзэн яагаад биднийг Өөрийнх нь сайн мэдээн дээр амьдралаа барьж босгоосой хэмээн хүсдэг талаарх мэдрэмжээ нэг нэгэнтэйгээ хуваалц. Яагаад “хад” сайн мэдээг дүрслэхэд тохирох үг вэ? Бид хэрхэн сайн мэдээний хадан дээр амьдралаа босгож болох вэ? (мөн Матай 7:24–29-ийг үзнэ үү).